Ɛp Yu Baybul Studɛnt dɛn fɔ Disayd fɔ Sav Jiova

1-2. (a) Wetin mek sɔm Baybul studɛnt dɛn kin fred fɔ disayd fɔ sav Jiova? (b) Wetin wi go tɔk bɔt insay dis atikul?

YU BIN gɛt sɔm tin dɛn we bin de mek yu fred fɔ bi Jiova Witnɛs? Sɔntɛm yu bin de fred se yu wokmet dɛn, padi dɛn, ɔ famili go tɔn agens yu. Ɔ sɔntɛm yu bin de fil se yu nɔ go ebul fɔ obe Gɔd in lɔ dɛn. If na so i bi, yu go ebul fɔ ɔndastand aw sɔm Baybul studɛnt dɛn de fil ɛn wetin mek i nɔ izi fɔ lɛ dɛn disayd fɔ sav Jiova.

² Jizɔs bin no se dɛn tin dɛn ya kin mek i nɔ izi fɔ mek pɔsin disayd fɔ sav Jiova. (Mat. 13:20-22) Bɔt i nɔ bin giv-ɔp pan di wan dɛn we bin de fred fɔ fala am. Bifo dat, i bin sho in disaypul dɛn aw fɔ ɛp dɛn kayn pipul dɛn de fɔ (1) no di tin dɛn we mek i nɔ izi fɔ lɛ dɛn disayd fɔ sav Jiova, (2) lɛk Jiova mɔ, (3) ɛp dɛn fɔ put Jiova fɔs na dɛn layf, ɛn (4) ɛp dɛn fɔ no wetin fɔ du we ɔda pipul dɛn de agens dɛn. Aw wi go aplay wetin Jizɔs bin tɛl in disaypul dɛn we wi de yuz di Ɛnjɔy Layf Sote Go! buk fɔ ɛp wi Baybul studɛnt fɔ disayd fɔ sav Jiova?

ƐP YU STUDƐNT FƆ NO DI TIN DƐN WE MEK I NƆ IZI FƆ LƐ I DISAYD FƆ SAV JIOVA

3. Wetin go dɔn mek i nɔ izi fɔ lɛ Nikodimɔs bi wan pan Jizɔs in disaypul dɛn?

³ I nɔ bin izi fɔ Nikodimɔs we na bin impɔtant lida fɔ di Ju dɛn fɔ bi wan pan Jizɔs in disaypul dɛn. Lɛk siks mɔnt afta Jizɔs bigin fɔ prich, Nikodimɔs bin no se Jizɔs na di Mɛsaya. (Jɔn 3:1, 2) Bɔt, Nikodimɔs disayd fɔ go mit Jizɔs sikrit wan bikɔs i bin “de fred di Ju dɛn.” (Jɔn 7:13; 12:42) Sɔntɛm i bin tink se i go lɔs bɔku tin dɛn if i bi Jizɔs in disaypul.a

4. Aw Jizɔs bin ɛp Nikodimɔs fɔ ɔndastand wetin Gɔd bin want am fɔ du?

⁴ Nikodimɔs bin sabi di Lɔ, bɔt i bin nid pɔsin fɔ ɛp am fɔ ɔndastand wetin Jiova want am fɔ du. Aw Jizɔs bin ɛp am? Jizɔs bin rɛdi fɔ yuz in tɛm ɛn ivin tɔk wit Nikodimɔs na nɛt. Ɛn Jizɔs bin tɛl Nikodimɔs klia wan wetin i fɔ du fɔ mek i go bi in disaypul, dat na fɔ ripɛnt fɔ in sin dɛn, baptayz insay wata, ɛn sho se i gɛt fet pan Gɔd in Pikin.​—Jɔn 3:5, 14-21.

5. Aw wi go ɛp wi Baybul studɛnt fɔ no wetin mek i nɔ izi fɔ lɛ i disayd fɔ sav Jiova?

⁵ Ilɛksɛf Baybul studɛnt ɔndastand di Baybul gud gud wan, sɔntɛm i go nid pɔsin fɔ ɛp am fɔ no wetin mek i nɔ izi fɔ lɛ i disayd fɔ sav Jiova. Sɔntɛm i nɔ izi fɔ lɛ i rich in spirichwal gol dɛn bikɔs ɔf di wok we i de du ɔ bikɔs in famili de agens am. So mek tɛm fɔ ɛp yu studɛnt. Sɔntɛm yu kin invayt am fɔ kam it wit yu ɔ fɔ mek una go waka. We una de du dɛn kayn tin dɛn de togɛda, sɔntɛm i go tɛl yu mɔ bɔt in prɔblɛm dɛn. Ɛnkɔrej yu studɛnt fɔ mek di ajɔstmɛnt dɛn we i nid fɔ mek bikɔs i lɛk Jiova, nɔto bikɔs i want mek yu gladi.

6. Aw yu go ɛp yu studɛnt fɔ gɛt maynd fɔ disayd fɔ sav Jiova? (1 Kɔrintians 16:13)

⁶ We yu Baybul studɛnt gɛt kɔnfidɛns se Jiova go ɛp am fɔ fala di lɔ dɛn na di Baybul, dat go mek i gɛt maynd fɔ aplay wetin i de lan. (Rid 1 Kɔrintians 16:13.) Wi go kɔmpia di wok we yu de du to pɔsin we de tich na skul. We yu tink bɔt di tɛm we yu bin de go skul, uskayn ticha yu bin lɛk mɔ? I go bi se na di ticha we bin de peshɛnt fɔ ɛp yu fɔ gɛt kɔnfidɛns pan di tin dɛn we yu ebul fɔ du. Semweso, gud Baybul ticha nɔ jɔs de tich in studɛnt wetin Gɔd want, bɔt i de mek in studɛnt no bak se Jiova go ɛp am fɔ chenj di we aw i de liv. Aw yu go ebul du dat?

ƐP YU STUDƐNT FƆ LƐK JIOVA MƆ

7. Aw Jizɔs bin ɛp di wan dɛn we bin de lisin to am fɔ lɛk Jiova mɔ?

⁷ Jizɔs bin no se if in disaypul dɛn lɛk Jiova, dat go mek dɛn aplay wetin dɛn de lan. Bɔku tɛm, i bin de tich in disaypul dɛn tin dɛn we go ɛp dɛn fɔ lɛk dɛn Papa we de na ɛvin mɔ. Fɔ ɛgzampul, i bin kɔmpia Jiova to papa we de gi in pikin dɛn gud tin dɛn. (Mat. 7:9-11) Sɔntɛm, sɔm pan di pipul dɛn we bin de lisin to Jizɔs nɔ bin gɛt papa we lɛk dɛn. Imajin aw dɛn go dɔn fil we Jizɔs bin pul di parebul bɔt wan papa we gɛt sɔri-at we wɛlkɔm in bɔypikin we bin dɔn du bad bad tin dɛn. Dɛn bin ebul fɔ si di kayn sɔri-at we Jiova gɛt fɔ in pikin dɛn we de na di wɔl.​—Lyuk 15:20-24.

8. Aw yu go ɛp yu Baybul studɛnt fɔ lɛk Jiova mɔ?

⁸ Yusɛf go ebul ɛp yu Baybul studɛnt fɔ lɛk Jiova mɔ bay we yu de tɔk mɔ bɔt Gɔd in kwaliti dɛn we yu de tich am. Ɛnitɛm we una de stɔdi, ɛp am fɔ ɔndastand aw di tin dɛn we i de lan de sho se Jiova lɛk wi. We una de tɔk bɔt di prayz we Jizɔs pe fɔ fri wi, tɔk mɔ bɔt aw dat gɛt sɔntin fɔ du wit am. (Rom. 5:8; 1 Jɔn 4:10) We yu studɛnt de tink bɔt aw Jiova lɛk am, dat go ɛp am fɔ lɛk Jiova.​—Gal. 2:20.

9. Wetin bin ɛp wan man we nem Maykɛl fɔ chenj di we aw i bin de liv in layf?

⁹ Lɛ wi tɔk bɔt Maykɛl we de na Indonishia. Dɛn mɛn am na di trut bɔt i nɔ bin baptayz. We i ol 18 ia, i bin travul go na ɔda kɔntri fɔ go wok as trɔk drayva. Leta, i bin kam mared na Indonishia, bɔt i lɛf in famili ɛn go kɔntinyu fɔ wok na ɔda kɔntri. We i travul, in wɛf ɛn in galpikin bigin fɔ stɔdi di Baybul ɛn aplay wetin dɛn de lan. Afta Maykɛl in mama day, i disayd fɔ go bak na Indonishia fɔ kia fɔ in papa, ɛn i bin gri fɔ stɔdi di Baybul. We dɛn bin de stɔdi di say we se “Lan Mɔ” na lɛsin 27 na di Ɛnjɔy Layf Sote Go! buk, dat bin rili tɔch Maykɛl in at. We Maykɛl tink bɔt aw Jiova go dɔn fil we i si In Pikin de sɔfa, dat bin mek i kray. I bin rili gladi fɔ di prayz we Jizɔs pe fɔ fri mɔtalman ɛn dat bin mek i chenj di we aw i de liv ɛn baptayz.

ƐP YU STUDƐNT FƆ PUT JIOVA FƆS NA IN LAYF

10. Aw Jizɔs bin ɛp in disaypul dɛn fɔ put Jiova fɔs na dɛn layf? (Lyuk 5:5-11) (Luk bak di pikchɔ.)

¹⁰ Jizɔs in fɔs disaypul dɛn bin no se na in na di Mɛsaya we Gɔd bin dɔn prɔmis se go kam, bɔt dɛn bin nid ɛp fɔ mek dɛn go put di prichin wok fɔs na dɛn layf. Pita ɛn Andru bin dɔn ɔlrɛdi bi disaypul dɛn fɔ sɔm tɛm bifo Jizɔs tɛl dɛn fɔ fala am. (Mat. 4:18, 19) Dɛn bin de du fish biznɛs wit Jems ɛn Jɔn, ɛn dɛn biznɛs bin de go bifo. (Mak 1:16-20) We Pita ɛn Andru bin “lɛf dɛn nɛt dɛn,” dɛn go dɔn du tin dɛn we go mek dɛn famili gɛt wetin dɛn nid we dɛn de fala Jizɔs. Wetin bin ɛp dɛn fɔ ajɔst ɛn put di prichin wok fɔs? Lyuk in akawnt tɛl wi se Jizɔs bin pafɔm wan mirekul we bin mek dɛn gɛt mɔ kɔnfidɛns se Jiova ebul fɔ kia fɔ dɛn.​—Rid Lyuk 5:5-11.

11. Aw wi go yuz wi yon ɛkspiriɛns fɔ ɛp wi studɛnt fɔ gɛt mɔ fet?

¹¹ Wi nɔ ebul fɔ pafɔm mirekul dɛn lɛk Jizɔs, bɔt wi go ebul tɔk bɔt ɛkspiriɛns dɛn we de sho aw Jiova de sɔpɔt di wan dɛn we de put Am fɔs na dɛn layf. Fɔ ɛgzampul, yu mɛmba aw Jiova bin ɛp yu we yu bin bigin fɔ atɛnd di mitin dɛn? Sɔntɛm yu bin nid fɔ mit yu bɔs ɛn ɛksplen to am wetin mek yu nɔ go wok ovataym igen if dat go mek yu nɔ ebul fɔ atɛnd di mitin dɛn. As yu de tɛl yu studɛnt yu ɛkspiriɛns, ɛksplen aw yu bin gɛt mɔ fet we yu si aw Jiova de sɔpɔt di tin dɛn we yu disayd fɔ du fɔ mek yu go put am fɔs na yu layf.

12. (a) Wetin mek wi fɔ go wit difrɛn pɔblisha dɛn we wi de go kɔndɔkt Baybul stɔdi? (b) Aw yu go ebul yuz vidio dɛn fɔ tich yu studɛnt fayn fayn wan? Gi wan ɛgzampul.

¹² Yu studɛnt go bɛnifit bak we i de yɛri wetin ɔda Kristian dɛn dɔn du fɔ mek dɛn go ebul put Jiova fɔs. So go wit difrɛn brɔda ɛn sista dɛn we yu de go kɔndɔkt Baybul stɔdi. Aks dɛn fɔ ɛksplen aw dɛn kam na di trut ɛn wetin dɛn bin du fɔ mek dɛn ebul put Jiova fɔs na dɛn layf. Dɔn bak, mek tɛm fɔ lɛ yu ɛn yu studɛnt wach di vidio dɛn we de na di say we se “Lan Mɔ” ɔ “Du Mɔ Risach” na di Ɛnjɔy Layf Sote Go! buk. Fɔ ɛgzampul, we una de stɔdi lɛsin 37, yu kin tɔk bɔt di prinsipul dɛn we de na di vidio we gɛt di taytul Jiova Go Gi Wi di Tin dɛn we Wi Nid.

ƐP YU STUDƐNT FƆ NO WETIN FƆ DU WE ƆDA PIPUL DƐN DE AGENS AM

13. Aw Jizɔs bin ɛp in disaypul dɛn fɔ no wetin fɔ du we pipul dɛn de agens dɛn?

¹³ Bɔku tɛm, Jizɔs bin de tɛl in disaypul dɛn se pipul dɛn go de agens dɛn, ivin dɛn yon fambul dɛn. (Mat. 5:11; 10: 22, 36) Shɔt tɛm bifo Jizɔs day, i bin tɛl in disaypul dɛn se sɔntɛm pipul dɛn go kil dɛn. (Mat. 24:9; Jɔn 15:20; 16:2) I bin ɛnkɔrej dɛn fɔ tek tɛm we dɛn de du di prichin wok. I bin advays dɛn nɔ fɔ agyu di wan dɛn we de agens dɛn ɛn fɔ tek tɛm du tin so dat dɛn go kɔntinyu fɔ prich.

14. Aw wi go ɛp wi studɛnt fɔ no wetin fɔ du we pipul dɛn de agens am? (2 Timoti 3:12)

¹⁴ Wi go ɛp wi studɛnt fɔ no wetin fɔ du we pipul dɛn de agens am bay we wi mek i no wetin sɔntɛm in wokmet dɛn, padi dɛn, ɛn fambul dɛn go tɛl am. (Rid 2 Timoti 3:12.) Sɔntɛm, sɔm pan in wokmet dɛn go laf am bikɔs ɔf di nyu we aw i de liv in layf. Ɛn sɔntɛm ɔda pipul dɛn ivin in fambul dɛn, go tɔk bad bɔt wetin i de lan na di Baybul. If wi nɔ westɛm fɔ ɛp wi studɛnt dɛn fɔ no wetin fɔ du we pipul dɛn de agens dɛn, dat go ɛp dɛn fɔ ebul tinap tranga wan we dat apin.

15. Wetin go ɛp Baybul studɛnt fɔ bia we in famili de agens am?

¹⁵ If yu studɛnt in famili de agens am, ɛp am fɔ tink bɔt wetin mek sɔm pan in fambul dɛn nɔ gladi we i de stɔdi di Baybul. Sɔntɛm dɛn go de tink se na lay lay tin dɛn Jiova Witnɛs dɛn de tich am, ɔ sɔntɛm dɛn nɔ jɔs lɛk Jiova Witnɛs dɛn. Ivin sɔm pan Jizɔs in fambul dɛn nɔ bin gladi bikɔs ɔf wetin i bin de du. (Mak 3:21; Jɔn 7:5) Tich yu studɛnt fɔ kɔntinyu fɔ peshɛnt ɛn tek tɛm tɔk to ɔda pipul dɛn, ivin in fambul dɛn.

16. Aw wi go ɛp wi Baybul studɛnt fɔ tek tɛm tɔk to ɔda pipul dɛn bɔt wetin i biliv?

¹⁶ Ivin we wi studɛnt in fambul dɛn sho se dɛn want fɔ no mɔ, i go mek sɛns fɔ lɛ di studɛnt nɔ ɛksplen ɔltin wantɛm wantɛm. If i du dat, sɔntɛm in fambul dɛn go taya fɔ lisin to am, ɛn sɔntɛm dat go mek dɛn nɔ want fɔ tɔk wit am igen bɔt wetin i biliv. So ɛnkɔrej yu studɛnt fɔ tɔk bɔt wetin i biliv di kayn we we go mek in fambul dɛn go want fɔ lisin ɔda tɛm. (Kol. 4:6) Sɔntɛm i go tɛl in fambul dɛn fɔ go na jw.org wɛbsayt. Dat go mek dɛn gɛt chans fɔ lan mɔ bɔt Jiova Witnɛs dɛn ɛnitɛm dɛn want ɛn disayd wetin dɛn go want fɔ lan.

17. Aw yu go tren yu studɛnt fɔ ansa kwɛstyɔn dɛn we pipul dɛn kin aks bɔt Jiova Witnɛs dɛn? (Luk bak di pikchɔ.)

¹⁷ Sɔntɛm yu kin yuz di jw.org siriz we se “Kwɛstyɔn dɛn we Pipul dɛn Kin Aks Ɔltɛm bɔt Jiova Witnɛs Dɛn” fɔ ɛp yu studɛnt fɔ pripia simpul ansa dɛn fɔ kwɛstyɔn dɛn we sɔntɛm in fambul dɛn ɔ wokmet dɛn go aks. (2 Tim. 2:24, 25) We una dɔn ɛni lɛsin na di Ɛnjɔy Layf Sote Go! buk, una du rivyu fɔ di say we se “Sɔm Pipul dɛn Kin Se.” Ɛnkɔrej yu studɛnt fɔ praktis aw fɔ ansa fɔ insɛf. Nɔ fred fɔ tɛl am di say dɛn we i nid fɔ impruv we i de ɛksplen wetin i biliv. We yu de praktis wit am, dat go ɛp am fɔ gɛt kɔnfidɛns fɔ tɔk bɔt wetin i de lan.

18. Aw yu go ɛnkɔrej yu studɛnt fɔ bigin prich wit di kɔngrigeshɔn? (Matyu 10:27)

¹⁸ Jizɔs bin tɛl in disaypul dɛn fɔ prich di gud nyuz to pipul dɛn. (Rid Matyu 10:27.) We Baybul studɛnt bigin fɔ tɔk bɔt wetin i biliv, dat go ɛp am fɔ abop pan Jiova. Aw yu go ɛp yu studɛnt fɔ sɛt dis gol? We dɛn anawns se una kɔngrigeshɔn gɛt kampen fɔ prich, ɛnkɔrej yu studɛnt fɔ tink bɔt wetin i go du fɔ kwalifay fɔ bi pɔblisha. Ɛksplen wetin mek i izi fɔ bɔku pipul dɛn fɔ bigin prich di tɛm we di kɔngrigeshɔn gɛt kampen. Dɔn bak, yu kin ɛnkɔrej yu studɛnt fɔ tray fɔ kwalifay fɔ gi tɔk dɛn na di mitin dɛn we wi kin gɛt insay di wik, so dat i go gɛt di trenin we i nid fɔ gɛt kɔnfidɛns fɔ tɔk bɔt wetin i biliv.

SHO SE YU GƐT KƆNFIDƐNS PAN YU STUDƐNT

19. Aw Jizɔs bin sho se i gɛt kɔnfidɛns pan in disaypul dɛn? Aw wi go falamakata am?

¹⁹ Bifo Jizɔs go na ɛvin, i bin tɛl in disaypul dɛn se wande dɛn go de togɛda bak. Dɛn nɔ bin ɔndastand se Jizɔs bin de tɔk se dɛn go go na ɛvin. Bɔt, Jizɔs nɔ bin pe atɛnshɔn to di dawt we dɛn bin de dawt, bifo dat, i pe atɛnshɔn pan di kɔmɔt we dɛn nɔ kɔmɔt biɛn am. (Jɔn 14:1-5, 8) I bin no se dɛn nid tɛm fɔ ɔndastand sɔm tin dɛn, lɛk di op fɔ go na ɛvin. (Jɔn 16:12) Wisɛf kin sho se wi gɛt kɔnfidɛns se wi studɛnt want fɔ du wetin Jiova want.

20. Aw wan sista na Malawi sho se i gɛt kɔnfidɛns pan in studɛnt?

²⁰ Gɛt kɔnfidɛns se yu studɛnt want fɔ du di rayt tin. Lɛ wi tɔk bɔt wan sista we nem Chifundo we de na Malawi in ɛgzampul. I bin bigin yuz di Ɛnjɔy Layf Sote Go! buk fɔ stɔdi di Baybul wit wan yɔŋ Katolik uman we nem Alinafe. We dɛn dɔn fɔ stɔdi lɛsin 14, Chifundo bin aks in studɛnt wetin i tink bɔt fɔ yuz imej dɛn fɔ wɔship. Alinafe bin vɛks ɛn tɔk se, “A kin disayd fɔ yuz imej dɛn if a want!” Chifundo bin tink se in studɛnt go stɔp fɔ stɔdi. Bɔt i bin peshɛnt ɛn kɔntinyu fɔ stɔdi wit Alinafe ɛn op se as tɛm de go i go ɔndastand se i rɔng fɔ yuz imej dɛn fɔ wɔship. Afta sɔm mɔnt, Chifundo bin aks am di kwɛstyɔn we de na lɛsin 34 we se: “Aw yu dɔn bɛnifit frɔm we yu dɔn de stɔdi di Baybul ɛn bɔt di tru Gɔd, Jiova?” Chifundo tɔk bɔt wetin Alinafe bin se. I se, “I bin tɔk bɔt bɔku fayn pɔynt dɛn, ɛn wan pan dɛn na dat Jiova Witnɛs dɛn nɔ de du wetin di Baybul kɔndɛm.” I nɔ te, Alinafe bin stɔp fɔ yuz imej dɛn fɔ wɔship ɛn i bin kwalifay fɔ baptayz.

21. Aw wi go ɛp wi studɛnt fɔ disayd fɔ sav Jiova?

²¹ Pan ɔl we na Jiova “de mek i gro,” wisɛf gɛt sɔntin fɔ du fɔ ɛp wi Baybul studɛnt fɔ go bifo. (1 Kɔr. 3:7) Wi nɔ fɔ jɔs tich am wetin Gɔd want am fɔ du. Wi fɔ ɛp am fɔ rili lɛk Jiova. Wi fɔ ɛnkɔrej am bak fɔ sho se i lɛk Jiova bay we i put Am fɔs na in layf. Ɛn wi kin tich am aw fɔ abop pan Jiova we pipul dɛn de agens am. We wi sho se wi gɛt kɔnfidɛns pan am, wi de ɛp am fɔ gɛt kɔnfidɛns se insɛf ebul fɔ liv in layf di we aw Jiova want ɛn disayd fɔ sav am.