4 Kwilekelako Mambo

BYO KILUMBULULA

Kulekelako muntu mambo kulumbulula kulubako kintu kyatama kyo auba. Kabiji kechi kulumbulula kukepesha kintu kyatama kyo auba nangwa kubepekezha nobe kechi watamisha ne.

JIFUNDE JA MU BAIBOLO: “Itekenyainga anwe bene na bene ne kwilekelako mambo umvwe umo uji na mambo na mukwabo.”—Kolose 3:13.

Ba Aaron baambile’mba: “Umwve twatemwa muntu, kechi tuta muchima ku bintu byo alalubankanya ne, bino tuta muchima pa bintu byawama byo abena kuba.”

ENE MAMBO O KYANEMENA

Kwikala na kizhingijisha kulengela muntu kukolwa, kabiji kuba bino kulengela baji mu masongola kubula kwikala bulongo.

Ba Julia baambile’mba: “Juba jimo bamwatawami balombele lulekelo lwa mambo byo baubile kintu kyamfichishe ku muchima. Kechi kyapelele kwibalekelako mambo ne. Byo papichile moba ne balekejileko mambo, bino nelangulusha mambo kechi nebalekejileko mambo bukiji ne. Byo nabujile kulekelako mambo benakwami kechi twaikelenga bulongo mu masongola ne.”

BYO MWAKONSHA KUBA

IIPUZHAI’MBA

Inge benakwenu bakemuzhingijishe, mukeipuzhe’mba:

• ‘Nanchi nzhingila bukiji nyi?’

• ‘Nanchi byo bauba byatamishatu kya kuba kanatu balombe lulekelo lwa mambo nyi, inyi nafwainwa kulubakotu?’

ISAMBAI NA BENAKWENU

• Inge twizhingijisha, nanchi twilekelako mambo bukiji bukiji nyi, inyi papita kimye kyabaya?

• Ñanyi bintu byo twafwainwa kuba pa kuba’mba twilekelengako mambo bukiji?

BYA KUBA

• Inge benakwenu bemulenga mambo, kange mulangulukenga kwiboba bintu byatama ne.

• Lekelaingako mambo benakwenu inge balubankanya “mambo atweba bonse twituntula javula.”—Yakoba 3:2.

Ba Kimberly baambile’mba: “Kipeela bingi kwilekelako mambo inge bonse mwalubankanya. Bino inge umotu ye watamisha kikatazha. Kwipelula ko kulengela kulekelako mukwenu mambo.”

JIFUNDE JA MU BAIBOLO: “Pwana bukiji na muntu ye uji nanji na mambo.”—Mateo 5:25.