Jizɔs De Insay di Tɛmpul

LUK di smɔl bɔbɔ we de tɔk to dɛn bigman ya. Dɛn bigman ya na ticha dɛn na Gɔd in tɛmpul na Jerusɛlɛm. Ɛn di smɔl bɔbɔ na Jizɔs. I dɔn big smɔl. I ol 12 ia naw.

Di ticha dɛn de wɔnda we Jizɔs no plɛnti tin bɔt Gɔd ɛn di tin dɛn we rayt na di Baybul. Bɔt wetin mek Josɛf ɛn Meri nɔ de wit Jizɔs naya? Usay dɛn de? Lɛ wi si.

Ɛvri ia, Josɛf kin go wit in famili na Jerusɛlɛm pan wan spɛshal ɔlide we dɛn kɔl Pasova. I fa fɔ kɔmɔt na Nazarɛt fɔ go na Jerusɛlɛm. Motoka nɔ bin de da tɛm de. Na waka bɔku pipul dɛn bin de waka, ɛn dɛn bin de tek lɛk tri dez so fɔ rich na Jerusɛlɛm.

Josɛf dɔn gɛt big famili naw. Jizɔs dɔn gɛt smɔl brɔda dɛn ɛn smɔl sista dɛn. Josɛf ɛn Meri gɛt fɔ kia fɔ dɛn ɔl. We di Pasova dɔn, Josɛf ɛn Meri bigin go bak wit dɛn pikin dɛn na Nazarɛt. We dɛn bin de go, dɛn bin tink se Jizɔs de wit di ɔda pipul dɛn we bin de travul wit dɛn. Bɔt we dɛn dɔn waka ol de, dɛn nɔ si Jizɔs. Dɛn bigin luk fɔ am to dɛn fambul dɛn ɛn dɛn padi dɛn, bɔt dɛn nɔ si am. So dɛn tɔn bak na Jerusɛlɛm fɔ go luk fɔ am.

We dɛn dɔn luk luk fɔ Jizɔs, dɛn kam si am na di tɛmpul wit di ticha dɛn. I de lisin to dɛn ɛn i de aks dɛn kwɛstyɔn. Ɛn ɔl di pipul dɛn de wɔnda di we aw Jizɔs gɛt sɛns. We Josɛf ɛn Meri si Jizɔs, Meri se: ‘Mi pikin, wetin mek yu du wi so? Mi ɛn yu papa dɔn luk fɔ yu ɛn wi wɔri we wi nɔ si yu.’

Jizɔs se: ‘Wetin mek una de luk fɔ mi? Una nɔ no se a fɔ de na mi Papa in Os?’

Jizɔs lɛk fɔ de na ples usay i kin lan bɔt Gɔd. So wisɛf fɔ lɛk fɔ de na ples usay wi go lan bɔt Gɔd. We Jizɔs kin de na Nazarɛt, i kin go usay dɛn de wɔship ɔltɛm. Bikɔs i bin de lisin we i de go de, i lan bɔku tin dɛn we de na di Baybul. Wisɛf fɔ tan lɛk Jizɔs.