Bya Kumwesha’mba Musanta pa Bukuzhi

1-2. Kitapisho kya bukuzhi kya kwa Yesu kyafwainwa kwitulengela kubapo ka, kabiji mambo ka? (2 Kolinda 5:14, 15) (Monai ne kipikichala.)

INGE muntu wimupulusha mu kishimikwa kimukulukila, nanchi kechi mukasanchila uno muntu pa kwimupulusha nenyi? Nangwa kya kuba ne bantu bakwabotu bavula bebapulwishe, mukakebesha kumusanchila uno muntu anweba bene, mambo kuba bino kukamwesha’mba musanta bingi pa byo emupulwishe.

² Byonka byo twafunjile mu mutwe wafumako, kechi twakonsha kwipokolola atweba bene ku bundengamambo ne lufu ne. Pakuba bukuzhi bwitupokolola mambo bwalengela (1) kwitulekelako mambo o tulenga, (2) kwikala na luketekelo lwa kukabukwa ne kwikala balumbuluka kulutwe ne (3) kupwana ne Lesa. Bukuzhi bwitulengela kwikala na luketekelo lwa kukekala myaka ne myaka mu ntanda ipya ya Lesa. Kinetu, Yesu wamwesheshe’mba watemwa bingi bantu byo epaine kwibafwila. Kabiji Yesu watemenwe bantu saka akyangyetu ne kwiya pano pa ntanda. (Maana 8:30, 31) Mutumwa Paulo wanembele amba “butemwe bwa Kilishitu bo bwitulengela kwingila.” (Tangai 2 Kolinda 5:14, 15.) Kino kilumbulula’mba butemwe bwa kwa Yesu bwafwainwa kwitulengela kubapo bimo. Tusanta bingi pa kitapisho kya bukuzhi kabiji kechi tulubamo kintu kitubijile Yesu ne.

3. Mambo ka byakonsha kuba muntu pa kumwesha kusanta pa bukuzhi o byakonsha kupusena na bakwabo?

³ Ñanyi bintu byo mwafwainwa kuba bikamwesha’mba musanta pa bukuzhi? Mukumbu wenu wakonsha kupusanako na wa muntu mukwabo. Pa kuba’mba tumvwishe, akilangulukai pa kino. Fwanyikizhai kuba’mba bantu basatu bakasa lwendo lwa kuya ku mpunzha imo, pano bino babena kufuma mu mizhi yapusana pusana. Mashinda o bakengijisha akapusana. Kyo kimotu, bintu byo mukoba pa kuba’mba mumweshe’mba musanta pa bukuzhi bikemena pa biji bulunda bwenu ne Yehoba pa kino kimye. Onkao mambo, mu uno mutwe tusakwisamba pa mabumba a bantu asatu: (1) Bafunda Baibolo. (2) bena Kilishitu babatizhiwa ne (3) bena Kilishitu baleka kwingijila Yehoba.

BAFUNDA BAIBOLO

4. Yehoba umvwa byepi pa bantu babena kufunda Baibolo?

⁴ Inge mubena kufunda Baibolo, vulukainga kino kishinka: Kufunda pe Yehoba kumwesha’mba muji pa bantu Yehoba bo abena kukwasha kwikala balunda nanji. (Yoa. 6:44; Byu. 13:48) “Yehoba ye utalatala mu michima.” Kino kibena kulumbulula’mba umona byo mubena kwibikako kufunda pe aye, kabiji umvwa bingi bulongo byo mubena kwibikako kupimpula byubilo byenu pa kuba’mba mwikelenga mwayila mizhilo yanji. (Maana 17:3; 27:11) Bukuzhi bo bwashinkula jishinda ja kwimukwasha kwikala balunda ne Yehoba. (Loma 5:10, 11) Mwafwainwa kuvulukanga kino kishinka kimye kyonse.

5. Bantu babena kufunda Baibolo bakonsha kulondela byepi byambo biji pa Filipai 3:16?

⁵ Anweba mubena kufunda Baibolo, mwakonsha kumwesha byepi amba musanta pa bukuzhi? Jishinda jimo ke kulondela byambo Paulo byo aambijile bena Filipai bya kuba’mba: “Monka mo twaendelako kala kufika ne pano po tuji, twayai twendenga bulongo monkamo.” (Fili. 3:16) Baibolo umo watuntulula byambo biji pa kino kyepelo amba: “Twafwainwa kutwajijila kuya kulutwe konka ko twatala.” Onkao mambo, kechi mwafwainwa kuswisha kintu kiji kyonse kwimulengela kuleka kwenda mu jishinda jaya ku bumi ne.​—Mat. 7:14; Luka 9:62.

6. Ñanyi kintu kyafwainwa kuba bafunda Baibolo inge kibakatazha kupimpula byubilo byabo? (Mpitulukilo ya mu mizhilo 30:11-14) (Monai ne kipikichala.)

⁶ Pano mwakonsha kuba byepi inge kimukatazha kumvwisha bintu bimo byo mwafunda mu Baibolo? Pesapesaipo pa kyokyo kintu ne kulomba Yehoba kwimukwasha kumvwisha. (Sala. 86:11) Inge mwakankalwa kumvwisha mo kyatala, kechi mwafwainwa kwakamwa ne. Twajijilaitu kufunda Baibolo. Pano ibyepi inge kimukatazha kuleka kyubilo kimo kyatama kyakanya Baibolo? Yehoba kechi witukebela kuba bintu byo twakonsha kukankalwa kuba ne. Ne anweba mwakonsha kwikela mwayila mafunde anji. (Tangai Mpitulukilo ya mu mizhilo 30:11-14.) Kabiji Yehoba walaya kwimukwasha. (Isa. 41:10, 13; 1 Ko. 10:13) Onkao mambo, kange muleke ne. Mu kifulo kya kulangulukangatu pa bintu bimukatazha kuleka, tai muchima pa byo musanchila Yehoba pa bintu byawama byo emubila kuvwangakotu ne bukuzhi. Butemwe bwenu bwa kutemwa Yehoba byo bukakoselako, mukashiinwa kuba’mba “mikambizho yanji kechi yakatazha ne.”​—1 Yoa. 5:3.a

7. Ñanyi bintu byafwainwa kulangulukangapo banyike bo babena kukomesha mu bukine?

⁷ Pano ibyepi anweba banyike bo babena kukomesha mu bukine? Ne anweba muji pa bantu bafunda Baibolo. Muji pa bantu bansemi benu bo bafunjisha Baibolo bo bata bingi muchima. Baibolo waamba’mba: “Fwenyai kwipi ne Lesa, ne aye ukafwenya kwipi ne anweba.” (Yako. 4:8; 1 Moba 28:9) Inge mwafuukulapo kufwenya kwipi ne Yehoba, ne aye ukafwenya kwipi ne anweba. Yehoba wimuyuka pa muntu pa muntu, kechi wimubajila mu bujibumba ne. Ukoka bantu bonse pa muntu pa muntu kuvwangakotu ne anweba bo babena kukomesha mu bukine. Ñanyi kintu kimushinkwila jishinda ja kwikelamo balunda ne Yehoba? Ke bukuzhi kabiji mwafwainwa kwibunemeka bingi. (Loma 5:1, 2) Onkao mambo, saka mukyangye kutanwa ku Kivuluko kya uno mwaka, mulangulukishepo bingi pa bintu bimubila Yehoba ne Yesu. Mulangulukepo bulongo pa byo mwafwainwa kwikalanga bwikalo bwenu ne bikonkwanyi byo mwafwainwa kwibikila pa kuba’mba mumweshenga’mba musanchila Yehoba.b

BENA KILISHITU BABATIZHIWA

8. Bena Kilishitu babatizhiwa bamwesha byepi amba baitabila mu bukuzhi?

⁸ Inge mwi bena Kilishitu babatizhiwa, mwamwesha lwitabilo lwenu mu bukuzhi mu mashinda avula. Mwaubilepo bintu bimo byanema bingi bimulengejile kufwenya kwipi ne Yehoba ne kwikela mwayila mizhilo yanji. Mwakookejile mukambizho wa kwa Yesu wa kufunjisha bantu kwikala baana ba bwanga kupichila mu kubuulako bantu bintu byo mwaitabilamo. Kepo mwipaine kwi Yehoba ne kubatizhiwa. Nanchi babena kwimumanyika na mambo a kwingijila Yehoba nyi? (2 Timo. 3:12) Kuchinchika kwenu mu bukishinka kumwesha’mba mwatemwa bingi Yehoba kabiji musanta pa byo apaine Mwananji kwikala bukuzhi.​—Hebe. 12:2, 3.

9. Ñanyi kintu bena Kilishitu babatizhiwa kyo bafwainwa kujimuka nakyo?

⁹ Byo tuji bena Kilishitu babatizhiwa, kuji kintu kimo kyo twafwainwa kujimuka nakyo. Mu kuya kwa moba, twakonsha kuleka kunemeka bukuzhi. Kino kyakonsha kubiwa byepi? Akilangulukai pa kyamwekejile bena Kilishitu ba mu myaka kitota kitanshi ba mu Efisesa. Yesu wibasanchijile pa kuchinchika kwabo. Nangwa byonkabyo, wibambijile’mba: “Kuji kintu kyatama kyo nataana mwi obewa, waleka butemwe bo wajinga nabo patanshi.” (Lum. 2:3, 4) Abino byambo bya kwa Yesu bibena kumwesha’mba mwina Kilishitu wakonsha kutendeka kwingijila Lesa na muleele. Uno mwina Kilishitu wakonsha kulombanga, kutanwa ku kupwila ne kwingila mwingilo wa kusapwila mu bukifulumuyatu. Inge kyaikala bino, ko kuba’mba butemwe kechi bo bubena kumulengela kwingijila Lesa ne. Mwakonsha kuba byepi inge mwayuka’mba mwaleka kutemwa Yehoba byonka byo mwamutemenwe patanshi?

10. Mwakonsha kulondela byepi Paulo byo atundaikile Timoti kuba? (1 Timoti 4:13, 15)

¹⁰ Mutumwa Paulo watundaikile Timoti ‘kulangulukishapo’ bulongo pa byo apopwela Yehoba ne kumwingijila na muchima yense. (Tangai 1 Timoti 4:13, 15.) Kwesakana na luno lujimuno, ne anweba langulukai pa mashinda akonsha kwimukwasha kutwajijila kwingijila Yehoba na “mukoyo.” (Loma 12:11) Nabiji kunengezha bulongo kupwila kukemukwashanga kutelekesha pa kupwila. Kimye kyo mubena kutanga Baibolo, mwakonsha kuya kwa bunke pa kuba’mba mulanguluke langulukenga bulongo pa byo mubena kutanga. Kuba bino kukemulengela kumwenamo bingi mu lufunjisho lwenu lwa pa bunke. Byonkatu byo mwakonsha kusonsela pa mujilo pa kuba’mba atwajijile kuteema, ne anweba inge mwibikako mu ino mbaji yo twaambapo, mukabaisha lusanchilo lwenu pa bimubila Yehoba kikatakata bukuzhi. Kabiji mu milungu ikanangijilanga ku Kivuluko, mwafwainwa kulanguluka languluka pa bintu byawama byo tumwenamo byo tuji Bakamonyi ba kwa Yehoba. Kwakubula nangwa kuzhinaukatu ne, kuba bino kukemulengela kunemeka bingi bukuzhi mambo bo bonkatu bwakonsha kwitulengela kwikala balunda ne Yehoba.

11-12. Inge pa bimye bimo kechi mwikala na kizaku ne, nanchi kino kibena kulumbulula’mba kechi muji na mupashi wa Lesa nenyi? Lumbululai. (Monai ne kipikichala.)

¹¹ Inge pa bimye bimo kechi mwikala na kizaku kya kwingijila Lesa ne, nanchi kino kibena kulumbulula amba kechi muji na mupashi wa Lesa nenyi? Akilangulukai pa byambo mutumwa Paulo byo anembejile bena Kolinda byaamba pa byo aingilanga mwingilo wa kusapwila. Waambile’mba: “Umvwe namwingila saka nabula kusaka, kyo kimotu bampa bukalama.” (1 Ko. 9:17) Watazhizhe mwepi?

¹² Paulo naye pa bimye bimo kechi waikalanga na kizaku kya kusapwila ne. Nangwa byonkabyo, watwajijile kusapwila nangwa kya kuba pa bimye bimo kechi waikalanga na kizaku ne. Ne anweba byo byo mwafwainwa kubanga. Twajijilai kuba byawama nangwa kya kuba kechi muji na kizaku ne. Lombainga Yehoba “kwimupa kizaku ne bulume bwa kwingila.” (Fili. 2:13) Twajijilai kuba bintu bikemukwasha kufwenya kwipi ne Yehoba. Inge mwauba bino, butemwe bo mwatemwa Yehoba bukakoselako kabiji kizaku kyenu kikabwela.

13. Twakonsha kuyuka byepi inge ‘tukiji monka mu lwitabilo?’

¹³ Pa kimye pa kimye, twafwainwa kulangulukanga pa biji bwikalo bwetu byonka byaamba 2 Kolinda 13:5 amba: “Iesekainga anwe bene pa kuba’mba muyuke kana mukiji monka mu lwitabilo nangwa ne; ipimainga anwe bene kuba’mba mwiyuke byo muji.” Pa kimye pa kimye, twafwainwa kwiipuzhanga mepuzho nabiji ano a kuba’mba: ‘Nanchi mbena kutangizhako bintu bya Bufumu mu bwikalo bwami nyi?’ (Mat. 6:33) ‘Nanchi byakisangajimbwe byo nsala bimwesha’mba nashikwa bintu byatama nyi?’ (Sala. 97:10) ‘Nanchi ntundaika mutende ne kukwatankana mu kipwilo nyi?’ (Efi. 4:2, 3) Kivuluko kitulengela kulanguluka bingi pa bukuzhi bwapaine Yehoba. Kabiji kitulengela kulanguluka pa biji bwikalo bwetu ne kwikela mwayila bikeba Kilishitu, kechi byo tukeba ne.

MIKOOKO YAFUMA MU JITANGA

14. Ñanyi bintu bimo bilengela bena Kilishitu bamo kufuma mu jitanga ja Lesa?

¹⁴ Bena Kilishitu bamo baleka kupwila nangwa kya kuba baingijila Yehoba pa bañondo bacheche nangwa pa myaka yavula mu bukishinka. Mambo ka? Bamo ke na mambo a “bijikila bya mu buno bwikalo.” (Luka 21:34) Bamo betuntwile na mambo a byambo byaambile nangwa byaubile mukwabo mwina Kilishitu. (Yako. 3:2) Bakwabo ke na mambo a kuba’mba balengele mambo akatampe kabiji baumvwine bumvu kulomba bukwasho. Ke na mambo a kyalengela ne, mwakonsha kuba byepi inge mwafuma mu jitanga? Lunengezho lwa bukuzhi lwafwainwa kwimulengela kuba ka?

15. Yehoba umwesha byepi amba wata muchima mikooko yafuma mu jitanga janji? (Ezikyo 34:11, 12, 16)

¹⁵ Langulukainga pe Yehoba byo amona bantu bafuma mu jitanga. Yehoba kechi wibazhingijila ne kwibalubako ne. Pakuba utwajijila kukeba mikooko yaeleka. Wiijisha ne kwiikwasha kubwela kwi aye. (Tangai Ezikyo 34:11, 12, 16.) Nanchi Yehoba byo byo abena kuba ne kwi anweba nyi? Ee. Byo kiji kuba’mba mubena kufunda uno mutwe, kibena kumweshatu patoka kuba’mba mubena kukebesha kutookesha Yehoba ku muchima. Yehoba byo amwene bintu byawama biji mu muchima wenu, wimukookejile mu bukine. Ne luno ubena kwimukoka kuba’mba mubwele.

16. Ñanyi bintu byakonsha kukwasha mikooko yaeleka kubwela kwi Yehoba? (Monai ne kipikichala.)

¹⁶ Mu buloshuwa wa kuba’mba Bwelai kwi Yehoba muji byambo byakonsha kwimutundaika bingi bya kuba’mba: “Yukai’mba Yehoba ukemukwasha inge mwabwela kwi aye. Ukemukwasha kuyuka mwa kubila na bijikila, kukana milanguluko yatama ne kwimukwasha kwikala na jiwi ja mu muchima jawama jikemulengela kwikala na milanguluko yawama ne mutende. Kino kikemulengela kutendeka kwingijila Yehoba jibiji pamo na bakwenu bena Kilishitu.” Kabiji vulukainga’mba bakulumpe mu kipwilo nabo bakebesha kwimukwasha. Bakekala nobe “kya kufyamamo pa kwiya kipupu, bakekala nobe mpunzha ya kufyamamo pa kwiya mvula wa kinkunkwila.” (Isa. 32:2) Kusanta pa bukuzhi kwafwainwa kwimulengela kwiipuzha amba, ‘Ñanyi bintu byo nafwainwa kuba pa kuba’mba ngikale na bulunda bwawama ne Yehoba jikwabo?’ (Isa. 1:18; 1 Pe. 2:25) Nanchi mwakonsha kuya na kutanwa ku kupwila ku Nzubo ya Bufumu nyi? Nanchi mwakonsha kusolomoka bakulumpe mu kipwilo pa kuba’mba bemukwashe kwikala na bulunda bwawama ne Lesa, mwakonsha ne kuvwangwa kutendeka kwimufunjisha Baibolo jikwabo nyi? Shiinwai’mba Yehoba ukemukwasha byo mubena kwibikako kumwesha kuba’mba musanta pa byo apaine Mwananji kwikala bukuzhi.

MUSAKUBAPO KA?

17-18. Twakonsha kwingijisha byepi bulongo kimye mu moba a kunangijila ku Kivuluko?

¹⁷ Yesu waambile’mba bukuzhi bwapainwe “kuba’mba bonse bamwitabila kechi bakonaike ne, poso bakekale na bumi bwa myaka ne myaka.” (Yoa. 3:16) Bukuzhi bo bwalengela kuba’mba Yehoba etupokolole ku bungengamambo ne lufu. Atweba bonse twafwainwa kwibunemeka bingi. (Loma 3:23, 24; 2 Ko. 6:1) Moba a kunangijila ku Kivuluko ekala kimye kyawama bingi atweba bonse kyo twafwainwa kulangulukanga pa butemwe bwitumwesha Yehoba ne Yesu, kabiji buno butemwe bwafwainwa kwitulengelanga kuba bintu bimwesha’mba tusanta.

¹⁸ Ñanyi bintu byo mwafwainwa kuba bikamwesha’mba musanta pa bukuzhi? Mukumbu wenu ku buno bwipuzho wakonsha kupusanako na wa bakwenu. Nangwa byonkabyo, mwafwainwa kushiinwa’mba Yehoba ukemukwasha kukwatankena pamo na bapopweshi bakwenu mwaya ntanda yonse ‘babula kwikela mwayila bikeba michima yabo, kana kwikela mwayila bikeba yewa wibafwijile.’​—2 Ko. 5:15.