Gɔd in Padi dɛn fɔ Du Wetin Gud

We yu gɛt padi we yu de kɔle ɛn rɛspɛkt, yu go want bi lɛk am. Di Baybul se: Jiova “gud ɛn i nɔ gɛt bɛnbɛn.” (Sam 25:8) Fɔ bi Gɔd in padi, wi fɔ de du gud ɛn waka tret. Di Baybul se: “We una na Gɔd in pikin dɛn we i lɛk, una fɔ tray fɔ tan lɛkɛ am. Una fɔ gɛt lɛk na una at.” (Lɛta Fɔ Ɛfisɔs 5:1, 2) Dis na sɔm we wi kin du gud:

Ɛp ɔda pipul dɛn. “Una fɔ du gud to ɔlman.”—Lɛta Fɔ Galeshya 6:10.

Pɔsin fɔ wok tranga wan. “Mek di pɔsin we bin de tif lɛf fɔ tif, ɛn bigin wok tranga wan.”—Lɛta Fɔ Ɛfisɔs 4:28.

Yu abit ɛn bɔdi fɔ klin. “Lɛ wi nɔ du ɛnitin we go mek wi bɔdi ɔ wi spirit nɔ klin, lɛ wi liv fɔ Gɔd nɔmɔ, ɛn lɛ wi sho pipul se wi de fred Gɔd.”—Sɛkɛn Lɛta Fɔ Kɔrint 7:1.

Lɛk ɛn rɛspɛkt ɔlman na yu famili. “Ɛvri man we mared fɔ lɛk in wɛf lɛkɛ aw i lɛk insɛf, ɛn ɔl mared uman fɔ rɛspɛkt in man. Una we na pikin, una fɔ de du wetin di wan dɛn we bɔn una tɛl una fɔ du.”—Lɛta Fɔ Ɛfisɔs 5:33–6:1.

Sho se yu lɛk ɔda pipul dɛn. “Una mek wi lɛk wi kɔmpin bikɔs na Gɔd put lɛk na mɔtalman at.”—Jɔn In Fɔs Lɛta 4:7.

Rɛspɛkt di lɔ na yu Kɔntri. “Una ɔl fɔ du wetin dɛn wan we de rul na di kɔntri tɛl una fɔ du . . . Una fɔ pe dɛn ɔl wetin una gɛt fɔ pe dɛn; una fɔ pe ɛni taks we di gɔvmɛnt se una fɔ pe.” —Lɛta Fɔ Rom 13:1, 7.