Sam
Fɔ di wan we de dayrɛkt. Gitit.* Korah in bɔypikin dɛn siŋ.
84 E Jiova we gɛt bɔku bɔku sojaman dɛn,
A rili lɛk yu wɔndaful tabanakul!
2 A rili want fɔ de na Jiova in kɔmpawn dɛn;
A so want fɔ de de dat, a fent.
A de ala wit gladi-at to di Gɔd we de alayv
Wit ɔl mi at ɛn mi trɛnk.
3 E Jiova we gɛt bɔku bɔku sojaman dɛn,
Mi Kiŋ ɛn mi Gɔd,
Ivin bɔd de fɛn os de,
Smɔl bɔd* gɛt os de fɔ insɛf
Usay i de kia fɔ in pikin
Nia yu big ɔlta.
4 Di wan dɛn we de na yu os gɛt gladi-at!
Dɛn de kɔntinyu fɔ prez yu. (Sila)
5 Di wan dɛn we yu de gi trɛnk gɛt gladi-at.
Di wan dɛn we rili want fɔ de na rod fɔ go na yu os gɛt gladi-at.
6 We dɛn pas na di Beka Vali,*
Dɛn de mek i bi ples usay spriŋ wata dɛn* de;
Ɛn di fɔs ren de kɔba am* wit blɛsin.
7 Dɛn go waka, bɔt dɛn nɔ go taya.
Ich wan pan dɛn de apia bifo Gɔd na Zayɔn.
8 E Jiova Gɔd we gɛt bɔku bɔku sojaman dɛn,
Yɛri mi prea;
E Jekɔp in Gɔd, lisin. (Sila)
9 Luk, wi shild ɛn wi Gɔd,*
Luk di wan we yu dɔn anɔynt in fes.
10 Wan de na yu kɔmpawn dɛn bɛtɛ pas wan tawzin dez ɛni ɔdasay!
Bifo a de na wikɛd pipul dɛn tɛnt dɛn,
A go disayd fɔ tinap na di domɔt na mi Gɔd in os.
11 Jiova Gɔd na san ɛn na shild;
I de gi glori ɛn du gud.
Jiova nɔ go kip ɛnitin we gud
Frɔm di wan dɛn we de waka tret wit am.
12 E Jiova we gɛt bɔku bɔku sojaman dɛn,
Di pɔsin we abop pan yu gɛt gladi-at.