Wetin Dɔn Apin we Mek Pipul dɛn Nɔ De Biev Fayn?—⁠Wetin di Baybul Se?

Dis biɛn tɛm, pipul dɛn nɔ de biev fayn to ɔda pipul dɛn. Peshɛnt dɛn we rud de ala pan dɔktɔ dɛn; kɔstɔma dɛn we de it na rɛstɔrant kin tɔk bad to di wan dɛn we de sav dɛn; pasenja dɛn we nɔ gɛt trenin kin kɔs ɔ ala pan di wan dɛn we de wok na motoka ɔ plen; pikin dɛn we nɔ gɛt rɛspɛkt kin provok, trɛtin, ɛn atak ticha dɛn; ɛn sɔm pipul dɛn we de bifo pan pɔlitiks de du tin dɛn we de sho se dɛn nɔ gɛt shem, dɔn sɔm pan dɛn de tray fɔ pruv se na dɛn de biev fayn.

Di Baybul na di tru tru buk we de sho wi aw fɔ biev fayn. I ɛksplen bak wetin mek pipul dɛn nɔ de biev fayn to ɔda pipul dɛn tide.

Wetin dɔn apin we mek pipul dɛn nɔ de biev fayn?

Ɔlsay na di wɔl, wi de si klia wan se sɔm pipul dɛn nɔ de biev fayn igen, ɛn dɛn nɔ gɛt fayn abit dɛn igen.

• Akɔdin to wan risɛnt intavyu frɔm di pɔblik, dɛn se insay di las 22 ia, di we aw pipul dɛn de biev bad na Amɛrika dɔn wɔs dis biɛn tɛm pas ɛni ɔda tɛm.

• Wan ɔda sɔve we dɛn du, dɛn intavyu pas 32,000 pipul dɛn we de na 28 kɔntri dɛn, 65 pasɛnt pan dɛn tɔk se, na jɔs smɔl pipul dɛn de biev fayn na di wɔl tide pas aw i bin de apin trade.

Di Baybul bin dɔn tɔk bɔt di bad we aw pipul dɛn de biev tide.

• “Bɔt no se insay di las dez, tin go tranga ɛn bad. Pipul dɛn go lɛk dɛnsɛf, dɛn go lɛk mɔni, dɛn go de bost, dɛn go de tink se dɛn bɛtɛ pas ɔda pipul dɛn, dɛn go de tɔk bad bɔt Gɔd ɛn pipul dɛn, dɛn nɔ go de obe dɛn mama ɛn papa, dɛn nɔ go gɛt wan tɛnki, . . . dɛn go wayl, [ɛn] dɛn nɔ go lɛk fɔ du gud.”—2 Timoti 3:​1-3.

Fɔ no mɔ bɔt aw dis prɔfɛsi de apin tide, na fɔ rid di atikul we gɛt di taytul “Did the Bible Predict the Way People Think and Act Today?”

Wan tru tru buk we de gayd wi fɔ biev fayn

Insay dis wɔl, di we aw pipul dɛn de biev jɔs de bad-ɔf. Bɔt pan ɔl dat, bɔku bɔku pipul dɛn dɔn kam fɔ no se di Baybul na fayn fayn buk we de gayd wi fɔ biev fayn. Di gud advays dɛn we de insay de “pɔsin kin abop pan dɛn ɔltɛm, naw ɛn sote go.” (Sam 111:8) Mek wi tɔk bɔt sɔm ɛgzampul dɛn:

• Wetin di Baybul se: “Ɔl wetin una want mek ɔda pipul dɛn du to una, na in una fɔ du to dɛn.”—Matyu 7:12.

  Wetin dis min?: Wi fɔ trit ɔda pipul dɛn fayn ɛn rɛspɛkt dɛn, jɔs lɛk aw wi want dɛn fɔ trit wi.

• Wetin di Baybul se: “Naw we una dɔn lɛf lay lay, lɛ ɔlman tɔk tru to in neba.”—Ɛfishians 4:25.

  Wetin dis min?: Wi fɔ ɔnɛs pan ɔltin we wi de se ɛn du.

Fɔ no mɔ bɔt dis tɔpik, duya rid:

• Di Wachtawa atikul we gɛt di taytul “Right and Wrong—A Guide You Can Trust.”

• Di atikul “Tolerance—How the Bible Can Help.”