Twafwainwa Kuba Byonse Yehoba byo Etukebela Amba Tube
1. Ñanyi makatazho amo o twakonsha kupitamo kimye kimo, kabiji mambo ka?
1 Kulondela mizhilo ne mafunde a Yehoba jo jishinda jawama kwikelamo ano moba, kabiji kwitukwasha kwala kitendekesho kyawama kya myaka ikeya. (Sala. 19:7-11; 1 Timo. 6:19) Bino, ino ntanda ya kwa Satana itulengela kwikala na bijikila. Mibiji yetu ya bumbulwakoloka nayo yanungapo makatazho. Mu kweseka kulondela mutembo wetu wa mu Binembelo, kimo kimye twakonsha kwiumvwa bapelelwa. (Sala. 40:12; 55:1-8) Twakonsha ne kwizhinausha umvwe twakonsha kuba bintu byonse Yehoba byo etukebela amba tube. Pa bimye bya uno mutundu, kika kyakonsha kwitukwasha kwikala bashikimana ku mupashi?
2. Yehoba witulangulukilako byepi mu byo etukebela’mba tube?
2 Mikambizho ya Yehoba Kechi Yakatazha ne: Yehoba kechi ukeba byavula kwi atweba ne. Mikambizho yanji kechi yakatazha ne, yaikelako ku buwame bwetu. (Mpitu. 10:12, 13; 1 Yoa. 5:3) Wayuka bilubo byetu, ‘uvuluka’mba, twi lukungu.’ (Sala. 103:13, 14) Lesa mu lusa lwanji witaba mingilo yo twibikako kumwingijila na muchima umo, nangwa kyakuba yapelelela kwesakana na bwikalo bwetu. (Levi. 5:7, 11; Mako 14:8) Witwita amba tutwike bisendwa byetu pe aye, kabiji witulaya’mba uketulamawizha ne kwikala bakishinka.—Sala. 55:22; 1 Ko. 10:13.
3. Yehoba witukosesha byepi kuba’mba tuchinchike?
3 Bishinka Bitulengela Kuchinchika: Mashimikila a mu Baibolo a bantu basungile bulumbuluke bwabo nabiji Elaija, Yelemiya, ne Paulo etumwesha ene mambo o twafwainwa kuchinchikila. (Hebe. 10:36) Yehoba wibapele byonse byo bakebelenga mu bimye bya malwa ne kulefulwa. (1 Mfu. 19:14-18; Yele. 20:7-11; 2 Ko. 1:8-11) Kabiji tutundaikwa bingi pa kumona bukishinka bwa balongo betu ba ano moba. (1 Pe. 5:9) Umvwe ketulanguluke pa bino bya kumwenako, byakonsha kwitukwasha kubula kulefulwa.
4. Mambo ka o kyanemena kimye kyonse kuvulukanga milaye ya Lesa?
4 Kwikala na luketekelo mu milaye ya Lesa kyo “kimiko kya muchima.” (Hebe. 6:19) Luketekelo lwatundaikile ba Abalahama ne Sala kwitaba bibambijile Yehoba amba bashe muzhi wabo ne ‘kukekala benyi mu ntanda ya mulaye.’ Luketekelo lwapele Mosesa bulume bwa kwimenako mpopwelo ya kine kwakubula moyo ne. Luketekelo lwakoseshe Yesu kuchinchika pa kichi kya lumanamo. (Hebe. 11:8-10, 13, 24-26; 12:2, 3, NW) Kwikala na luketekelo mu milaye ya Lesa ya kuleta ntanda ipya ya bololoke kuketukwasha ne atweba kwikala bashikimana.—2 Pe. 3:11-13.
5. Kyawamina ka kuvulukanga byubilo byetu bya kunyuma bya bukishinka?
5 Kuvulukanga byubilo byetu bya kunyuma bya bukishinka, kwipana kwetu, ne kuchinchika nako kwakonsha kwitukosesha mu mwingilo wetu. (Hebe. 10:32-34) Kwituvululako lusekelo lo twikala nalo umvwe twamupa Yehoba bintu byo etukebela amba tube—kwipana na muchima wetu yense.—Mat. 22:37.