Wetin Mek Bad Tin Nɔ Bin Apin To Jizɔs?

SƆNTƐNDE Jiova kin du wɔndaful tin dɛn fɔ mek bad tin nɔ apin to yɔŋ wan dɛn, ɛn di wan dɛn we nɔ ebul fɛt fɔ dɛnsɛf. If yu go nia bush, yu go si wan we aw Jiova kin du dis. Bɔt fɔs, yu nɔ go ɔndastand wetin rili de apin.

Wan bɔd go kam tinap nia yu. I tan lɛk se sɔntin dɔn apin to am. I de drɛg wan pan in wiŋ dɛn ɛn de muv as yu de tray fɔ go nia am. As yu de fala di bɔd na so i de go fa frɔm yu. Dɔn wantɛm wantɛm, di bɔd flay go. Natin nɔ bin du in wiŋ. Yu no wetin mek di bɔd du dat?—

Wɛl, di bɔd bin dɔn ayd in pikin dɛn na di bush nia usay i kam tinap. Di mama bin de fred se yu go si in pikin dɛn ɛn du bad tin to dɛn. So i mek lɛk se sɔntin du am so dat yu go kɔmɔt nia in pikin dɛn. Yu sabi udat de mek bad nɔ apin to wi lɛk da bɔd dɛn mama?— Insay di Baybul, dɛn kɔmpia Jiova to wan bɔd we dɛn kɔl igul, we de ɛp in pikin dɛn.—Ditarɔnɔmi 32:​11, 12.

Di pikin we Jiova lɛk pas ɔl na Jizɔs. Di tɛm we Jizɔs bin de na ɛvin, in na bin pawaful spirit pɔsin, jɔs lɛk in Papa. I bin ebul fɔ kia fɔ insɛf. Bɔt we dɛn bɔn Jizɔs as pikin na dis wɔl, i nɔ bin ebul fɔ du natin. I bin nid pɔsin we go mek bad tin nɔ apin to am.

Fɔ mek wetin Gɔd want bi na dis wɔl, Jizɔs bin nid fɔ gro ɛn bi bigman we pafɛkt. Bɔt Setan bin tray fɔ kil Jizɔs bifo dat apin. Di we aw Setan bin want fɔ kil Jizɔs we in na bin pikin ɛn di we aw Jiova bin mek bad tin nɔ apin to am na fayn stori. Yu go lɛk fɔ yɛri am?—

Smɔl tɛm afta dɛn bɔn Jizɔs, Setan bin mek wan sta we kɔmɔt na di ist de shayn na di skay. Sɔm man dɛn we de stɔdi bɔt sta dɛn bin fala dis sta go fa say te dɛn rich Jerusɛlɛm. We dɛn rich de, dɛn aks usay dɛn go bɔn di kiŋ fɔ di Ju dɛn. We dɛn aks di man dɛn we no bɔt wetin di Baybul bin dɔn se, dɛn ansa se: “Na Bɛtliɛm.”—Matyu 2:​1-6.

Afta Ɛrɔd we na bin bad kiŋ na Jerusɛlɛm yɛri se dɛn dɔn bɔn dis nyu kiŋ na Bɛtliɛm, i tɛl di man dɛn we de stɔdi bɔt sta dɛn se: ‘Una go luk gud gud wan fɔ di pikin; we una si am, una tɔn bak kam tɛl mi.’ Yu no wetin mek Ɛrɔd bin want fɔ no usay Jizɔs de?— Na bikɔs Ɛrɔd bin de jɛlɔs ɛn i want fɔ kil Jizɔs.

Aw Gɔd bin mek natin nɔ du in Pikin?— Wɛl, we di man dɛn we de stɔdi bɔt sta dɛn bin si Jizɔs, dɛn bin gi am gift dɛn. Leta Gɔd bin yuz drim fɔ wɔn di man dɛn se dɛn nɔ fɔ go bak to Ɛrɔd. So dɛn yuz ɔda rod fɔ go bak na dɛn kɔntri. We Ɛrɔd kam fɔ no se di man dɛn we de stɔdi sta dɛn dɔn go, i bin vɛks bad bad wan. Bikɔs Ɛrɔd bin want fɔ kil Jizɔs, i mek dɛn kil ɔl di bɔy pikin dɛn we ol tu ia te kam dɔŋ. Bɔt da tɛm de, Jizɔs nɔ bin de de igen.

Yu no wetin bin apin?— Afta we di man dɛn we stɔdi bɔt sta go na dɛn kɔntri, Jiova bin tɛl Meri in man, we na Josɛf, fɔ rɔnawe go na Ijipt. We Jizɔs de de, Ɛrɔd nɔ go ebul du bad tin to am. Afta lɔng tɛm, we Meri ɛn Josɛf kɔmɔt Ijipt wit Jizɔs, Gɔd bin tɔk to Josɛf bak. I tɛl am na drim fɔ mek i go na Nazarɛt usay natin nɔ go du Jizɔs.—Matyu 2:​7-23.

Yu si aw Jiova mek natin nɔ apin to in Pikin?— Udat yu go se tan lɛk da smɔl bɔd dɛn we dɛn mama de ayd na bush ɔ lɛk Jizɔs we na bin smɔl pikin? Yu tan lɛk dɛn, nɔto so?— Pɔsin de we want fɔ du yu bad. Yu no udat?—

Di Baybul se Setan tan lɛk layɔn we dɔn vɛks bad bad wan we want fɔ it wi. Ɛn jɔs lɛk we layɔn lɛk fɔ it dɛn smɔl animal dɛn, na so Setan ɛn in dɛbul dɛnsɛf lɛk fɔ ambɔg smɔl pikin dɛn. (Pita In Fɔs Lɛta 5:​8) Bɔt Jiova gɛt pawa pas Setan. Jiova ebul mek bad tin nɔ apin to in pikin dɛn, ɔ i ebul pul ɛni bad tin we Setan dɔn du to dɛn.

Mɛmba se na Chapta 10 insay dis buk, wi bin lan bɔt wetin Setan ɛn in dɛbul dɛn de tray fɔ mek wi du, nɔto so?— Yɛs, dɛn kin want fɔ mek wi du mami ɛn dadi biznɛs pan ɔl we Gɔd se i bad. Bɔt udat dɛn nɔmɔ fɔ du mami ɛn dadi biznɛs?— Yɛs, na man ɛn uman we dɔn big ɛn we dɔn mared.

Bɔt i sɔri fɔ no se sɔm big pipul dɛn kin want fɔ du mami ɛn dadi biznɛs wit smɔl pikin dɛn. We dɛn kin du dis, bɔy pikin ɛn gyal pikin dɛn kin bigin du di bad tin dɛn we dɛn dɔn lan frɔm dɛn big wan dɛn ya. Dɛn kin bigin bak fɔ yuz dɛn prayvet pat di rɔŋ we. Na dis kayn tin bin apin trade insay wan tɔŋ we dɛn kɔl Sɔdɔm. Di Baybul se di pipul dɛn we bin de de, ‘frɔm big wan to smɔl wan,’ tray fɔ du mami ɛn dadi biznɛs wit sɔm man dɛn we bin kam to Lɔt.—Jɛnɛsis 19:​4, 5.

So jɔs lɛk aw Jizɔs bin nid pɔsin we go mek bad tin nɔ apin to am, na so yusɛf nid pɔsin we go mek big pɔsin nɔ du bad tin to yu ɔ ivin frɔm ɔda pikin dɛn we go want fɔ mek una du mami ɛn dadi biznɛs. Bɔku tɛm, dɛn pipul ya kin mek lɛk se yu na dɛn padi. Dɛn go ivin se dɛn go gi yu sɔntin if yu prɔmis se yu nɔ go tɛl ɛnibɔdi bɔt wetin dɛn want fɔ du to yu. Bɔt dɛn pipul ya de tink bɔt dɛnsɛf nɔmɔ lɛk Setan ɛn in dɛbul dɛn, ɛn dɛn jɔs want fɔ ɛnjɔy dɛnsɛf. Ɛn dɛn de ɛnjɔy dɛnsɛf we dɛn du mami ɛn dadi biznɛs wit pikin dɛn. Dis rili bad!

Yu sabi wetin dɛn go du fɔ ɛnjɔy dɛnsɛf?— Wɛl, dɛn go tray fɔ rɔb yu prayvet pat. Ɔ dɛn go ivin rɔb dɛn prayvet pat pan yu yon. Bɔt yu nɔ fɔ mek ɛnibɔdi ple wit yu prayvet pat; ivin if na yu brɔda ɔ sista ɔ yu mama ɔ papa. Dis na prayvet pat dɛn na yu bɔdi.

Wetin yu go du fɔ mek pɔsin nɔ du bad tin lɛk dis to yu?— Fɔs, nɔ gri lɛ ɛnibɔdi ple wit yu prayvet pat dɛn. If sɔmbɔdi tray fɔ du dat, tɔk lawd wan se: “Stɔp dat! A de go le yu kɔmplen!” Ɛn if di pɔsin se wetin apin na yu fɔlt, nɔ biliv am. Dat nɔto tru. Jɔs go le in kɔmplen, ilɛk udat i bi! Yu fɔ le in kɔmplen ilɛksɛf i tɛl yu se na sikrit we fɔ de bitwin yu ɛn in nɔmɔ. Ilɛksɛf i prɔmis yu fayn fayn tin ɔ i trɛtin yu, yu fɔ rɔnawe ɛn le in kɔmplen.

Yu nɔ nid fɔ fred, bɔt yu fɔ rili tek tɛm. We yu mama ɛn papa wɔn yu bɔt pipul dɛn ɔ ples dɛn we nɔ fayn fɔ de, yu nid fɔ lisin to dɛn. If yu du dat, yu go mek bad pɔsin nɔ gɛt chans fɔ du yu bad.