Sam
To di wan we de dayrɛkt; di myuzik we nem “Nɔ Dɔnawe wit Mi.” Devid in siŋ. Miktam.* Di tɛm we i bin de rɔnawe pan Sɔl ɛn go insay wan kev.
57 Sɔri fɔ mi, E Gɔd, sɔri fɔ mi,
Bikɔs na to yu a de ayd,
Ɛn a de ayd na di shado we yu wiŋ dɛn de mek te di trɔbul dɛn pas.
2 A de kɔl Gɔd We De Pantap Ɔlman,
Di tru Gɔd, we de mek di trɔbul dɛn dɔn fɔ mi.
3 Gɔd we de na ɛvin go ɛp mi ɛn sev mi.
I go mek di wan we de atak* mi in plan nɔ wok. (Sila)
Gɔd go sho se i gɛt lɔv we nɔ de chenj ɛn i fetful.
4 Layɔn dɛn de arawnd mi;
Ivin we a ledɔm, pipul dɛn de arawnd mi
We tan lɛk animal dɛn we de it mɔtalman.
Dɛn tit dɛn na spia dɛn ɛn aro dɛn
Ɛn dɛn tɔŋ na shap sɔd.
5 E Gɔd, lɛ yu de pantap ɛvin;
Lɛ yu glori de ɔlsay na di wɔl.
6 Dɛn dɔn rɛdi nɛt fɔ kech mi;
A butu bikɔs mi at pwɛl.
Dɛn dɔn dig ol bifo mi,
Bɔt na dɛnsɛf sɛf fɔdɔm insay de. (Sila)
7 E Gɔd, a go fetful to yu.
A go fetful to yu.
A go siŋ ɛn mek myuzik.
8 A go wek.*
E myuzik instrumɛnt we gɛt string, na fɔ wek. E ap, yusɛf wek.
A go wek ali mɔnin.
9 E Jiova, a go prez yu usay pipul dɛn de,
Ɛn a go siŋ fɔ prez* yu na di neshɔn dɛn.
10 Di we aw yu de sho lɔv we nɔ de chenj so bɔku dat i rich ɔp na ɛvin,
Ɛn di we aw yu fetful de rich ɔp di skay.
11 E Gɔd, lɛ yu de pantap ɛvin;
Lɛ yu glori de ɔlsay na di wɔl.