Aw Jizɔs Bin Luk Lɛk?
Di Baybul in ansa
Nɔbɔdi nɔ rili no aw Jizɔs bin luk lɛk bikɔs di Baybul nɔ tɔk bɔt aw in fes ɔ in bɔdi bin tan. Dis sho se di we aw Jizɔs bin luk lɛk nɔ rili impɔtant. Bɔt di Baybul tɛl wi sɔntin dɛn fɔ ɛp wi fɔ no aw Jizɔs in bɔdi ɛn in fes bin tan lɛk.
Aw Jizɔs bin luk lɛk: Jizɔs na bin Ju ɛn i go mɔs bi se i fiba in mama pan di we aw Ju pipul dɛn bin luk lɛk. (Ibruz 7:14) I go mɔs bi se di we aw i bin luk nɔ bin rili difrɛn frɔm ɔda Ju dɛn. Wantɛm, i bin ebul travul sikrit wan frɔm Galili to Jerusɛlɛm ɛn nɔbɔdi nɔ bin no se na in. (Jɔn 7:10, 11) Ɛn i go mɔs bi se i nɔ bin difrɛn ivin we i de wit in disaypul dɛn. Mɛmba se Judas Iskariɔt bin nid fɔ sho udat na Jizɔs di tɛm we wan krawd we ol wɛpɔn dɛn bin kam fɔ arɛst am.—Matyu 26:47-49.
In ia: I go mɔs bi se Jizɔs in ia nɔ bin lɔng bikɔs di Baybul tɔk se “na disgres fɔ mek man gɛt lɔng ia.”—1 Kɔrintians 11:14.
In bia-bia: Jizɔs bin gɛt bia-bia. I bin fala di Ju lɔ we bin se man ‘nɔ fɔ shev in bia-bia.’ (Lɛvitikɔs 19:27; Galeshians 4:4) Dɔn di Baybul tɔk bɔt Jizɔs in bia-bia insay wan prɔfɛsi we de tɔk bɔt aw i sɔfa.—Ayzaya 50:6.
In bɔdi: Ɔl wetin wi no bɔt Jizɔs de sho se i bin strɔng, ɛn i bin gɛt wɛlbɔdi. Di tɛm we i de prich, i bin de waka go fa. (Matyu 9:35) I klin di Ju dɛn tɛmpul tu tɛm, i tɔnoba di wan dɛn we de chenj mɔni dɛn tebul dɛn, ɛn wantɛm i yuz wip fɔ drɛb dɛn animal dɛn. (Lyuk 19:45, 46; Jɔn 2:14, 15) McClintock and Strong’s Cyclopedia tɔk se: “Ɔl wetin dɛn tɔk bɔt Jizɔs in prichin wok sho se i bin strɔng ɛn i bin gɛt wɛlbɔdi.”—Vɔlyum IV, pej 884.
In fes: Jizɔs bin lɛk pipul dɛn ɛn i bin gɛt sɔri-at, ɛn in fes bin de sho se na da kayn pɔsin de i bi. (Matyu 11:28, 29) Ɔlkayn pipul dɛn bin de kam to am fɔ mek in ɛnkɔrej dɛn ɛn ɛp dɛn. (Lyuk 5:12, 13; 7:37, 38) Ivin pikin dɛn bin de fil fri fɔ kam nia am.—Matyu 19:13-15; Mak 9:35-37.
Lay lay tin dɛn bɔt aw Jizɔs luk lɛk
Lay: Sɔm pipul dɛn kin agyu se i go mɔs bi se Jizɔs in pipul dɛn kɔmɔt Afrika bikɔs Rɛvɛleshɔn kɔmpia in ia to wul ɛn in fut to “bras we dɛn bɔn na faya.”—Rɛvɛleshɔn 1:14, 15, Krio Fɔs Oli Baybul.
Tru: Dɛn yuz “sayn dɛn” fɔ tɔk bɔt di tin dɛn we de na Rɛvɛleshɔn. (Rɛvɛleshɔn 1:1) We Rɛvɛleshɔn tɔk bɔt Jizɔs in ia ɛn in fut, i bin de sho Jizɔs in kwaliti dɛn afta i gɛt layf bak, nɔto aw in ia ɔ in fut bin tan lɛk di tɛm we i de na di wɔl. We Rɛvɛleshɔn 1:14 tɔk se Jizɔs “in ed ɛn in ia bin wayt lɛk wayt wul, lɛk sno,” i bin de yuz kɔlɔ fɔ kɔmpia, nɔto aw in ia sɔft. Dis vas de tɔk bɔt in sɛns bikɔs ɔf in ej. (Rɛvɛleshɔn 3:14) I nɔ de kɔmpia di we aw Jizɔs in ia tan to wul jɔs lɛk aw i nɔ de kɔmpia am to di we aw sno tan.
Jizɔs in fut dɛn bin “tan lɛk fayn kɔpa we de shayn insay wam wam faya.” (Rɛvɛleshɔn 1:15) Dɔn in fes bin “tan lɛk di san we i de shayn brayt brayt wan.” (Rɛvɛleshɔn 1:16) Bikɔs no res nɔ de we gɛt skin kɔlɔ we fiba wetin dɛn vas dɛn ya se, dis vishɔn go mɔs min sɔntin. I min se Jizɔs we dɔn gɛt layf bak na di wan we “de na ples we so brayt dat nɔbɔdi nɔ ebul fɔ go de.”—1 Timoti 6:16.
Lay: Jizɔs bin wik.
Tru: Jizɔs bin de du tin lɛk man. Fɔ ɛgzampul, i bin gɛt maynd fɔ sho insɛf to pipul dɛn we bin kam fɔ arɛst am. (Jɔn 18:4-8) Dɔn bak, Jizɔs bin gɛt trɛnk fɔ yuz di tul dɛn we dɛn bin gɛt dɛn tɛm dɛn de fɔ wok as kapɛnta.—Mak 6:3.
So wetin mek Jizɔs bin nid pɔsin fɔ ɛp am fɔ tot di tik we i bin sɔfa pan? Ɛn wetin mek i bin day bifo in kɔmpin dɛn we dɛn ɛŋ na di tik? (Lyuk 23:26; Jɔn 19:31-33) Jɔs bifo dɛn kil Jizɔs, in bɔdi bin rili wik. I nɔ slip ol nɛt bikɔs ɔf aw i bin de fil. (Lyuk 22:42-44) Da nɛt de, di Ju dɛn bin dɔn trit am bad, ɛn di nɛks mɔnin, di Roman dɛnsɛf bin pɔnish am bad bad wan. (Matyu 26:67, 68; Jɔn 19:1-3) I go mɔs bi se na ɔl dɛn tin ya mek i day kwik.
Lay: Jizɔs bin siriɔs ɔltɛm ɛn i nɔ bin gladi.
Tru: Jizɔs bin de falamakata in Papa we de na ɛvin, Jiova, in kwaliti dɛn pafɛkt wan ɛn di Baybul tɔk se Jiova na “di Gɔd we gladi.” (1 Timoti 1:11; Jɔn 14:9) Infakt, Jizɔs bin tich ɔda pipul dɛn wetin dɛn fɔ du fɔ mek dɛn gladi. (Matyu 5:3-9; Lyuk 11:28) Dɛn tin dɛn ya de sho se we yu si Jizɔs yu go no se na pɔsin we gladi.