Di Dɛbul Na Rial Pɔsin?

Di Baybul in Ansa

Yɛs, di Dɛbul na rial pɔsin. Na in de “rul di wɔl.” In na spirit pɔsin we bin wikɛd ɛn we tɔn in bak pan Gɔd. (Jɔn 14:​30; Ɛfishians 6:​11, 12) Di Baybul sho di kayn pɔsin we di dɛbul bi bay dɛn nem ɛn kwaliti dɛn ya:

• Setan, we min “Pɔsin we trangayes.”—Job 1:​6.

• Dɛbul we min, “Pɔsin we de pwɛl ɔda pɔsin in nem.”—Rɛvɛleshɔn 12:​9.

• Snek, we di Baybul yuz fɔ min “Pɔsin we de ful ɔda pɔsin.”—2 Kɔrintians 11:​3.

• Pɔsin we de mek ɔda pɔsin du bad.—Matyu 4:​3.

• Layman.—Jɔn 8:​44.

Setan nɔto di bad kwaliti we de insay pɔsin

Sɔm pipul dɛn tink se Setan di Dɛbul na jɔs di bad abit ɔ bad kwaliti we kin de insay wi. Bɔt di Baybul tɔk bɔt wan tɛm we Gɔd ɛn Setan bin de tɔk. Gɔd pafɛkt, so i nɔ go bi se i bin de tɔk to di bad pat we de insay am. (Ditarɔnɔmi 32:​4; Job 2:​1-6) Semweso, Setan bin tɛmt Jizɔs, we nɔ bin sin. (Matyu 4:​8-10; 1 Jɔn 3:​5) So di Baybul sho se di Dɛbul na rial pɔsin nɔto jɔs di bad abit ɔ kwaliti we de insay wi.

Wi fɔ sɔprayz fɔ no se bɔku pipul dɛn nɔ biliv se di Dɛbul na rial pɔsin? Nɔ, bikɔs di Baybul se Setan de ful pipul dɛn fɔ gɛt wetin i want. (2 Tɛsalonians 2:​9, 10) Wan pan di bɛst we aw i de du dat, na we i de mek pipul dɛn biliv se i nɔ de.—2 Kɔrintians 4:​4.

Ɔda lay lay tin dɛn we pipul dɛn biliv bɔt di Dɛbul

Lay: Di Dɛbul in ɔda nem na Lusifa.

Tru: Di Ibru wɔd we sɔm Baybul dɛn translet as “Lusifa” min di wan we de shayn. (Ayzaya 14:​12) Di vas dɛn we de arawnd dis wɔd sho se i bin de tɔk bɔt di kiŋ dɛn we bin de rul na Babilɔn, we Gɔd bin dɔnawe wit bikɔs dɛn bin de mek prawd. (Ayzaya 14:​4, 13-20) Dɛn yuz di wɔd di wan we de shayn fɔ provok di Babilonian kiŋ dɛn afta we dɛn ovatro dɛn.

Lay: Gɔd de yuz Setan fɔ jɔj pipul dɛn.

Tru: Di Dɛbul na Gɔd in ɛnimi, nɔto in savant. Setan di Dɛbul de agens pipul dɛn we de sav Gɔd ɛn i de tɔk bad bɔt dɛn.​—1 Pita 5:​8; Rɛvɛleshɔn 12:​10.