Joɛl
3 “Da tɛm de,
We a briŋ bak di wan dɛn we dɛn dɔn kapchɔ na Juda ɛn Jerusɛlɛm,
2 A go gɛda ɔl di neshɔn dɛn bak
Ɛn a go jɔj dɛn de
Bikɔs ɔf mi pipul dɛn ɛn Izrɛl we na mi yon,
Fɔ we dɛn skata dɛn na ɔda neshɔn dɛn ɛn sheb mi land to dɛnsɛf.
3 Dɛn de balɔt fɔ mi pipul dɛn;
Dɛn de sɛl wan bɔbɔ fɔ gɛt wan raregal,
Ɛn dɛn de sɛl wan titi fɔ gɛt wayn fɔ drink.
4 E Taya, Saydɔn, ɛn ɔl di eria dɛn na Filistia,
Wetin una gɛt agens mi?
A du bad to una we mek una de tɔn-dɛt?
If una want fɔ tɔn-am-gi mi,
A go pe una bak fɔ ɔl wetin una dɔn du,
Ɛn a go du am kwik kwik wan.
5 Bikɔs una dɔn tek mi silva ɛn mi gold,
Ɛn una dɔn kɛr mi valyu tin dɛn we fayn pas ɔl na una tɛmpul dɛn;
6 Ɛn una dɔn sɛl di pipul dɛn na Juda ɛn Jerusɛlɛm to di Grik dɛn,
So dat una go pul dɛn kɔmɔt usay dɛn de ɛn kɛr dɛn go fa;
7 A go mek dɛn lɛf di ples usay una sɛl dɛn ɛn kam bak,
Ɛn a go pe una fɔ wetin una dɔn du.
8 A go sɛl una bɔypikin dɛn ɛn galpikin dɛn to di pipul dɛn na Juda,
Ɛn dɛn go sɛl dɛn to di man dɛn na Shiba,
We na wan neshɔn we de fa fa say;
Na mi Jiova dɔn tɔk am.
9 Anawns dis to di neshɔn dɛn:
‘Una rɛdi fɔ wɔ! Kɔl di trɛnkman dɛn!
Lɛ ɔl di sojaman dɛn go atak!
10 Una nak nak una plawshia* dɛn ɛn tɔn dɛn to sɔd dɛn,
Ɛn una nak nak di gadin nɛf dɛn mek dɛn tɔn to spia dɛn.
Ɛn lɛ di wan we wik tɔk se: “Mi a pawaful.”
11 Una dɛn neshɔn dɛn we de arawnd,
Una ɔl gɛda togɛda ɛn kam ɛp!’”
E Jiova, kam wit yu pawaful wan* dɛn na da ples de.
12 “Lɛ di neshɔn dɛn kam togɛda ɛn kam na Jɛoshafat in Vali;*
Bikɔs na de a go sidɔm fɔ jɔj ɔl di neshɔn dɛn we de arawnd.
13 Yuz sikul,* bikɔs di tin dɛn dɔn du fɔ avɛst.
Kam dɔŋ ɛn mas mas di greps,
Bikɔs di say we dɛn de mek wayn dɔn ful-ɔp wit greps.
Di say we di wayn de go dɔn ful-ɔp te i de trowe,
Bikɔs di bad tin we dɛn de du dɔn bɔku.
14 Big big krawd de na di vali* usay dɛn de disayd,
Bikɔs Jiova in de dɔn nia na di vali* usay dɛn de disayd.
15 Di san ɛn di mun go dak,
Ɛn di sta dɛn nɔ go shayn igen.
16 Jiova go ala na Zayɔn lawd wan lɛk layɔn;
I go ala lawd wan na Jerusɛlɛm.
Ɛn ɛvin ɛn di wɔl go shek;
Bɔt Jiova go protɛkt in pipul dɛn,
Ɛn i go bi ples fɔ ayd fɔ in pipul dɛn na Izrɛl.
17 Ɛn una go no se mi na Jiova una Gɔd,
We de na Zayɔn, we na mi oli mawntin.
Jerusɛlɛm go bi ples we oli,
Ɛn strenja* dɛn nɔ go pas insay de igen.
18 Da de de swit wayn go rɔndɔŋ na di mawntin dɛn,
Milk go rɔndɔŋ na di il dɛn,
Ɛn ɔl di watasay dɛn na Juda go gɛt wata.
Spriŋ wata* go kɔmɔt insay Jiova in os,
Ɛn i go wata di vali usay di akeshia stik dɛn de.
19 Bɔt pipul dɛn nɔ go de na Ijipt igen,
Ɛn Idɔm go bi wildanɛs* we pipul dɛn nɔ de,
Bikɔs ɔf di bad tin dɛn we una du to di pipul dɛn na Juda,
Usay una kil inosɛnt pipul dɛn.
20 Bɔt pipul dɛn go de ɔltɛm na Juda,
Ɛn jɛnɛreshɔn afta jɛnɛreshɔn go de na Jerusɛlɛm.
21 A go fɔgiv dɛn fɔ di bad tin dɛn we dɛn dɔn du,*
Ɛn Jiova go de na Zayɔn.”