“I Bin De Fɔgiv Pipul dɛn Trade fɔ Dɛn Sin Dɛn”

Na di prayz we Jizɔs bin pe wit in blɔd fɔ bay wi bak nɔmɔ Jiova de yuz fɔ fɔgiv wi sin dɛn. (Ɛfi. 1:7) Bɔt, di Baybul se: “Di bia we [Gɔd] de bia mek i bin de fɔgiv pipul dɛn trade fɔ dɛn sin dɛn,” dat na, bifo Jizɔs gi in layf as prayz fɔ bay wi bak. (Rom. 3:25, futnot.) Aw Jiova go du dis ɛn stil kɔntinyu fɔ bi Gɔd we de du tin fia wan?

Jiova bin prɔmis fɔ sɛn wan “pikin” we go sev di wan dɛn we gɛt fet pan Am ɛn in prɔmis dɛn. We i bin mek da prɔmis de, i bin tan lɛk se i dɔn ɔlrɛdi pe di prayz fɔ bay mɔtalman dɛn bak. (Jɛn. 3:15; 22:18) Gɔd bin gɛt kɔnfidɛns se we di tɛm we i dɔn pik rich, in wangren Bɔypikin we i rili lɛk go rɛdi fɔ sakrifays in layf fɔ bay mɔtalman bak. (Gal. 4:4; Ibru.10:​7-10) We Jizɔs bin de na di wɔl, Jiova bin gi am di pawa fɔ fɔgiv sin dɛn bifo i pe di prayz. Jizɔs bin de fɔgiv di wan dɛn we bin put fet pan am bikɔs i bin no se di sakrifays we i go sakrifays in layf go kɔba dɛn sin.​—Mat. 9:2-6.