We Wi Sho se Wi Bisin bɔt Ɔda Pipul dɛn, Dat Go Mek Wi Gɛt Blɛsin Sote Go

Papa na bin ɛlda na di Yunaytɛd Chɔch na Kanada we bin de na wi eria, so ɛni wik, i bin de sɛn mi ɛn mi sista na Sɔnde skul. We wi kɔmɔt de, wi bin de jɔyn am fɔ di chɔch savis we bin de stat ilɛvin oklɔk na mɔnin. Dɔn wi bin de go wit wi mama na Kiŋdɔm Ɔl santɛm. I bin izi fɔ lɛ wi si aw di tu rilijɔn dɛn difrɛn.

Mama bin ɛksplen wetin i bin de lan frɔm di Baybul to ingud padi dɛn we na Bɔb ɛn Mariɔn Ɔchisin ɛn dɛnsɛf bin kam fɔ bi Jiova Witnɛs. Ɛn dɛnsɛf bin leta bi Jiova Witnɛs. Insay 1958, Brɔda ɛn Sista Ɔchisin bin go wit mi ɛn dɛn tri bɔypikin dɛn na di Divine Will International Assembly insay Nyu Yɔk Siti, we bin las fɔ et dez. Na naw a no se i nɔ bin izi fɔ mek dɛn go wit mi, bɔt da asɛmbli de na wan pan di bɛst tin dɛn we a nɔ go ɛva fɔgɛt na mi layf.

BRƆDA ƐN SISTA DƐN BIN ƐP MI FƆ DU MƆ NA JIOVA IN SAVIS

We mi na bin tineja, wi bin de na wan fam usay a bin de ɛnjɔy fɔ kia fɔ animal dɛn. So a bin de tink fɔ go stɔdi fɔ bi dɔktɔ fɔ animal dɛn. Mi mama bin tɛl wan ɛlda na di kɔngrigeshɔn bɔt dis tin we a want fɔ du. Di ɛlda tek tɛm mɛmba mi se wi de na “di las dez” ɛn i aks mi aw mi padi biznɛs wit Jiova go tan lɛk if a go yuz bɔku tɛm fɔ stɔdi na yunivasiti. (2 Tim. 3:​1) So dis bin mek a disayd se a nɔ go go yunivasiti.

A bin stil de wɔnda wetin a go du we a dɔn skul. Pan ɔl we a bin de go fil savis ɛni wikɛnd, a nɔ bin de ɛnjɔy fɔ prich, ɛn a nɔ bin tink se a go ebul bi payɔnia. Mi papa ɛn mi ɔnkul we nɔto bin Jiova Witnɛs bin de ɛnkɔrej mi fɔ wok ful-taym na wan big inshɔrans kɔmni na Toronto. Mi ɔnkul na bin bigman na da kɔmni de, so a bin gri fɔ tek di wok.

We a bin de na Toronto, a bin de yuz bɔku pan mi tɛm fɔ wok ɛn fɔ de wit pipul dɛn we nɔto Jiova Witnɛs, so dis bin mek a nɔ bin de atɛnd mitin ɛn go fil savis ɔltɛm. A bin de wit mi granpa we nɔto Jiova Witnɛs, bɔt afta i day, a bin nid fɔ go de ɔdasay.

Brɔda ɛn Sista Ɔchisin we bin go wit mi na di 1958 kɔnvɛnshɔn bin tan lɛk mama ɛn papa to mi. Dɛn bin tɛl mi fɔ kam de wit dɛn, ɛn dɛn ɛp mi fɔ gɛt tayt padi biznɛs wit Jiova. Insay 1960, mi ɛn dɛn bɔypikin we nem Jɔn bin baptayz. Jɔn bigin fɔ payɔnia; dis bin ɛnkɔrej mi fɔ du mɔ na di prichin wok. Di brɔda dɛn na di kɔngrigeshɔn bin notis se a de go bifo pan Gɔd biznɛs, so leta dɛn mek a bi di Tiokratik Ministri Skul savant.a

A BIN GƐT WƆNDAFUL PATNA ƐN A STAT FƆ PAYƆNIA

Insay 1966, a mared Randi Bag, we na wan payɔnia sista we gɛt zil ɛn we bin rili want fɔ prich usay dɛn nid mɔ pipul dɛn. Wi sakit ovasia bin rili bisin bɔt wi, ɛn i ɛnkɔrej wi fɔ go ɛp di kɔngrigeshɔn na Orilia, insay Ɔntario. So wi bin muf go de wantɛm wantɛm.

We wi rich na Orilia, a jɔyn Randi fɔ bigin rɛgyula payɔnia. A bin dɔn ɔlrɛdi gɛt di kayn zil we i bin gɛt. Afta a stat fɔ wok tranga wan fɔ bi gud rɛgyula payɔnia, a bin gladi fɔ yuz di Baybul ɛn fɔ si we pipul dɛn de ɔndastand am. Na bin rial blɛsin fɔ ɛp wan maredman ɛn in wɛf na Orilia we bin mek chenj dɛn na dɛn layf ɛn bi Jiova in savant dɛn.

WI LAN NYU LANGWEJ ƐN CHENJ DI WE AW WI DE TINK

Wan tɛm we a bin go waka na Toronto, a mit Anɔld MakNamara, we na bin wan pan di brɔda dɛn we de bifo na Bɛtɛl. I bin aks if wi go lɛk fɔ bi spɛshal payɔnia. Wantɛm wantɛm, a ansa am se: “Yɛs! Wi rɛdi fɔ go ɛnisay wans nɔto Kyubɛk!” A bin alaw di bad we aw di pipul dɛn we de tɔk Inglish na Kanada bin de fil bɔt di pipul dɛn we de tɔk Frɛnch na Kyubɛk fɔ afɛkt mi. Dɛn tɛm dɛn de, pipul dɛn bin de rayɔt agens di gɔvmɛnt, ɛn dɛn bin want fɔ mek Kyubɛk nɔ bin wan pan di tɔŋ dɛn na Kanada.

Anɔld bin ansa mi se, “Na Kyubɛk na di wangren ples usay di branch de sɛn spɛshal payɔnia dɛn rayt naw.” So wantɛm wantɛm a gri fɔ go. A bin ɔlrɛdi no se Randi bin want fɔ go sav de. Leta, a bin kam fɔ no se dis na wan pan di bɛst tin dɛn we wi bin disayd fɔ du na wi layf.

Afta wi lan Frɛnch fɔ fayv wik, mi ɛn Randi wit wan brɔda ɛn in wɛf bin go na Rimuski, we bin de lɛk 540 kilomita (336 mayl) na di nɔt ist pat na Mɔntrial. Wi bin stil gɛt bɔku tin fɔ lan, ɛn wi bin si dat klia wan na wan mitin usay a bin de rid sɔm anawnsmɛnt dɛn. Bifo a tɔk se bɔku “Ɔstrian brɔda ɛn sista dɛn” go atɛnd di kɔnvɛnshɔn, a bin mistek tɔk se wi go gɛt bɔku “ɔstrich brɔda ɛn sista dɛn” we go atɛnd di kɔnvɛnshɔn.

We wi bin de na Rimuski, 4 sista dɛn we nɔ mared ɛn we bin gɛt zil bin jɔyn mi ɛn Randi wit di ɔda brɔda ɛn in wɛf. Dɔn bak, Brɔda ɛn Sista Yubado ɛn dɛn tu galpikin dɛn bin jɔyn wi. Brɔda ɛn Sista Yubado bin rɛnt wan big os, ɛn ɔl di payɔnia dɛn we bin de de bin de ɛp fɔ pe di rɛnt. Wi bin de kɔl am Wayt Aws bikɔs di frɔnt pat na di os bin wayt ɛn i bin gɛt wayt pila dɛn. Bɔku tɛm, na arawnd 12 to 14 pipul dɛn kin de na di os. Bikɔs mi ɛn Randi na bin spɛshal payɔnia dɛn, wi bin de prich na mɔnin, aftanun, ɛn ivintɛm. So wi bin rili gladi we pɔsin kin de ɔltɛm fɔ jɔyn wi na fil savis; ivin dɛn ivintɛm dɛn we ples kin rili kol.

Wi bin kam fɔ gɛt tayt padi biznɛs wit dɛn fetful payɔnia dɛn ya, ɛn i bin tan lɛk se wi na famili. Sɔntɛnde, wi bin de sidɔm rawnd bɔnfaya ɔ wi bin gɛt de we wi ɔl de kuk togɛda. Wan pan di brɔda dɛn na bin myuzishian, so bɔku tɛm wi bin de siŋ ɛn dans Satide nɛt dɛn.

Bɔku pipul dɛn na Rimuski bin want fɔ lan bɔt di Baybul. Insay fayv ia, wi bin gladi fɔ si we bɔku Baybul studɛnt dɛn de baptayz. Di kɔngrigeshɔn bin gɛt lɛk 35 pɔblisha dɛn.

We wi bin de na Kyubɛk, wi bin gɛt fayn trenin as pipul dɛn we de prich. Wi bin si aw Jiova ɛp wi na di prichin wok ɛn wit di tin dɛn we wi nid fɔ liv. Dɔn bak, wi bin lan fɔ lɛk di pipul dɛn we de tɔk Frɛnch. Wi bin lɛk bak dɛn langwej ɛn dɛn kɔlchɔ, ɛn dis bin mek wi kam fɔ lɛk ɔda kɔlchɔ dɛn bak.—2 Kɔr. 6:​13.

Sɔntin we wi nɔ bin de ɛkspɛkt bin apin. Di branch bin tɛl wi fɔ muf go na di tɔŋ we nem Trakadi, we bin de na di ist pat na Nyu Brunswik. Dis na tin we nɔ bin izi fɔ wi bikɔs wi bin jɔs dɔn sayn kɔntrakt fɔ rɛnt wan os ɛn a bin de tich fɔ sɔm awa insay di wik na wan skul. Dɔn bak, sɔm pan wi Baybul studɛnt dɛn bin jɔs dɔn bi pɔblisha ɛn wi bin de bil wan Kiŋdɔm Ɔl.

Wi bin pre da wikɛnd de bɔt di muf we wi fɔ muf. Dɔn wi go waka na Trakadi, we bin rili difrɛn frɔm Rimuski. Bɔt wi bin disayd se bikɔs Jiova want wi fɔ go de, wi go go. Wi bin tɛst Jiova, ɛn wi si aw i ɛp wi wit ɔl di tin dɛn we nɔ bin izi fɔ wi. (Mal. 3:​10) Bikɔs Randi bin gɛt tayt padi biznɛs wit Jiova, i nɔ bin jɔs bisin bɔt insɛf, ɛn in na pɔsin we fɔni, i bin izi fɔ lɛ wi muf.

Di wangren ɛlda we bin de na wi kɔngrigeshɔn na Rɔbɔt Rɔs. In ɛn in wɛf we nem Linda bin dɔn payɔnia de, ɛn dɛn bin disayd fɔ kɔntinyu fɔ de de afta dɛn bɔn dɛn fɔs pikin. Pan ɔl we dɛn bin de kia fɔ dɛn bɔypikin we bin smɔl, dɛn bin rili ɛnkɔrej mi ɛn Randi bikɔs dɛn bin rili gud ɛn dɛn bin gɛt zil fɔ du di prichin wok.

WI BIN GƐT BLƐSIN DƐN BIKƆS WI SAV ƐNISAY WE NID DE

Afta wi payɔnia na Trakadi fɔ tu ia, ɔda tin bin apin we bin sɔprayz wi. Dɛn bin invayt wi fɔ du di sakit wok. Wi bin sav di Inglish sakit dɛn fɔ sɛvin ia. Afta dat, dɛn sɛn wi na wan Frɛnch sakit insay Kyubɛk. Wi distrikt ovasia na Kyubɛk we nem Leons Krepo bin de tɛl mi tɛnki fɔ mi tɔk dɛn. Bɔt leta i bin de aks mi ɔltɛm se, “Aw yu go ebul fɔ mek yu tɔk dɛn fayn mɔ?”b Dis we aw dis brɔda bin sho se i bisin bɔt mi bin ɛp mi fɔ tink bɔt aw a go de tich bɔt patikyula tin dɛn ɛn tich di kayn we we go izi fɔ ɔndastand.

Wan pan di asaynmɛnt dɛn we a nɔ go ɛva fɔgɛt na di wan we a bin gɛt na di 1978 “Victorious Faith” Intanashɔnal Kɔnvɛnshɔn na Mɔntrial. A bin wok na di say we dɛn de mek it. Wi bin de ɛkspɛkt 80,000 pipul dɛn, ɛn wi bin gɛt fɔ fid dɛn di kayn we we difrɛn frɔm aw wi bin dɔn yus fɔ du am. Ɔltin bin rili nyu: di tin dɛn we wi yuz, di it dɛn we wi mek, ɛn di we aw wi bin mek di it dɛn bin rili nyu. Wi bin gɛt lɛk 20 big friza dɛn we nɔ bin de wok ɔltɛm. Bifo di fɔs de fɔ di kɔnvɛnshɔn, wi nɔ bin ebul fɔ go insay di stediɔm pas te 12 oklɔk nɛt, bikɔs dɛn bin gɛt gem na di stediɔm. Ɛn wi bin nid fɔ layt di ovin dɛn bifo do klin so dat wi go mek di mɔnintɛm it. Wi bin taya, bɔt a bin lan bɔku tin frɔm mi kɔmpin vɔlɔntia dɛn we bin de wok tranga wan, we bin machɔ, ɛn we bin rili fɔni. Wi bin kam fɔ bi tayt padi dɛn, ɛn te tide, wi na padi dɛn. A bin rili gladi fɔ de na dis impɔtant kɔnvɛnshɔn na Kyubɛk, we na di tɔŋ usay dɛn bin rili mek Jiova in pipul dɛn sɔfa insay dɛn 1940 ɛn 1950.

A bin lan bɔku tin frɔm mi kɔmpin ovasia dɛn di tɛm dɛn we wi bin de gɛt big kɔnvɛnshɔn na Mɔntrial. Wan ia, Devid Splen, we na Gɔvnin Bɔdi mɛmba naw, na bin di kɔnvɛnshɔn ovasia. Insay wan ɔda kɔnvɛnshɔn we wi bin gɛt, we dɛn bin aks mi fɔ du da wok de, Devid Splen bin rili sɔpɔt mi.

Insay 2011, afta wi dɔn ɛnjɔy di sakit wok fɔ 36 ia, dɛn bin invayt mi fɔ bi instrɔktɔ na di Skul fɔ Kɔngrigeshɔn Ɛlda Dɛn. Mi ɛn Randi bin slip na 75 difrɛn bed dɛn insay tu ia, bɔt wi bin gladi fɔ mek ɔl dɛn sakrifays dɛn de. Ɛnitɛm we di wik dɔn, di ɛlda dɛn kin rili gladi bikɔs dɛn de si aw di Gɔvnin Bɔdi rili bisin bɔt di padi biznɛs we wi ɛlda dɛn gɛt wit Jiova.

Leta, a bin tich na di Skul fɔ Pipul dɛn We De Prich bɔt Gɔd in Kiŋdɔm. Bɔku tɛm, di studɛnt dɛn kin rili taya ɛn wɔri bikɔs ɔf di we aw dɛn kin bizi: dɛn kin gɛt fɔ sidɔm na klas fɔ lɛk sɛvin awa ɛni de, du omwɔk fɔ tri awa ɛni ivnin, ɛn du lɛk 4 ɔ fayv asaynmɛnt dɛn ɛni wik. Mi ɛn di ɔda instrɔktɔ bin ɛksplen se dɛn nɔ bin fɔ ebul du dɛn tin dɛn de if Jiova nɔ bin ɛp dɛn. A kin mɛmba ɔltɛm aw di studɛnt dɛn bin sɔprayz fɔ si se we dɛn abop pan Jiova, dɛn bin ebul du pas wetin dɛn bin tink se dɛn go du.

WE WI SHO SE WI BISIN BƆT ƆDA PIPUL DƐN, DAT GO MEK WI GƐT BLƐSIN SOTE GO

Bikɔs mi mama bin bisin bɔt ɔda pipul dɛn, dat mek in Baybul studɛnt dɛn bin ebul fɔ go bifo, ɛn i ivin ɛp mi papa fɔ chenj di we aw i de tink bɔt di trut. Tri dez afta mi mama day, wi papa bin sɔprayz wi bay we i atɛnd di pɔblik tɔk na di Kiŋdɔm Ɔl, ɛn i bin kɔntinyu fɔ atɛnd mitin fɔ 26 ia afta dat. Pan ɔl we Papa nɔ bin ɛva baptayz, di ɛlda dɛn bin tɛl mi se na in fɔs bin de go na mitin ɔltɛm ɛni wik.

Mi mama bin rili sɛt fayn ɛgzampul fɔ mi ɛn mi sista dɛn. Mi tri sista dɛn ɛn dɛn man dɛn de sav Jiova fetful wan. Tu pan dɛn de sav na branch ɔfis dɛn; wan de na Pɔtyugal ɛn di ɔda wan de na Eti.

Rayt naw, mi ɛn Randi na spɛshal payɔnia dɛn na Amiltin, insay Ɔntario. We wi bin de du di sakit wok, wi bin de ɛnjɔy fɔ go wit ɔda pipul dɛn fɔ go du dɛn ritɔn visit ɛn Baybul stɔdi dɛn. Bɔt naw wi gladi fɔ si we wi yon Baybul studɛnt dɛn de go bifo pan Gɔd biznɛs. Ɛn as wi de bi padi to di brɔda ɛn sista dɛn na wi nyu kɔngrigeshɔn, wi gladi fɔ si aw Jiova de sɔpɔt dɛn di tɛm we tin fayn ɛn we tin nɔ fayn.

We wi tink bɔt di ia dɛn we dɔn pas, wi rili gladi fɔ di we aw bɔku pipul dɛn bin sho se dɛn rili bisin bɔt wi. Wisɛf de tray fɔ sho se wi “rili bisin” bɔt ɔda pipul dɛn, ɛn wi de ɛnkɔrej dɛn fɔ sav Jiova di bɛst we aw dɛn ebul. (2 Kɔr. 7:​6, 7) Fɔ ɛgzampul, insay wan famili, di wɛf, di bɔypikin, ɛn di galpikin dɛn ɔl bin de na ful-taym savis. So a aks di papa if i dɔn ɛva tink fɔ payɔnia. I bin ansa mi se i ɔlrɛdi de sɔpɔt tri payɔnia dɛn. So a aks am se, “Yu ebul sɔpɔt dɛn pas Jiova?” A bin ɛnkɔrej am fɔ ɛnjɔy wetin in famili de ɛnjɔy. I bigin fɔ payɔnia siks mɔnt afta dat.

Mi ɛn Randi go kɔntinyu fɔ “tɛl di nɛks jɛnareshɔn” bɔt Jiova in ‘wɔndaful wok dɛn,’ ɛn wi op se dɛn go ɛnjɔy fɔ sav am di we aw wi dɔn ɛnjɔy.—Sam 71:​17, 18.