1924​—Wan Ɔndrɛd Ia we Dɔn Pas

DƐN BIN BIL REDIO STESHƆN

I bin dɔn pas wan ia we di brɔda dɛn na Bɛtɛl bin de wok fɔ bil di WBBR redio steshɔn na Statin Ayland, insay Nyu Yɔk Siti. We dɛn dɔn fɔ klia di land, dɛn bin bil big ples usay di wokman dɛn fɔ de ɛn ɔda ples fɔ di tin dɛn we dɛn go yuz na di redio steshɔn. We dɛn dɔn fɔ du di wok, di brɔda dɛn bin bigin fɔ put di tin dɛn togɛda we dɛn fɔ yuz fɔ mek dɛn go bigin gɛt program dɛn na redio. Bɔt bɔku prɔblɛm dɛn bin de we dɛn bin nid fɔ sɔlv.

I nɔ bin izi fɔ mek di brɔda dɛn fiks di men antena we dɛn fɔ yuz fɔ di redio steshɔn. Di antena in ayt na bin 91-mita (300-fit) ɛn dɛn bin nid fɔ ɛng am bitwin tu pol dɛn, ɛn ɛniwan pan di pol dɛn ayt na bin 61 mita (200 fit). Di fɔs tɛm we dɛn tray fɔ ɛng am, dɛn nɔ bin ebul. Bɔt leta, bikɔs di brɔda dɛn bin abop pan Jiova, dɛn bin ebul fɔ du am. Kalvin Prɔsa we bin ɛp fɔ du di wok bin tɔk se: “If wi bin ebul fɔ du am di fɔs tɛm we wi tray, i bin fɔ izi fɔ mek wi prez wisɛf ɛn tɔk se, ‘Luk wetin wi dɔn ebul fɔ du!’” Di brɔda dɛn bin prez Jiova we dɛn ebul fɔ du di wok, bɔt dɛn bin gɛt ɔda prɔblɛm.

Redio biznɛs bin jɔs bigin, so i nɔ bin izi fɔ mek dɛn gɛt di tin dɛn we dɛn nid. So di brɔda dɛn bin bay wan sɛkɔn-an 500-wat transmita we pɔsin bin dɔn mek. Bifo dɛn bay maykrofon, dɛn bin yuz maykrofon we dɛn pul frɔm tɛlifon. Wan nɛt insay Fɛbwari, di brɔda dɛn bin disayd fɔ tɛst if ɔltin de wok fayn. Dɛn bin nid fɔ gɛt program we pipul dɛn go lisin to, so di brɔda dɛn bin siŋ Kiŋdɔm siŋ dɛn. Anɛs Lo tɔk bɔt wan fɔni tin we bin apin we di brɔda dɛn bin de siŋ, i se, Jɔj Rutafɔdb bin kɔl we i yɛri dɛn de siŋ na redio. I bin de na Bruklin we de lɛk 25 kilomita (15 mayl) frɔm usay di redio steshɔn bin de.

Brɔda Rutafɔd bin tɔk se: “Una stɔp da nɔys de. I tan lɛk se na pus dɛn de kray!” Di brɔda dɛn bin ɔt di transmita wantɛm wantɛm bikɔs dɛn bin shem, bɔt dɛn bin gɛt kɔnfidɛns se dɛn dɔn rɛdi fɔ di fɔs redio program we dɛn go gɛt.

Insay Fɛbwari 24, 1924, we dɛn bin gɛt di fɔs program na redio, Brɔda Rutafɔd bin tɔk se di redio steshɔn “na fɔ du di wok we gɛt fɔ du wit di Mɛsaya in Kiŋdɔm.” I bin tɔk bak se di rizin we mek dɛn mek dis redio steshɔn na fɔ “ɛp pipul dɛn fɔ ɔndastand di Baybul ɛn fɔ no aw di tɛm we wi de naw rili impɔtant.”

Di fɔs redio program bin rili kɔmɔt fayn. Fɔ 33 ia, na WBBR di ɔganayzeshɔn bin de yuz as dɛn redio steshɔn fɔ mek program dɛn we pipul dɛn go lisin to.

DƐN BIN GƐT MAYND FƆ TƆK AGENS DI BIGMAN DƐN PAN GƆD BIZNƐS

Insay Julay 1924, di Baybul Studɛnt dɛn bin gɛt kɔnvɛnshɔn na Kɔlɔmbɔs, Oayo. Di Baybul Studɛnt dɛn bin kɔmɔt ɔlsay na di wɔl ɛn dɛn bin lisin to tɔk dɛn insay difrɛn langwej dɛn lɛk Arabik, Inglish, Frɛnch, Jaman, Grik, Ɔngerian, Italian, Lituenian, Pɔlish, Rɔshian, Skandinevian langwej dɛn, ɛn Yukrenian. Pipul dɛn bin ebul fɔ lisin to sɔm pan di tɔk dɛn na redio ɛn di brɔda dɛn bin mek arenjmɛnt bak fɔ mek di Ohio State Journal rayt atikul dɛn bɔt di kɔnvɛnshɔn program ɛvride.

Tɔsde, Julay 24, i pas 5,000 brɔda ɛn sista dɛn we bin go prich na di siti usay dɛn bin gɛt di kɔnvɛnshɔn. Dɛn bin gi ɔlmost 30,000 buk dɛn ɛn stat bɔku bɔku Baybul stɔdi dɛn. We di Wach Tawa de tɔk bɔt dis de, i bin se “dis na di pat we wi ɛnjɔy pas ɔl na di kɔnvɛnshɔn.”

Frayde Julay 25, insay wan pan Brɔda Rutafɔd in tɔk dɛn, i bin gɛt maynd fɔ rid wan dɔkyumɛnt we de tɔk agens di bigman dɛn pan Gɔd biznɛs. I bin tɔk se di wan dɛn we de bifo pan pɔlitiks, rilijɔn, ɛn biznɛs “de mek pipul dɛn nɔ lan di tru bɔt Gɔd in Kiŋdɔm ɛn na da Kiŋdɔm de Gɔd go yuz fɔ blɛs mɔtalman.” I bin tɔk bak se, dɛn man dɛn ya nɔ de du di rayt tin bikɔs dɛn bin de “sɔpɔt di League of Nations ɛn tɔk se ‘na in Gɔd bin de yuz fɔ rul di wɔl.’” Di Baybul Studɛnt dɛn bin nid fɔ gɛt maynd fɔ prich to ɔda pipul dɛn bɔt dis mɛsej.

We Di Wach Tawa bin de tɔk bɔt aw di kɔnvɛnshɔn bin afɛkt pipul dɛn, i bin se: “Dis smɔl grup we bin gɛda fɔ di kɔnvɛnshɔn na Kɔlɔmbɔs bin gɛt mɔ fet afta di kɔnvɛnshɔn . . . , i bin mek dɛn gɛt maynd fɔ prich pan ɔl we pipul dɛn bin de agens dɛn. Lio Klaws, we bin atɛnd di kɔnvɛnshɔn bin tɔk se: “We di kɔnvɛnshɔn dɔn, wi bin rili gɛt zil fɔ go prich dis mɛsej na wi tɛritri.”

Insay Ɔktoba, di Baybul Studɛnt dɛn bigin fɔ sheb di trakt we gɛt di mɛsej we Brɔda Rutafɔd bin rid we de tɔk agens di bigman dɛn pan Gɔd biznɛs. Insay wan smɔl tɔŋ na Klivland, Oklaoma, Frank Jɔnsin bin dɔn fɔ sheb sheb di trakt 20 minit bifo di tɛm rich fɔ mek di ɔda pɔblisha dɛn kam tek am. I nɔ bin tinap na say we i go izi fɔ mek pɔsin si am bikɔs sɔm man dɛn we bin vɛks bikɔs ɔf in prichin wok bin de luk fɔ am. So Brɔda Jɔnsin bin disayd fɔ ayd insay wan chɔch we bin de nia am. Bikɔs di chɔch bin ɛmti, i lɛf di trakt dɛn insay di pastɔ in Baybul ɛn na ɔl di sidɔmples dɛn. I nɔ bin westɛm fɔ kɔmɔt na di chɔch. Bikɔs i bin stil gɛt smɔl tɛm, i go na tu ɔda chɔch dɛn ɛn du di sem tin.

Frank bin rɔn go bak usay di brɔda dɛn bin fɔ kam mit am. I ayd biɛn wan fyuɛl steshɔn de wach fɔ di man dɛn we bin de fɛn am. Di man dɛn bin kam pas wit dɛn motoka, bɔt dɛn nɔ si am. As dɛn go so, in kɔmpin dɛn we bin de prich nia usay i bin de kam tek am ɛn dɛn ɔl go.

Wan pan di brɔda dɛn tɔk se “we wi de lɛf di tɔŋ fɔ go, wi pas tri chɔch dɛn. Na lɛk 50 pipul dɛn bin tinap bifo ɛniwan pan di chɔch dɛn. Sɔm pipul dɛn bin de rid di trakt ɛn di ɔda wan dɛn bin de sho di pastɔ di trakt. I bin lɛf smɔl fɔ mek dɛn kech wi! Bɔt wi tɛl Jiova wi Gɔd tɛnki fɔ we i protɛkt wi ɛn gi wi sɛns fɔ mek wi ɛnimi dɛn nɔ kech wi.”

DI BAYBUL STUDƐNT DƐN BIN GƐT MAYND FƆ PRICH NA ƆDA KƆNTRI DƐN

Di Baybul Studɛnt dɛn na ɔda kɔntri dɛn bak bin gɛt maynd fɔ prich. Na di nɔt pat na Frans, Josɛf Kret bin de prich to pipul dɛn we kɔmɔt na Pɔland we bin de du maynin. I bin fɔ gi wan tɔk we gɛt di taytul, “Di Wan dɛn We Dɔn Day Go Gɛt Layf Bak Jisnɔ.” We di brɔda ɛn sista dɛn bin de gi inviteshɔn to di pipul dɛn na di tɔŋ, wan prist we bin de de bin tɛl in mɛmba dɛn nɔ fɔ atɛnd. Bɔt in mɛmba dɛn nɔ bin lisin. I bin pas 5,000 pipul dɛn we go lisin to di tɔk ɛn di prist sɛf bin go! Brɔda Kret bin tɛl di prist fɔ kam difɛnd wetin i biliv, bɔt i nɔ bin du am. Brɔda Kret bin gi ɔl di pɔblikeshɔn dɛn we i bin gɛt, i bin si se di pipul dɛn we i prich to bin rili want fɔ lan bɔt Gɔd.—Emɔs 8:11.

Brɔda Klɔd Brawn bin go na Afrika fɔ prich di gud nyuz na di Gold Kost we dɛn de kɔl naw Gana. Di tɔk dɛn we i bin de gi ɛn di pɔblikeshɔn dɛn we i bin de sheb sheb bin ɛp fɔ mek di gud nyuz rich bɔku say dɛn na di kɔntri. Jɔn Blanksin we bin de stɔdi fɔ wok na famesi, bin lisin to wan pan Brɔda Brawn in tɔk dɛn. Wantɛm wantɛm i bin no se i dɔn fɛn di trut. Jɔn bin tɔk se: “Di trut bin mek a gladi ɛn a bin de tɛl bɔku pipul dɛn na di famesi skul we a bin de atɛnd.”

Wande, Jɔn bin go na wan Anglikan chɔch fɔ aks di prist wetin i tink bɔt di Triniti, bɔt Jɔn bin dɔn ɔndastand se Triniti na tichin we nɔ de na di Baybul. Di prist bin vɛks, ala pan am, ɛn drɛb am. I tɛl am se: “Yu nɔto Kristian, na di dɛbul yu de fɔ. Kɔmɔt na ya!”

We Jɔn go na os, i rayt to di prist fɔ invayt am fɔ difɛnd wetin i biliv bɔt di Triniti na pɔblik. Di prist bin tɛl Jɔn fɔ go na di men lɛkchɔra in ɔfis ɛn di lɛkchɔra bin aks Jɔn if na in rayt di lɛta to di prist.

Jɔn bin tɔk se: “Na mi rayt am.”

Di lɛkchɔra bin tɔk se Jɔn fɔ rayt lɛta to di prist fɔ tɛl am se i sɔri. So Jɔn rayt se:

“Sa, Mi lɛkchɔra se mek a rayt lɛta to yu fɔ se a sɔri ɛn a rɛdi fɔ rayt di lɛta fɔ se a sɔri, bɔt bifo a du am yu fɔ gri se na lay lay tin dɛn yu de tich.”

Di lɛkchɔra bin sɔprayz so i tɔk se, “Blanksin, na dis yu want fɔ rayt?”

“Yɛs, Sa. Na dat nɔmɔ a ebul fɔ rayt.”

“Wi go drɛb yu kɔmɔt na dis skul. Yu nɔ go tɔk bad bɔt di prist na di gɔvmɛnt chɔch ɛn ɛkspɛkt se di gɔvmɛnt go stil kɔntinyu fɔ sɔpɔt yu.”

“Bɔt, Sa, . . . we yu de tich wi, if pɔynt dɛn de we wi nɔ ɔndastand wi nɔ kin aks kwɛstyɔn dɛn?”

“Yɛs, una kin aks.”

“Wɛl, na di sem tin apin. Di man bin de tich wi di Baybul ɛn a aks am kwɛstyɔn. If i nɔ ebul ansa di kwɛstyɔn, wetin mek a fɔ rayt lɛta fɔ tɛl am se a sɔri?”

Dɛn nɔ bin drɛb Blanksin ɛn i nɔ bin rayt lɛta fɔ se i sɔri.

DI BAYBUL STUDƐNT DƐN BIN GLADI FƆ DU MƆ WOK

We di Wach Tawa de tɔk bɔt di tin dɛn we apin insay di ia, i bin tɔk se: “Wi gri wit Devid we se: ‘Yu go gi mi trɛnk fɔ fɛt wɔ.’ (Sam 18:39) Wi dɔn rili gɛt ɛnkɔrejmɛnt insay dis ia bikɔs wi dɔn si aw Jiova dɔn ɛp wi fɔ du in wok . . . In fetful savant dɛn dɔn de prich di gud nyuz wit gladi-at.”

We di ia de dɔn, di brɔda dɛn bin bil ɔda redio steshɔn. Dɛn bin bil da redio steshɔn de nia Chikago. Dɛn bin de kɔl dis nyu steshɔn WƆD. Bikɔs dɛn yuz 5,000-wat transmita, dis nyu steshɔn bin mek di Kiŋdɔm mɛsej go fa fa say dɛn, ivin na Kanada we de na di nɔt pat na Amɛrika.

Insay di ia 1925, Jiova bin ɛp di brɔda dɛn fɔ ɔndastand nyu tin dɛn bɔt Rɛvɛleshɔn chapta 12. Di nyu tin dɛn we dɛn lan bin mek sɔm pipul dɛn lɛf fɔ sav Jiova. Bɔt bɔku ɔda pipul dɛn bin gladi fɔ ɔndastand di tin dɛn we bin apin na ɛvin ɛn aw i bin afɛkt pipul dɛn we de na di wɔl.