Job
15 Na de Ɛlifaz di Timanayt tɔk se:
2 “Yu tink se pɔsin we gɛt sɛns go ansa pɔsin wit tɔk dɛn we nɔ mek sɛns,
Ɔ i go ful-ɔp in bɛlɛ wit di briz we de kɔmɔt na di ist?
3 Fɔ kɔrɛkt pɔsin wit wɔd dɛn nɔmɔ nɔ gɛt ɛni yus,
Ɛn fɔ tɔk nɔmɔ nɔ gɛt no bɛnifit.
4 Yu de mek ɔda pipul dɛn nɔ fred Gɔd igen,
Ɛn yu de mek dɛn nɔ de tink bɔt Gɔd igen.
5 Yu mistek de sho wetin yu de se,*
Ɛn yu dɔn disayd fɔ tɔk kɔni kɔni tɔk dɛn.
6 Na yu yon mɔt kɔndɛm yu, nɔto mi;
Na yu yon mɔt tɔk agens yu.
7 Fɔ se na yu na di fɔs pɔsin we dɛn ɛva bɔn,
Ɔ dɛn bɔn yu bifo di il dɛn?
8 Yu de lisin to di sikrit tɔk we Gɔd de tɔk,
Ɔ na yu nɔmɔ gɛt sɛns?
9 Wetin yu sabi we wi nɔ no?
Wetin yu ɔndastand we wi nɔ ɔndastand?
10 Pipul dɛn we gɛt wet ia ɛn di wan dɛn we dɔn ol de wit wi,
Dɛn ol pas yu papa fa fawe.
11 Fɔ se di kɔrej we Gɔd de kɔrej yu,
Ɔ di wɔd dɛn we i de tɔk saful wan to yu nɔ du fɔ yu?
12 Wetin mek yu de alaw yu at fɔ kɔntrol yu,
Ɛn wetin mek yu yay de sho se yu vɛks?
13 Yu dɔn vɛks pan Gɔd,
Ɛn yu dɔn alaw dɛn kayn wɔd dɛn de fɔ kɔmɔt na yu mɔt.
14 Udat na mɔtalman we i fɔ klin,
Ɔ we i fɔ de du wetin rayt?
15 Luk! I nɔ gɛt fet pan in oli wan dɛn,
Ɛn ivin di ɛvin nɔ klin na in yay.
16 Wetin wi go se naw bɔt pɔsin we dɔti ɛn kɔrɔpt,
Pɔsin we de drink tin we nɔ rayt jɔs lɛk wata!
17 Lisin to mi! A go tich yu!
A go tɛl yu wetin a dɔn si,
18 A go tɛl yu wetin pipul dɛn we gɛt sɛns dɔn tɔk,
Tin dɛn we dɛn dɔn lan frɔm dɛn papa dɛn ɛn we dɛn nɔ ayd.
19 Na dɛn nɔmɔ dɛn gi di land,
Ɛn no strenja nɔ pas de.
20 Wikɛd pɔsin de sɔfa te i day,
Ɛn i de si trɔbul ɔl di tɛm dɛn we i de alayv.
21 I de yɛri sawnd dɛn we de mek i fred;
Di tɛm we pis de, gɛng dɛn we de red kin atak am.
22 I nɔ biliv se i go ɛskep frɔm daknɛs;
Dɛn dɔn kip am fɔ kil am wit sɔd.
23 I de pas pas de fɛn tin fɔ it.* I de aks se: ‘Usay i de?’
I no gud gud wan se daknɛs nɔ de fa igen.
24 Pwɛlat ɛn pen de mek i fred;
Dɛn de kam pan am lɛk kiŋ we rɛdi fɔ atak.
25 I de es in an agens Gɔd,
Ɛn i de tray fɔ chalenj di Ɔlmayti.
26 I de tawa fɔ go agens Am,
Wit in tik strɔng shild.
27 In fes fat,*
Ɛn in bɛlɛ big.
28 I de na siti dɛn we dɛn gɛt fɔ dɔnawe wit,
Na os dɛn usay nɔbɔdi nɔ de,
We tan lɛk say usay ston dɛn pak.
29 I nɔ go gɛt mɔni, ɛn i nɔ go gɛda jɛntri,
In prɔpati dɛn nɔ go de ɔlsay na di land.
31 I nɔ fɔ go di rɔng we ɛn abop pan wetin nɔ gɛt valyu,
Bikɔs wetin i go gɛt nɔ go gɛt valyu.
32 I go apin di tɛm we i de alayv,
Ɛn in branch dɛn nɔ go ɛva frɛsh.
33 I go tan lɛk vayn we in grep dɛn we nɔ rɛp yet dɔn fɔdɔm,
Ɛn lɛk ɔliv tik we in flawa dɛn we jɔs bɔs dɔn fɔdɔm.
34 Bɛtɛ nɔ de kɔmɔt na di say usay pipul dɛn we nɔ de fred Gɔd* de,
Ɛn faya go bɔn di tɛnt usay dɛn de tek brayb.
35 Dɛn de plan bad tin na dɛn at ɛn dat de mek dɛn du wikɛd tin dɛn.
Dɛn de plan bad bad tin dɛn na dɛn maynd ɔltɛm.”