Ɛsta
7 So di kiŋ ɛn Eman kam fɔ it di fud we Kwin Ɛsta dɔn mek. 2 Di sɛkɔn de we dɛn bin de drink wayn, di kiŋ aks Ɛsta bak se: “Wetin yu want fɔ aks fɔ, Kwin Ɛsta? Tɛl mi, a go du am fɔ yu. Wetin yu want? Ivin if na af pat pan mi kiŋdɔm yu want, a go gi yu!” 3 Kwin Ɛsta ansa se: “E kiŋ, if yu gladi fɔ mi, ɛn if i ɔrayt wit di kiŋ, di tin we a want aks fɔ na fɔ lɛ yu sev mi layf,* ɛn di tin we a want na fɔ lɛ yu sev mi pipul dɛn layf.* 4 Dɛn dɔn sɛl mi ɛn mi pipul dɛn fɔ lɛ dɛn kil wi, dɔnawe wit wi, ɛn wep wi ɔl. If na sɛl nɔmɔ dɛn bin sɛl wi as man ɛn uman slev dɛn, a nɔ fɔ dɔn tɔk natin. Bɔt i nɔ go fayn fɔ lɛ dis kayn prɔblɛm apin, bikɔs i go afɛkt di kiŋ bad bad wan.”
5 Kiŋ Aazuirɔs aks Kwin Ɛsta se: “Udat dande? We di pɔsin we gɛt di maynd fɔ du da kayn tin de?” 6 Ɛsta se: “Di ɛnimi ɛn di wan we et wi na dis wikɛd Eman.”
Na de Eman fred bad bad wan bikɔs ɔf di kiŋ ɛn di kwin. 7 Na de di kiŋ vɛks bad bad wan ɛn grap na di say we dɛn bin de drink wayn ɛn go na di gadin we de na di pales, bɔt Eman tinap fɔ beg Kwin Ɛsta fɔ in layf,* bikɔs i bin no se di kiŋ dɔn mek-ɔp in maynd fɔ pɔnish am. 8 Di kiŋ kɔmɔt na di gadin we de na di pales ɛn kam bak na di say we dɛn bin de drink wayn ɛn si Eman dɔn fɔdɔm na di chia we Ɛsta de. Di kiŋ aks se: “I want fɔ rep di kwin na mi yon os?” As di kiŋ tɔk dɛn wɔd dɛn de, nain dɛn kɔba Eman in fes. 9 Abona, we na wan pan di kiŋ in savant dɛn we gɛt ay pozishɔn na di pales, tɔk se: “Eman dɔn mek tik fɔ Mɔdikay, di man we in ripɔt sev di kiŋ. Di tik tinap na Eman in os, in ayt na 50 kyubit.”* Na de di kiŋ tɔk se: “Una ɛng am de.” 10 So dɛn ɛng Eman pan di tik we i bin dɔn rɛdi fɔ Mɔdikay, ɛn di kiŋ in at kol.