Sɔm Man dɛn We No Bɔt Sta

YU DE si da brayt sta we wan pan dɛn man ya de pɔynt? Dɛn si di sta we dɛn kɔmɔt na Jerusɛlɛm. Dɛn man ya kɔmɔt na di Ist ɛn dɛn no bɔt sta. Dɛn biliv se dis nyu sta de kɛr dɛn go usay wan impɔtant pɔsin de.

We dɛn man ya bin kam na Jerusɛlɛm, dɛn aks se: ‘Usay dɛn bɔn di pikin we go bi kiŋ fɔ di Ju pipul dɛn?’ Ju na ɔda we fɔ kɔl di Izrɛlayt dɛn. Di man dɛn kɔntinyu fɔ tɔk se: ‘Wi si di pikin in sta we wi bin de na di Ist. Ɛn wi dɔn kam fɔ wɔship di pikin.’

Da tɛm de, na Ɛrɔd na bin di kiŋ na Jerusɛlɛm. We i yɛri bɔt dis, i vɛks. I nɔ bin want mek dɛn pul di kiŋdɔm na in an. So Ɛrɔd kɔl di bigman dɛn fɔ di prist dɛn, ɛn aks dɛn se: ‘Usay dɛn go bɔn di pikin we gɛt fɔ bi kiŋ?’ Dɛn ansa am se: ‘Di Baybul se dɛn go bɔn am na Bɛtliɛm.’

So Ɛrɔd kɔl di man dɛn we kɔmɔt na di Ist, ɛn tɛl dɛn se: ‘Una go luk fɔ dis pikin. We una si am, una kam tɛl mi. Misɛf want go wɔship am.’ Bɔt yu no wetin mek Ɛrɔd tɔk so? Na bikɔs i bin want kil di pikin.

We dɛn man ya de go, di sta de bifo dɛn te dɛn rich na Bɛtliɛm. Ɛn di sta lɛf fɔ muf we i rich na di os usay di pikin de. We di man dɛn go insay di os, dɛn si Meri ɛn Jizɔs. Dɛn gi Jizɔs di tin dɛn we dɛn sɛn fɔ am. Bɔt leta Jiova wɔn dɛn man ya pan drim se dɛn nɔ fɔ go bak to Ɛrɔd. So dɛn pas ɔda rod fɔ go bak na dɛn kɔntri.

We Ɛrɔd no se di man dɛn we kɔmɔt na di Ist dɔn go bak na dɛn kɔntri, i vɛks bad. So i pas lɔ se dɛn fɔ kil ɔl di bɔy pikin dɛn na Bɛtliɛm we ol frɔm tu ia te kam to di wan dɛn we dɛn jɔs bɔn. Bɔt Jiova bin dɔn wɔn Josɛf lɔntɛm pan drim, so Josɛf bin dɔn go wit in famili na Ijipt. Leta we Josɛf yɛri se Ɛrɔd dɔn day, i kam bak wit Meri ɛn Jizɔs na Nazarɛt. Na dis tɔŋ ya Jizɔs de te i big.

Udat yu tink se mek da nyu sta shayn? Mɛmba se, we di man dɛn si di sta, na Jerusɛlɛm fɔs dɛn go. Setan bin want fɔ kil Gɔd in Pikin, ɛn i no se Kiŋ Ɛrɔd we de na Jerusɛlɛm go mɔs tray fɔ kil am. So i go mɔs bi se na Setan mek da sta de shayn.