1 Kɔrintians
1 Mi, Pɔl, we Krays Jizɔs kɔl fɔ bi apɔsul bikɔs na dat Gɔd want, a de wit Sɔstiniz wi brɔda. 2 A de rayt to Gɔd in kɔngrigeshɔn we de na Kɔrint, dat na to una we Gɔd dɔn put wansay ɛn we gɛt wanwɔd wit Krays Jizɔs, una we Gɔd kɔl fɔ bi oli pipul dɛn, wit ɔl di wan dɛn ɔlsay we de kɔl wi Masta Jizɔs Krays in nem, we na dɛn Masta ɛn wi yon Masta:
3 Lɛ Gɔd, we na wi Papa, ɛn Masta Jizɔs Krays gi una pis ɛn mek dɛn spɛshal gudnɛs* de pan una.
4 A kin tɛl mi Gɔd tɛnki ɔltɛm fɔ una bikɔs ɔf in spɛshal gudnɛs* we de pan una tru Krays Jizɔs. 5 Bikɔs una gɛt wanwɔd wit am, una gɛt ɔltin, una sabi tɔk gud gud wan, ɛn una no bɔku tin dɛn, 6 jɔs lɛk aw una dɔn rili biliv di tichin bɔt di Krays gud gud wan. 7 Ɛn dis dɔn mek una gɛt ɔl wetin una nid, we una de rili wet fɔ mek wi Masta Jizɔs Krays sho in pawa. 8 I go mek una tinap tranga wan te di ɛnd so dat nɔbɔdi nɔ go se una dɔn du ɛni bad insay wi Masta Jizɔs Krays in de. 9 Gɔd we kɔl una fɔ gɛt wanwɔd* wit in Pikin we na Jizɔs Krays wi Masta, na Gɔd we fetful.
10 Mi brɔda dɛn, a de tek wi Masta Jizɔs Krays in nem beg una, mek una ɔl gɛt wanwɔd pan wetin una de tɔk ɛn mek una nɔ skata, bɔt una fɔ rili gɛt wanwɔd we i kam pan wetin de na una maynd, ɛn una fɔ de tink di sem we. 11 Mi brɔda dɛn, sɔm pipul dɛn na Klowi in os dɔn tɛl mi bɔt una. Dɛn se una nɔ gɛt wanwɔd. 12 Wetin a min na dat, sɔm pan una de se, “A de fɔ Pɔl,” ɔda wan dɛn de se, “Mi de fɔ Apɔlɔs,” ɔda wan dɛn bak de tɔk se, “Mi de fɔ Sifas,”* ɛn sɔm de se, “Mi de fɔ Krays.” 13 Fɔ se di Krays dɔn sheb? Pɔl nɔ bin day na di tik fɔ una, nɔto so? Ɔ na insay Pɔl in nem una bin baptayz? 14 A tɛl Gɔd tɛnki we a nɔ baptayz una nɔn pas Krispɔs ɛn Geɔs nɔmɔ, 15 so dat nɔbɔdi nɔ go se na insay mi nem una baptayz. 16 Ɛn na tru se a baptayz ɔlman we de na Stɛfanas in os. Bɔt fɔ di ɔda wan dɛn, a nɔ no if a baptayz ɛni ɔda pɔsin. 17 Krays nɔ sɛn mi fɔ baptayz, i sɛn mi fɔ prich di gud nyuz; bɔt i nɔ sɛn mi fɔ tɔk lɛk masta sabi bukman dɛn, so dat di tik we Krays sɔfa pan* nɔ go bi sɔntin we nɔ gɛt ɛni yuz.
18 Di tichin bɔt di tik we Jizɔs sɔfa pan* nɔ mek sɛns to di wan dɛn we de day, bɔt to wi we de sev, na Gɔd in pawa. 19 Dɛn rayt se: “A go mek di sɛnsman dɛn sɛns dɔn, ɛn di sɛns we masta sabi bukman dɛn gɛt, a nɔ go tek am mek natin.” 20 We di sɛnsman? We di Lɔ ticha?* We di pɔsin we de agyu naw?* Gɔd dɔn tɔn di sɛns na dis wɔl to ful, nɔto so? 21 We di wɔl nɔ ebul fɔ no Gɔd bay dɛn yon sɛns, i sho se Gɔd gɛt sɛns. Gɔd bin si am se i fayn fɔ yuz di mɛsej we wi de prich we ɔda pipul dɛn de si as sɔntin we nɔ mek sɛns, fɔ sev di wan dɛn we biliv.
22 Di Ju dɛn de aks fɔ sayn dɛn ɛn di Grik dɛn de luk fɔ sɛns; 23 bɔt wi de prich se dɛn nel Krays na di tik, to di Ju dɛn dis tan lɛk ston we de mek dɛn fɔdɔm, bɔt to ɔda neshɔn dɛn dis na sɔntin we nɔ mek sɛns. 24 Bɔt to di Ju ɛn Grik dɛn we Gɔd kɔl, Krays na Gɔd in pawa ɛn na Gɔd in sɛns. 25 Ɛnitin bɔt Gɔd we pipul dɛn de tink se nɔ mek sɛns gɛt sɛns pas mɔtalman, ɛn ɛnitin bɔt Gɔd we pipul dɛn de tink se wik, strɔng pas mɔtalman.
26 Mi brɔda dɛn, una si se bɔku pan una we Gɔd kɔl nɔ gɛt sɛns na mɔtalman in yay, bɔku pan una nɔ pawaful, ɛn bɔku pan una nɔ kɔmɔt na impɔtant famili dɛn, 27 bɔt Gɔd pik di tin dɛn we nɔ gɛt sɛns na di wɔl fɔ mek di sɛnsman dɛn shem, ɛn Gɔd pik di wik tin dɛn na di wɔl fɔ mek di strɔng tin dɛn shem; 28 ɛn Gɔd pik di tin dɛn we nɔ impɔtant na di wɔl ɛn di tin dɛn we pipul dɛn nɔ tek mek natin, di tin dɛn we nɔ gɛt valyu, fɔ mek di tin dɛn we gɛt valyu nɔ min natin, 29 so dat nɔbɔdi nɔ go bost bifo Gɔd. 30 Bɔt na bikɔs ɔf am una gɛt wanwɔd wit Krays Jizɔs, we de sho wi Gɔd in sɛns, we de mek wi no wetin rayt, we de mek wi oli, ɛn we dɔn pe di prayz fɔ fri wi, 31 so dat i go bi jɔs lɛk aw dɛn rayt se: “Di wan we de bost fɔ bost bɔt Jiova.”*