Ɛsta

4 We Mɔdikay yɛri bɔt ɔl wetin dɛn dɔn du, i chɛr in klos ɛn wɛr klos we pipul dɛn kin wɛr we dɛn at pwɛl ɛn put ashis pan insɛf. Dɔn i go midul di siti de kray lawd lawd wan ɛn bita bita wan. 2 I go te rich na di kiŋ in get ɛn stɔp de, bikɔs nɔbɔdi nɔ de ɛnta na di kiŋ in get if i wɛr klos we pipul dɛn kin wɛr we dɛn at pwɛl. 3 Ɛni prɔvins we di kiŋ in wɔd rich, di Ju dɛn we de de dɛn at bin de pwɛl bad bad wan, dɛn bin de fast ɛn kray lawd wan. Bɔku pan dɛn bin de ledɔm pan klos we pɔsin kin wɛr we in at pwɛl ɛn pan ashis. 4 We Ɛsta in uman savant dɛn ɛn di man dɛn we dɛn kastret* we de wok fɔ am kam insay ɛn tɛl am, in at bin rili pwɛl. Dɔn i sɛn klos dɛn fɔ Mɔdikay fɔ mek i wɛr dɛn ɛn pul di klos we pipul dɛn kin wɛr we dɛn at pwɛl, bɔt i nɔ gri fɔ tek dɛn. 5 Na de Ɛsta kɔl Etak we na wan pan di man dɛn we dɛn kastret* we de wok fɔ di kiŋ, we di kiŋ bin dɔn pik fɔ wok fɔ Ɛsta. Dɔn Ɛsta tɛl am fɔ go faynd awt to Mɔdikay wetin dis min ɛn wetin de apin.

6 So Etak go to Mɔdikay na di pɔblik ples* na di siti we de bifo di kiŋ in get. 7 Mɔdikay tɛl am ɔltin we dɔn apin to am ɛn di ɛgzakt mɔni we Eman prɔmis fɔ put na di say we dɛn de kip di kiŋ in valyu tin dɛn, so dat dɛn go dɔnawe wit di Ju dɛn. 8 Dɔn i gi am wan kɔpi ɔf di lɔ we dɛn mek na Shushan* fɔ kil dɛn. I fɔ sho am to Ɛsta, ɛksplen am to am ɛn tɛl am fɔ go to di kiŋ ɛn beg am fɔ lɛ i sɔri fɔ in pipul dɛn.

9 Etak go bak ɛn tɛl Ɛsta wetin Mɔdikay tɛl am. 10 Na de Ɛsta tɛl Etak wetin i fɔ tɛl Mɔdikay. I tɛl am se: 11 “Ɔl di kiŋ in savant dɛn ɛn di pipul dɛn na di kiŋ in prɔvins dɛn no se if ɛni man ɔ uman go na di kiŋ in kɔmpawnd we de insay we dɛn nɔ kɔl am, na wangren tin go apin to am: Akɔdin to di lɔ, dɛn fɔ kil am; di tin nɔmɔ we go mek dɛn nɔ kil am na if di kiŋ pɔynt in gold staf to am. Ɛn i dɔn tek 30 dez naw we di kiŋ nɔ kɔl mi.”

12 We dɛn tɛl Mɔdikay wetin Ɛsta se, 13 i se mek dɛn go tɛl Ɛsta se: “Nɔ fil se bikɔs yu de na di kiŋ in os dɛn go kil ɔl di Ju dɛn ɛn nɔ du natin to yu. 14 If yu sɛt mɔt naw, ɔda pɔsin go ɛp ɛn sev di Ju dɛn, bɔt yu ɛn yu papa in fambul dɛn go day. Ɛn udat no if na fɔ tɛm lɛk dis mek yu dɔn bi kwin?”

15 Dɔn Ɛsta se mek dɛn go tɛl Mɔdikay se: 16 “Go, gɛda ɔl di Ju dɛn we de na Shushan* ɛn una fast fɔ mi. Una nɔ it ɔ drink fɔ tri dez, de ɛn nɛt. Mi ɛn mi uman savant dɛn bak go fast. Dɔn a go go to di kiŋ, pan ɔl we dat de agens di lɔ, ɛn if a fɔ day, a go day.” 17 So Mɔdikay go du ɔl wetin Ɛsta dɔn tɛl am fɔ du.