Na So Gɔd Bin Want Lɛ Wi De?
WE YU rid nyuspepa, lisin redio ɔ yu wach tɛlivishɔn, na soso bad tin dɛn yu go si ɔ yɛri. Sɔm pan dɛn bad tin ya na wɔ, pipul dɛn we de brok lɔ ɛn sɔm de ɛng bɔm pan dɛnsɛf fɔ kil ɔda pipul dɛn. Tink bak bɔt yu yon prɔblɛm dɛn. Sɔntɛm yu nɔ wɛl ɔ pɔsin we yu lɛk dɔn day. Ɔl dis kin mek yu at pwɛl. I go mek yu fil lɛk wan man na di Baybul we nem Job, we bin tɔk se di prɔblɛm dɛn we i gɛt de mek i de sɔfa pasmak.—Job 10:15, NW.
Yu dɔn ɛva aks dɛn kwɛstyɔn dɛn ya?
Na so Gɔd bin want mek mi ɛn mi kɔmpin mɔtalman dɛn de?
Wetin go ɛp mi fɔ bia wit mi prɔblɛm dɛn?
Tɛm go kam we pis ɛn kolat go de na di wɔl?
Di Baybul gɛt ansa fɔ ɔl dɛn kwɛstyɔn ya.
DI BAYBUL SE GƆD GO MEK ƆL DƐN TIN YA APIN NA DI WƆL.
“I go mek dɛn nɔ kray igen; dɛn nɔ go day igen; ebi at ɛn waala nɔ go de igen; nɔbɔdi nɔ go kray igen, bikɔs dɛn tin we bin de fɔs nɔ go de igen.”—Rɛvɛleshɔn 21:4
“Kripul pɔsin go jomp lɛk dia.”—Ayzaya 35:6
“Blɛnyay man in yay go opin.”—Ayzaya 35:5
“Ɔl dɛn pipul we dɔn day go . . . rayz frɔm dɛn grev.”—Jɔn 5:28, 29
“Nɔbɔdi . . . nɔ go se ‘A nɔ wɛl.’” —Ayzaya 33:24
“Lɛ it gro ɔlsay na di land.”—Sam 72:16
DI TIN DƐN WE DI BAYBUL DE TICH DE BƐNIFIT WI
Sɔm pipul dɛn go fil se di tin dɛn we wi tɔk bɔt na pej 4 ɛn pej 5, nɔ go ɛva bi. Bɔt dat nɔto tru! Na Gɔd insɛf sɛf dɔn prɔmis se ɔl dɛn tin dɛn de go bi, ɛn di Baybul dɔn ɛksplen aw Gɔd go du am.
Nɔto dat nɔmɔ di Baybul de tɔk bɔt o! I de sho wi bak wetin wi fɔ du we go mek wi ɛnjɔy layf rayt naw. Tink bɔt yu yon prɔblɛm dɛn. Sɔntɛm yu nɔ gɛt bɛtɛ mɔni, yu famili gɛt prɔblɛm, yu sik, ɔ pɔsin we yu lɛk dɔn day. Di Baybul go ɛp yu fɔ bia wit yu prɔblɛm dɛn, ɛn i de ansa kwɛstyɔn dɛn lɛk dɛn wan ya:
Wetin mek wi de sɔfa?
Aw wi go ebul fɔ bia wit wi prɔblɛm dɛn?
Aw wi go mek wi famili gladi?
Wetin de apin to wi we wi day?
Wi go ɛva si di wan dɛn we dɔn day?
Wetin mek wi biliv se Gɔd go du ɔl wetin i dɔn prɔmis?
Di rid we yu de rid dis buk de sho se yu want fɔ no wetin di Baybul de tich. Dis buk go ɛp yu fɔ du dat. I gɛt paregraf ɛn kwɛstyɔn dɛn we de dɔŋ di pej. We Jiova Witnɛs dɛn kin stɔdi pipul dɛn wetin de na di Baybul, dɛn kin aks kwɛstyɔn ɛn di pipul dɛn kin gi di ansa. Ɛn bɔku pipul dɛn lɛk fɔ stɔdi di Baybul da we de. Wi op se yusɛf go lɛk fɔ stɔdi di Baybul da sem we de. Ɛn wi de pre mek Gɔd blɛs yu as yu de lan bɔt wetin rili di Baybul de tich!