Wetin fɔ Du if Yu Kɔmit Siriɔs Sin?

Pan ɔl we yu rili lɛk Jiova ɛn yu de tray tranga wan fɔ avɔyd ɛnitin we go mek i fil bad, wan wan tɛm yu go mek mistek dɛn. Bɔt sɔm sin dɛn de we siriɔs pas ɔda wan dɛn. (1 Kɔrintians 6:​9, 10) If yu kɔmit siriɔs sin, mɛmba se dat nɔ min se Jiova nɔ lɛk yu igen; i rɛdi fɔ fɔgiv yu ɛn ɛp yu.

1. Wetin wi fɔ du fɔ mek Jiova fɔgiv wi?

Di wan dɛn we lɛk Jiova kin rili fil bad we dɛn kɔmit siriɔs sin. Bɔt dɛn kin gɛt kɔrej frɔm wetin Jiova bin prɔmis in pipul dɛn fɔ se: “Ilɛk una sin dɛn rɛd lɛk blɔd, dɛn go wayt lɛk shatin.” (Ayzaya 1:18) If wi ripɛnt fɔ tru, Jiova go rili fɔgiv wi. Aw wi go ripɛnt? Wi go du dat bay we wi sho se wi rili sɔri fɔ di bad we wi dɔn du, lɛf fɔ du di bad ɛn beg Jiova fɔ fɔgiv wi. Dɔn wi fɔ tray tranga wan fɔ chenj di rɔng we aw wi de tink ɔ lɛf di bad abit dɛn we mek wi sin, ɛn wi fɔ tray fɔ liv wi layf di klin we aw Jiova want.​—Rid Ayzaya 55:​6, 7.

2. Aw Jiova de yuz di ɛlda dɛn fɔ ɛp wi we wi sin?

If wi kɔmit siriɔs sin, Jiova se wi fɔ “kɔl di ɛlda dɛn na di kɔngrigeshɔn.” (Rid Jems 5:​14, 15.) Dɛn man dɛn ya lɛk Jiova ɛn di wan dɛn we de sav am. Dɛn dɔn tich dɛn aw fɔ ɛp wi so dat wi go gɛt tayt padi biznɛs wit Jiova bak.​—Galeshians 6:​1.

Aw di ɛlda dɛn go ɛp wi if wi kɔmit siriɔs sin? Tu ɔ tri ɛlda dɛn go yuz skripchɔ dɛn frɔm di Baybul fɔ kɔrɛkt wi. Dɛn go ɛnkɔrej wi ɛn gi wi advays we go ɛp wi fɔ mek wi nɔ sin bak. If pɔsin kɔmit siriɔs sin ɛn i nɔ gri fɔ ripɛnt, di ɛlda dɛn go pul am kɔmɔt na di kɔngrigeshɔn so dat i nɔ go mek ɔda pipul dɛn bigin du bad na di kɔngrigeshɔn.

LAN MƆ

3. We wi kɔnfɛs, dat go ɛp wi

Ɛni sin we wi kɔmit de mek Jiova fil bad, so wi fɔ kɔnfɛs to am. Rid Sam 32:1-5, dɔn una tɔk bɔt dis kwɛstyɔn:

• Wetin mek i fayn fɔ mek wi kɔnfɛs wi sin dɛn to Jiova ɛn nɔ tray fɔ ayd dɛn?

VIDIO: “Jiova De Kɔrɛkt di Wan dɛn We I Lɛk” (3:01)

• Insay di vidio, aw di ɛlda dɛn bin ɛp Kanɔn fɔ kam bak to Jiova?

Wi nid fɔ ɔnɛs ɛn nɔ shem fɔ tɔk to di ɛlda dɛn; dɛn rɛdi fɔ ɛp wi. Rid Jems 5:16, dɔn una tɔk bɔt dis kwɛstyɔn:

• We wi ɔnɛs wit di ɛlda dɛn, aw dat go mek i izi fɔ mek dɛn ɛp wi?

4. Jiova de sho sɔri-at to sina dɛn

If pɔsin kɔmit siriɔs sin ɛn nɔ gri fɔ fala wetin Jiova se rayt ɔ rɔng, dɛn go pul am kɔmɔt na di kɔngrigeshɔn, ɛn wi nɔ go de kip kɔmpin wit am. Rid 1 Kɔrintians 5:6, 11, dɔn una tɔk bɔt dis kwɛstyɔn:

• Jɔs lɛk aw yist de mek flawa rayz, we wi kip kɔmpin wit pipul dɛn we nɔ gri fɔ ripɛnt, aw dat go afɛkt di kɔngrigeshɔn?

Aw di we aw Jiova de trit sina dɛn de sho se i de du tin fia wan, i gɛt sɔri-at, ɛn i lɛk wi?

5. Jiova de fɔgiv wi we wi ripɛnt

Jizɔs bin yuz wan ɛgzampul we ɛp wi fɔ ɔndastand aw Jiova de fil we pɔsin ripɛnt. Rid Lyuk 15:1-7, dɔn una tɔk bɔt dis kwɛstyɔn:

• Wetin dis tich yu bɔt Jiova?

Rid Izikɛl 33:11, dɔn una tɔk bɔt dis kwɛstyɔn:

• Us impɔtant tin pɔsin fɔ du fɔ sho se i dɔn ripɛnt?

WETIN YU DƆN LAN?

If wi kɔmit siriɔs sin bɔt wi rili sɔri ɛn wi mekɔp wi maynd fɔ lɛf fɔ du bad, Jiova go fɔgiv wi.

Rivyu

• Wetin mek i fayn fɔ mek wi kɔnfɛs wi sin dɛn to Jiova?

• Wetin wi nid fɔ du fɔ mek Jiova go fɔgiv wi sin dɛn?

• If wi kɔmit siriɔs sin, wetin mek wi fɔ go to di ɛlda dɛn fɔ ɛp wi?

DU MƆ RISACH

Lan aw Jiova bin sho di kayn sɔri-at we de na Ayzaya 1:18 to wan man.

Nɔ Ɛva Dawt Jiova in Sɔri-At (5:02)

Aw di ɛlda dɛn de tray fɔ ɛp di wan dɛn we dɔn kɔmit siriɔs sin?

“Aw Ɛlda dɛn Go Sho Sɔri-At ɛn Lɔv to Pɔsin We Dɔn Sin?” (Di Wachtawa, Ɔgɔst 2024)

Lan bɔt di lɔv ɛn sɔri-at we dɛn kin sho to sina dɛn we nɔ ripɛnt.

“Aw Ɛlda dɛn Go Ɛp di Wan dɛn we Dɛn Dɔn Pul Kɔmɔt na di Kɔngrigeshɔn?” (Di Wachtawa, Ɔgɔst 2024

Insay di stori we gɛt di taytul “A Bin Nid fɔ Kam Bak to Jiova,” lan wetin mek wan man we bin dɔn lɛf di trut bin fil se Jiova bin drɔ am fɔ kam bak.

“Di Baybul De Chenj Layf” (Di Wachtawa, Epril 1, 2012)