Mepuzho Kufuma Kubatanga
Lufunjisho ka Luji mu Byambo bya Mana 24:27?
Byo afunjilengako yewa nsongwalume, nembi wa Byambo bya Mana waambile’mba: “Patanshi lungikila jimo bya mwingilo wobe wa pangye, kabiji ujimine jimo bujimi bobe, apa bino ukashimike nzubo yobe.” Ñanyi kishinka kibena kwambiwapo mu bino byambo bya mana byanembwa na mupashi? Kishinka ke kya kuba’mba mwanamulume wafwainwa kwinengezhezha jimo bulongo saka akyangye kusongola ne kutendeka kisemi kyanji, kabiji wafwainwa kuyuka mitembo iji mu masongola.
Kala, kino kyepelo jimo kyalumbululwanga kuba’mba mwanamulume, awo waikala nsemi kechi wafwainwatu kuta muchima ku nkito yanji ya ku mubiji kwapwa ne, bino wafwainwa kukomesha ne kukosesha kisemi kyanji na mikambizho ya ku mupashi. Nangwa kya kuba bino byambo bya kine kabiji bya mu Binembelo, kyamweka nobe kechi kyo kishinka kibena kwambiwapo ne. Mambo ka? Akimonai bino bishinka bibiji.
Kitanshi, kyepelo kyaambiwapo kechi kibena kwamba pa mambo a kukosesha kisemi kyaikelako jimo ne. Bino mulanguluko wanembwamo ke wa kushimika nzubo yonkaye. Kyambo kyatuntululwa’mba ‘kushimika’ kyakonsha ne kwingila mu bukifwanyikizho, mu mulanguluko wa kutunga, nangwa kwikala na kisemi, ko kuba’mba kusongola ne kusema baana.
Kya bubiji, kino kyepelo kyaamba ne pa kuba bintu mundonda, pamo nobe kwamba’mba “patanshi uba kikye bino ube ne kyokya.” Pano nanchi bino byambo bya mana bibena kwamba kuba’mba patanshi twafwainwa kukingila mingilo ya ino ntanda apa bino twaingila ya ku mupashi nyi? Ine!
Mu kimye kya kala, umvwe muntu wakeba ‘kushimika nzubo yanji,’ nangwa kwikala na kisemi kupichila mu kusongola, wafwainwe kwishikisha aye mwine amba, ‘Abya nenengezha kulama ne kukwasha mukazhami ne baana bo tukakonsha kusema kulutwe na lwendo nyi?’ Saka akyangye kwikala na kisemi, waingilanga mwingilo wa kujima ne kunengezha kajo. O ene mambo Baibolo wa Today’s English Version o atuntulwila kino kyepelo amba: “Kechi ushimike nzubo nangwa kwikala na kisemi kajo saka kakyangye kupya mu majimi obe ne, kabiji wafwainwa kumona amba ujipo na mashinda amo mwa kwikela.” Nanchi uno mukambizho wakonsha kwingila ne lelo jino nyi?
Ee. Mwanamulume ukeba kusongola wafwainwa kwinengezha bulongo kusenda uno mutembo. Inge ujitu bulongo ku mubiji, wafwainwa kwingila mingilo. Pano bino kwingila na ngovu kwa mwanamulume mu kulama kisemi kyanji kechi kwafwainwa kwikalatu kwa ku mubiji kwapwa ne. Mambo a Lesa aamba’mba mwanamulume ubula kulama ba mu nzubo yanji ku mubiji, kwibatangijila mu milanguluko ne ku mupashi wakila wabula kwitaba mu kutama. (1 Timo. 5:8) Onkao mambo, pa kwinengezha kusongola ne kwikala na kisemi, mwanamulume wafwainwa kwishikisha aye mwine ano mepuzho amba: ‘Nanchi kine nenengezha kumwena ba mu kisemi kyami bintu bya ku mubiji nyi? Abya nenengezha kutangijila kisemi kyami ku mupashi nyi? Nanchi nkafikizhanga mutembo wa kutangijila lufunjisho lwa Baibolo kimye kyonse ku mukazhami ne baana nyi?’ Mambo a Lesa aambishapo bingi pa ino mitembo yanema. —Mpitu. 6:6-8; Efi. 6:4.
Onkao mambo mwanamulume ukeba kusongola wafwainwa kulangulukishapo bingi pa jifunde jitanwa mu Byambo bya Mana 24:27. Byonkabyo ne mwanamukazhi naye wafwainwa kwishikisha umvwe winengezha kusenda mitembo ya kwikala mukazhi ne inetu. Ba mulume ne mukazhi bakyanyike bafwainwa kwiipuzha ano mepuzho pa mambo a kukomesha baana bo bakonsha kwikala nabo. (Luka 14:28) Kulondela luno lutangijilo lwa ku mupashi kwakonsha kukwasha bantu ba Lesa kubula kwikala na binyenge ne kwibalengela kwikala na lusekelo mu kisemi.
[Mabulañano pa peja 12]
Mepuzho ka pa mambo a masongola mwanamulume o afwainwa kwishikisha?