Lɛ Lɔv Mek Yu Kɔntinyu fɔ Prich!

1. Wetin wi lan na di 2023 anwal mitin?

NA DI 2023 anwal mitin,a wi bin yɛri bɔt sɔm ajɔstmɛnt dɛn bɔt di tin dɛn we wi biliv ɛn wi bin yɛri sɔm fayn anawnsmɛnt dɛn bɔt wi prichin wok. Fɔ ɛgzampul, wi lan se sɔm pipul dɛn go stil gɛt chans fɔ jɔyn Jiova in pipul dɛn ivin afta dɛn dɔnawe wit Babilɔn di Gret. Wi bin lan bak se frɔm Novɛmba 2023, pɔblisha dɛn nɔ go nid fɔ rayt ɔltin we dɛn du na dɛn fil savis ripɔt igen. Fɔ se dɛn tin dɛn ya de mek i tan lɛk se di prichin wok nɔ ɔjɛnt igen lɛk aw i bin ɔjɛnt? Nɔ, nɔto so i bi!

2. Wetin mek wi prichin wok de ɔjɛnt mɔ ɛn mɔ ɛvride? (Mak 13:10)

² Wi prichin wok de ɔjɛnt mɔ ɛn mɔ ɛvride. Wetin mek? Na bikɔs bɛtɛ tɛm nɔ de igen. Tink bɔt wetin Jizɔs bin tɔk bɔt di prichin wok we go apin insay di las dez. (Rid Mak 13:10.) Akɔdin to wetin Matyu rayt, Jizɔs bin tɔk se dɛn go prich di gud nyuz na di wan ol wɔl bifo “di ɛnd” kam. (Mat. 24:14) Dɛn wɔd dɛn de de tɔk bɔt di tɛm we dɛn go dɔnawe wit ɔltin na Setan in wikɛd wɔl. Jiova dɔn pik “di de ɛn di awa” we dɛn tin dɛn ya go apin. (Mat. 24:36; 25:13; Akt 1:7) Wi de go nia da tɛm de ɛnide wi slip ɛn wek. (Rom. 13:11) Bɔt te da tɛm de rich, wi fɔ kɔntinyu fɔ prich di gud nyuz.

3. Wetin mek wi de prich?

³ As wi de tink bɔt wi prichin wok, i go fayn fɔ mek wi aks wisɛf dis impɔtant kwɛstyɔn: Wetin mek wi de prich di gud nyuz. Na lɔv de mek wi prich. We wi de du di prichin wok, i de sho se wi lɛk di gud nyuz, wi lɛk pipul dɛn, ɛn wetin impɔtant pas ɔl na dat, wi lɛk Jiova ɛn in nem. Lɛ wi tɔk bɔt dɛn tri rizin dɛn ya wan bay wan.

WI DE PRICH BIKƆS WI LƐK DI GUD NYUZ

4. Aw wi kin fil we wi yɛri gud nyuz?

⁴ Yu ebul mɛmba aw yu bin fil we yu yɛri gud nyuz? Sɔntɛm dɛn tɛl yu se pɔsin na yu famili dɔn bɔn ɔ dɛn gi yu wok we yu bin rili nid. Wan dawt nɔ de se yu bin want fɔ tɛl yu fambul ɛn padi dɛn bɔt da nyuz de. Na di sem tin apin to yu we yu yɛri di bɛst nyuz we na di gud nyuz bɔt Gɔd in Kiŋdɔm?

5. Aw yu bin fil di fɔs tɛm we yu lan di tru tin dɛn na Gɔd in Wɔd? (Luk bak di pikchɔ dɛn.)

⁵ Tink bɔt aw yu bin fil di fɔs tɛm we yu lan di tru tin dɛn na Gɔd in Wɔd. Yu bin lan se yu Papa we de na ɛvin lɛk yu, i want yu fɔ de pat pan in famili we de wɔship am, i dɔn prɔmis se i go mek pipul dɛn lɛf fɔ fil pen ɛn sɔfa, ɛn yu kin op se yu go si yu fambul dɛn we yu lɛk we dɔn day gɛt layf bak na di nyu wɔl, ɛn bɔku ɔda tin dɛn. (Mak 10:​29, 30; Jɔn 5:​28, 29; Rom. 8:​38, 39; Rɛv. 21:​3, 4) Dɛn tru tin dɛn ya we yu lan bin rili tɔch yu at. (Lyuk 24:32) Yu bin lɛk wetin yu de lan ɛn yu bin want fɔ tɛl ɔda pipul dɛn bɔt di fayn tin dɛn we yu dɔn lan!—Luk bak Jɛrimaya 20:9.

6. Wetin yu lan frɔm Anɛs ɛn Roz dɛn ɛkspiriɛns?

⁶ Lɛ wi tɔk bɔt wan ɛkspiriɛns. Wan brɔda we nem Anɛsb bin ol lɛk 10 ia we in papa day. Anɛs tɔk se: “A bin de wɔnda: ‘Fɔ se i dɔn go na ɛvin? Ɔ fɔ se a nɔ go ɛva si am igen?’ A bin de jɛlɔs ɔda pikin dɛn we dɛn papa dɛn bin stil de alayv.” Anɛs bin de go na di grevyad ɔltɛm ɛn nil dɔŋ bifo in papa in grev, ɛn pre se: “Gɔd duya, a want fɔ no usay mi papa de.” Lɛk 17 ia so afta Anɛs in papa day, dɛn aks am if i go lɛk fɔ stɔdi di Baybul ɛn i bin gri. I bin sɔprayz fɔ lan se di wan dɛn we dɔn day nɔ no natin, i jɔs tan lɛk se dɛn de pan dip slip, ɛn di Baybul prɔmis se di wan dɛn we dɔn day go gɛt layf bak tumara bambay. (Ɛkli. 9:​5, 10; Akt 24:15) Faynali, i gɛt ansa to kwɛstyɔn dɛn we dɔn de na in maynd fɔ lɔng tɛm! Anɛs bin rili gladi fɔ di tru tin dɛn we i bin de lan na di Baybul. In wɛf, Roz insɛf bin jɔyn am fɔ stɔdi ɛn insɛf bin lɛk wetin i de lan. Dɛn bin baptayz insay 1978. Dɛn bin gladi fɔ tɛl dɛn fambul dɛn, padi dɛn, ɛn ɔda pipul dɛn we rɛdi fɔ lisin to di fayn tin dɛn we dɛn dɔn lan. Bikɔs ɔf dat, Anɛs ɛn Roz bin ɛp pas 70 pipul dɛn fɔ gi dɛn layf to Jiova ɛn baptayz.

7. Wetin go apin if wi lɛk di tru tin dɛn we wi de lan na di Baybul? (Lyuk 6:45)

⁷ Wi dɔn si klia wan se we wi rili lɛk di trut, wi go want fɔ tɛl ɔda pipul dɛn bɔt am. (Rid Lyuk 6:45.) Wi go fil di sem we aw Jizɔs in fɔstɛm disaypul dɛn bin fil we mek dɛn tɔk se: “Wi nɔ go stɔp fɔ tɔk bɔt di tin dɛn we wi dɔn si ɛn yɛri.” (Akt 4:20) Wi rili lɛk di trut, so wi want fɔ tɛl ɔlman we wi ebul tɛl bɔt am.

WI DE PRICH BIKƆS WI LƐK PIPUL DƐN

8. Wetin de mek wi want fɔ tɛl pipul dɛn bɔt di gud nyuz? (Luk di bɔks we gɛt di taytul “Lɛk Pipul dɛn—we Yu De Mek Disaypul.”) (Luk bak di pikchɔ.)

⁸ Jɔs lɛk Jiova ɛn in Bɔypikin, wisɛf lɛk pipul dɛn. (Prɔv. 8:31; Jɔn 3:16) Wi de rili sɔri fɔ di wan dɛn we nɔ “no Gɔd” ɛn di wan dɛn we nɔ “gɛt op.” (Ɛfi. 2:12) Dɛn gɛt bɔku prɔblɛm dɛn ɛn wi gɛt wetin dɛn nid, we na di gud nyuz bɔt Gɔd in Kiŋdɔm. Di lɔv ɛn sɔri-at we wi gɛt fɔ dɛn kayn pipul dɛn de go mek wi du ɔl wetin wi ebul fɔ tɛl dɛn di gud nyuz. Da fayn mɛsej de, de gi dɛn op, ɛp dɛn fɔ liv di bɛst layf naw, ɛn gi dɛn chans fɔ gɛt “di rial layf” we na layf we go de sote go na Gɔd in nyu wɔl.—1 Tim. 6:19.

9. Us wɔnin wi de gi pipul dɛn bɔt tumara bambay? Wetin mek? (Izikɛl 33:​7, 8)

⁹ Di lɛk we wi lɛk pipul dɛn de mek wi wɔn dɛn se di tɛm fɔ lɛ dis wɔl dɔn de nia. (Rid Izikɛl 33:7, 8.) Wi gɛt sɔri-at fɔ wi neba dɛn ɛn wi fambul dɛn we nɔto Jiova Witnɛs. Bɔku pan dɛn de liv dɛn layf nɔmal wan ɛvride ɛn dɛn nɔ no se wan “big big trɔbul we nɔ wande apin frɔm we Gɔd mek di wɔl te naw go apin, ɛn i nɔ go ɛva apin igen.” (Mat. 24:21) Wi want mek dɛn no se we di tɛm fɔ jɔj rich, dɛn go dɔnawe wit lay lay rilijɔn ɛn Setan in wikɛd wɔl insay Amagɛdɔn. (Rɛv. 16:​14, 16; 17:​16, 17; 19:​11, 19, 20) Wi de pre se bɔku pipul dɛn go lisin to di wɔnin mɛsej naw ɛn jɔyn wi fɔ wɔship Jiova di rayt we. Bɔt wetin go apin to di wan dɛn we nɔ de lisin to dis wɔnin naw, ivin wi fambul dɛn we wi lɛk?

10. Wetin mek i ɔjɛnt fɔ mek wi kɔntinyu fɔ wɔn pipul dɛn bɔt wetin gɛt fɔ apin?

¹⁰ Jɔs lɛk aw wi dɔn ɛksplen na di atikul bifo dis wan, sɔntɛm Jiova go want fɔ sev di pipul dɛn we go sho se dɛn gɛt fet pan am we dɛn go si se dɛn dɔn dɔnawe wit Babilɔn di Gret. If na so i go bi, dat min se i ɔjɛnt naw pas ɛni ɔda tɛm fɔ mek wi kɔntinyu fɔ wɔn pipul dɛn. Tink bɔt dis: Wetin wi go tɛl dɛn naw go mek dɛn gɛt sɔntin fɔ mɛmba da tɛm de. (Luk bak Izikɛl 33:33.) Sɔntɛm dɛn go tink bɔt di wɔnin we dɛn bin dɔn gɛt ɛn dat go mek dɛn disayd fɔ jɔyn wi fɔ wɔship Jiova bifo i go let pasmak. Jɔs lɛk aw di man we bin de gayd di jelman dɛn na Filipay bin chenj afta i si wan “big big atkwek apin,” sɔntɛm na so sɔm pan di pipul dɛn we nɔ de lisin to wi naw go chenj we dɛn si di we aw dɛn dɔnawe wit Babilɔn di Gret.—Akt 16:​25-34.

WI DE PRICH BIKƆS WI LƐK JIOVA ƐN IN NEM

11. Aw wi go gi Jiova di glori, ɔnɔ, ɛn pawa? (Rɛvɛleshɔn 4:11) (Luk bak di pikchɔ dɛn.)

¹¹ Di rizin we impɔtant pas ɔl we mek wi de prich di gud nuyz na bikɔs wi lɛk Jiova Gɔd ɛn in oli nem. Wi de si di prichin wok as we fɔ mek wi go prez di Gɔd we wi lɛk. (Rid Rɛvɛleshɔn 4:11.) Wi gri wit ɔl wi at se Jiova Gɔd fit fɔ gɛt di glori, di ɔnɔ, ɛn di pawa frɔm di wan dɛn we de wɔship am. Wi de gi am glori ɛn ɔnɔ we wi ɛp ɔda pipul dɛn fɔ biliv se “na [in] mek ɔltin” ɛn na in gi wi layf. Wi de gi am wi pawa we wi yuz wi tɛm, trɛnk, ɛn di tin dɛn we wi gɛt fɔ du ɔl wetin wi ebul fɔ prich to pipul dɛn. (Mat. 6:33; Lyuk 13:24; Kol. 3:23) Fɔ tɔk am simpul wan, wi lɛk fɔ tɔk bɔt Gɔd bikɔs wi lɛk am. Wi want fɔ tɛl ɔda pipul dɛn bak bɔt in nem ɛn di kayn Gɔd we i bi. Wetin mek?

12. Aw wi go ɛp fɔ mek Jiova in nem oli we wi de prich?

¹² Di lɛk we wi lɛk Jiova de mek wi want fɔ mek in nem oli. (Mat. 6:9) Wi want fɔ ɛp fɔ mek pipul dɛn no se di bad tin dɛn we Setan dɔn tɔk bɔt Jiova nɔto tru. (Jɛn. 3:​1-5; Job 2:4; Jɔn 8:44) We wi de prich, wi rili want fɔ tɛl ɔlman we go lisin to wi di tru bɔt udat Jiova rili bi. Wi want mek ɔlman no se di kwaliti we pas ɔl we i gɛt na lɔv. Wi want mek dɛn no bak se i de rul di rayt we, i de du tin tret, ɛn i nɔ go te igen in Kiŋdɔm go mek wi lɛf fɔ sɔfa ɛn mek ɔlman gɛt pis ɛn gladi-at. (Sams 37:​10, 11, 29; 1 Jɔn 4:8) We wi tɛl pipul dɛn bɔt dɛn tin dɛn ya we wi de prich, wi de ɛp fɔ mek Jiova in nem oli. Wi kin gladi bak fɔ no se wi de du wetin i tɛl wi fɔ du as Jiova Witnɛs dɛn. Wetin mek wi se so?

13. Wetin mek wi de si am se na big big ɔnɔ wi gɛt fɔ mek dɛn kɔl wi Jiova Witnɛs dɛn? (Ayzaya 43:​10-12)

¹³ Jiova dɔn pik wi fɔ bi in “witnɛs dɛn.” (Rid Ayzaya 43:10-12.) I dɔn te smɔl we di Gɔvnin Bɔdi rayt insay wan lɛta se: “Di ɔnɔ we pas ɔl we wi go gɛt na we dɛn kɔl wi Jiova Witnɛs.”c Wetin mek wi se so? Tink bɔt dis ɛgzampul. Imajin se dɛn lay pan yu se yu dɔn du bad, ɛn yu nid pɔsin fɔ go tɔk fɔ yu se di tin dɛn we dɛn tɔk bɔt yu nɔto tru, ɛn fɔ mek dɛn no se yu na gud pɔsin we nɔ go ɛva du da kayn tin de. Udat yu go pik? Wi biliv se yu go pik pɔsin we yu sabi ɛn trɔst we ɔda pipul dɛn bak gɛt rɛspɛkt fɔ ɛn we dɛn trɔst. Semewso, we Jiova pik wi fɔ bi in Witnɛs dɛn, i sho se i sabi wi gud gud wan ɛn i biliv se wi go ebul fɔ mek pipul dɛn no se in na di wangren tru Gɔd. Wi rili gladi fɔ di ɔnɔ we wi gɛt fɔ bi in Witnɛs dɛn, na dat mek wi de yuz ɛni chans we wi gɛt fɔ mek pipul dɛn sabi in nem, ɛn fɔ mek dɛn no se di lay lay tin dɛn we dɛn de tɔk bɔt am nɔto tru. We wi de du dat, wi de sho se wi gladi we dɛn de kɔl wi Jiova Witnɛs dɛn!—Sams 83:18; Rom. 10:​13-15.

WI GO KƆNTINYU FƆ PRICH TE DI ƐND KAM

14. Us fayn tin dɛn go apin jisnɔ?

¹⁴ Us fayn tin dɛn go apin jisnɔ? Wit Jiova in blɛsin, wi de op fɔ si we bɔku bɔku pipul dɛn go jɔyn wi fɔ sav am bifo da big big trɔbul bigin. Ɛn wi gladi bak fɔ no se chans go stil de fɔ mek pipul dɛn kɔmɔt na Setan in wɔl ɛn kam jɔyn wi fɔ prez Jiova ivin insay di tɛm fɔ di big big trɔbul!—Akt 13:48.

15-16. Wetin wi go kɔntinyu fɔ du? Ustɛm wi go stɔp?

¹⁵ Rayt naw wi gɛt wok fɔ du. Wi gɛt di chans fɔ prich di gud nyuz bɔt Gɔd in Kiŋdɔm ɔlsay na di wɔl, ɛn dis na wok we wi nɔ go ɛva gɛt chans fɔ du igen. As wi de prich, wi fɔ kɔntinyu fɔ wɔn pipul dɛn bɔt wetin go apin jisnɔ. Pipul dɛn nid fɔ no se tɛm nɔ de fa igen fɔ mek dis wikɛd wɔl dɔn. So we di tɛm fɔ jɔj rich, dɛn go no se di mɛsej we wi bin de prich kɔmɔt frɔm Jiova Gɔd.—Izi. 38:23.

¹⁶ Wetin wi dɔn mek-ɔp wi maynd fɔ du? Bikɔs wi lɛk di gud nyuz, lɛk pipul dɛn, ɛn wetin pas ɔl na dat wi lɛk Jiova Gɔd ɛn in nem, wi de kɔntinyu fɔ prich wit zil ɛn wi de du am ɔjɛnt wan te Jiova tɔk se, “I du so!”