Baibolo Waambapo’mba ka pa Bantu Bekala Pamo kwa Kubula Kwisongola?
Mukumbu wa mu Baibolo
Baibolo waamba’mba kyaswa muchima wa Lesa ku bantu bonse ke kya kuba’mba bafwainwa “kuchina bulalelale.” (1 Tesalonika 4:3) Akino kyambo kya “bulalelale” kwesakana na byo bekingijisha mu Baibolo kyavwangamo bukende, kwilaala na mwanamulume nangwa na mwanamukazhi mukwenu ne kwilaala kubiwa ku mwanamulume ne mwanamukazhi babula kwisongola.
Mambo ka Lesa o akebela mwanamulume ne mwanamukazhi kwisongola inge bakeba kwilaalanga ne kwikala pamo?
Lesa ye wabikako masongola. Waubile bino kimye kyo asongweshe bamulume ne mukazhi batanshi. (Ntendekelo 2:22-24) Lesa walengele mwanamulume ne mwanamukazhi kuba’mba bafwainwa kwisongola ne kwikala bakishinka mulwabo.
Lesa ye wayuka bintu byafwainwa kukwasha bantu. Kyaswa muchima wa Lesa ke kya kuba’mba masongola afwainwa kwikala myaka ne myaka. Mambo wayukile’mba bonse mu kisemi bakamwenamo byawama. Umvwai kino kishimpi kyapeela. Byonkatu balenga bya kulengalenga babikako mikambizho ya kulondela pa kuba’mba muyuke bya kufiika kintu kyo mwapota. Kyo kimotu, mikambizho ya Lesa itubuula byo twafwainwa kwikala bulongo mu kisemi. Kimye kyonse, balondela mikambizho ya Lesa bamwenamo bintu byawama bingi.—Isaya 48:17, 18.
Balenga bya kulengalenga babikako mikambizho ya kulondela pa kuba’mba muyuke bya kufiika kintu kyo mwapota. Mikambizho ya Lesa nayo itubuula byo twafwainwa kwikala bulongo mu kisemi
Kuba bulalelale mufuma bintu byatama bingi. Bintu bifuma mu kuba bulalelale ke bino, mufuma mavumo, kusambula bikola ne bintutu bikwabo byatama.a
Lesa wapeele mwanamulume ne mwanamukazhi bulume bwa kusema kupichila mu kwilaala. Lesa umona bumi amba bwazhila bingi ne bulume bwa kusema baana ke kya bupe kyawama bingi kyo etupa. Lesa ukebatu atweba kwilaala inge twasongola nangwa kusongolwa. Inge twakookela byo etubuula, tumwesha’mba twanemeka kino kya bupe.—Bahebelu 13:4.
Nanchi kyatama mwanamulume ne mwanamukazhi bakyangye kwisongola kukikala pamo pa kuba’mba beyuke bulongo inge bakonsha kwikala na masongola a lusekelo nyi?
Pa kuba’mba mwikale na masongola awama kechi kyawama kukikala pamo pa kimye kimo ne. Pakuba masongola akosatu inge mwanamulume ne mwanamukazhi bonse betemwa kabiji bengijila pamo kupwisha makatazho.b Bantu besongola bachipa luchipo lwa kuba’mba bakekalanga pamo myaka ne myaka ne kwitemwa.—Mateo 19:6.
Bamulume ne mukazhi bakonsha kukosesha byepi masongola abo?
Kafwako bantu besongola babula kupita mu makatazho ne. Nangwa kiji bino, bamulume ne mukazhi bakonsha kwikala na masongola awama inge kebengijishe mafunde a mu Baibolo. Mafunde amo o bafwainwa kulondela ke ano:
Tainga bingi muchima ku bintu bikeba benakwenu kukila bintu byo mukeba.—1 Kolinda 7:3-5; Filipai 2:3, 4.
Itemwai ne kwipanga mushingi anweba bene na bene.—Efisesa 5:25, 33.
Yukainga bya kwamba.—Byambo bya Maana 12:18.
Tekanyainga ne kwilekelangako mambo.—Kolose 3:13, 14.