Byambo Bikwabo bya mu Mutanchi wa Kupwila kwa Bwikalo ne Mwingilo
© 2023 Watch Tower Bible and Tract Society of Pennsylvania
MARCH 4-10
BYA BUNEME BIJI MU MAMBO A LESA | SALAMO 16-17
“Yehoba, Nsulo Yami ya Buwame”
Anweba Banyike, Mwakonsha Kwikala Bwikalo bwa Lusekelo
IKALAI NA BALUNDA BAJI NA BYUBILO BYAWAMA
11 Tangai Salamo 16:3. Davida wayukile bya kusala balunda bawama. Kupwanañana na bantu batemenwe Yehoba kwamulengelanga “kusangalala bingi.” Walumbulwile bantu bajinga na byubilo byawama amba “bazhila.” Nyimbi wa masalamo mukwabo naye byo byo aumvwanga pa kusala balunda bawama. Wanembele’mba: “Aba bonse bemwakamwa bo balunda nami ne boba balama mikambizho yenu.” (Sala. 119:63) Byonka byo twafunjile mu mutwe wafumako, ne anweba mwakonsha kutaana balunda bawama mu bantu bakamwa Yehoba ne kumukookela. Ko kuba’mba bantu ba mafumbi apusana-pusana
‘Monainga Buya bwa Yehoba’
Davida waimbile’mba: “Yehoba kyo kyami kyangabilwapo, bo buswanyi bwami ne kitomeno kyami: Anweba yenu mulama kyami kyo bangabilapo. Mizhinge ya kupimako yantujilwa panengela.” (Sala. 16:5, 6) Davida wasanchile bingi pa ‘kyo bamwabijilepo,’ ko kuba’mba kwikala na bulunda bwawama ne Yehoba ne jishuko ja kumwingijila. Byonka byajinga bwikalo bwa kwa Davida, ne atweba nangwa tupite mu makatazho abaya byepi, tuji na mapesho avula bingi a ku mupashi. Onkao mambo, twayai atweba bonse tutwajijile kusangalela mu bupopweshi bwa kine ne ‘kulanguluka langulukanga’ kimye kyonse pa nzubo ya kwa Yehoba ya ku mupashi.
Mubikai Yehoba ku Meso enu Moba Onse
2 Atweba bonse twakonsha kufunda byavula ku bya kumwenako bya bantu bayukanyikwa banembwa mu Baibolo nabiji ba Abalahama, Sala, Mosesa, Luta, Davida, Eshita, mutumwa Paulo, ne bakwabotu. Bino ne mashimikila a bantu babula kuyukanyikwa kya kine nao akonsha kwitukwasha. Kulanguluka languluka pa mashimikila a mu Baibolo kwakonsha kwitukwasha kuba byonka byaubile nyimbi wa masalamo. Waambile’mba: “Namubika Yehoba ku meso ami moba onse; Kabiji byo aikala ku kilujo kyami, kechi nkatenkene ne.” (Sala. 16:8) Abino byambo twakonsha kwibyumvwina mwepi?
3 Mushilikale waingijishanga mpoko yanji na kuboko kwa kilujo, kabiji kuno kuboko kechi kwazhikijilwanga na jikebo jo alaminanga ku kuboko kwanji kwa kipiko ne. Pano bino wazhikijilwangatu inge mukwabo waimena ku kuboko kwanji kwa kilujo. Ne atweba umvwe saka tumuvuluka Yehoba ne kuba kyaswa muchima wanji, uketuzhikijila. Onkao mambo, twayai tumone buneme buji mu kufunda mashimikila a mu Baibolo byo akonsha kukosesha lwitabilo lwetu pa kuba’mba ‘tumubike Yehoba ku meso etu moba onse.’
Bishinka Bikwabo Byanema
it-2 714
Kantu ka pa Jiso
Kyambo kya Kihebelu kya kuba’mba ʼi·shohnʹ (Mpi 32:10; Man 7:2), inge bekingijisha na kyambo kya ʽaʹyin (jiso), kilumbulula’mba “kantu ka pa jiso”; kyo kimotu na kyambo kya, bath (mwana wa mukazhi) kyo baingijisha pa Majilo a Yelemiya 2:18 kilumbulula amba “mwana wa mukazhi wa jiso jobe,” bino byambo byonse bilumbulula kantu ka pa jiso. Kabiji pa Salamo 17:8 paji kyambo kya Kihebelu kya (ʼi·shohnʹ bath-ʽaʹyin) kituntululwa amba “muntu mucheche, mwana wa mukazhi wa jiso jobe” (“kantu ka pa jiso,” NW). Bino byambo bilumbulula byo twimona kukepa inge twatala mu jiso ja muntu mukwabo.
Jiso janekena bingi kya kuba nangwa inge mwatwela lusuki nangwa lukungu jitendeka kukola ponkapotu. Pakachi ka jiso paji kazhikapo kafwainwa kulamwa bulongo, mambo inge twikozhapo nangwa paikala kikumbi nangwa kabale, kilengela kubula kumona bulongo nangwa meso kufwa. Pa kwitukwasha kumvwisha byo twafwainwa kulamanga mizhilo ya Lesa, Baibolo waamba’mba twafwainwa kwiilamanga byonkatu byotulama “kantu ka pa jiso.” (Man 7:2) Pa Mpitulukilo ya mu Mizhilo 32:10 palumbulula Lesa byo alamanga bena Isalela na kifyele nobe “kantu ka pa jiso.” Davida walombele Lesa kumuzhikijila nobe ‘kantu ka pa jiso janji.’ (Sl 17:8) Davida walombele Yehoba kumukwasha bukiji inge balwanyi bamulukuka. (Esakanyako Zek 2:8; paji kyambo kya Kihebelu kya ba·vathʹ ʽaʹyin, kilumbulula “kantu ka pa jiso.”)—Kabiji monai JISO.
MARCH 11-17
BYA BUNEME BIJI MU MAMBO A LESA | SALAMO 18
“Yehoba . . . ye Umpokolola”
Lusekelo lwa Yehoba yo Nsakwa Yetu Yakosa
Baibolo waesakanya Yehoba ku bintu bibula kupema. Nabiji byo amutongola amba “Jibwe ja Isalela,” “jibwe jikatampe,” ne kuba’mba “nsakwa yakosa.” (2 Samwela 23:3; Salamo 18:2; Mpitulukilo ya mu Mizhilo 32:4) Bino byambo bilumbulula ka? Byonkatu jibwe jikatampe byo jikala pa mpunzha imo kwakubula kusunkena, ne Yehoba Lesa byo byo emuzhikijila.
5 Mu buku wa Masalamo Yehoba bamulumbulula mu ñambilo ya kifwanikizho yavula bingi. Nabiji pa Salamo 84:11 Yehoba bamulumbulula’mba “jo juba jetu kabiji jo jikebo jetu” mambo ye Nsulo ya kyeya, bumi, bulume ne luzhikijilo. Kabiji pa Salamo 121:5 pa aamba’mba “Yehoba ye kimfutele kiji ku kuboko kobe kwa kilujo.” Byonkatu kimfutele byo kituzhikijila ku mute, ne Yehoba uzhikijila bakalume banji ku bya malwa nobe baji mu kimfutele kya ‘byapi byanji’ nangwa nobe bebavweta ku kimvule kya ‘kuboko kwanji’.—Isaya 51:16; Salamo 17:8; 36:7.
it-2 1161 jifu. 7
Jiwi
Lesa umvwa jiwi ja bakalume banji. Aba bengijila Lesa mu mupashi ne mu bukine, balomba kwi aye saka baketekela amba usakumvwa byo bamulomba. Kechi na mambo a mulaka ye bengijisha pa kumulomba ne. Kununga pa kino, nangwa kya kuba muntu kechi ubena kulomba na jiwi japeulu ne, Yehoba wayuka biji mu muchima kabiji umvwa byo bamulomba. (Sl 66:19; 86:6; 116:1; 1Sa 1:13; Neh 2:4) Lesa umvwa milombelo ya boba baji na bulanda bamujijila na kukeba bukwasho. Kabiji inge babi ke balanguluke kuba byatama bakalume banji uyuka.—Nt 21:17; Sl 55:18, 19; 69:33; 94:9-11; Ye 23:25.
Byo Twakonsha Kuchinchika Inge Tuji na Bijikila
2 Vulukainga Yehoba byo emukwashishe pa bintu byo mwapichilemo kala. Inge mwalanguluka pa bwikalo bwenu, nanchi mubena kuvulukapo Yehoba byo emukwashishe kuchinchika makatazho amo o mwapichilemo mu bwikalo bwenu nyi? Inge twavuluka Yehoba byo etukwashishe ne byo akwashishe bakalume banji ba kala, lwitabilo lwetu lukoselako kabiji tutwajijila kuketekela mwi aye. (Sala. 18:17-19) Mukulumpe mu kipwilo aye Joshua waambile’mba: “Nanemba bintu byonse byankumbwile Yehoba. Kino kinkwasha kuvuluka bintu byonse byo nalombele kwi Yehoba kabiji wankumbwijile monka mo nalombejile.” Kwambatu kine, inge ketulanguluke pa bintu bitubila Yehoba, tuyuka mwakubila na bijikila.
Bishinka Bikwabo Byanema
it-1 432 jifu. 2
Kelubi
Bano bakelubi kechi bajinga byonka byamwekanga bipikichala bya bilengwa biji na byapi byapopwelanga bisaka bya bantu babulanga kupopwela Lesa, byonka byamba bamo ne. Kwesakana na byamba Bayudea bavula bajingako kala (Baibolo kechi waambapo ne), bano bakelubi bamwekanga nobe bantu. Bakelubi bobalengejile pa jikwachi bamwekanga bulongo. Baimenangako bamalaika babuya, kabiji bebalengele ‘monka mwayijile kimwesho kyo bamwesheshe.’ (Lup 25:9) Mutumwa Paulo waambile’mba “peulu ya jikwachi pajinga bakelubi ba lukumo saka banyeñamina pa kizhiko kya kufuchilapo mambo.” (Heb 9:5) Bakelubi baimenangako lukumo lwa Yehoba nabiji byo ambile’mba: “Nkeya konkakwa kwi obewa ne kwisamba nobe peulu ya kizhiko. Pakachi ka bakelubi babiji baji peulu ya jikwachi ja Lushimuno.” (Lup 25:22; Nu 7:89) Yehoba bamulumbulula amba“waikala peulu ya bakelubi.” (1Sa 4:4; 2Sa 6:2; 2Mf 19:15; 1Mo 13:6; Sl 80:1; 99:1; Is 37:16) Onkao mambo bakelubi bajinga “kifwanyikizho kya kalaki” wa Yehoba po aikala (1Mo 28:18), kabiji byapi byabo byazhikijilanga kalaki ne kumulengela kwenda bukiji. Mu lwimbo wanji wa nsansawilo, Davida waambile pe Yehoba byo aishile bukiji na kumukwasha amba “waendelenga pa kelubi ne kwiya saka atumbuka” ne “pa byapi bya kilengwa kya mupashi.”—2Sa 22:11; Sl 18:10.
MARCH 18-24
BYA BUNEME BIJI MU MAMBO A LESA | MASALAMO 19-21
“Jiulu Jamba Lukumo lwa Lesa”
Bantu Bonse Bambe Mambo a Lukumo lwa Yehoba
DAVIDA mwana Yese saka ajitu kafunga kalombwana, wakomejilenga mu Betelema. Kimye kya bufuku umvwe ubena kusopa jitanga ja bashanji, wafwainwa watalanga bingi mwiulu mwabula makumbi ne kumona tubanganga! Kwa kubula nangwa kuzhinauka, abye bintu bya kitambo wibivulukile kimye kyo atangijilwe na mupashi wazhila wa Lesa kunemba byambo byawama biji mu Salamo 19 byaamba kuba’mba: “Bya mwiulu byamba mambo a lukumo lwa Lesa; ne jiulu najo jimwesha mingilo ya maboko anji. Kipimo kyabyo kyakumbana ntanda yonse, ne byambo byabyo byafika kwapela ntanda.”—Salamo. 19:1, 4.
2 Kwa kubula kwambabyambo nangwa jiwi, bya mwiulu bya kukumya byalenga Yehoba byamba lukumo lwanji, pa juba pa juba bufuku ne mute. Bilengwa kechi bileka kwamba lukumo lwa Lesa ne, kabiji kulanguluka pa bino bintu byamba kishinshi byakumbana konse “kwapela ntanda” kuba’mba bantu bonse bebimone. Kino ke kintu kyafwainwa kulengela muntu kuyuka byo akepesha bingi kwi Lesa. Pano bino, kwamba kishinshi kuba bilengwa kechi ko konka kukebewatu ne. Bantu ba kishinka nabo bakambizhiwa kushimuna na bya tunwa byabo. Nyimbi wa masalamo wabula kutelwa jizhina waambile pa bapopweshi ba kishinka na byambo byanembeshiwe na mupashi wazhila amba: “Panai kwi Yehoba lukumo ne bulume. Panai kwi Yehoba lukumo lwafwainwa jizhina janji.” (Masalamo 96:7, 8) Bonse balunda ba pa muchima ne Yehoba basekela bingi pa byo bino byambo. Nanchi bika biji mu kupana lukumo kwi Lesa?
Bilengwa Byamba Mambo a Lukumo lwa Lesa!
8 Kabiji Davida walondolola kintu kikwabo kya kukumya kya pa bilengwa bya Lesa: “Monkamo [mwiulu] mo mo abika tente wa juba, jiji pamo ne musongoshi byo alupuka mu nzubo yanji, kabiji jisekela nobe muntu wakosa pa kunyema mu kikonkwanyi kyanji. Ko jilupukila ko kwapela jiulu, ne ko jizhokolokela nako ko ku mpelo yajo; kabiji kafwako nangwa kimo kyafyamika ku kyuya kyajo ne.”—Masalamo 19:4-6.
9 Umvwe twijesakanya na tubangabanga tukwabo, juba ke jaesakanatu. Bino jaikala kabangabanga kakatampe kalengela ma pulaneti ejizhokoloka kumweka kukepa. Buku umo waambapo kuba’mba juba jiji na kinemenezhi kya “mabilyonyi ne mabilyonyi a kukankalwa kubala”. Ko kuba’mba jiji na kinemenezhi kikatampe kyakila bintu byonse bijizhokoloka! Ngovu yajo idosa ilengela ntanda kuzhokolokela pa musinso walepa makilomita 150 milyonyi kwakubula kuya palepa nangwa kufwenyesha kwipi na juba ne. Bulumetu buchuchu bo bufika panopantanda, pano bino buno bulume bwawana kulama bintu byonse byumi biji panopantanda.
10 Nyimbi wa masalamo walondolola juba mu ñambilo ya kifwanyikizho, kwijifwanyikizha nobe “muntu wakosa” unyema kufuma kwatendekela jiulu kufika ko jasambakena na ntanda kufuma kimye kya lukelo kabiji ne kuleka kunyema kimye kya bufuku wakatwela mu “tente” na kukokoloka. Juba byo jimweka panopantanda amba jazhika, jimweka nobe jaya na kukokoloka mu “tente.” Lukelo jisamatu ntulantula nobe “musongoshi byo alupuka mu nzubo yanji.” Byo ajinga kafunga, Davida, wayukile mashika akatampe ekalako bufuku. (Ntendekelo 31:40) Wavulukile mintetenga ya juba byo yamutwishanga kyuya ne mpunzha yamuzhokolokele. Kya kine, kechi jakokanga pa “lwendo” lwajo lwa kufuma ku musela kuya ku muzhika ne, bino jajinga nobe “muntu wakosa,” winengezha kutatula lwendo jikwabo.
g95 11/8 7 jifu. 3
Mulenga ye Babula Kunemeka Lelo Jino
Kulanguluka languluka bingi pa bilengwa byo tumona, kwitulengela kuyuka bulongo Mulenga wetu. Pa kimye kimo Yesu waambijile baana banji babwanga kutajisha maluba a mungye ajinga mu Ngalilea.Wibambijile amba “Langulukai pa maluba a mungye byo akoma; kechi engila mwingilo nangwa kupikula bisapi ne. Pakuba nemubuula namba, nangwatu Solomone mu lukumo lwanji lonse kechi wavwajile pamo nobe maluba ne.” (Mateo 6:28, 29) Inge twalanguluka pa bimwenka bulongo ano maluba nangwa kya kuba ekalatu pa ka kimye kacheche, kituvululamo amba Lesa kechi wakonsha kulekelela bantu banji ne.
Bishinka Bikwabo Byanema
it-1 1073
Kihebelu, II
Kuji nembelo ikwabo ya kuba mukuku wa bubiji kechi waambatu pa kintu kimo nangwa kwambilatu mu jishinda japusanako ne, bino bamunemba mu jishinda jilengela kuvwisha kyo babena kwambapo mu mukuku mutanshi nangwa kunungapo mulanguluko mukwabo. Mu Salamo 19:7-9 mo muji nembelo ya uno mutundu:
Mizhilo ya Yehoba yalumbuluka,
ibwezhamo bulume.
Bya kuvululako bya Yehoba byo bya kishinka,
kabiji bipana maana ku wabula maana.
Malamuna afuma kwi Yehoba aoloka,
asangajika muchima;
Mikambizho ya Yehoba yawama,
ilengela muntu kumona kyeya.
Kwakamwa Yehoba kwawama,
kwikala myaka ne myaka.
Mizhilo ya Yehoba ya kine;
yonsetu yaoloka.
Lubaji lwa bubiji lwa ino mikuku yonse lwapwisha mulanguluko uji mu mukuku mutanshi nangwa kyepelo. Onkao mambo ino mikuku yonse yakwatankanya milanguluko ibiji. Inge muntu watanga mukuku wabubiji waamba amba “ibwezhamo bulume” ne wa kuba’mba ‘ipana maana ku wabula maana,’ popo akayuka’mba “Mizhilo ya Yehoba yalumbuluka” ne kuba’mba “bya kuvululako bya Yehoba byo bya kishinka.” Kino kimwesha’mba ino mikuku yonse ipasha. Kabiji ibena kumwesha ne kuba’mba batwajijila kwamba pa mulanguluko umo mu bino byepelo byonse. Kyokyo twakonsha kwambila’mba ino nembelo itukwasha kumvwisha buneme bwa kyo babena kwambapo.
TAIKO MUCHIMA KU MWINGILO WA KUSAPWILA
“Mambo ka Bakamonyi ba kwa Yehoba o Bavulukila Kijiilo kya Nkambo kya Mabanga mu Jishinda Japusanako ku Bupopweshi Bukwabo”
ijwfq 45
Mambo ka Bakamonyi ba kwa Yehoba o Bavulukila Kijiilo kya Nkambo kya Mabanga mu Jishinda Japusanako ku Bupopweshi Bukwabo
Tulondela byaamba Baibolo pa kuvuluka “Kijiilo kya Nkambo kya Mabanga,” kabiji kitelwa’mba Kijiilo Kyapeleleko nangwa’mba Kuvuluka lufu lwa kwa Yesu. (1 Kolinda 11:20) Kupusanako na byo twaitabilamo, byuba bupopweshi bwabubela pa kuvuluka lufu lwa Yesu kechi byaimena pa Baibolo ne.
Ene Mambo o Tuvulukila
Ene mambo o twikela na Kijiilo kya Nkambo kya Mabanga ke kuvuluka Yesu, kumwesha lusanchilo pa bukuzhi bo apaine. (Mateo 20:28; 1 Kolinda 11:24) Kino kivuluko kechi ke kisho kyo basekela mu bupopweshi pa kuba’mba Lesa ebapeshe ne kwibalekelako mambo ne. Baibolo ufunjisha kuba’mba mambo etu akonsha kulekelwa inge twaitabila mwi Yesu kechi kupichila mu kwikala na bijiilo bikala mu bupopweshi ne.—Loma 3:25; 1 Yoano 2:1, 2.
Bimye binga?
Yesu wakambizhe baana banji ba bwanga kuvulukanga kijiilo kya Nkambo kya Mabanga, bino kechi wibambijile bimye byo bafwainwa kuvulukanga ne. (Luka 22:19) Bamo balanguluka’mba kyafwainwa kwikalangako pa ñondo pa ñondo, bakwabo nabo bamba’mba pa mulungu pa mulungu, moba onse, bimye byavula pa juba jimo nangwa kimye kyonse muntu kyo akeba. Pano monai bishinka byo mwafwainwa kulangulukapo.
Yesu watendekeshe Kijiilo kya Mabanga kya Nkambo pa juba ja Kijiilo kya Lupitailo kya Bayudea, kabiji pa jonka jino juba popo afwile. (Mateo 26:1, 2) Akino kechi kyamwekeletu ne. Binembelo byesakanya kitapisho kya kwa Yesu na mwana mukooko ye baipayanga pa Kijiilo kya Lupitailo. (1 Kolinda 5:7, 8) Kijiilo kya Lupitailo kyaikalangako jimo pa mwaka. (Kulupuka 12:1-6; Bena Levi 23:5) Ne bena Kilishitu batanshi nabo bavulukanga Kivuluko kya lufu lwa kwa Yesu jimo pa mwaka kabiji Bakamonyi ba kwa Yehoba balondela byonka byo kyanembwa mu Baibolo.
Juba ne kimye
Jishinda jaubijilemo Yesu jitukwasha kuyuka bimye binga, juba ne kimye kyo twafwainwa kwikelamo na Kivuluko. Yesu watendekele kivuluko panyuma ya kuzhika juba pa Nisanyi 14, 33 C.E., kwesekana na kalenda ye baingijishanga kimye kyo banembejilemo Baibolo. (Mateo 26:18—20, 26) Twatwajijila kwikala na Kivuluko pa mwaka pa mwaka, byonka byaubanga bena Kilishitu ba kala.
Nangwa kya kuba pa Nisanyi 14, mu 33 C.E. pajinga pa Kitanu, jino juba jakonsha kufika pa juba jikwabotu mu yewo mwaka. Tuyuka jino juba ja Nisanyi 14 pa mwaka pa mwaka kwingijisha jonka jino jishinda jo babajilangamo moba mu kimye kyajingako Yesu, bino kechi twingijisha kalenda wa Bayudea ne.
Shinkwa ne binyu bichila
Pa kikye kijiilo kyo bajinga nakyo, Yesu waingijishe shinkwa wakubula mbizho ne binyu bichila byashajilepo ku Kijiilo kya Lupitailo. (Mateo 26:26-28) Pa kulondela byonka byo aubile, twingijisha shinkwa wabula mbizho ne binyu bichila, bino kechi byo bafiina ku mañanzañanza nangwa byo babikamo byatobala ne.
Bupopweshi bumo bwingijisha shinkwa muji mbizho, bino mbizho mu Baibolo imenako bundengamambo nangwa bukamfutumfutu. (Luka 12:1; 1 Kolinda 5:6-8; Ngalatiya 5:7-9) Onkao mambo, shinkwa wabula mbizho ye mwafwainwa kwingijisha kwimenako mubiji wa kwa Yesu wabula bundengamambo. (1 Petelo 2:22) Kisho kikwabo kyabula mu Baibolo ke kupingakenyapo binyu byo mwafina ku mañanzañanza. Mu machechi amo boba bino mambo balanguluka amba kukanya kutoma binyu kechi kwa mu binembelo ne.—1 Timoti 5:23.
Bipashañano kechi misunyi ne mashi ne
Shinkwa wabula mbizho ne binyu bichila byo bengijisha pa Kivuluko ke bipashañano bimenako mashi ne mubiji wa kwa Kilishitu. Kechi bebyalula nangwa kwibivwanga na mashi a kwa Yesu mu jishinda ja kukumya byonka byo balanguluka bantu bamo ne.
Akimonai byaamba Binembelo pa kino.
Inge kya kuba’mba Yesu wakambizhe baana banji ba bwanga kutoma mashi anji, ko kuba’mba wibaswishishe kulala Muzhilo wa Lesa wakanya kutoma mashi. (Ntendekelo 9:4; Byubilo 15:28, 29) Kechi kyafwainwe kwikala bino ne mambo Yesu kechi wakonsha kukambizha bantu kulala muzhilo wa Lesa waamba pa kuzhila mashi ne.—Yoano 8:28, 29.
Umvwe batumwa batomenenga mashi a kwa Yesu, inge kechi wibambijile’mba mashi anji “akechikila” bavula ne, kumwesha kuba’mba kitapisho kyakijinga kulutwe.—Mateo 26:28.
Kitapisho kya kwa Yesu kyaubiwe “jimotu” (Bahebelu 9:25, 26) Bino nangwa byonkabyo, inge shinkwa ne binyu byaalwilwe ke misunyi ne mashi byo bajinga na Kijiilo kya Nkambo kya Mabanga, ko kuba’mba aba bajileko inge babwezhezhepo kitapisho.
Yesu waambile’mba: “Saka muba kino mu kumvuluka,” kechi amba “mu kitapisho kyami ne.”—1 Kolinda 11:24.
Bantu baitabila kuba’mba shinkwa ne binyu byaalukile ke mashi ne mubiji wa kwa Yesu kwafuma pa binembelo bya mu Baibolo byo babula kutuntulula bulongo. Nabiji mu ma Baibolo avula Yesu po aambile pa binyu batuntulula kuba’mba: “Ano o mashi ami.” (Mateo 26:28) Kabiji bino byambo byatuntululwa ne kuba’mba: “Ano o ‘mashi ami” “Ano emenako mashi ami” nangwa’mba “Ano alumbulula mashi ami.” Byonka byo aubanga, Yesu waingijisha bishimpi pa kufunjisha.—Mateo 13:34, 35.
Bañanyi bajako?
Bakamonyi ba kwa Yehoba kimye kyo bekala na Kijiilo kya Nkambo kya Mabanga, bantutu bacheche bajako shinkwa ne kutoma binyu. Mambo ka?
Mashi a kwa Yesu aikajikile “Lulayañano lupya” lwapingakene pa lulayañano Yehoba Lesa lo alayañene na bena Isalela ba kala. (Bahebelu 8:10-13) Aba baji mu lulayañano lupya bo bajako ku bipashañano bya pa Kivuluko. Kechi bena Kilishitu bonse bajako ne kanatu boba “baitwa” na Lesa mu jishinda ja kukumya. (Bahebelu 9:15; Luka 22:20) Abano bo bakalamanga ne Kilishitu mwiulu, kabiji Baibolo waamba’mba bajitu 144,000 bo bakalamanga ne Yesu.—Luka 22:28-30; Lumwekesho 5:9, 10; 14:1, 3.
Kufumyako ba mu “kajitanga kacheche” bakalamanga ne Kilishitu, atweba bavula tuji mu “jibumba jikatampe” tukekala na bumi bwa myaka ne myaka pano pa ntanda. (Luka 12:32; Lumwekesho 7:9, 10) Atweba bavula tuji na luketekelo lwa kwikala pano pa ntanda kechi tujako ku bipashañano bya pa Kivuluko ne, bino tumwesha lusanchilo pa kitapisho kya kwa Yesu kyo apaine na mambo atweba.—1 Yoano 2:2.
MARCH 25-31
BYA BUNEME BIJI MU MAMBO A LESA | SALAMO 22
Bintu Byaambijile Jimo Bungauzhi pa Lufu lwa kwa Yesu
Bamutaine Mesiasa
16 Mesiasa ukamweka nobe Lesa wamulekelela. (Tangai Salamo 22:1.) Byonka byaamba buno bungauzhi, “pa kulemba juba [nobe 3 koloko], Yesu wabijikile amba: ‘Eli, Eli, lama sabakatani?’ ko kuba amba: “Lesa wami, Lesa wami, mambo ka o mwanshila bunke?” (Mako 15:34) Yesu byo aambile’mba Lesa wamusha bunke kechi kyalumbulwile’mba lwitabilo mwi Shanji wa mwiulu lwapwa ne. Wayukile’mba Lesa kechi ukamuzhikijila pa kimye kya lufu lwanji ne, kabiji kino kyajinga kimye kwi Yesu kya kumwesha’mba ukekalanga wa kishinka kwi Lesa. Kabiji byo abijikile pa kujila, wafikizhe Salamo 22:1.
Bamutaine Mesiasa
13 Davida waawile’mba Mesiasa bakamwambila mwenga. (Tangai Salamo 22:7, 8.) Byo amanaminenga pa kichi, Yesu bamwambijilenga mwenga. Mateo witubula’mba: “Bantu bapichilenga bamwambijilenga mwenga saka benauna mitwe yabo amba: ‘Obewa waambilenga amba, wakonsha kukundula nzubo ya Lesa ne kwiishimika mu moba asatu, ipulushe obe mwine! Umvwe wi Mwana Lesa, fuma po po pa kichi kya lumanamo.’” Bañanga bakatampe, banembeshi ne bakulumpe nabo bamubilenga kapunyi amba “Wapulushanga bakwabo; bino wakankalwa kwipulusha aye mwine; Ye Mfumu wa bena Isalela; mulekai afume pa kichi kya lumanamo ne atweba tusakumwitabila. Waketekela mwi Lesa; umvwe Lesa wamutemwa; lekai a mupulushe, mambo waambile amba, ‘Amiwa ne Mwana Lesa.’” (Mat. 27:39-43) Bino Yesu kechi waambilepo kyatama nangwa kimo ne. Ke muntu wawama bingi kulondela!
Bamutaine Mesiasa
14 Bivwalo bya kwa Mesiasa bakebitayila bubale. Nyimbi wa masalamo wanembele’mba: “Bivwalo byami beabenyabyo, ne mukangyo wami bamutayila bubale.” (Sala. 22:18) Kino kyo kyaubiwe mambo “[bashilikale babena Loma] byo bamupopele [Yesu] pa kichi, baabene bivwalo byanji kupichila mu kuta bubale.”—Mat. 27:35; tangai Yoano 19:23, 24.
Bishinka Bikwabo Byanema
Kunemeka Kupwila Kwetu Kwazhila
7 Kuji mashinda avula ayukanyikwa o twafwainwa kumwesheshamo mushingi pa kupwila kwetu. Jishinda jimo ke kutanwako na kwimba nyimbo ya Bufumu. Aino nyimbo yavula iji mu bululombelo, onkao mambo yafwainwa kwimbiwa mu mushingi. Kimye kyo atangilenga byambo byanembwa mu Salamo 22, mutumwa Paulo wanembele byaambile Yesu kuba’mba: “Nkasolola jizhina jenu ku balongo bami, mu bipwilo nkemwimbila ya kwi mutota.” (Bahebelu 2:12) Onkao mambo, twafwainwa kumona kuba’mba twaikala pa bipona byetu cheyamani saka akyangye kutongola lwimbo, kabiji ne kimye kya kwimba lwimbo twafwainwa kutako muchima ku bibena kulumbulula byambo biji mu yewo lwimbo. Lekai kwimba kwetu kumweshe biumvwinenga nyimbi wa masalamo wanembele’mba: “Amiwa nkamusanchila Yehoba na muchima wami yense mu kije kya baoloka, ne mu kipwilo kya bantu.” (Masalamo 111:1) Ee kine, kwimba nyimbo ya kumutota Yehoba kyo kishinka kimo kyakonsha kwitulengela kufika bukiji pa kupwila kwetu kabiji ne kwikala kufikatu ne kimye kya kupwisha kupwila.
w03 9/1 20 Jifu. 1
Totai Yehoba “Mukachi ka Kipwilo”
Byonkatu byo kyajinga kala, ne lelo jino kuji lunengezho lwafwainwa kwitulengela kumwesha lwitabilo lwetu patoka “mukachi ka kipwilo.” Jishinda jimo jo tumwesheshamo lwitabilo lwetu, ke kukumbulapo pa kupwila. Langulukainga pa ene mambo o kyawamina kukumbulapo. Nabiji, inge twakumbulapo mukumbu waamba pa byo twafwainwa kushinda makatazho, tutundaika balongo ne banyenga kulondela mafunde a mu Baibolo. Mikumbu yaamba pa binembelo bijimo byo babula kulumbulula nangwa pa bishinka byo twakebele pa yeo mutwe itundaika bakwetu kwikalangapo na kimye kya kutanga Mambo a Lesa.
TAIKO MUCHIMA KU MWINGILO WA KUSAPWILA
“Bungauzhi bwa mu Baibolo Bukosesha Lwitabilo”
Shiinwai Kuba’mba Mwaitabila Bukine
14 Bungauzhi bwa mu Baibolo ke lubaji lwanema bingi lwa Mambo a Lesa lwitukwasha kwikala na lwitabilo lwakosa mwi Yehoba. Ñanyi bungauzhi bwakosesha lwitabilo lwenu? Mwakonsha kutongola bungauzhi bwaamba pa “moba a kupelako.” (2 Timo. 3:1-5; Mat. 24:3, 7) Bino ñanyi bungauzhi bukwabo bwakonsha kukosesha lwitabilo lwenu? Abya mwakonsha kulumbulula bungauzhi bwanembwa mu Danyela kitango 2 nangwa mu Danyela kitango 11 byo bwafikile kala ne byo bwatwajijila kufika nyi?c Inge lwitabilo lwenu lwaimena pa ano mafunjisho azhika a mu Baibolo, kechi lukakooka ne. Akilangulukai pa balongo betu bo bamanyikile kya mama nafwa mu Germany kimye kya Nkondo ya Bubiji ya Ntanda Yonse. Nangwa kya kuba kechi baumvwishishe bungauzhi bwa mu Baibolo bwaamba pa moba a kupelako ne, bino bajinga lwitabilo lwakosa mu Mambo a Lesa.
15 Kimye kafulumende wa Nazi kyo alaminenga mu Germany, balongo ne banyenga yetu bavula bingi bebakashijile mu makampu a lumanamo. Hitler ne mukulumpe wa bashilikale ba SS aye Heinrich Himmler bashikilwe Bakamonyi ba kwa Yehoba. Nyenga umo washimikizhe’mba, Himmler wabuujile jibumba ja banyenga bajinga mu kampu umo wa lumanamo amba: “Yehoba wenu wakonsha kulama mwiulu, bino pano pa ntanda yetu tubena kulama! Tusakumona bakatwajijila kuchinchika, kana anweba nangwa atweba!” Ki ka kyakwashishe bantu ba Yehoba kutwajijila kwikala ba kishinka?
16 Bafundanga Baibolo bayukile’mba Bufumu bwa Lesa bwatendekele kulama mu 1914. Kechi bakuminye pa kumona byo bebamanyikilenga ne. Nangwa byonkabyo, bantu ba Yehoba bashiinwe kuba’mba kafwako kafulumende wa bantu wakonsha kukanya Lesa kuba kyaswa muchima wanji ne. Hitler wakankelwe kuzhiya bupopweshi bwa kine, kabiji wakankelwe kulenga kafulumende wakonsheshe kwikala na bulume kukila Bufumu bwa Lesa. Balongo betu bashiinwe kuba’mba juba jimo bukalama bwa kwa Hitler bukapwa.
17 Byaitabijile bano balongo ne banyenga byajinga bya kine. Kechi papichile ne myaka yavula ne, kafulumende wa Nazi bamufumishepo, kabiji Heinrich Himmler, yenka waambile’mba “atweba yetu tubena kulama pano pa ntanda” wanyemene kuchina’mba bakamwipaya. Byo anyemenenga, wasambakene Mulongo Lübke ye bakashile kabiji wamuyukile. Himmler saka akakilwa bingi waipwizhe Mulongo Lübke amba: “Obewa ufunda Baibolo, ki ka kisakumweka luno?” Mulongo Lübke walumbulwijile Himmler amba Bakamonyi ba kwa Yehoba bayukile kuba’mba kafulumende wa Nazi kechi ukatwajijila ne, ne kuba’mba bakebakasulula. Himmler, mwanamulume waambanga byatama bingi pa Bakamonyi ba kwa Yehoba, pa kikye kimye kechi wajinga na bya kwamba ne. Kechi pabanjile ne, wikujikile. Ki ka kyo tubena kufunjilako? Kufunda Baibolo ne bungauzhi bujimo kwakonsha kwitukwasha kwikala na lwitabilo lwakosa mwi Lesa ne kushiinwa kuba’mba tukatwajijila kuchinchika kimye kya lumanamo.—2 Pe. 1:19-21.
18 Atweba bonse pa muntu pa muntu twafwainwa kumweshanga butemwe, mambo ko kayukilo ka bena Kilishitu ba kine. Bino twafwainwa ne “kuyukisha bulongo bintu ne kwikala na milangwe yonse.” (Fili. 1:9) Mambo inge twabula kuba bino, twakonsha kulondela “mafunjisho a bubela a bantu bajimbaika bakwabo,” kubikapotu ne bansatuki. (Efi. 4:14) Baana ba bwanga bavula byo balekele kulondela Yesu, mutumwa Petelo wamwesheshe kuba’mba washiinwe’mba Yesu wajinga “na byambo bipana bumi bwa myaka ne myaka.” (Tangai Yoano 6:67, 68.) Nangwa pa kyo kya kimye Petelo kechi wayukile bishinka byonse pa bino byambo ne, bino watwajijile kwikala wa kishinka mambo waumvwishishe bukine pe Kilishitu. Ne anweba mwakonsha kukosesha lwitabilo lwenu mu mafunjisho a mu Baibolo. Inge mwauba bino, mukatwajijila kwikala na lwitabilo lwakosa nangwa mukapite mu bintu bya mutundu ka, kabiji mukakwasha bakwenu nabo kwikala na lwitabilo lwakosa.—2 Yoa. 1, 2.
APRIL 1-7
BYA BUNEME BIJI MU MAMBO A LESA | MASALAMO 23-25
“Yehoba ye Kafunga Wami.”
“Yehoba ye Kafunga Wami”
Yehoba utangijila mikooko yanji. Mikooko yabula kafunga yakonsha kweleka. Kyo kimotu, tukebewa lutangijilo lwawama mu bumi. (Yelemiya 10:23) Davida waambile pe Yehoba amba utangijila bantu banji ku “munyemvu wavula” ne “ku mapunzha a kukokolokelamo kwavula mema.” Kabiji ne ‘kwibatangijila mu mashinda a bololoke’ (Byepelo 2, 3) Ino ñambilo ya kifwanyikizho itulengela kwikala na luketekelo lwakosa mwi Lesa. Inge ketulondele lutangijilo lwa mupashi wanji byonka bya amba Baibolo, tukazhikijilwa ne kutondwa na bumi kabiji tukekala na lusekelo mu bwikalo.
“Yehoba ye Kafunga Wami”
Yehoba uzhikijila mikooko yanji. Kwakubula kafunga, mikooko ikala bingi na moyo kabiji kechi izhikijilwa ne. Yehoba ubula bantu banji kubula kwakamwa nangwa kya kuba ‘baenda mu kimpachiko mwafiitatu bwii.’—ko kuba’mba inge babena kupita mu bintu byakatazha mu bwikalo biji nobe mfishi. (kyepelo 4) Yehoba wibata muchima, winengezha kwibazhikijila, kabiji wibazhikijila kimye kyonse. Upa bapopweshi banji bulume ne maana akebewa pa kuba’mba bachinchike makatazho.—Filipai 4:13; Yakoba 1:2-5.
“Yehoba ye Kafunga Wami”
Yehoba ujisha mikooko yanji. Kafunga wafwainwa kukebela mikooko yanji kajo. Lesa ye yekatu wafwainwa kwitukwasha ne kwitupa kajo ka ku mupashi. (Mateo 5:3) Tumusachila bingi Yehoba pa bupanyi bwanji mambo unengezhezha bakalume banji kajo ku tebulu. (Kyepelo 5) Baibolo ne mabuku alumbulula Baibolo nabiji ye mubena kutanga ke kajo ka ku mupashi ketukwasha kuyuka ene mambo o twaikela na bumi ne kyaswa muchima wa Lesa ku bantu.
Bishinka Bikwabo Byanema
Temwai Bololoke na Muchima Wenu Yense
KUPICHILA mu Mambo anji ne mupashi wanji wazhila, Yehoba ubena kutangijila bantu banji mu “mashinda a bololoke.” (Sala. 23:3) Byo tuji bambulwa kulumbuluka, twakonsha kusensuka mu jino jishinda. Pa kuba amba tutendeke jibiji kuba byawama kikebewa kwibikishako bingi. Ki ka kiketukwasha kuba bino? Byonka byajinga Yesu, twafwainwa kutemwa kuba byawama.—Tangai Salamo 45:7.
2 Nga “mashinda a bololoke o aka”? Jishinda ke kalolo nangwa mukwakwa mupita bantu. Ano “mashinda” emenako bipimo byaoloka bya kwa Yehoba. Mu Kihebelu ne Kingiliki, kyambo kya “bololoke” kilumbulula kintu “kyaluñama,” ko kuba amba kulondela kya kine mafunde aoloka. Yehoba byo aikala “kipaka kyabo kya kine [bololoke],” bapopweshi banji batala kwi aye na lusekelo kwibamwena jishinda jawama jo bafwainwa kuyamo.—Yele. 50:7.
3 Tukakonshatu kutokesha Lesa pa muchima inge kya kuba ketwibikisheko kulondela na muchima yense bipimo byaoloka bya kwa Yehoba. (Mpitu. 32:4) Kyakonsha kwitukwasha kuba bino ke kumona amba tubena kufunda byavula pe Yehoba Lesa mu Mambo anji Baibolo. Kufunda byavula pe aye, ne kufwenya kwipi ne aye pa juba pa juba, kuketulengela kutwajijila kutemwa bololoke bwanji. (Yako. 4:8) Twafwainwa ne kuswa lutangijilo lwa Mambo a Lesa anembwa na mupashi inge ketufuukule pa mambo a bintu byanema mu bwikalo.
APRIL 8-14
BYA BUNEME BIJI MU MAMBO A LESA | SALAMO 26-28
Davida Wakoseshanga Byepi Bukishinka Bwanji?
w04 12/1 14 mafu. 8-9
Endainga mu Bulumbuluke
8 Davida walombele amba: “Anweba Yehoba, mpimapimai ne kungeseka; tokeshai milanguluko yami ya mukachi mwine ne muchima wami.” (Salamo 26:2) Mafyo ekala mwine mukachi ka mubiji. Mu bukifwanyikizho, mafyo emenako milanguluko ya muntu ya mukachi ne byo omvwa ku muchima. Kabiji muchima wa kifwanyikizho ke muntu wa mukachi, ko kuba’mba ,byo tumvwa, byo tulanguluka ne ene mambo o tulangulukila byobyo. Davida byo alombele Yehoba kumupimapima, walombele Lesa kupimapima milanguluko yanji.
9 Davida walombele kuba’mba Lesa apimepime mafyo ne muchima wanji. Yehoba upimapima byepi milanguluko ya mu muchima wetu? Davida waimbile’mba: “Nkamutotanga Yehoba, yenka wambuula bya kuba. Nangwatu mu kimye kya bufuku, milanguluko yami ya mukachi mwine, imfunjisha.” (Salamo 16:7) Bino byambo bilumbulula ka? Bilumbulula kuba’mba lujimuno lwa Lesa lwamufikile bingi pa muchima Davida, ne kumulengela kupimpula ndangulukilo ne byo aumvwinenga. Ne atweba byobyo kyakonsha kwikala inge twalangulukishapo bulongo pa lujimuno luji mu Mambo a Lesa. Kutwajijila kulomba kuba’mba Yehoba apimepimenga milanguluko yetu kuketukwasha kutwajijila kwenda mu bulumbuluke.
w04 12/1 15 mafu. 12-13
Ikalai Bakishinka Kimye Kyonse
12 Davida waambile pa kishinka kikwabo kyakoseshe bukishinka bwanji amba “Kechi mpwanañana na bantu ba bujimbijimbi ne, kabiji nchinuzhuka boba befya byo baji. Nashikwa jibumba ja bantu batama, kabiji kechi mpwanañana na bantu babi ne.” (Salamo 26:4, 5) Davida kechi waikalanga pa bantu babi ne, kabiji washikilwe kupwanañana nabo
13 Tubena kufunjilako ka? Nanchi tukaana kutamba bintu bya bubela bibika bantu pa mitanchi ya pa TV, mu mafilimu, bipikichala, bya pa intaneti nangwa mu mashinda akwabotu nyi? Nanchi tunchinuzhuka bantu befya byo baji nyi? Bantu bamo bo tufunda nabo sukulu nangwa bo twingila nabo ku nkito bakonsha kwibepekezha kwikala balunda netu na mulanguluko watama. Nanchi twafwaniwa kwisampa bulunda na bantu bashikwa Lesa nyi? Bansatuki bebepekizha kwikala bantu bawama pa kuba’mba betulengele kuleka kwingijila Yehoba. Twakonsha kuba byepi inge mu kipwilo muji bantu ba uno mutundu befya bo baji? Ba Jayson, bakwasho mu kipwilo bajinga na balunda ba uno mutundu kimye kyo bajinga banyike. Baambile’mba: “Juba jimo umo pa balunda nami wañambijile’mba: ‘Kechi twafwainwa kuta muchima pa bintu byo tubena kuba luno ne, mambo ntanda ipya inge yafika, tukafwa kechi tukayuka ne bikamwekanga ne. Kabiji kechi tukayuka amba twashalapo pa bintu byawama ne.’ Ino ñambilo yandengijile kuyuka amba kechi bajinga balunda bawama ne. Mambo kechi nakebelenga kubula kutwela mu ntanda ipya ne.” Onkao mambo ba Jayson balekele kupwanañana na bano balunda nabo. Mutumwa Paulo witujimwineko amba: “Kange mujimbaikwe ne. Kupwanañana na babi konauna byubilo byawama.” (1 Kolinda 15:33) Twafwainwa kwibikako kuleka kupwanañana na babi.
w04 12/1 16 mafu. 17-18
Ikala Bakishinka Kimye Kyonse
17 Tente wa lusambakeno ne kya kusokelapo bitapisho popaimenejile bupopweshi bwa Yehoba mu Isalela. Davida walumbulwile byo atemenwe ino mpunzha byo alombele amba: “Anweba Yehoba, natemwa nzubo yenu yo mwikalamo, ku mpunzha kwikala lukumo lwenu.”—Salamo 26:8.
18 Nanchi twatemwa kutanwa ku mapunzha ko tuya na kufunda pe Yehoba nyi? Ku mpunzha konse komukaya mu kataana Nzubo ya Bufumu, paimena mpopwelo ya kine, po tutambwila mikambizho. Kabiji tutambwila mikambizho pa kushonkena, pa kubuñana kwa mwanzo ne pa kupwila kukwabo kukatampe. Tufunda bya “kuvululako” bya Yehoba pa kuno kupwila konse. Inge ‘twatemwa bingi’ bya kuvululako bya Yehoba tukatanwanga ku kupwila kimye kyonse kabiji tukatangako bingi muchima inge tubena kupwila. (Salamo 119:167) Kyawama bingi kwikala pamo na balongo ne banyenga betutundaika ne kwitukwasha kutwajijila kwikala bakishinka kwi Yehoba kimye kyonse.—Bahebelu 10:24, 25.
Bishinka Bikwabo Byanema
w06 7/15 28 jifu. 15
Yehoba Upokolola Yewa Ubena Kumanama
15 Nyimbi wa masalamo Davida waimbile’mba: “Batata ne bamama umvwe bandekelela, ponkapo Yehoba ukantola.” (Masalamo 27:10) Byo kitekeneshapo kuyuka’mba butemwe bwa Yehoba bwakila bwa bansemi ba bumuntu! Nangwa kya kuba kikola bingi ku muchima umvwe bansemi bakukana nangwa ke bakumanyike, Yehoba aye wimuta bingi muchima. (Loma 8:38, 39) Yukai kuba’mba Lesa ukokela koaji aba boatemwa. (Yoano 3:16; 6:44) Nangwa bantu bemumanyike byepi, Shenu wa mwiulu wimutemwa bingi!
APRIL 15-21
BYA BUNEME BIJI MU MAMBO A LESA | SALAMO 29-31
Lujimuno Lumwesha Butemwe bwa Yehoba
it-1 802 jifu. 3
Kilungi
Byambo bya kuba’mba ‘kufya kilungi’ biji na ndumbulwilo yavula kwesakana na kintu kyo babena kwambapo. Yehoba Lesa inge wafya kilungi kyanji javula kilumbulula’mba waleka kupana bukwasho nangwa bulume bwanji. Kino kyakonsha kumweka inge muntu nangwa bantu baleka kumukookela, byonka byaubile kisaka kya bena Isalela. (Yob 34:29; Sl 30:5-8; Is 54:8; 59:2) Kabiji kimye kimo bino byambo byakonsha kulumbulula amba Yehoba wikaanya kusololapo bintu bimo nangwa kubula kukumbula ne kupembelela pa kimye kyanji kyafwainwa. (Sl 13:1-3) Davida byo alombele’mba: “Ndekelaiko mambo ami,” walombelenga Lesa amba afute mambo anji nangwa amba kuzhimañanya bubi bwanji bonse.—Sl 51:9; esakanyai Sl 10:11.
Kupembelela Yehoba na Lusekelo
Twakonsha kwesakanya bitukwasha lujimuno lwitupa Yehoba ku bikoma kipangwa. Baibolo waamba pa lujimuno lwa Lesa amba: “Aba bo bafunda bapanga bipangwa bya mutende ne bololoke.” (Bahebelu 12:11) Byonkatu kipangwa byo kikebewa kimye pa kuba’mba kipye, ne atweba kyo kimotu papita kimye pa kuba’mba tukookele lujimuno lwitupa Yehoba ne kupimpula byubilo byetu. Inge betutambula mingilo mu kipwilo na mambo a byubilo byatama, muchima wa kupembelela Yehoba uketukwasha kubula kulefuulwa ne kuleka kwingijila Lesa. Mu bimye bya uno mutundu, byambo byanembele Davida na lutangijilo lwa mupashi byakonsha kwitukosesha bingi. Wanembele’mba: “Mambo bukaji [bwa Lesa] bo bwa kakimyetu kacheche, bino bibusa byanji byo bya moba onse. Mabanga kwakonsha kwikala kujila, bino lukelo, kwikala kusangalala.” (Salamo 30:5) Inge twaikala na muchima wa kupembelela ne kulondela lujimuno lwa Lesa luji mu Mambo Anji, ne lufuma ku jibumba janji, mu kuya kwa moba tukekala na ‘lusekelo.’
Kulapila kya Kine Kulumbulula Ka?
18 Muntu ye bapanga mu kipwilo pa kuba’mba amweshe’mba walapila kya kine, wafwainwa kutanwanga ku kupwila kimye kyonse ne kulondela lujimuno lwamupele bakulumpe mu kipwilo lwa kulombanga kimye kyonse ne kufunda Baibolo. Kabiji wafwainwa kwibikako kuchinuzhuka bintu byakonsha kumulengela kulenga mambo jibiji. Inge waingila na ngovu kuwamisha bulunda bwanji ne Yehoba, wakonsha kwikala na luketekelo lwa kuba’mba Yehoba ukamulekelako mambo kabiji bakulumpe mu kipwilo bakamukwasha kubwela mu kipwilo. Pano bino, kimye bakulumpe mu kipwilo kyo babena kukeba kuyuka inge muntu walapila kya kine, bavuluka kuba’mba mambo apusana-pusana. Onkao mambo, bapesapesa mambo onse bulongo ne kuchinuzhuka kuchiba mambo lubilo.
Bishinka Bikwabo Byanema
w06 5/15 19 ¶13
Bishinka Bikatampe Kufuma mu Buku Mutanshi wa Masalamo
31:23—Awa witota, Yehoba umufweta byepi byavula? Lukabisho yo mfweto yanji. Waoloka umvwe watupila bamujimunako kyafwainwa kwi Yehoba mambo kechi ubilamotu kyanshiji ne. Muntu witota byo abula kuleka byubilo byanji byatama, bamufweta lumanamo lwavula.—Byambo bya Mana 11:31; 1 Petelo 4:18.
APRIL 22-28
BYA BUNEME BIJI MU MAMBO A LESA | SALAMO 32-33
Mambo ka o Twafwainwa Kusolwela Mambo Akatampe o Twalenga?
w93 3/15 9 jifu. 7
Lusa lwa Yehoba Lwitulengela Kubula Kupelelwa
7 Inge tubena kwizhachisha na mambo a kulala muzhilo wa Lesa, kyakonsha kwitukatazha kusolola mambo etu, nangwatu kwi Yehoba. Twakonsha kuba byepi inge kya uno mutundu kitumwekela? Mu Salamo 32 ,Davida waambile’mba: “Byo nazhindaminepo, bikupa byami byakookele na mambo a kubinza kimye kyonse. Mute ne bufuku, kuboko [kwa Yehoba] kwannemejile. Bulume bwami bwapwile byonka byuma mema na mambo a kyuya mu kimye kya kisalo.” (Byapelo 3, 4) Kufya mambo o alengele ne kumukatazha ku jiwi ja mu muchima kwamukokeshe bingi Davida. Kyamukolele bingi ku muchima kya kuba wajingatu nobe kichi kyalela mabula na mambo a kubula mema. Kyamweka wakolelwe kabiji wajinga bingi na bijikila. Kino kyamulengejile kubula kwikala na lusekelo. Twakonsha kuba byepi inge kya uno mutundu kitumwekela?
Lesa ‘Waswila Jimo Kulekela Mambo’
8 Davida walapijile waambile amba: ‘Nemusolwejile mambo ami, ne bubi bwami kechi nebufile ne. . . . Kabiji anweba mwandekele bubi bwa mambo ami.’ (Masalamo 32:5) Kyambo kya ‘kulekela’ kyatuntululwa ku kyambo kya Kihebelu kilumbulula’mba “kunyamuna” nangwa “kusenda.” Ñiñijishilo yakyo pano ilumbulula kusenda “luzhachisho, bundengamambo ne mizhilulwila.” Onkao mambo, kiji nobe Yehoba wafumishepo mambo a kwa Davida kabiji ne kwiasenda. Kwakubula nangwa kuzhinauka ne, kino kyamwamwineko Davida ku milanguluko ya kuzhatwa yo ajinga nayo. (Masalamo 32:3) Ne atweba twakonsha kuketekela na muchima yense mwi Lesa usenda mambo a boba bakeba kulekelwa mambo kupichila mu lwitabilo lwabo mu kitapisho kya bukuzhi bwa kwa Yesu.—Mateo 20:28.
Kulapila kya Kine Kulengela Kubukwa
Davida byo alapijile, kechi watwajijle kwizhachisha ne kwilengulula ne. Byambo byo aambile byanembwa mu Masalamo bimwesha byo aumvwine kimye kyo alapijile ne kutwajijila kwingijila Lesa mu bukishinka. Nabiji byambo biji mu Salamo 32. Kyepelo 1, kyaamba’mba: “Ye wa lusekelo awa ye balekelako mizhilulwila, kabiji ye bavwetela pa mambo anji.” Nangwa kya kuba mambo abayepotu byepi, muntu wakonsha kwikala na lusekelo jikwabo inge walapila kya kine. Jishinda jimo mumwekela kulapila kwa kine ke kuswa mambo byonka byaubile Davida. (2 Samwela 12:13) Kechi wikangaizhenga kwi Yehoba nangwa kupamo bakwabo mambo ne. Kyepelo 5 kyaamba’mba: “Kepo nasolwele mambo ami kwi anweba; kechi nafile mambo ami ne. Naambile namba: ‘Nsakusolola mizhilulwila yami kwi Yehoba.’ Ne anweba mwandekejileko mambo ami.” Kulapila kya kine kulengela muntu kubukwa. Onkao mambo, muntu walapila kya kine kechi wafwainwa kutwajijila kwizhachisha pa bintu byatama byo aubile kala ne.
Bishinka Bikwabo Byanema
w06 5/15 20 jifu. 1
Bishinka Bikatampe Kufuma mu Buku Mutanshi wa Masalamo
33:6; Davida watazhizhe mwepi byoalombele amba kechi muleke boba banshikwa bafyeteke meso ne? Kufyeteka meso kwafwainwe kwalumbulwilenga lusekelo lwajinga na balwanyi ba kwa Davida byo bakebelenga kumushinda pa kubula mambo ne. Davida walombele amba kino kechi kyubiwe ne.
APRIL 29–MAY 5
BYA BUNEME BIJI MU MAMBO A LESA | SALAMO 34-35
“Nkamutotanga Yehoba Kimye Kyonse”
Twayai Tutumbijikenga Jizhina ja Yehoba Bonse Pamo
11 ‘Nkamutakaikanga Yehoba moba onse: Bya kumutota bikakelwa mu kanwa kami.’ (Salamo 34:1) Davida byo aikalangatu nobe muntu ye basula, wakonsheshe kwikala na bijikila byavula bingi pa mambo a bintu bya ku mubiji, bino kwesakana na bino byambo, kechi walekele bintu bya pa juba ne juba kumulengela kubula kutota Yehoba ne. Kino byo kyaikalapo kya kumwenako kyawama bingi kulonda umvwe twaikala na makatazho! Kikale tuji ku sukulu, ku nkito, na bena Kilishitu bakwetu, nangwa mu busapwishi, kintu kikatampe kyo twafwainwa kutapo muchima ke kutota Yehoba. Akilangulukai bishinka byavula byakonsha kwitulengela kuba kino! Kya kumwenako, kuji bintu byavula bingi bya kukankalwa kuyuka bikebewa kuyuka ne kutana lusekelo mu mingilo ya kukumya yo alenga Yehoba. Kabiji akilangulukai byo auba kupichila mu jibumba janji ja panopantanda! Yehoba waingijisha bantu ba kishinka kyabaya bingi mu ano moba nangwa kya kuba bambulwakoloka. Nga mingilo ya Lesa iji byepi umvwe twiyesakanya na ya boba bantu bo bapopwela ku bantu ba ino ntanda? Nanchi kechi muswa byaambile Davida wanembele’mba: “Mu bilesalesa ka muji nangwa umo waesakana nenu ne; Nangwa mingilo yaesakana na yenu ne” nyi?—Salamo 86:8.
Twayai Tutumbijikenga Jizhina Ja Yehoba Bonse Pamo
13 ‘Muchima wami uketotelanga mwi Yehoba: Bakimote bakekyumvwa, ne kusekela bakasekela.’ (Salamo 34:2) Apano Davida kechi witotele amba waubile bintu mu bulume bwanji ne. Kya kumwenako, kechi witotele pa mambo a byo ajimbaikile mfumu wa bena Gata ne. Wayukile’mba Yehoba ye wamuzhikijile byo ajinga mu Gata kabiji ne kuba’mba wanyemene mambo a bukwasho bwa Yehoba. (Byambo bya Mana 21:1) Onkao mambo, Davida witotejile mwi Yehoba, kechi mwi aye mwine ne. Davida byo atumbijikile Yehoba, kyalengejile bakimote kwiya kwi Yehoba. Yesu naye kimye kyonse watumbijikanga jizhina ja Yehoba, kabiji kino kyaletele bantu bekepeshe, bafwainwe kufunjishiwa kwi Yehoba. Lelo jino, bakimote ba mu mikoka yonse ya bantu beya mu kipwilo kya ntanda yonse kya bena Kilishitu bashingwa, ne Yesu ye Mutwe wakyo. (Kolose 1:18) Michima ya bano bakimote itundaikwa bingi umvwe baumvwa jizhina ja Lesa saka jitumbijikwa na bakalume banji bekepesha kabiji umvwe baumvwa mambo a mu Baibolo kupichila mu bukwasho bwa mupashi wazhila.—Yoano 6:44; Byubilo 16:14.
Twayai Tutumbijikenga Jizhina Ja Yehoba Bonse Pamo
15 ‘Nakebele Yehoba, ne aye wangitabile, ne kumpokolola wampokolwele ku moyo wami yense.’ (Salamo 34:4) Kino kintu kyanemene bingi kwi Davida. Kyo kine kintu kyo atwajijile kwamba’mba: ‘Uno muyanji waichile, ne Yehoba wamumvwine. Wamupulwishe mu byakatazha byanji byonse.’ (Salamo 34:6) Kimye kyo tubena kupwanañena pamo na bakwetu ba mu lwitabilo, kyo kimye kyo twafwainwa kushimikizhapo bintu bimo byawama byo twapitamo Yehoba byo etukwasha kuchinchika makatazho a mu bwikalo. Kino kikosesha bingi lwitabilo lwa bakwetu ba mu lwitabilo lumo, byonkatu byambo bya kwa Davida byo byakoseshe lwitabilo lwa bantu banji. Davida ne bantu banji ‘batajile kuji aye [Yehoba] ne kusama basaminenga; ne bilungi byabo kechi byaubilenga bumvu nangwa pacheche ne.’ (Salamo 34:5) Nangwa kya kuba banyemenenga Mfumu Saulo, kechi baumvwine bumvu ne. Bayukishetu amba Lesa wamuzhikijilenga Davida, ne bilungi byabo byasaminenga. Popamotu, ne boba baji na lusekelo lwa kufunda bukine kubikapotu ne bena Kilishitu babanda mu bukine baketekela mwi Yehoba kwibakwasha. Na mambo akuba Yehoba wibakwasha, kusama kwa bilungi byabo kumwesha’mba babena kukebesha kwikala bakishinka.
Bishinka Bikwabo Byanema
w06 5/15 20 jifu. 2
Bishinka Bikatampe Kufuma mu Buku Mutanshi wa Masalamo
35:19—Davida watazhizhe mwepi byoalombele amba kechi muleke boba banshikwa bafyeteke meso ne? Kufyeteka meso kwafwainwe kwalumbulwilenga lusekelo lwajinga na balwanyi ba kwa Davida byo bakebelenga kumushinda pa kubula mambo ne. Davida walombele amba kino kechi kyubiwe ne.