Ɛsta
3 Afta dat Kiŋ Aazuirɔs promot Eman, we na Amɛdeta di Agagayt in bɔypikin, ɛn i es am ɔp bay we i gi am ay pozishɔn pas ɔl di ɔda prins dɛn we de wit am. 2 Ɛn ɔl di kiŋ in savant dɛn we bin de na di kiŋ in get bin de butu ɛn ledɔm flat na grɔn bifo Eman, bikɔs na dis di kiŋ bin dɔn se dɛn fɔ du to am. Bɔt Mɔdikay nɔ gri fɔ butu ɔ ledɔm flat na grɔn bifo am. 3 So di kiŋ in savant dɛn we bin de na di kiŋ in get aks Mɔdikay se: “Wetin mek yu nɔ de obe di kiŋ in lɔ?” 4 Ɛnide dɛn bin de aks am, bɔt i nɔ bin de lisin to dɛn. Dɔn dɛn tɛl Eman fɔ si if i go alaw Mɔdikay fɔ kɔntinyu fɔ biev da we de; bikɔs Mɔdikay bin dɔn tɛl dɛn se in na Ju.
5 We Eman si se Mɔdikay nɔ gri fɔ butu bifo am ɛn ledɔm flat na grɔn, i vɛks bad bad wan. 6 Bɔt i si am se i nɔ du fɔ kil Mɔdikay in wangren, bikɔs dɛn bin dɔn tɛl am bɔt Mɔdikay in pipul dɛn. So Eman bigin fɔ fɛn we fɔ kil* ɔl di Ju dɛn we de na ɔl di say dɛn we Kiŋ Aazuirɔs de rul, dat na, ɔl Mɔdikay in pipul dɛn.
7 Insay di fɔs mɔnt, dat na, Naysan,* insay di ia we mek 12 we Kiŋ Aazuirɔs de rul, dɛn mek Pɔ (we min, dɛn balɔt) bifo Eman fɔ no di de ɛn di mɔnt, ɛn i fɔdɔm pan di mɔnt we mek 12, dat na, Eda.* 8 Dɔn Eman tɛl Kiŋ Aazuirɔs se: “Sɔm pipul dɛn de we skata amɔng di pipul dɛn ɛn we de na ɔl di prɔvins dɛn we yu de rul, bɔt dɛn lɔ dɛn difrɛn frɔm ɔl di ɔda pipul dɛn; ɛn dɛn nɔ de obe di kiŋ in lɔ dɛn, ɛn i nɔ go fayn fɔ lɛ di kiŋ lɛf dɛn so. 9 If i ɔrayt wit di kiŋ, lɛ dɛn rayt lɛta fɔ se dɛn fɔ kil di Ju dɛn. A go pe 10,000 silva talɛnt* to di ɔfisa dɛn fɔ mek dɛn put am na di say we dɛn de kip di kiŋ in valyu tin dɛn.”*
10 Na de di kiŋ pul in riŋ we i de yuz fɔ stamp na in an ɛn gi am to Eman, we na Amɛdeta di Agagayt in bɔypikin, we na bin di Ju dɛn ɛnimi. 11 Di kiŋ tɛl Eman se: “A dɔn gi yu di silva ɛn di pipul dɛn, du wetin yu want wit dɛn.” 12 I kɔl di kiŋ in sɛktri dɛn di de we mek 13 insay di fɔs mɔnt. Dɛn rayt ɔl Eman in ɔda dɛn to di kiŋ in setrap* dɛn, di gɔvnɔ dɛn we de oba di prɔvins dɛn, ɛn di prins dɛn fɔ di difrɛn pipul dɛn. Dɛn rayt di lɛta to ɔl di prɔvins dɛn akɔdin to aw dɛn de rayt na da prɔvins de ɛn dɛn rayt to ɔl di pipul dɛn insay dɛn yon langwej. Dɛn put am de se na Kiŋ Aazuirɔs rayt di lɛta ɛn dɛn stamp am wit di riŋ we di kiŋ de yuz fɔ stamp.
13 Dɛn sɛn mɛsenja dɛn fɔ kɛr go di lɛta dɛn na ɔl di kiŋ in prɔvins dɛn. Di lɛta gi di ɔda fɔ kil, wep, ɛn dɔnawe wit ɔl di Ju dɛn, yɔŋ wan dɛn, ol wan dɛn, pikin dɛn ɛn uman dɛn, insay wangren de, di de we mek 13 insay di mɔnt we mek 12, dat na, di mɔnt we nem Eda, ɛn dɛn fɔ siz dɛn prɔpati dɛn. 14 Di tin dɛn we rayt na di lɛta fɔ bi lɔ na ɛni prɔvins, ɛn dɛn fɔ anawns am to ɔl di pipul dɛn, so dat dɛn go rɛdi fɔ da de de. 15 Di mɛsenja dɛn go kwik kwik wan jɔs lɛk aw di kiŋ tɛl dɛn fɔ du; dɛn mek di lɔ na di pales* na Shushan.* Dɔn di kiŋ ɛn Eman sidɔm fɔ drink, bɔt di pipul dɛn na di siti na Shushan* bin kɔnfyuz.