Daniɛl

9 Na bin di fɔs ia fɔ Darayɔs, we na Aazuirɔs in bɔypikin we kɔmɔt frɔm di Mid dɛn ɛn we dɛn bin dɔn mek kiŋ na di Kaldian dɛn kiŋdɔm. 2 Insay di fɔs ia we i de rul, di buk* dɛn ɛp mi, Daniɛl, fɔ ɔndastand ɔmɔs ia Jiova bin dɔn tɛl prɔfɛt Jɛrimaya se Jerusɛlɛm go de in pwɛl wan, dat na, fɔ 70 ia. 3 So a tɔn* to Jiova di tru Gɔd, a bin de beg am we a de pre to am, a bin de fast ɛn wɛr klos we pipul dɛn kin wɛr we dɛn at pwɛl ɛn rɔb ashis pan misɛf. 4 A pre to Jiova mi Gɔd ɛn kɔnfɛs to am. A tɛl am se:

“E Jiova di tru Gɔd, di Wan we gret, di Wan we fit fɔ lɛ pipul dɛn fred ɛn rɛspɛkt am, we de kip to in agrimɛnt, we de sho lɔv to di wan dɛn we lɛk am ɛn we de obe in lɔ dɛn, ɛn we nɔ de kɔmɔt biɛn dɛn, 5 wi dɔn sin, wi dɔn du rɔng, wi dɔn du wikɛd tin dɛn ɛn wi dɔn tɔn wi bak pan yu; ɛn wi dɔn lɛf fɔ fala yu kɔmandmɛnt dɛn ɛn yu lɔ dɛn. 6 Wi nɔ lisin we yu savant dɛn, we na di prɔfɛt dɛn, bin de tɔk wetin yu tɛl dɛn fɔ tɛl wi kiŋ dɛn, wi prins dɛn, wi gret gret granpa dɛn, ɛn ɔl di pipul dɛn na di land. 7 E Jiova, yu de du wetin rayt, bɔt de lɛk tide, na wi dɔn shem, wi ɔl, di wan dɛn na Juda, di wan dɛn we de na Jerusɛlɛm, ɔlman na Izrɛl, di wan dɛn we de nia ɛn di wan dɛn we de fa, di wan dɛn we de na ɔl di land dɛn usay yu skata dɛn bikɔs dɛn nɔ fetful to yu.

8 “E Jiova, na wi dɔn shem, wi kiŋ dɛn, wi prins dɛn, ɛn wi gret gret granpa dɛn, bikɔs wi dɔn sin na yu yay. 9 Jiova wi Gɔd, yu de sho sɔri-at ɛn yu de fɔgiv, na wi dɔn tɔn wi bak pan yu. 10 Wi nɔ obe wetin Jiova wi Gɔd tɛl wi bay we wi nɔ fala in lɔ dɛn we i yuz in savant dɛn we na di prɔfɛt dɛn fɔ tɛl wi. 11 Ɔlman na Izrɛl dɔn brok yu Lɔ ɛn tɔn dɛn bak pan yu bay we dɛn nɔ de obe yu, ɛn dis dɔn mek yu dɔn briŋ pan wi di siriɔs swɛ we rayt na di Lɔ we yu gi Mozis we na yu savant, bikɔs wi dɔn sin na yu yay. 12 I dɔn du wetin i bin dɔn tɔk se i go du to wi ɛn wi rula dɛn we bin de rul wi,* bay we i mek big big trɔbul dɔn kam pan wi; di kayn tin we dɛn du na Jerusɛlɛm nɔ ɛva apin yet na di wan ol wɔl. 13 Ɔl dis trɔbul dɔn kam pan wi jɔs lɛk aw i rayt na di Lɔ we Gɔd Gi Mozis, bɔt wi nɔ beg wi Gɔd Jiova fɔ sɔri fɔ wi bay we wi de lɛf di bad tin dɛn we wi de du ɛn bay we wi de sho se wi ɔndastand wetin tru na yu yay.

14 “So Jiova kɔntinyu fɔ wach ɛn i kam wit trɔbul pan wi, bikɔs wi Gɔd Jiova de du wetin rayt pan ɔl di tin dɛn we i dɔn du; bɔt stil wi nɔ obe am.

15 “E Jiova wi Gɔd, di Wan we dɔn pul in pipul dɛn na Ijipt wit in pawaful an ɛn mek nem fɔ insɛf te to dis de, wi dɔn sin ɛn wi dɔn du wikɛd tin dɛn. 16 E Jiova, yu we dɔn de du wetin rayt, duya, nɔ kɔntinyu fɔ pul yu wamat ɛn vɛksteshɔn pan yu siti Jerusɛlɛm, we na yu oli mawntin; bikɔs wi sin dɛn ɛn di mistek dɛn we wi gret gret granpa dɛn bin de du, dɔn mek Jerusɛlɛm ɛn yu pipul dɛn dɔn bi disgres to ɔl di wan dɛn we de rawnd wi. 17 E wi Gɔd, lisin to yu savant in prea ɛn to di beg we i de beg yu, ɛn du gud tin dɛn fɔ yu oli ples we dɔn pwɛl, fɔ yu yon sek, E Jiova. 18 E mi Gɔd, pe atɛnshɔn ɛn lisin! Duya opin yu yay ɛn si di bad we aw wi ɛn di siti we yu nem de pan de; wi nɔ de beg yu bikɔs wi de du wetin rayt bɔt na bikɔs yu rili gɛt sɔri-at. 19 E Jiova, duya lisin. E Jiova, duya fɔgiv. E Jiova, duya pe atɛnshɔn ɛn du sɔntin! E mi Gɔd, nɔ dile, fɔ yu yon sek, bikɔs yu nem de pan yu siti ɛn pan yu pipul dɛn.”

20 We a bin stil de tɔk, pre, ɛn kɔnfɛs mi sin ɛn mi pipul dɛn na Izrɛl dɛn sin ɛn de beg mi Gɔd Jiova fɔ in oli mawntin, 21 da sem tɛm de we a bin stil de pre, Gebrɛl, we a bin dɔn si insay di vishɔn, kam to mi we a bin rili taya arawnd di tɛm we dɛn bin de mek di ivintɛm gift ɔfrin, 22 ɛn i mek a ɔndastand. I tɛl mi se:

“E Daniɛl, a dɔn kam fɔ ɛp yu fɔ tink gud wan ɛn fɔ ɔndastand. 23 We yu bigin fɔ beg, dɛn gi mi mɛsej, ɛn a dɔn kam fɔ tɛl yu, bikɔs yu na pɔsin we rili gɛt valyu. So tink bɔt dis ɛn ɔndastand di vishɔn.

24 “Na 70 wiks* dɛn dɔn disayd fɔ yu pipul dɛn ɛn yu oli siti, fɔ mek dɛn nɔ brok Gɔd in lɔ igen, fɔ pul sin kɔmɔt, fɔ fɔgiv di bad tin we dɛn de du, fɔ mek dɛn du wetin rayt sote go, fɔ kɔnfam di vishɔn ɛn di prɔfɛsi,* ɛn fɔ anɔynt di Say we Oli Pas Ɔl. 25 Yu fɔ no ɛn ɔndastand se frɔm di tɛm we dɛn gi wɔd se dɛn fɔ bil Jerusɛlɛm bak ɛn mek am lɛk aw i bin de te di Mɛsaya* we na di Lida kam, i go tek 7 wiks, dɔn 62 wiks. Dɛn go bil am bak ɛn mek am lɛk aw i bin de, wit pɔblik ples* ɛn gɔta, bɔt i go apin di tɛm we prɔblɛm de.

26 “Ɛn afta di 62 wiks, dɛn go kil di Mɛsaya ɛn i nɔ go gɛt natin fɔ insɛf.

“Ɛn wan lida go kam wit in ami ɛn dɛn go dɔnawe wit di siti ɛn di oli ples. Ɛn na bay flɔd i go ɛnd. Ɛn wɔ go de te di ɛnd; ɛn Gɔd dɔn disayd se dɛn go pwɛl.

27 Ɛn i go kip di agrimɛnt fɔ bɔku pipul dɛn fɔ wan wik; ɛn we di wik go midul, i go mek sakrifays ɛn gift ɔfrin stɔp.

“Di wan we de pwɛl go sidɔm pan dɔti dɔti tin dɛn wiŋ we i de kam; di tin we Gɔd dɔn disayd go apin to di wan we dɔn pwɛl, te dɛn dɔnawe wit am.”