Ɔgɔst

Notis tu impɔtant pɔynt dɛn na di sam we de ɔp: (1) Pipul dɛn we de fala Jiova kin gɛt prɔblɛm dɛn. (2) Jiova de ɛp wi we wi gɛt prɔblɛm dɛn. Aw Jiova de ɛp wi? Wan we na bay we i de ɛp wi fɔ tink di rayt we bɔt layf insay dis wɔl. Na tru se Jiova dɔn prɔmis wi se wi go gɛt gladi-at we wi de sav am, bɔt i nɔ gi garanti se wi nɔ go gɛt wan prɔblɛm na layf. (Ayz. 66:14) I de ɛnkɔrej wi fɔ pe atɛnshɔn pan tumara bambay, we wi go gɛt di layf we i want wi fɔ ɛnjɔy sote go. (2 Kɔr. 4:16-18) Rayt naw, i de ɛp wi fɔ kɔntinyu fɔ sav am ɛvride. (Lam. 3:22-24) Wetin wi go lan frɔm Jiova in fetful savant dɛn we bin de di tɛm we dɛn bin de rayt di Baybul ɛn insay wi yon tɛm? Sɔntɛm wi go gɛt prɔblɛm dɛn we wi nɔ de ɛkspɛkt. Bɔt if wi abop pan Jiova, i nɔ go ɛva lɛf fɔ ɛp wi.​—Sam 55:22. w23.04 14-15 ¶3-4

Wi kin lan frɔm Josɛf ɛn Meri dɛn ɛgzampul, we bin rɛdi fɔ obe di wan dɛn we gɛt pawa pan ɔl we i nɔ bin izi fɔ dɛn. (Lyuk 2:1-6.) We Meri in bɛlɛ bin dɔn rich lɛk 9 mɔnt, sɔntin bin apin we bin tɛst if in ɛn Josɛf de obe. Ɔgɔstɔs we bin de rul di Roman Ɛmpaya bin want mek dɛn kɔnt di pipul dɛn. Josɛf ɛn Meri bin gɛt fɔ waka 93 mayl fɔ go na Bɛtliɛm, ɛn dɛn go pas na rod dɛn we gɛt il dɛn. Da patrol de nɔ bin izi mɔ fɔ Meri. Sɔntɛm dɛn bin de wɔri bɔt Meri ɛn di pikin we i nɔ bɔn yet dɛn sef wan. Sɔntɛm dɛn bin de wɔri bɔt wetin go apin if i bɔn we dɛn de travul. Dɛn bin fɔ dɔn wɔri bɔt aw fɔ kip di pikin sef bikɔs na in na di Mɛsaya we dɛn bin de wet fɔ. Yu tink se ɔl dɛn tin ya fɔ dɔn mek dɛn nɔ obe di gɔvmɛnt? Josɛf ɛn Meri nɔ bin alaw ɛniwan pan dɛn tin dɛn de fɔ afɛkt dɛn ɛn mek dɛn nɔ obe di lɔ. Jiova bin blɛs dɛn we dɛn obe. Meri bin rich sef wan na Bɛtliɛm, bɔn pikin we gɛt wɛlbɔdi, ɛn i bin ivin ɛp fɔ mek Baybul prɔfɛsi kam tru!​—Mayk. 5:2. w23.10 8 ¶9; 9 ¶11-12

Wetin yu go du if yu de fred fɔ kɔmɛnt na mitin? Sɔntɛm i go fayn fɔ pripia fayn. (Prɔv. 21:5) Di mɔ yu sabi di tin we wi de stɔdi, na di mɔ i go izi fɔ lɛ yu es yu an fɔ gi kɔmɛnt. Dɔn bak, gi shɔt kɔmɛnt. (Prɔv. 15:23; 17:27) Shɔt kɔmɛnt kin mek yu nɔ fred bɛtɛ. We yu gi shɔt kɔmɛnt yu yon we, yu de sho se yu pripia fayn fayn wan ɛn yu rili ɔndastand wetin una de stɔdi. Wetin yu go du if yu dɔn tray fɔ du sɔm pan dɛn tin dɛn ya bɔt yu stil de fred fɔ gi kɔmɛnt pas wan ɔ tu tɛm? Mɛmba se Jiova go gladi bikɔs yu rili tray fɔ du wetin yu ebul. (Lyuk 21:1-4) Fɔ gi yu bɛst nɔ min se yu fɔ stren yusɛf. (Fil. 4:5) Tray fɔ no wetin yu ebul du, sɛt gol fɔ du am, ɛn pre fɔ mek Jiova ɛp yu lɛ yu nɔ wɔri. Sɔntɛm di fɔs gol we yu go sɛt na fɔ gi wan kɔmɛnt we shɔt. w23.04 21 ¶6-8

Apɔsul Pɔl kɔmpia wi to sojaman dɛn we rɛdi ɛn drɛs fɔ go fɛt wɔ. Pipul dɛn de ɛkspɛkt sojaman fɔ rɛdi fɔ fɛt ɛnitɛm we wɔ de. Na di sem tin wit wi. Wi go kɔntinyu fɔ rɛdi fɔ Jiova in de bay we wi wɛr di tin we de protɛkt pɔsin in chɛst we na fet ɛn lɔv ɛn di ɛlmɛt we na op. Di tin we pɔsin de wɛr fɔ protɛkt in chɛst bin de protɛkt sojaman in at. Fet ɛn lɔv de protɛkt wi at ɔ di pɔsin we wi bi insay. Dɛn kwaliti dɛn ya go ɛp wi fɔ kɔntinyu fɔ sav Gɔd ɛn fala Jizɔs. Fet de mek wi gɛt kɔnfidɛns se Jiova go blɛs wi fɔ we wi de luk fɔ am wit ɔl wi at. (Ibru. 11:6) I go muv wi fɔ mek wi kɔntinyu fɔ de biɛn wi Lida, we na Jizɔs, ivin if wi gɛt fɔ bia prɔblɛm dɛn. Wi go ebul fɔ gɛt strɔng fet we go mek wi ebul fɔ bia prɔblɛm dɛn bay we wi lan frɔm pipul dɛn insay wi yon tɛm we kɔntinyu fɔ de biɛn Jiova pan ɔl we dɛn de mek dɛn sɔfa ɔ dɛn gɛt mɔni prɔblɛm. Ɛn wi go ebul fɔ avɔyd di denja fɔ lɛk mɔni ɛn prɔpati if wi falamakata di wan dɛn we de liv simpul layf fɔ mek dɛn go ebul put di Kiŋdɔm fɔs na dɛn layf. w23.06 10 ¶8-9

Fɔ mek pɔsin kɔntrol insɛf min se i fɔ ebul kɔntrol di we aw i de fil ɛn di tin dɛn we i de du. Wi nid fɔ kɔntrol wisɛf fɔ mek wi rich wi gol dɛn, mɔ if di gol we wi gɛt fɔ nɔ izi fɔ rich ɔ wi nɔ gɛt tin we de muv wi fɔ rich am. Mɛmba se fɔ ebul kɔntrol wisɛf na wan pan di kwaliti dɛn we di spirit de gi, so na fɔ aks Jiova fɔ in oli spirit fɔ ɛp yu fɔ gɛt dis impɔtant kwaliti. (Lyuk 11:13; Gal. 5:22, 23) Nɔ wet te ɔltin fayn. Insay dis wɔl, sɔntɛm i nɔ go ɛva pɔsibul fɔ mek ɔltin fayn. If wi se wi de wet fɔ mek ɔltin fayn, wi nɔ go ɛva rich wi gol. Sɔntɛnde, wi nɔ kin gɛt sɔntin we de muv wi bikɔs i kin tan lɛk se i nɔ rili izi fɔ rich wi gol. If na so i bi fɔ yu, tray fɔ sɛt smɔl smɔl gol dɛn we go ɛp yu fɔ rich di wan we nɔ izi fɔ rich. If yu gol na fɔ gɛt wan kwaliti, yu nɔ tink se igo fayn fɔ mek yu luk fɔ smɔl smɔl we dɛn fɔs we yu go sho da kwaliti de? If yu gol na fɔ rid di wan ol Baybul, yu nɔ tink se i go fayn fɔ mek yu stat bay we yu de rid am fɔ shɔt tɛm? w23.05 29 ¶11-13

Insay di las dez, Jiova dɔn de yuz in ɔganayzeshɔn fɔ gi wi spirichwal it we de ɛp wi fɔ kɔntinyu fɔ travul na “di Oli Rod.” (Ayz. 35:8; 48:17; 60:17) Wi go se ɛnitɛm pɔsin gri fɔ stɔdi di Baybul, i dɔn gɛt di chans fɔ waka na “di Oli Rod.” Sɔm pipul dɛn kin travul fɔ shɔt tɛm ɛn lɛf di men rod. Ɔda wan dɛn dɔn mekɔp dɛn maynd fɔ kɔntinyu fɔ travul na di rod te dɛn rich usay dɛn de go. Bɔt usay dɛn de go? Fɔ di wan dɛn we gɛt di op fɔ go na ɛvin, “di Oli Rod” go mek dɛn go na “Gɔd in paradays” na ɛvin. (Rɛv. 2:7) Fɔ di wan dɛn we gɛt di op fɔ de na dis wɔl, da men rod de go mek dɛn pafɛkt afta we di 1,000ia go dɔn. If yu de travul na da men rod de tide, nɔ luk biɛn. Ɛn nɔ lɛf fɔ travul de te yu rich na di nyu wɔl! w23.05 17 ¶15; 19 ¶16-18

We yu tink bɔt ɔl di tin dɛn we Jiova dɔn du fɔ yu, yu go want fɔ sho se yu gɛt tɛnki ɛn gi yu layf to am. (Sam 116:12-14) Di Baybul kɔl Jiova di Pɔsin we de gi “ɔl gud gift ɛn ɔl pafɛkt prɛzɛnt.” (Jems 1:17) Di gift we pas ɔl we Gɔd dɔn gi wi na we i mek in Bɔypikin Jizɔs sakrifays in layf fɔ wi. Jɔs tink bɔt dis! Di day we Jizɔs day fɔ bay wi bak dɔn mek i pɔsibul fɔ mek yu gɛt tayt padi biznɛs wit Jiova. Ɛn i dɔn mek yu gɛt chans fɔ gɛt layf we go de sote go. (1 Jɔn 4:9, 10) Fɔ gi yu layf to Jiova na wan pan di bɛst we dɛn fɔ sho se yu gladi fɔ da lɔv de we pas ɔl ɔda lɔv we ɛnibɔdi dɔn ɛva sho, ɛn fɔ ɔl di ɔda gud tin dɛn we Jiova dɔn du fɔ yu.​—Dit. 16:17; 2 Kɔr. 5:15. w24.03 5 ¶8

We wi si di bad we aw pipul dɛn de biev tide we i kam pan mami ɛn dadi biznɛs, wi kin fil di sem we aw Lɔt bin de fil. Io“bin tɔmɛnt bad bad wan bikɔs di pipul dɛn . . . nɔ bin de obe lɔ,” ɛn i bin no se wi Papa we de na ɛvin et we pipul dɛn de biev bad we. (2 Pit. 2:7, 8) Bikɔs Lɔt bin rili rɛspɛkt ɛn lɛk Gɔd, i bin et di bad we aw pipul dɛn we bin de arawnd am de biev we i kam pan mami ɛn dadi biznɛs. Wisɛf gɛt pipul dɛn arawnd wi we nɔ gɛt wan rɛspɛkt fɔ Jiova in lɔ bɔt mami ɛn dadi biznɛs. Pan ɔl dat, wi go stil ebul avɔyd mami ɛn dadi biznɛs di we aw Gɔd nɔ want ɛn bi klin pipul dɛn if wi kɔntinyu fɔ lɛk Gɔd ɛn lan fɔ gɛt dip rɛspɛkt fɔ am. Jiova de ɛp wi fɔ du dat bay we i de yuz di Baybul buk we nem Prɔvabs fɔ ɛnkɔrej wi. Ɔl Kristian dɛn, man ɛn uman dɛn, yɔŋ wan ɛn ol wan dɛn, go rili bɛnifit frɔm di fayn advays we de de. We wi de fred Jiova, wi de tek tɛm mek wi nɔ bi padi to di wan dɛn we de du bad tin dɛn. w23.06 20 ¶1-2; 21 ¶5

Sɔntɛm yu famili de agens yu, ɔ sɔntɛm yu dɔn sakrifays mɔni ɛn ɔda tin dɛn fɔ put Gɔd in Kiŋdɔm fɔs na yu layf. (Mat. 6:33) If na so i bi, gɛt kɔnfidɛns se Jiova no ɔl wetin yu dɔn du fɔ am. (Ibru. 6:10) Sɔntɛm yu dɔn si se di wɔd dɛn we Jizɔs tɔk na tru we i se: “Ɛnibɔdi we dɔn lɛf os ɔ brɔda dɛn ɔ sista dɛn ɔ mama ɔ papa ɔ pikin dɛn ɔ fam dɛn fɔ mi sek ɛn fɔ di gud nyuz in sek go gɛt dɛn tin ya pas 100 tɛm naw. I go gɛt os dɛn, brɔda dɛn, sista dɛn, mama dɛn, pikin dɛn, fam dɛn, dɔn pipul dɛn go mek i sɔfa, bɔt i go gɛt layf we go de sote go tumara bambay.” (Mak 10:29, 30) Wan dawt nɔ de se di blɛsin dɛn we yu dɔn gɛt bɔku fa fawe pas ɛni sakrifays we yu dɔn mek.​—Sam 37:4. w24.03 9 ¶5

We Kristian dɛn na Judia nɔ bin gɛt tin fɔ it, di kɔngrigeshɔn we de na Antiɔk bin “mekɔp dɛn maynd fɔ sɛn sɔm tin dɛn to di brɔda dɛn we de na Judia.” (Akt 11:27-30) Pan ɔl we di brɔda dɛn we nɔ bin gɛt bɛtɛ tin fɔ it bin de fa say, di Kristian dɛn na Antiɔk bin mekɔp dɛn maynd fɔ ɛp dɛn. (1 Jɔn 3:17, 18) Wisɛf go ebul fɔ sho sɔri-at tide we wi no se wi brɔda ɛn sista dɛn de sɔfa bikɔs ɔf dizasta ɔ ɔda siriɔs prɔblɛm dɛn. Wi nɔ de westɛm fɔ ɛp. Sɔntɛm wi kin ɛp bay we wi aks di ɛlda dɛn if wi go ebul fɔ wok pan wan projɛkt, bay we wi de gi kɔntribyushɔn fɔ di wɔlwayd wɔk, ɔ bay we wi de pre fɔ di wan dɛn we di dizasta afɛkt. Sɔntɛm wi brɔda ɛn sista dɛn go nid ɛp bak fɔ gɛt di tin dɛn we dɛn nid. We wi Kiŋ, we na Jizɔs Krays, go kam fɔ jɔj pipul dɛn, wi go want fɔ mek i kam mit wi de sho sɔri-at, ɛn i go invayt wi fɔ “tek di Kiŋdɔm.”​—Mat. 25:34-40. w23.07 4 ¶9-10; 6 ¶12

Jizɔs bin falamakata Jiova bay we i bin sho se in na pɔsin we nɔ de pin pan sɔntin. Jiova bin sɛn am na dis wɔl fɔ prich to “di Izrɛlayt dɛn nɔmɔ we tan lɛk ship dɛn we dɔn lɔs.” Bɔt i bin sho se i nɔ de pin pan sɔntin we i bin de du da wok de. Wan tɛm, wan uman we nɔto Izrɛlayt bin beg am fɔ mɛn in galpikin we bin de “sɔfa bad bad wan bikɔs i gɛt dimɔn.” Jizɔs bin sho sɔri-at ɛn du wetin di uman tɛl am fɔ du bay we i mɛn in galpikin. (Mat. 15:21-28) Lɛ wi tɔk bɔt ɔda ɛgzampul. We Jizɔs bin stat in prichin wok, i bin tɔk se: “Ɛnibɔdi we dinay mi . . . , misɛf go dinay am.” (Mat. 10:33) Bɔt fɔ se Jizɔs bin dinay Pita bikɔs Pita dinay am tri tɛm? Nɔ. Jizɔs bin no se Pita bin rili sɔri fɔ wetin i du ɛn in na man we bin gɛt fet. Afta we Jizɔs gɛt layf bak, i bin apia to Pita, ɛn i go bi se i bin mek Pita no se i dɔn fɔgiv am ɛn i stil lɛk am. (Lyuk 24:33, 34) Jiova Gɔd ɛn Jizɔs Krays nɔ de pin pan sɔntin. Bɔt we wi? Jiova de ɛkspɛkt wi fɔ bi pipul dɛn we nɔ de pin pan sɔntin. w23.07 21 ¶6-7

Wetin wi fɔ tɛl ɔda pipul dɛn fɔ mek dɛn biliv se dis prɔmis ya go kam tru? Fɔs, na Jiova insɛf sɛf mek di prɔmis. Di Baybul buk we nem Rɛvɛleshɔn tɔk se: “Di Wan we sidɔm na di tron se: “Luk! A de mek ɔltin nyu.’” In gɛt sɛns, pawa, ɛn i rili want fɔ mek in prɔmis kam tru. Sɛkɔn, Jiova no se wetin i tɔk go mɔs apin, na dat mek i tɔk se: “Dɛn wɔd ya na tru ɛn pɔsin kin abop pan dɛn. . . . Dɛn dɔn apin!” Tɔd, natin nɔ de we ebul mek Jiova nɔ dɔn wetin i bigin fɔ du, na dat mek i tɔk se: “Mi na di Alfa ɛn di Omɛga.” (Rɛv. 21:6) Jiova go pruv se Setan na layman we nɔ ebul stɔp am fɔ du wetin i want. So we pɔsin tɔk se, “I rili wɔndaful bɔt a nɔ tink se i go kam tru,” rid ɛn ɛksplen Rɛvɛleshɔn 21:5, 6. Sho am di garanti we Jiova dɔn gi wi fɔ mek wi biliv se wetin i prɔmis go mɔs kam tru.​—Ayz. 65: 16. w23.11 7 ¶18-19

Jiova bin mek dis prɔmis to Ebraam we i bin ol 75 ia ɛn nɔ bin gɛt pikin. Fɔ se Ebraam bin si we da prɔmis de bin kam tru? I nɔ bin si ɔltin. Afta i krɔs di Yufretis Riva ɛn wet fɔ 25 ia, Ebraam bin si we dɛn bɔn in bɔypikin Ayzak bay mirekul ɛn afta 60 ia, i bin si we dɛn bɔn in granpikin dɛn Isɔ ɛn Jekɔb. (Ibru. 6:15.) Bɔt Ebraam nɔ bin ɛva si we in pikin dɛn bi gret neshɔn ɛn gɛt di land we Gɔd bin dɔn prɔmis. Bɔt da fetful man de bin gɛt tayt padi biznɛs wit di Wan we mek ɔltin. (Jems 2:23) Ɛn we Ebraam go gɛt layf bak, i go gladi fɔ no se bikɔs i bin peshɛnt ɛn gɛt fet, ɔl di neshɔn dɛn na di wɔl bin gɛt blɛsin! (Jɛn. 22:18) Wetin na di lɛsin fɔ wi? Sɔntɛm wi nɔ go de fɔ si we ɔl di tin dɛn we Jiova dɔn prɔmis kam tru. Bɔt if wi peshɛnt lɛk Ebraam, wi shɔ se Jiova go blɛs wi naw ɛn ivin blɛs wi mɔ insay In nyu wɔl we i dɔn prɔmis.​—Mak 10:29, 30. w23.08 24 ¶14

We Kiŋ Uzaya bin yɔŋ, i bin ɔmbul. I bin lan ‘fɔ fred Jiova.’ I bin liv fɔ 68 ia, ɛn Jiova bin blɛs am fɔ ɔl di tɛm dɛn we i bin fetful to am. (2 Kro. 26:1-4.) Uzaya bin win bɔku pan dɛn ɛnimi dɛn, ɛn i bin mek shɔ se dɛn protɛkt Jerusɛlɛm gud gud wan. (2 Kro. 26:6-15) Wan dawt nɔ de se Uzaya bin gladi fɔ wetin Gɔd bin ɛp am fɔ du. (Ɛkli. 3:12, 13) Kiŋ Uzaya bin dɔn yus fɔ tɛl ɔda pipul dɛn wetin fɔ du. Sɔntɛm na dat bin mek i fil se i kin du ɛnitin we i want. Wan de, Uzaya bin go insay Jiova in tɛmpul, ɛn i nɔ bin sho wan rɛspɛkt bay we i tray fɔ bɔn insɛns na di ɔlta we na sɔntin we kiŋ dɛn nɔ fɔ du. (2 Kro. 26:16-18) Ay Prist Azaraya bin tray fɔ kɔrɛkt am, bɔt Uzaya bin vɛks pan am bad bad wan. I sɔri fɔ no se Uzaya nɔ bin kɔntinyu fɔ fetful ɛn Jiova bin pɔnish am bay we i mek i gɛt lɛprɔsi. (2 Kro. 26:19-21) In layf fɔ dɔn bɛtɛ pas dat fa fawe if i bin kɔntinyu fɔ put insɛf dɔŋ! w23.09 10 ¶9-10

Ivin afta we Gɔd bin dɔn anɔynt apɔsul Pita wit oli spirit, i bin stil de mek mistek dɛn. Insay di ia 36 afta Krays, Pita bin de we Gɔd bin anɔynt Kɔnilyɔs we nɔto bin Ju wit oli spirit. Dis na bin klia pruf fɔ sho se “Gɔd nɔ de tek wan pɔsin bɛtɛ pas ɔda pɔsin” ɛn pipul dɛn we nɔto Ju kin bi pat pan di Kristian kɔngrigeshɔn. (Akt 10:34, 44, 45) Afta dat, Pita bin fil fri fɔ it wit ɔda pipul dɛn we nɔto Ju, ɛn dis na sɔntin we i nɔ bin fɔ dɔn ɛva du bifo dis tɛm. Bɔt, sɔm Ju Kristian dɛn bin fil se di wan dɛn we na Ju ɛn di wan dɛn we nɔto Ju nɔ fɔ it togɛda. We sɔm pipul dɛn we bin de tink da sem we de kam na Antiɔk, Pita bin stɔp fɔ it wit in brɔda dɛn we nɔto Ju, sɔntɛm i bin de fred se di Kristian dɛn we na Ju go vɛks. Apɔsul Pɔl bin si wetin Pita bin du, ɛn i kɔrɛkt am bifo ɔda pipul dɛn. (Gal. 2:13, 14) Pan ɔl we Pita bin mek dis mistek, i nɔ bin giv-ɔp. w23.09 22 ¶8

Na fɔ ɔnɛs wit yusɛf ɛn si usay yu nid fɔ du mɔ, bɔt nɔ pwɛlat. “Di Masta gud,” ɛn i go ɛp yu fɔ du mɔ. (1 Pit. 2:3) Apɔsul Pita ɛnkɔrej wi se: “Gɔd . . . Insɛf sɛf go dɔn fɔ tren una. I go mek una tinap tranga wan.” Fɔs, Pita bin fil se i nɔ fit fɔ de nia Gɔd in Pikin. (Lyuk 5:8) Bɔt di sɔpɔt we Jiova ɛn Jizɔs bin sɔpɔt Pita fɔ sho se dɛn lɛk am, bin ɛp Pita fɔ kɔntinyu fɔ fala Krays. So dat bin mek Jiova alaw Pita fɔ “ɛnta wit glori insay wi Masta ɛn Seviɔ Jizɔs Krays in Kiŋdɔm we go de sote go.” (2 Pit. 1:11) Dis na big big blɛsin! If yu nɔ giv-ɔp jɔs lɛk Pita ɛn alaw Jiova fɔ tren yu, yusɛf go gɛt di pe, we na layf we go de sote go. Yu ‘fet go mek yu sev.’​—1 Pit. 1:9. w23.09 31 ¶16-17

Di tabanakul bin gɛt wan kɔmpawnd. Na bin big eria we gɛt fɛns rayt rawnd usay di prist dɛn bin de du dɛn wok. Di big ɔlta we dɛn mek wit kɔpa usay dɛn bin de bɔn sakrifays bin de na di kɔmpawnd, ɛn i bin gɛt bol we dɛn mek wit kɔpa, ɛn wata bin de insay di bol we di prist dɛn bin de yuz fɔ klin dɛnsɛf bifo dɛn du dɛn wok. (Ɛks. 30:17-20; 40:6-8) Tide di anɔyntɛd dɛn de sav Jiova fetful insay di kɔmpawnd na in spirichwal tɛmpul we de na dis wɔl. Di big bol usay dɛn bin de put wata we bin de na di tabanakul ɛn di tɛmpul dɛn na impɔtant tin we fɔ mɛmba dɛn ɛn ɔl Kristian dɛn se dɛn fɔ kɔntinyu fɔ klin na Jiova in yay. So usay di “bɔku bɔku pipul dɛn de sav Jiova? Apɔsul Jɔn bin si dɛn “tinap bifo di tron,” we fiba di kɔmpawnd we de na do na dis wɔl usay “dɛn de wɔship [Gɔd] de ɛn nɛt na in tɛmpul.” (Rɛv. 7:9, 13-15) Wi rili gladi we Jiova dɔn gi wi di chans fɔ wɔship am na in gret spirichwal tɛmpul! w23.10 28 ¶15-16

Wan we aw Jiova de ɛnkɔrej wi na we i de yuz di ɛlda dɛn. (Ayz. 32:1, 2) So we yu de wɔri bɔt yu prɔblɛm dɛn, na fɔ tɛl di ɛlda dɛn. Na fɔ gladi fɔ tek di ɛp we dɛn gi yu. Jiova go yuz dɛn fɔ ɛnkɔrej yu. Di op we di Baybul de gi wi fɔ gɛt layf we go de sote go Paradays na dis wɔl ɔ fɔ de na ɛvin de mek wi gɛt trɛnk. (Rom. 4:3, 18-20) Wi op de ɛp wi fɔ bia prɔblɛm dɛn, fɔ prich di gud nyuz, ɛn fɔ du difrɛn wok dɛn na di kɔngrigeshɔn. (1 Tɛs. 1:3) Da sem op de bin ɛp apɔsul Pɔl fɔ gɛt trɛnk. Tin nɔ bin rili izi fɔ am, i “nɔ [bin] no wetin fɔ du,” “dɛn [bin] de mek [i] sɔfa,” ɛn dɛn bin “ib [am] dɔŋ.” Infakt, sɔntɛnde in layf bin de pan denja. (2 Kɔr. 4:8-10) Pɔl bin gɛt trɛnk fɔ bia bay we i bin de pe atɛnshɔn pan di op we i gɛt. 2 Kɔr. 4:16-18) Pɔl bin pe atɛnshɔn pan di op we i gɛt fɔ gɛt layf we go de sote go na ɛvin. Pɔl bin de tink gud wan bɔt da op de, ɛn bikɔs ɔf dat, i bin de fil se di pɔsin we i bi insay “de nyu ɛvride.” w23.10 15-16 ¶14-17

We yu de pre, tink if na di rayt tɛm dis fɔ mek Jiova ansa mi prea?’ Sɔntɛnde wi kin fil se Jiova nid fɔ ansa wi prea dɛn wantɛm wantɛm. Bɔt fɔ tru, Jiova no ustɛm fɔ ɛp wi. (Ibru. 4:16.) Sɔntɛnde, we Jiova nɔ ansa wi prea wantɛm wantɛm, wi kin tink se in ansa to wi prea na ‘Nɔ.’ Bɔt in ansa kin bi ‘Nɔto naw.’ Fɔ ɛgzampul, lɛ wi se wan yɔŋ brɔda pre fɔ mek i wɛl. Bɔt in bɔdi nɔ bɛtɛ. If Jiova pafɔm mirekul ɛn mek i wɛl, Setan go tɔk se na bikɔs Jiova dɔn mek di brɔda wɛl nain mek i de kɔntinyu fɔ sav am. Dɔn bak, Jiova dɔn ɔlrɛdi sɛt tɛm fɔ pul ɔl kayn sik. (Ayz. 33:24; Rɛv. 21:3, 4) Ɛn te da tɛm de kam, wi nɔ fɔ ɛkspɛkt se Jiova go yuz mirekul fɔ mek wi wɛl. So di brɔda kin pre to Jiova fɔ mek i ɛp am fɔ gɛt trɛnk ɛn kolat so dat i go ebul fɔ bia di sik ɛn kɔntinyu fɔ sav Gɔd fetful wan. w23.11 24 ¶13

Samsin bin dɔn mek siriɔs mistek, bɔt i nɔ bin giv-ɔp. I luk fɔ chans fɔ fɛt di Filistin dɛn, we na sɔntin we Jiova bin want am fɔ du. (Jɔj. 16:28-30) Samsin bin beg Jiova se: “Mek a tɔn-am-gi di Filistin dɛn.” Di tru Gɔd bin ansa Samsin in prea, ɛn i bin gi am spɛshal trɛnk bak. Dis tɛm, Samsin bin kil bɔku Filistin dɛn pas ɔl di ɔda tɛm dɛn. Pan ɔl we bad tin dɛn bin apin to Samsin bikɔs ɔf in mistek, i nɔ bin stɔp fɔ tray fɔ du wetin Jiova want. Ivin if wi mek mistek we go mek dɛn kɔrɛkt wi ɔ mek wi lɛf fɔ du di wok we wi bin de du na di kɔngrigeshɔn, wi nɔ fɔ giv-ɔp. Mɛmba se Jiova nɔ de giv-ɔp pan wi. (Sam 103:8, 9) Pan ɔl we wi kin mek mistek dɛn, Jiova go stil yuz wi, jɔs lɛk Samsin. w23.09 6 ¶15-16

Di bia we yu de bia de mek Jiova gladi. Bɔt dis nɔ min se Jiova gladi fɔ si we yu de sɔfa. Na yu i gladi fɔ. I de rili ɛnkɔrej wi fɔ no se Jiova de gladi we wi bia! (Sam 5:12) Mɛmba se Ebraam bin gɛt prɔblɛm dɛn ɛn Jiova bin gladi fɔ am we i bia dɛn. Jiova bin si am as In padi ɛn as pɔsin we de du wetin rayt. (Jɛn. 15:6; Rom. 4:13, 22) Wisɛf go ebul mek Jiova si wi as in padi ɛn pɔsin we de du wetin rayt. Gɔd nɔ de gladi fɔ wi bikɔs ɔf ɔmɔs wok wi de du ɔ usay wi de wok fɔ am. Bɔt Jiova kin gladi fɔ wi we wi bia prɔblɛm dɛn ɛn kɔntinyu fɔ sav am fetful wan. Ɛn ilɛk wetin de apin to wi, ɔmɔs ia wi ol, ɔ wetin wi sabi du, wi ɔl ebul fɔ bia. Yu gɛt prɔblɛm rayt naw we yu de bia fetful wan? If na so i bi, mɛmba se yu de mek Jiova gladi. We wi mɛmba se Gɔd gladi fɔ wi, dat de ɛp wi fɔ biliv mɔ ɛn mɔ se wi go gɛt di tin dɛn we wi op fɔ. w23.12 11 ¶13-14

Man we na Kristian nid fɔ lan fɔ lisin ɛn tɔk fayn fayn wan. Dis min se i nid fɔ lisin ɛn tray fɔ ɔndastand aw ɔda pipul dɛn de tink ɛn fil. (Prɔv. 20:5) I kin tray fɔ no wetin ɔda pipul dɛn de tink ɔ aw dɛn de fil bay aw dɛn vɔys de we dɛn de tɔk ɛn aw dɛn mek dɛn fes ɛn dɛn bɔdi. Yu nɔ go ebul fɔ du dis if yu nɔ de spɛn tɛm wit ɔda pipul dɛn. If na bay imel ɛn tɛks mɛsej yu dɔn yus fɔ tɔk to ɔda pipul dɛn, i nɔ go izi fɔ lɛ yu tɔk to dɛn fes-to-fes. So mek tɛm fɔ tɔk wit ɔda pipul dɛn fes-to-fes. (2 Jɔn 12) Man we na machɔ Kristian fɔ ebul bak sɔpɔt insɛf ɛn di wan dɛn we de na in os. (1 Tim. 5:8.) I fayn fɔ sabi du sɔntin we go ɛp yu fɔ fɛn wok. (Akt 18:2, 3; 20:34; Ɛfi. 4:28) Gɛt di abit fɔ wok tranga wan ɛn dɔn ɛni wok we yu stat. Ɔda pipul dɛn go notis dis abit ɛn tɔk gud tin bɔt yu wok. If yu du dat, i go izi mɔ fɔ mek yu gɛt wok ɛn wok nɔ go lɛf yu. w23.12 27 ¶12-13

We di Baybul de tɔk bɔt “Jiova in de,” i de tɔk bɔt di tɛm we Jiova go dɔnawe wit in ɛnimi dɛn ɛn sev in pipul dɛn. Trade, Jiova bin pɔnish sɔm neshɔn dɛn. (Ayz. 13:1, 6; Izi. 13:5; Zɛf. 1:8) Insay wi yon tɛm, “Jiova in de” go bigin we di wan dɛn we de bifo pan pɔlitiks go dɔnawe wit Babilɔn di Gret, ɛn i go dɔn insay Amagɛdɔn. Wi nid fɔ rɛdi naw so dat wi go sev da “de” de. Jizɔs bin tich wi se wi fɔ “rɛdi” fɔ di “big big trɔbul.” Dis min se wi nid fɔ rɛdi ɔltɛm. (Mat. 24:21; Lyuk 12:40) Insay di fɔs lɛta we apɔsul Pɔl bin rayt to di Kristian dɛn na Tɛsalonayka, i bin yuz difrɛn ɛgzampul dɛn fɔ ɛp Kristian dɛn fɔ kɔntinyu fɔ rɛdi fɔ Jiova in big big de we i go jɔj. Pɔl bin no se Jiova in de nɔ go kam da tɛm de. (2 Tɛs. 2:1-3) Bɔt stil, i bin ɛnkɔrej in brɔda dɛn fɔ rɛdi fɔ da de de lɛk se i de kam tumara, ɛn wisɛf fɔ fala in advays. w23.06 8 ¶1-2

Insay 1978, dɛn bin bil wan bildin we rili tɔl na Tokyo, insay Jepan. Pipul dɛn bin de wɔnda if da bildin de go kɔntinyu fɔ tinap, bikɔs bɔku atkwek dɛn bin de apin na da siti de. Wetin na bin di sikrit? Di injinia dɛn bin dizayn di bildin fɔ mek i go rili strɔng, ɛn dɛn bin mek am di kayn we we go mek ilɛk atkwek apin, i nɔ go fɔdɔm. Kristian dɛn tan lɛk da tɔl bildin de. Aw? Pɔsin we na Kristian fɔ ebul tinap tranga wan ɛn ebul fɔ ajɔst bak. I nid fɔ tinap tranga wan ɛn mekɔp in maynd fɔ obe Jiova in lɔ dɛn ɔltɛm. I “rɛdi fɔ obe” ɛn i nɔ de alaw ɛnitin fɔ ambɔg in padi biznɛs wit Jiova. Bɔt i nid fɔ bi pɔsin bak we “nɔ de pin,” ɔ we rɛdi fɔ ajɔst we nid de. (Jems 3:17) Pɔsin we na Kristian we dɔn lan fɔ biev dis kayn we nɔ go bi pɔsin we tu strikt ɔ pɔsin we de alaw ɛnitin. w23.07 14 ¶1-2

Jizɔs bin nid fɔ tinap tranga wan fɔ mek Setan nɔ tɛmt am fɔ du wetin bad ɛn ivin we Setan bin tɛl am fes-to-fes fɔ mek i nɔ kɔntinyu fɔ de biɛn Jiova. (Mat. 4:1-11) Setan bin dɔn mekɔp in maynd fɔ mek Jizɔs sin so dat i nɔ go ebul fɔ pe di prayz fɔ fri mɔtalman. We Jizɔs bin de du di prichin wok na di wɔl, i bin gɛt fɔ bia ɔda tɛst dɛn bak. In ɛnimi dɛn bin mek i sɔfa ɛn dɛn tray fɔ kil am. (Lyuk 4:28, 29; 13:31) I bin gɛt fɔ bia wit di mistek dɛn we in disaypul dɛn bin de mek. (Mak 9:33, 34) We dɛn bin de aks am kwɛstyɔn dɛn bifo dɛn kil am, dɛn bin de du bad bad tin dɛn to am ɛn provok am. Dɔn dɛn bin kil am lɛk kriminal, ɛn i bin rili sɔfa bifo i day. (Ibru. 12:1-3) I bin gɛt fɔ bia di las tɛst bifo i day, ɛn Jiova nɔ bin protɛkt am. (Mat. 27:46) Wi dɔn si klia wan se Jizɔs bin sɔfa bɔku tin dɛn fɔ mek i go ebul pe di prayz fɔ bay wi bak. We wi tink bɔt ɔl di sakrifays dɛn we Jizɔs bin rɛdi fɔ mek fɔ wi, dat nɔ de mek wi rili lɛk am? w24.01 10-11 ¶7-9

If wi na pɔsin we de peshɛnt, dat go mek wi gɛt gud padi biznɛs wit ɔda pipul dɛn. I go ɛp wi fɔ tek tɛm lisin we ɔda pipul dɛn de tɔk. (Jems 1:19) We wi de peshɛnt, dat de mek bak wi gɛt pis wit ɔda pipul dɛn. I go mek wi nɔ rɔsh fɔ du tin ɛn tɔk sɔntin we go mek ɔda pipul dɛn fil bad we wi strɛs. Ɛn if wi na pɔsin we de peshɛnt, wi nɔ go de vɛks kwik we sɔmbɔdi tɔk ɔ du sɔntin we mek wi fil bad. Bifo wi tɔn-am-gi, wi go “kɔntinyu fɔ bia [wi] kɔmpin dɛn ɛn fɔgiv dɛn fɔ fri.” (Kol. 3:12, 13). We wi bi pɔsin we de peshɛnt, dat go ɛp wi fɔ disayd fɔ du di rayt tin dɛn. Bifo wi rɔsh ɛn nɔ tink bifo wi du sɔntin, wi go tek tɛm du risach ɛn tink bɔt di bɛst tin we wi go disayd. Fɔ ɛgzampul, sɔntɛm if wi de fɛn wok, wi go want fɔ tek di fɔs wok we wi gɛt. Bɔt if wi na pɔsin we de peshɛnt, wi go tek tɛm tink bɔt aw dis wok go afɛkt wi famili ɛn wi padi biznɛs wit Jiova. If wi na pɔsin we de peshɛnt, wi go avɔyd fɔ disayd fɔ du tin dɛn we nɔ rayt. w23.08 22 ¶8-9

If yu at de pwɛl we yu mɛmba se yu nid fɔ fɛt agens di rɔng tin dɛn we yu de fil fɔ du, we yu tink bɔt di prɔmis we yu bin dɔn mek to Jiova we yu gi yu layf to am, dat go ɛp yu fɔ fɛt agens ɛnitin we go tɛmt yu. Aw? We yu gi yu layf to Jiova, yu dɔn sho se yu nɔ de fɔ yusɛf igen. Dis min se yu dɔn disayd nɔ fɔ du ɛnitin we go mek Jiova nɔ gladi. (Mat. 16:24) So we sɔntin tɛst yu, yu nɔ go gɛt wan dawt bɔt wetin fɔ du. Yu go dɔn ɔlrɛdi disayd wetin fɔ du, dat na fɔ kɔntinyu fɔ fetful to Jiova. Yu go mekɔp yu maynd fɔ kɔntinyu fɔ du tin dɛn we go mek Jiova gladi. We yu du dat, yu go tan lɛk Job. Pan ɔl we i bin gɛt siriɔs prɔblɛm dɛn, i bin sho se i dɔn mekɔp in maynd bay we i tɔk se: “A nɔ go lɛf fɔ waka tret na Gɔd in yay!”​—Job 27:5. w24.03 9 ¶6-7

Jiova we na “di Gɔd we gɛt lɔv,” de wit wi! (2 Kɔr. 13:11) I bisin bɔt wi wan bay wan. Wi biliv se “In lɔv we nɔ de ɛva chenj sɔrawnd” wi. (Sam 32:10) Di mɔ we wi de tink bɔt aw i dɔn sho se i lɛk wi, na di mɔ wi de si am as rial pɔsin, ɛn na di mɔ wi go fil se wi gɛt tayt padi biznɛs wit am. Wi nɔ fɔ fred fɔ pre to am ɛn tɛl am aw wi rili nid in lɔv. Wi kin tɛl am bɔt di tin dɛn we de mek wi wɔri bikɔs wi gɛt kɔnfidɛns se i de ɔndastand ɛn i rɛdi fɔ ɛp wi. (Sam 145:19) Jɔs lɛk aw wi kin go nia faya fɔ wam wisɛf we ples kol, na so wi de fil fɔ kam nia Jiova bikɔs i gɛt lɔv. So alaw Jiova in lɔv fɔ kɔrej yu ɛn gi yu kolat. Gladi bikɔs Jiova lɛk yu. Ɛn lɛ wi ɔl gri se i lɛk wi bay we wi de se: “A lɛk Jiova”!​—Sam 116:1. w24.01 31 ¶19-20

Jizɔs nɔ bin jɔs tɛl pipul dɛn se Gɔd in nem na Jiova, bɔt i bin du pas dat. Di Ju pipul dɛn we Jizɔs bin de tich bin ɔlrɛdi sabi Gɔd in nem. Bɔt na Jizɔs bin de bifo fɔ “ɛksplen bɔt Am.” (Jɔn 1:17, 18) Fɔ ɛgzampul, di Ibru Skripchɔ dɛn sho se Jiova na Gɔd we gɛt sɔri-at. (Ɛks. 34:5-7) Jizɔs bin sho klia wan se dis na tru bay we i pul wan parebul bɔt wan trangayes bɔbɔ ɛn in papa. Insay da stori de, wi lan se we di papa si in bɔypikin we bin dɔn ripɛnt, i rɔn go mit am “we i de fa de kam,” i ɔg am, ɛn fɔgiv am wit ɔl in at. Dis stori sho klia wan aw Jiova de sho sɔri-at. (Lyuk 15:11-32) Jizɔs ɛp wi fɔ ɔndastand uskayn pɔsin in Papa rili bi. w24.02 10 ¶8-9

Jiova de kɔrej di wan dɛn we gɛt prɔblɛm ɛn ɛp dɛn fɔ fil fayn. Aw wi go falamakata Jiova fɔ sho sɔri-at to ɔda pipul dɛn ɛn kɔrej dɛn? Wan we aw wi go du dat na we wi tray fɔ gɛt kwaliti dɛn we go ɛp wi fɔ sɔri fɔ pipul dɛn ɛn kɔrej dɛn. Wetin na sɔm pan dɛn kwaliti dɛn ya? Wetin go ɛp wi fɔ gɛt di lɔv we wi nid fɔ kɔntinyu fɔ “kɔrej [wi] kɔmpin dɛn” ɛvride? (1 Tɛs. 4:18) Wi nid fɔ gɛt fayn kwaliti dɛn lɛk, fɔ fil fɔ wi kɔmpin dɛn, fɔ rili lɛk wisɛf lɛk aw brɔda dɛn kin lɛk dɛnsɛf, ɛn fɔ du gud. (Kol. 3:12; 1 Pit. 3:8.) Aw dɛn kwaliti dɛn ya go ɛp wi? We wi de sɔri fɔ wi brɔda ɛn sista dɛn ɛn rili bisin bɔt dɛn, dat go mek wi rili want fɔ kɔrej dɛn we dɛn de sɔfa. Lɛk aw Jizɔs tɔk, “Na wetin ful-ɔp na pɔsin in at na in i de tɔk. Di gud man de tɔk gud tin dɛn, bikɔs i gɛt gud tin dɛn na in at.” (Mat. 12:34, 35) We wi de kɔrej wi brɔda ɛn sista dɛn we nid kɔrej, dat rili impɔtant bikɔs i de sho se wi lɛk dɛn. w23.11 10 ¶10-11

If wi want fɔ ɔndastand Baybul prɔfɛsi, wi nid fɔ aks fɔ ɛp. Tink bɔt dis ɛgzampul. Imajin se yu go waka na ples we yu nɔ sabi, bɔt yu padi we go wit yu sabi di ples gud gud wan. I no usay una de ɛn usay una go rich if una pas na ɛni rod. Wan dawt nɔ de se yu go gladi bikɔs yu padi gri fɔ go wit yu! Jiova tan lɛk da padi de. I no gud gud wan wetin go apin to wi tumara bambay. So fɔ lɛ wi ɔndastand Baybul prɔfɛsi, wi nid fɔ put wisɛf dɔŋ ɛn beg Jiova fɔ ɛp wi. (Dan. 2:28; 2 Pit. 1:19, 20) Jɔs lɛk ɛni gud mama ɔ papa, Jiova want in pikin dɛn fɔ ɛnjɔy tumara bambay. (Jɛr. 29:11.) Bɔt Jiova ebul fɔ du sɔntin we no mama ɔ papa nɔ ebul fɔ du, dat na fɔ tɔk kɔrɛkt wan bɔt wetin gɛt fɔ apin tumara bambay. I mek dɛn rayt prɔfɛsi dɛn na in Wɔd so dat wi go no bɔt impɔtant tin dɛn bifo dɛn apin.—Ayz. 46:10. w23.08 8 ¶3-4