Job
14 “Mɔtalman in layf shɔt,
Ɛn i ful-ɔp wit trɔbul.
2 I de kam ɔp lɛk flawa we jɔs bɔs, dɔn i wida;*
I de rɔnawe lɛk shado, dɔn i lɔs.
3 Fɔ tru, yu dɔn put yu yay pan am,
Ɛn yu kɛr am go na kɔt fɔ lɛ dɛn jɔj am as pɔsin we yu gɛt kes wit.
4 Udat go mek pɔsin we klin kɔmɔt frɔm pɔsin we nɔ klin?
Nɔbɔdi nɔ ebul du dat!
5 If na tru se mɔtalman nɔ fɔ gɛt lɔng layf,
Da tɛm de mɔtalman in layf de ɔnda yu kɔntrol;
Yu dɔn disayd aw lɔng mɔtalman fɔ liv, ɛn i nɔ go pas dat.
6 Pul yu yay pan am so dat i go rɛst,
Sote i dɔn in wok fɔ di de, lɛk wokman we dɛn aya.
7 Op de ivin fɔ tik.
If dɛn kɔt am, i go gro bak,
Ɛn in yɔŋ branch dɛn go kɔntinyu fɔ gro.
8 If di rut ol na di grɔn
Ɛn di bɔtɔm pat day na di dɔti,
9 As wata tɔch am so i de bɔs
Ɛn pul branch dɛn lɛk nyu plant.
10 Bɔt we mɔtalman day, i nɔ de ebul du natin;
We mɔtalman in layf dɔn, usay i de de?
11 Wata de dray na di si,
Ɛn wata de dɔn na riva ɛn dray.
12 Mɔtalman bak de ledɔm ɛn nɔ grap.
As lɔng as ɛvin kɔntinyu fɔ de, i nɔ go wek,
Ɛn pɔsin nɔ go wek am frɔm in slip.
13 A wish yu go ayd mi na di Grev,*
Yu go ayd mi te yu vɛksteshɔn dɔn,
Ɛn yu go sɛt tɛm fɔ mi ɛn mɛmba mi!
14 If pɔsin day, i go gɛt layf bak?
A go wet te di tɛm we dɛn de fos mi fɔ wet dɔn,
Te di tɛm we a go fri.
15 Yu go kɔl, ɛn a go ansa yu.
Yu go rili want* fɔ si di wok we yu du wit yu an.
16 Bɔt fɔ naw, yu de kɔnt ɔl wetin a de du;
Na mi sin nɔmɔ yu de wach fɔ.
17 Yu dɔn lɔk mi sin na bag,
Ɛn yu dɔn sil mi mistek wit glu.
18 Jɔs lɛk aw mawntin de fɔdɔm ɛn skata
Ɛn rɔk de kɔmɔt na in ples,
19 Jɔs lɛk aw wata de it-it ston dɛn
Ɛn bɔku bɔku wata de dig dig grɔn,
Na so yu dɔn dɔnawe wit di op we mɔtalman gɛt.
20 Yu kɔntinyu fɔ sɔprɛs am te i day;
Yu chenj aw i luk lɛk, ɛn sɛn am na di grev.
21 Dɛn ɔnɔ in bɔypikin dɛn, bɔt i nɔ no;
Dɛn nɔ impɔtant igen, bɔt i nɔ no.
22 I de fil pen di tɛm nɔmɔ we i de alayv;
I de kray nɔmɔ di tɛm we i nɔ day yet.”