Zɛkaraya

5 A luk ɔp bak, ɛn a si wan skrol we de flay. 2 Di enjɛl aks mi se: “Wetin yu de si?”

A ansa am se: “A de si wan skrol we de flay, we na 20 kyubit* lɔng ɛn 10 kyubit wayd.”

3 Dɔn i tɛl mi se: “Dis na di swɛ we de go ɔlsay na di wɔl, bikɔs dɛn nɔ pɔnish di wan dɛn we de tif, jɔs lɛk aw i rayt na wansay na di skrol, ɛn dɛn nɔ pɔnish di wan dɛn we de swɛ, jɔs lɛk aw i rayt na di ɔdasay na di skrol.” 4 Jiova we gɛt bɔku bɔku sojaman dɛn se: “A dɔn sɛn di swɛ, ɛn i go go insay di tifman in os ɛn insay di wan we de yuz mi nem fɔ swɛ pan tin we na lay, in os; ɛn i go kɔntinyu fɔ de insay da os de, i go pwɛl di os, in bod dɛn, ɛn in ston dɛn.”

5 Na de di enjɛl we bin de tɔk to mi kam bifo ɛn tɛl mi se: “Duya, luk ɔp, ɛn si wetin de go.”

6 So a aks se: “Wetin dande?”

I ansa se: “Dis na di ifa kɔntena* we de go.” I kɔntinyu fɔ tɔk se: “Na so dɛn luk lɛk ɔlsay na di wɔl.” 7 Ɛn a si we dɛn es di rawnd kɔba we dɛn mek wit lɛd, ɛn wan uman bin sidɔm insay di kɔntena. 8 So di enjɛl se: “Dis na Wikɛdnɛs.” Dɔn i ib am bak insay di ifa kɔntena, afta dat i put di lɛd kɔba pantap di kɔntena.

9 Dɔn a luk ɔp ɛn si tu uman dɛn de kam, dɛn de kam ɛn flay. Dɛn wiŋ dɛn tan lɛk stɔk bɔd in wiŋ dɛn. Ɛn dɛn es di kɔntena go ɔp na di skay. 10 So a aks di enjɛl we bin de tɔk to mi se: “Usay dɛn de kɛr di ifa kɔntena?”

11 I ansa mi se: “Dɛn de kɛr am* go na Shayna* fɔ bil os fɔ am; ɛn we dɛn bil am dɔn, dɛn go put am de, na di rayt ples we i fɔ de.”