Yu Tink se Sayɛns Gri wit di Baybul?
Di Baybul in ansa
Yɛs, pan ɔl we di Baybul nɔto sayɛns buk, ɔl wetin i tɔk bɔt sayɛns kɔrɛkt. Lɛ wi tɔk bɔt sɔm ɛgzampul dɛn we de sho se sayɛns gri wit di Baybul, ɛn di Baybul tɔk kɔrɛkt tin dɛn bɔt sayɛns we rili difrɛn frɔm wetin bɔku pipul dɛn we bin de di tɛm we dɛn bin de rayt di Baybul bin biliv.
Di wan ol wɔl gɛt biginin. (Jɛnɛsis 1:1, NWT) Bɔt bɔku lay lay tichin dɛn trade bin se nɔto pɔsin bin mek di wan ol wɔl, bɔt ɔl wetin wi de si kam bay chans. Di Babilonian dɛn biliv se di gɔd dɛn we bin bɔn di wan ol wɔl kɔmɔt frɔm tu difrɛn si dɛn. Ɔda pipul dɛn trade trade bin de tich se di wan ol wɔl kɔmɔt frɔm wan big big eg.
Na nachɔral lɔ dɛn de gayd di wan ol wɔl ɛvride, nɔto lay lay gɔd dɛn. (Job 38:33; Jɛrimaya 33:25) Lay lay stori dɛn ɔlsay na di wɔl de tich se mɔtalman nɔ go ebul no wetin gɛt fɔ apin ɛn nɔbɔdi nɔ go ebul fɔ ɛp dɛn frɔm di bad tin dɛn we di gɔd dɛn de du to dɛn.
Di wɔl nɔ ɛng pan natin. (Job 26:7) Trade trade, bɔku pipul dɛn biliv se di wɔl bin flat ɛn na gayant ɔ animal lɛk bufalo ɔ tɔtɔys ol di wɔl.
Di wata we kin go ɔp na di skay we di san kin wam, na in kin fɔdɔm bak na di wɔl as ren, sno, ɔ big big ays blɔk ɛn ful-ɔp di riva ɛn spring dɛn. (Job 36:27, 28; Ɛkliziastis 1:7; Ayzaya 55:10; Emɔs 9:6) Di Grik pipul dɛn trade trade bin de tink se na ɔndagrɔn wata bin de ful-ɔp di riva dɛn, ɛn pipul dɛn bin biliv dat te insay dɛn 1800.
Mawntin dɛn kin tinap ɛn fɔdɔm, ɛn di mawntin dɛn tide bin de ɔnda di si. (Sam 104:6, 8) Bɔt difrɛn lay lay stori dɛn de tich se di we aw di mawntin dɛn de naw na so di gɔd dɛn bin mek dɛn.
We wi de klin wi bɔdi ɛn di eria we wi de, dat de protɛkt wi wɛlbɔdi. Di Lɔ we Gɔd bin gi to di Izrɛlayt dɛn bin se dɛn fɔ was dɛn an afta dɛn tɔch dedebɔdi, dɛn fɔ kwarantin di wan dɛn we gɛt sik we de prɛd, ɛn dɛn fɔ dig ol we dɛn want fɔ go na tɔylɛt. (Lɛvitikɔs 11:28; 13:1-5; Ditarɔnɔmi 23:13) Bɔt di tɛm we Gɔd bin gi dɛn lɔ dɛn ya, wan pan di mɛrɛsin dɛn we di Ijipshian dɛn bin de yuz we pɔsin wund, dɛn bin de miks am wit tɔylɛt.
Yu tink se ɛnitin de we di Baybul tɔk bɔt sayɛns we nɔ kɔrɛkt?
If wi tek tɛm stɔdi di Baybul, wi go kam fɔ no se di ansa na nɔ. Lɛ wi tɔk bɔt sɔm tin dɛn we di Baybul tɔk bɔt sayɛns we pipul kin ɔndastand di rɔng we:
Lay: Di Baybul tɔk se Gɔd bin mek di wan ol wɔl insay siks dez, ɛn ɛniwan pan dɛn siks dez dɛn de na 24 awa.
Tru: Di Baybul nɔ tɔk bɔt wan patikyula de we Gɔd bin mek di wɔl ol wɔl. (Jɛnɛsis 1:1, NWT) Dɔn bak, di dez dɛn we Gɔd tek fɔ mek di wan ol wɔl we Jɛnɛsis chapta 1 tɔk bɔt, na tɛm we wi nɔ no aw lɔng i las fɔ. Infakt, ɔl di tɛm we Gɔd yuz fɔ mek ɛvin ɛn di wɔl, di Baybul kɔl am “de.”—Jɛnɛsis 2:4, NWT.
Lay: Di Baybul se Gɔd mek di plant dɛn fɔs bifo i mek di san fɔ sɔpɔt photosynthesis.—Jɛnɛsis 1:11, 16.
Tru: Di Baybul sho se na di san we na wan pan di sta dɛn na “ɛvin” Gɔd bin mek fɔs bifo i mek plant dɛn. (Jɛnɛsis 1:1, NWT) Dɔl layt frɔm di san bin de shayn na di wɔl insay di fɔs “de” we Gɔd bin de mek tin dɛn. As di ples bin de brayt bay di “de” we mek tri, di san bin de shayn fɔ sɔpɔt photosynthesis, we min se i de ɛp di plant fɔ gro. (Jɛnɛsis 1:3-5, 12, 13) Na leta di san bigin shayn brayt wan na di wɔl.—Jɛnɛsis 1:16.
Lay: Di Baybul se di san de go rawnd di wɔl.
Tru: Ɛkliziastis 1:5 se: Di “san de kam ɔp ɛn [di] san de go dɔŋ, i de rɔn go bak usay i bin bigin.” Bɔt dis jɔs de ɛksplen aw wi de si di san de muv frɔm di wɔl. Ivin tide pɔsin kin se “san de kam ɔp” ɛn “san de go dɔŋ,” bɔt i no se di wɔl de go rawnd di san.
Lay: Di Baybul se di wɔl flat.
Tru: We di Baybul tɔk bɔt “di say we fa pas ɔl” i min “di fa fa say dɛn na di wɔl.” Bɔt dis nɔ min se di wɔl flat ɔ i gɛt ɛj. (Akt 1:8; futnot) Semweso, we di Baybul tɔk bɔt “di 4 kɔna dɛn na di wɔl” i nɔ min se di wɔl gɛt 4 kɔna dɛn bɔt i min se na di wan ol wɔl i de tɔk bɔt.—Rɛvɛleshɔn 7:1; Lyuk 13:29.