Di Twin dɛn we Difrɛn

DƐN tu bɔbɔ ya difrɛn, nɔto so? Yu sabi dɛn nem dɛn? Di wan in nem na Isɔ, in na ɔntinman. Ɛn di ɔda wan in nem na Jekɔb, in na shɛpad.

Isɔ ɛn Jekɔb na twin dɛn. Na Ayzak ɛn Ribɛka bɔn dɛn. Ayzak lɛk Isɔ bad bikɔs i sabi ɔntin, ɛn i kin kam wit tin fɔ it na os. Bɔt Ribɛka lɛk Jekɔb bad bikɔs i kwayɛt, ɛn i nɔ gɛt wan prɔblɛm.

Dɛn granpa we na Ebraam bin stil de. So i go mɔs bi se Jekɔb bin lɛk fɔ lisin to am we i de tɔk bɔt Jiova. Ebraam bin ol 175 ia we i day, ɛn di twin dɛn bin ol 15 ia da tɛm de.

We Isɔ ol 40 ia, i mared tu uman dɛn na Kenan. Dis mek Ayzak ɛn Ribɛka dɛn at pwɛl bikɔs dɛn uman ya nɔ de wɔship Jiova.

Wan de, sɔntin apin we mek Isɔ vɛks bad pan in brɔda. Na di tɛm we Ayzak fɔ blɛs in fɔs pikin. Bikɔs Isɔ big pas Jekɔb, i bin fil se na in go gɛt di blɛsin. Bɔt Isɔ bin dɔn sɛl in rayt fɔ bi di fɔs pikin, to Jekɔb. Na dis rayt bin fɔ mek i gɛt in papa in blɛsin. Bifo dɛn bɔn dɛn, Gɔd bin dɔn se na Jekɔb go gɛt di blɛsin. Ɛn na so i bi. Ayzak gi di blɛsin to Jekɔb.

Leta we Isɔ no bɔt dis, i vɛks bad pan Jekɔb ɛn dis mek i tɔk se i go kil am. We Ribɛka yɛri bɔt dis, i fred. So i tɛl in man se: ‘I nɔ go fayn if Jekɔb sɛf mared wan pan dɛn uman ya na Kenan.’

We in wɛf tɛl am dis, Ayzak kɔl Jekɔb ɛn tɛl am se: ‘Nɔ mared uman na Kenan. Go na Eran to yu granpa we nem Bɛtyuɛl. Bɛtyuɛl gɛt wan bɔy pikin we nem Leban. Mared wan pan Leban in gyal pikin dɛn.’

Jekɔb lisin to in papa, ɛn bigin in lɔng patrol fɔ go to in fambul dɛn na Eran.