Lɛ Wi Ɛnkɔrej Wi Kɔmpin dɛn we Wi De na Mitin

1. Wetin mek wi kin gi kɔmɛnt na mitin?

WETIN mek wi kin atɛnd wi mitin dɛn na wi kɔngrigeshɔn? Di men rizin na fɔ prez Jiova. (Sam 26:​12; 111:​1) Wi kin atɛnd mitin bak fɔ ɛnkɔrej wi kɔmpin dɛn insay dis tɛm we nɔ izi. (1 Tɛs. 5:​11) Wi de ɛp fɔ du dɛn tu tin dɛn ya ɛnitɛm we wi es wi an ɛn gi kɔmɛnt.

2. Us chans dɛn wi gɛt fɔ gi kɔmɛnt na mitin?

² Ɛvri wik, wi kin gɛt chans dɛn fɔ gi kɔmɛnt na wi mitin dɛn. Fɔ ɛgzampul, we wi kin go mitin insay di wikɛnd, wi kin tek pat pan di kɔngrigeshɔn Wachtawa Stɔdi. We wi kin go mitin insay di wik, wi kin gi kɔmɛnt di tɛm we wi de du di pat we nem Luk Gud Wan fɔ di Valyu Tin dɛn na Gɔd in Wɔd, di Kɔngrigeshɔn Baybul Stɔdi, ɛn ɔda pat dɛn we dɛn kin aks di ɔdiɛns kwɛstyɔn.

3. Wetin kin mek i nɔ izi fɔ lɛ wi gi kɔmɛnt? Aw Ibruz 10:​24, 25 go ɛp wi?

³ Wi ɔl want fɔ prez Jiova ɛn ɛnkɔrej wi kɔmpin Kristian dɛn. Bɔt sɔm tin dɛn de we kin mek i nɔ izi fɔ lɛ wi gi kɔmɛnt. Sɔntɛm wi de fred fɔ gi kɔmɛnt, ɔ wi go rili want fɔ gi mɔ kɔmɛnt, bɔt sɔntɛnde di brɔda dɛn nɔ kin kɔl wi we wi es wi an. Wetin go ɛp wi if ɛniwan pan dɛn tu tin dɛn ya de apin to wi? Di lɛta we apɔsul Pɔl bin rayt to di Ibru Kristian dɛn go ɛp wi fɔ fɛn di ansa. We Pɔl bin de tɔk bɔt aw i impɔtant fɔ mit togɛda, i bin tɔk se wi fɔ pe atɛnshɔn fɔ “ɛnkɔrej wi kɔmpin dɛn.” (Rid Ibruz 10:​24, 25.) We wi mɛmba se wi kin ɛnkɔrej ɔda pipul dɛn na di ɔdiɛns bay we wi de gi simpul kɔmɛnt dɛn we de tɔk bɔt wi fet, dat go ɛp wi fɔ lɛ wi nɔ fred fɔ es wi an. Ɛn if dɛn nɔ kɔl wi ɔltɛm, wi go gladi we ɔda pipul dɛn na di kɔngrigeshɔn gɛt chans fɔ gi kɔmɛnt.—1 Pit. 3:​8.

4. Us tri pɔynt dɛn wi go tɔk bɔt insay dis atikul?

⁴ Insay dis atikul, wi go tɔk fɔs bɔt aw wi go ɛnkɔrej wi kɔmpin dɛn we wi de na smɔl kɔngrigeshɔn usay bɔku pipul dɛn nɔ de fɔ gi kɔmɛnt. Dɔn, wi go tɔk bɔt aw wi go ɛnkɔrej wi kɔmpin dɛn we wi de na big kɔngrigeshɔn usay bɔku pipul dɛn kin es dɛn an fɔ gi kɔmɛnt. Di las tin we wi go tɔk bɔt na difrɛn we dɛn we wi go ebul ɛnkɔrej ɔda pipul dɛn bay wetin wi de tɔk we wi de gi kɔmɛnt.

ƐNKƆREJ YU KƆMPIN DƐN NA SMƆL KƆNGRIGESHƆN

5. Aw wi go ɛnkɔrej wi kɔmpin dɛn if wi nɔ bɔku na mitin?

⁵ Bɔku pipul dɛn nɔ kin es dɛn an fɔ gi kɔmɛnt na smɔl kɔngrigeshɔn ɔ grup. Sɔntɛnde, di brɔda we de kɔndɔkt kin nid fɔ wet smɔl bifo pɔsin es in an fɔ gi kɔmɛnt. Dat kin mek i luk lɛk se di mitin de te pas aw i fɔ te, ɛn dat nɔto sɔntin we de ɛnkɔrej ɔda pipul dɛn. Bɔt wetin yu go ebul du? Rɛdi fɔ es yu an fast fast. We yu du dat, sɔntɛm yu go ɛnkɔrej ɔda pipul dɛn fɔ mek dɛnsɛf de es dɛn an fast fast.

6-7. Wetin go ɛp wi fɔ lɛ wi nɔ fred bɛtɛ fɔ gi kɔmɛnt?

⁶ Wetin yu go du if yu de fred fɔ kɔmɛnt? Wɛl, bɔku pipul dɛn kin fil da we de. Bɔt fɔ mek yu go ebul fɔ ɛnkɔrej yu brɔda ɛn sista dɛn mɔ ɛn mɔ, yu nɔ tink se i go fayn fɔ lan bɔt tin dɛn we go ɛp yu fɔ lɛ yu nɔ fred fɔ kɔmɛnt? Aw yu go du dat?

⁷ Sɔntɛm i go fayn fɔ go ova di pɔynt dɛn na Wachtawa atikul dɛn we wi bin dɔn stɔdi trade we de tɔk bɔt fɔ gi kɔmɛnt.b Fɔ ɛgzampul, pripia fayn. (Prɔv. 21:​5) Di mɔ yu sabi di tin we wi de stɔdi, na di mɔ i go izi fɔ lɛ yu es yu an fɔ gi kɔmɛnt. Dɔn bak, gi shɔt kɔmɛnt. (Prɔv. 15:​23; 17:​27) Shɔt kɔmɛnt kin mek yu nɔ fred bɛtɛ. I go bi se yu brɔda ɛn sista dɛn go ivin ɔndastand shɔt kɔmɛnt pas di lɔng wan we gɛt bɔku pɔynt dɛn. We yu gi shɔt kɔmɛnt yu yon we, yu de sho se yu pripia fayn fayn wan ɛn yu rili ɔndastand wetin una de stɔdi.

8. Aw Jiova de si di tray we wi de tray fɔ gi am wi bɛst?

⁸ Wetin yu go du if yu dɔn tray fɔ du sɔm pan dɛn tin dɛn ya bɔt yu stil de fred fɔ gi kɔmɛnt pas wan ɔ tu tɛm? Mɛmba se Jiova go gladi bikɔs yu rili tray fɔ du wetin yu ebul. (Lyuk 21:​1-4) Fɔ gi yu bɛst nɔ min se yu fɔ stren yusɛf. (Fil. 4:​5) Tray fɔ no wetin yu ebul du, sɛt gol fɔ du am, ɛn pre fɔ mek Jiova ɛp yu lɛ yu nɔ wɔri. Sɔntɛm di fɔs gol we yu go sɛt na fɔ gi wan kɔmɛnt we shɔt.

ƐNKƆREJ YU KƆMPIN DƐN NA BIG KƆNGRIGESHƆN

9. Wetin kin mek i nɔ izi fɔ gi kɔmɛnt na big kɔngrigeshɔn?

⁹ If bɔku pɔblisha dɛn de na yu kɔngrigeshɔn, sɔntɛm yu go gɛt difrɛn prɔblɛm. I go bi se bɔku brɔda ɛn sista dɛn kin es dɛn an fɔ kɔmɛnt, ɛn dat kin mek dɛn nɔ de kɔl yu fast fast. Wan sista we nem Diniɛl kin lɛk fɔ kɔmɛnt na mitin ɔltɛm.c I kin si am as pat pan in wɔship, we fɔ ɛnkɔrej ɔda pipul dɛn, ɛn we fɔ mek i gɛt mɔ fet pan di tin dɛn we i de lan na di Baybul. Bɔt we i bin go na big kɔngrigeshɔn, dɛn nɔ bin de kɔl am ɔltɛm; sɔntɛnde dɛn nɔ bin de ivin kɔl am te mitin dɔn. I tɔk se: “A bin de rili fil bad. A bin de fil se a dɔn lɔs di chans fɔ du sɔntin we rili impɔtant. We i bin de apin ɔltɛm, a bigin wɔnda if na bay wilful di brɔda dɛn nɔ de kɔl mi.”

10. Wetin wi go du fɔ gɛt mɔ chans fɔ gi kɔmɛnt na mitin?

¹⁰ Yu dɔn ɛva fil di sem we aw Diniɛl de fil? If na so i bi, sɔntɛm yu go tink se i bɛtɛ lɛ yu giv-ɔp ɛn jɔs lisin to di mitin. Bɔt nɔ ɛva stɔp fɔ tray fɔ gi kɔmɛnt. Wetin na sɔm tin dɛn we yu go ebul fɔ du? Sɔntɛm i go fayn fɔ lɛ yu pripia bɔku kɔmɛnt dɛn fɔ ɛni mitin. Da tɛm de, if dɛn nɔ kɔl yu we di stɔdi stat, yu go stil gɛt chans fɔ kɔmɛnt we di mitin de go ɔn. We yu de pripia fɔ di Wachtawa Stɔdi, tink bɔt aw ɔl di paregraf dɛn gɛt sɔntin fɔ du wit di atikul in taytul. If yu du dat, i go mɔs bi se yu go gɛt sɔntin fɔ tɔk as di stɔdi de go ɔn. Dɔn bak, wan ɔda tin we yu kin du na fɔ pripia kɔmɛnt fɔ paregraf dɛn we de tɔk bɔt di dip tin dɛn na di Baybul we at fɔ ɛksplen. (1 Kɔr. 2:​10) Wetin mek? Bikɔs i go mɔs bi se bɔku pipul dɛn nɔ go es dɛn an we wi rich da pat de na di stɔdi. Bɔt wetin yu go du if yu dɔn tray fɔ du ɔl dɛn tin ya ɛn yu stil nɔ de gɛt chans fɔ gi kɔmɛnt na mitin? Wan tin we yu kin du na fɔ go mit di brɔda we de kɔndɔkt bifo mitin stat ɛn tɛl am di kwɛstyɔn we yu go lɛk fɔ ansa.

11. Wetin Filipians 2:​4 de ɛnkɔrej wi fɔ du?

¹¹ Rid Filipians 2:​4. Gɔd bin dayrɛkt apɔsul Pɔl fɔ ɛnkɔrej Kristian dɛn fɔ tink bɔt wetin ɔda pipul dɛn want. Aw wi go fala dis advays we wi de na mitin? Na we wi mɛmba se jɔs lɛk aw wi want fɔ kɔmɛnt na so ɔda pipul dɛn bak want fɔ kɔmɛnt.

12. Wetin na wan fayn we fɔ ɛnkɔrej ɔda pipul dɛn na mitin? (Luk bak di pikchɔ.)

¹² Tink bɔt am dis we. We yu de tɔk wit yu padi dɛn, fɔ se na yu wan kin tɔk te dɛn nɔ gɛt chans fɔ tɔk? Nɔ, nɔto so i bi. Yu kin want fɔ mek dɛnsɛf tɔk. Semweso, we wi de na mitin, wi want fɔ alaw bɔku pipul dɛn fɔ gi kɔmɛnt. Infakt, wan pan di bɛst we dɛn fɔ ɛnkɔrej wi brɔda ɛn sista dɛn na we wi gi dɛn chans fɔ tɔk bɔt dɛn fet. (1 Kɔr. 10:​24) Lɛ wi tɔk bɔt aw wi go ebul fɔ du dat.

13. Aw wi go alaw mɔ pipul dɛn na di ɔdiɛns fɔ gi kɔmɛnt?

¹³ Wan tin we wi kin du na fɔ gi shɔt kɔmɛnt, so dat tɛm go de fɔ mek ɔda pipul dɛnsɛf gi kɔmɛnt. Ɛlda dɛn ɛn ɔda pɔblisha dɛn we gɛt ɛkspiriɛns kin sɛt fayn ɛgzampul we i kam to dis. Ilɛksɛf yu de gi shɔt kɔmɛnt, avɔyd fɔ tɔk bɔt bɔku pɔynt dɛn. If yu tɔk bɔt ɔltin we de na di paregraf, bɛtɛ tin nɔ go de fɔ lɛ ɔda pipul dɛn tɔk bɔt. Fɔ ɛgzampul, dis paregraf tɔk bɔt tu tin dɛn, we na fɔ gi shɔt kɔmɛnt ɛn avɔyd fɔ tɔk bɔt bɔku pɔynt dɛn. If na yu fɔs dɛn kɔl fɔ gi kɔmɛnt na dis paregraf, yu nɔ tink se i go fayn fɔ jɔs tɔk bɔt wan pan dɛn pɔynt dɛn ya?

14. Wetin go ɛp wi fɔ disayd ɔmɔs tɛm wi fɔ es wi an? (Luk bak di pikchɔ.)

¹⁴ Yuz yu sɛns we yu de disayd ɔmɔs tɛm yu go es yu an fɔ gi kɔmɛnt. If wi de es wi an fast fast, sɔntɛm wi go mek di brɔda we de kɔndɔkt fil se i fɔ kɔl wi ɔltɛm, pan ɔl we ɔda pipul dɛn nɔ kin dɔn gi kɔmɛnt yet. Dis go mek ɔda pipul dɛn nɔ want fɔ es dɛn an igen.—Ɛkli. 3:​7.

15. (a) Wetin wi fɔ du if dɛn nɔ kɔl wi fɔ gi kɔmɛnt? (b) Aw di brɔda dɛn we de kɔndɔkt go sho se dɛn de tink bɔt ɔlman? (Rid di bɔks we gɛt di taytul “If Na Yu De Kɔndɔkt.”)

¹⁵ We bɔku pɔblisha dɛn de es dɛn an fɔ gi kɔmɛnt, sɔntɛm wi nɔ go gɛt chans fɔ gi kɔmɛnt ɔl di tɛm dɛn we wi go want fɔ gi kɔmɛnt. Sɔntɛnde, di brɔda we de kɔndɔkt nɔ kin ebul fɔ kɔl wi atɔl. Dat kin mek wi at pwɛl, bɔt wi fɔ tray lɛ wi nɔ fil bad if dɛn nɔ kɔl wi.—Ɛkli. 7:​9.

16. Aw wi go ɛnkɔrej ɔda pipul dɛn we de gi kɔmɛnt?

¹⁶ If yu nɔ ebul fɔ gi kɔmɛnt ɔl di tɛm dɛn we yu go want fɔ gi kɔmɛnt, yu nɔ tink se i go fayn fɔ tek tɛm lisin we ɔda pipul dɛn de gi dɛn yon kɔmɛnt ɛn tɛl dɛn tɛnki afta mitin? I go mɔs bi se we yu tɛl yu brɔda ɛn sista dɛn tɛnki, dat go ɛnkɔrej dɛn jɔs lɛk aw yu kɔmɛnt bin fɔ dɔn ɛnkɔrej dɛn. (Prɔv. 10:​21) We wi de tɛl tɛnki, dat na ɔda we fɔ ɛnkɔrej wi kɔmpin dɛn.

ƆDA WE DƐN FƆ ƐNKƆREJ WI KƆMPIN DƐN

17. (a) Aw mama ɛn papa dɛn go ɛp dɛn pikin dɛn fɔ pripia kɔmɛnt we dɛn go ebul fɔ gi? (b) Akɔdin to di vidio, wetin na di 4 tin dɛn we wi fɔ du fɔ pripia kɔmɛnt? (Luk bak di futnot.)

¹⁷ Us ɔda we wi go ebul fɔ ɛnkɔrej wi kɔmpin dɛn na mitin? If yu na mama ɔ papa, ɛp yu pikin dɛn fɔ pripia kɔmɛnt dɛn we dɛn go ebul fɔ gi akɔdin to dɛn ej. (Mat. 21:​16) Sɔntɛnde, if wi de stɔdi bɔt siriɔs tin dɛn lɛk mared prɔblɛm ɔ di we aw Gɔd want wi fɔ liv, sɔntɛm wan ɔ tu paregraf go de we pikin go ebul kɔmɛnt pan. Dɔn bak, ɛp yu pikin dɛn fɔ ɔndastand wetin mek dɛn nɔ go kɔl dɛn ɛnitɛm we dɛn es dɛn an. If yu ɛksplen dis to dɛn, i go ɛp dɛn fɔ lɛ dɛn nɔ fil bad we dɛn nɔ kɔl dɛn.—1 Tim. 6:​18.d

18. Aw wi go avɔyd fɔ mek pipul dɛn pe atɛnshɔn to wi we wi de gi kɔmɛnt? (Prɔvabs 27:​2)

¹⁸ Wi ɔl kin pripia fayn kɔmɛnt dɛn we de ɔnɔ Jiova ɛn ɛnkɔrej wi kɔmpin Kristian dɛn. (Prɔv. 25:​11) Na tru se tɛm dɛn de we wi kin gi shɔt kɔmɛnt bɔt wi ɛkspiriɛns, bɔt wi fɔ tray lɛ wi nɔ tɔk tumɔs bɔt wisɛf. (Rid Prɔvabs 27:​2; 2 Kɔr. 10:​18) Bifo wi tɔk tumɔs bɔt wisɛf, wi fɔ tray fɔ tɔk mɔ bɔt Jiova, in Wɔd, ɛn ɔl in pipul dɛn we de wɔship am. (Rɛv. 4:​11) Bɔt if di kwɛstyɔn fɔ wan paregraf aks wi fɔ tɔk sɔntin bɔt wisɛf, i go fayn fɔ lɛ wi du dat. Dis kayn ɛgzampul de na di nɛks paregraf insay dis atikul.

19. (a) Wetin go apin we wi sho se wi de tink bɔt ɔlman we atɛnd mitin? (Romans 1:​11, 12) (b) Wetin yu lɛk bɔt fɔ gi kɔmɛnt na mitin?

¹⁹ Na tru se no strikt lɔ nɔ de bɔt aw fɔ gi kɔmɛnt, bɔt wi ɔl fɔ tray fɔ ɛnkɔrej wi kɔmpin dɛn. Sɔntɛm dis go min se wi go gi bɔku kɔmɛnt. Ɔ sɔntɛm i go min se wi fɔ satisfay wit di chans dɛn we wi gɛt fɔ gi kɔmɛnt ɛn gladi we ɔda pipul dɛn bak gɛt chans fɔ gi dɛn yon kɔmɛnt. We wi tink mɔ bɔt ɔda pipul dɛn we wi de na mitin, wi ɔl go ebul fɔ “ɛnkɔrej wisɛf.”—Rid Romans 1:​11, 12.