Emɔs

“Jiova go ala na Zayɔn lawd wan lɛk layɔn,

I go ala lawd wan na Jerusɛlɛm.

Di gras dɛn we di shɛpad dɛn de yuz fɔ fid dɛn animal dɛn go wida,

Ɛn pantap Mawnt Kamɛl go dray.”

 3 Dis na wetin Jiova se,

‘“Bikɔs Damaskɔs dɔn sin igen ɛn igen,* a nɔ go chenj wetin a dɔn disayd,

Bikɔs dɛn dɔnawe wit Giliad lɛk we dɛn de yuz ayɛn tul fɔ pul sid pan plant.

 4 So a go sɛn faya insay Azaɛl in os,

Ɛn i go bɔn Bɛnedad in strɔng tawa dɛn.”’

 5 “Jiova se, ‘A go brok di ba dɛn na Damaskɔs;

A go dɔnawe wit di pipul dɛn na Bikat-evɛn

Ɛn di wan we de rul* na Bɛt-idɛn;

Dɛn go kapchɔ di pipul dɛn na Siria ɛn kɛr dɛn go na Kia.”’

 6 Dis na wetin Jiova se,

‘“Bikɔs Gaza dɔn sin igen ɛn igen,* a nɔ go chenj wetin a dɔn disayd,

Bikɔs dɛn an ova to Idɔm bɔku pipul dɛn we dɛn bin kapchɔ.

 7 So a go sɛn faya pan Gaza in wɔl,

Ɛn i go bɔn in strɔng tawa dɛn.

 8 A go dɔnawe wit di wan dɛn we de na Ashdɔd,

Ɛn di wan we de rul* na Ashkɛlɔn;

A go pɔnish Ɛkrɔn,

Ɛn di wan dɛn we lɛf pan di Filistin dɛn go day.’” Na dat Jiova we na di Masta We De Rul Ɔlman se.

 9 Dis na wetin Jiova se,

‘Bikɔs Taya dɔn sin igen ɛn igen,* a nɔ go chenj wetin a dɔn disayd,

Bikɔs dɛn an ova to Idɔm bɔku pipul dɛn we dɛn bin kapchɔ,

Ɛn bikɔs dɛn nɔ mɛmba di agrimɛnt we de bitwin brɔda dɛn.

10 So a go sɛn faya pan Taya in wɔl,

Ɛn i go bɔn in strɔng tawa dɛn.’

11 Dis na wetin Jiova se,

‘Bikɔs Idɔm dɔn sin igen ɛn igen,* a nɔ go chenj wetin a dɔn disayd,

Bikɔs i rɔnafta in yon brɔda wit sɔd,

Ɛn bikɔs i nɔ gri fɔ sho sɔri-at.

Pan in wamat, i kɔntinyu fɔ chɛr chɛr dɛn,

Ɛn i kɔntinyu fɔ vɛks pan dɛn bad bad wan.

12 So a go sɛn faya pan Timan,

Ɛn i go bɔn di strɔng tawa dɛn na Bɔzra.’

13 Dis na wetin Jiova se,

‘“Bikɔs di Amɔnayt dɛn dɔn sin igen ɛn igen,* a nɔ go chenj wetin a dɔn disayd,

Bikɔs dɛn de opin di bɛlɛ-uman dɛn na Giliad dɛn bɛlɛ, fɔ mek dɛn gɛt mɔ land.

14 So a go sɛt faya pan Raba in wɔl,

Ɛn i go bɔn in strɔng tawa dɛn.

We di ami go atak di siti, dɛn go de ala as dɛn de fɛt.

Da de de, big big briz go de blo.