Aw Jizɔs De Sev?
Di Baybul in ansa
Jizɔs sev fetful mɔtalman dɛn bay we i gi in layf fɔ sev dɛn frɔm sin ɛn day. (Matyu 20:28) Na dat mek di Baybul kɔl Jizɔs di wan we kam fɔ “sev di wɔl.” (1 Jɔn 4:14) Di Baybul tɔk bak se: “No ɔda pɔsin nɔ de we go mek wi sev, bikɔs no ɔda nem nɔ de na di wɔl we dɛn dɔn gi mɔtalman we go mek wi sev.”—Akt 4:12.
Jizɔs “tes day fɔ ɔlman” we put fet pan am. (Ibruz 2:9; Jɔn 3:16) Afta dat, “Gɔd gi [Jizɔs] layf bak,” ɛn i go bak na ɛvin as spirit pɔsin. (Akt 3:15) Na de Jizɔs go ebul “fɔ sev di wan dɛn we de kam nia Gɔd tru am, pafɛkt wan, bikɔs i de alayv ɔltɛm fɔ beg fɔ dɛn.”—Ibruz 7:25.
Wetin mek wi nid Jizɔs fɔ beg fɔ wi?
Wi ɔl de sin. (Romans 3:23) Sin de mek wi nɔ gɛt padi biznɛs wit Gɔd, ɛn i de mek wi day. (Romans 6:23) Bɔt Jizɔs de “beg fɔ” di wan dɛn we sho se dɛn gɛt fet pan di day we i day fɔ fri wi frɔm sin ɛn day. (1 Jɔn 2:1, futnot) I de beg fɔ dɛn ɛn aks Gɔd fɔ yɛri dɛn prea dɛn ɛn fɔgiv dɛn sin dɛn tru di day we i day fɔ dɛn. (Matyu 1:21; Romans 8:34) Gɔd de lisin we Jizɔs de beg fɔ mɔtalman bikɔs na dat I want. Gɔd sɛn Jizɔs na di wɔl “fɔ mek di wɔl sev.”—Jɔn 3:17.
Wi jɔs nid fɔ biliv Jizɔs fɔ mek wi sev?
Nɔ. Pan ɔl we wi nid fɔ biliv Jizɔs fɔ mek wi sev, ɔda tin dɛn de fɔ du. (Akt 16:30, 31) Di Baybul se: “Jɔs lɛk aw bɔdi we nɔ gɛt spirit insay am dɔn day, na so bak pɔsin we gɛt fet bɔt nɔ de du natin, in fet dɔn day.” (Jems 2:26) Fɔ mek wi sev wi fɔ:
Lan bɔt Jizɔs ɛn in Papa, Jiova.—Jɔn 17:3.
Put fet pan dɛn.—Jɔn 12:44; 14:1.
Sho se wi gɛt fet bay we wi de du wetin dɛn tɛl wi. (Lyuk 6:46; 1 Jɔn 2:17) Jizɔs bin tich se nɔto ɔlman we de kɔl am “Masta” go sev bɔt na di wan dɛn nɔmɔ “we de du wetin [in] Papa we de na ɛvin want.”—Matyu 7:21.
Kɔntinyu fɔ sho fet pan ɔl we tin nɔ izi. Jizɔs mek wi no dis klia wan we i se: “Di wan we dɔn bia te di ɛnd na in go sev.”—Matyu 24:13.