Sam
To di wan we de dayrɛkt; Jedutɔn.* David in siŋ.
39 A tɔk se: “A go tek tɛm wit wetin a de du
So dat a nɔ go sin wit mi mɔt. A go kɔba mi mɔt
As lɔng as a de usay wikɛd pɔsin de.”
2 A nɔ bin ebul fɔ tɔk, ɛn a sɛt mi mɔt;
A kɔntinyu fɔ sɛt mi mɔt ivin fɔ tin we gud,
Bɔt mi pen bin wɔs.
3 Mi at de bɔn insay mi.
As a de tink gud gud wan, di faya kɔntinyu fɔ bɔn.
Na de a tɔk se:
4 “E Jiova, ɛp mi fɔ no wetin go bi mi ɛnd,
Ɛn aw lɔng a go liv fɔ,
So dat a go no aw mi layf shɔt.
5 Fɔ tru, yu dɔn mek mi layf shɔt;
Ɛn mi layf nɔ min natin to yu.
Fɔ tru, pan ɔl we i go tan lɛk se ɔltin fayn fɔ mɔtalman, in na ɛmti bloblo. (Sila)
6 Fɔ tru, ɔl mɔtalman de waka lɛk shado.
I de yagba fɔ natin.
I de gɛda jɛntri, i nɔ ivin no udat go ɛnjɔy am.
7 E Jiova, us op a gɛt?
Na yu nɔmɔ a abop pan.
8 Sev mi frɔm ɔl mi sin dɛn.
Nɔ mek lɛ di fulish wan et mi.
9 A kɔntinyu fɔ sɛt mi mɔt;
A nɔ opin mi mɔt,
Bikɔs na yu dɔn kɔz ɔl dis.
10 Pul dis prɔblɛm pan mi.
A dɔn taya bikɔs yu de pɔnish mi.
11 Yu de kɔrɛkt pɔsin wit pɔnishmɛnt fɔ in mistek;
Yu de it di tin dɛn we valyu to am jɔs lɛk aw mɔt flay* de du.
Fɔ tru, ɔl mɔtalman na ɛmti bloblo. (Sila)
12 E Jiova, lisin to mi prea,
Lisin to di kray we a de kray fɔ ɛp.
Nɔ mek lɛk se yu nɔ de si mi kray wata.
Bikɔs mi na fɔrina to yu,
A fiba pɔsin we de travul jɔs lɛk ɔl mi gret gret granpa dɛn.
13 Nɔ wach mi wit wamat so dat a go gladi
Bifo a day go, ɛn a nɔ de igen.”