Put Yusɛf Dɔŋ ɛn Gri se Nɔto Ɔltin Yu No

1. Us tin dɛn Jiova mek wi ebul fɔ du? Wetin mek?

JIOVA mek wi di kayn we we wi ebul fɔ tink, lan nyu tin dɛn, ɔndastand, ɛn du tin wit sɛns. Wetin mek i mek wi dis kayn we? Na bikɔs i want mek wi ‘no bɔt am’ ɛn mek wi tink we wi de sav am.​—Prɔv. 2:1-5; Rom. 12:1.

2. (a) Wetin na sɔm tin dɛn we wi nɔ ebul fɔ du? (Job 37:23, 24) (Luk bak di pikchɔ.) (b) Aw wi de bɛnifit we wi gri se sɔm tin dɛn de we wi nɔ ebul fɔ du?

² Pan ɔl we wi ebul fɔ lan nyu tin dɛn, tin dɛn de we wi nɔ no. (Rid Job 37:​23, 24.) Lɛ wi tɔk bɔt Job in ɛgzampul. Di kwɛstyɔn dɛn we Jiova bin aks Job bin mek i no se bɔku tin dɛn de we i nɔ no. Dat bin mek Job put insɛf dɔŋ, ɛn i ɛp am fɔ kɔrɛkt di we aw i bin de tink. (Job 42:3-6) Wisɛf go bɛnifit we wi mɛmba se nɔto ɔltin wi no. We wi no se nɔto ɔltin wi no, dat go mek wi abop pan Jiova se i go mek wi no wetin wi rili nid fɔ no fɔ ɛp wi fɔ disayd fɔ du tin wit sɛns.​—Prɔv. 2:6.

3. Wetin wi go tɔk bɔt insay dis atikul?

³ Insay dis atikul, wi go tɔk bɔt sɔm tin dɛn we wi nɔ no ɛn di prɔblɛm dɛn we wi kin gɛt bikɔs wi nɔ no dɛn tin dɛn de. Wi go tɔk bak bɔt wetin mek i fayn we sɔm tin dɛn de we wi nɔ no. Di tin dɛn we wi go lan go ɛp wi fɔ gɛt mɔ kɔnfidɛns se, Jiova “di Wan we sabi ɔltin pafɛkt wan,” de tɛl wi wetin wi rili nid fɔ no.​—Job 37:16.

WI NƆ NO USTƐM DI ƐND GO KAM

4. Akɔdin to Matyu 24:36, wetin na wan tin we wi nɔ no?

⁴ Rid Matyu 24:36. Wi nɔ no ustɛm dis wɔl go dɔn. Ivin we Jizɔs sɛf bin de na di wɔl, i nɔ bin no “di de ɛn di awa.”a Leta, Jizɔs bin tɛl in apɔsul dɛn se Jiova we na di Pɔsin we sabi tɛm pas ɔlman, na in “nɔmɔ gɛt di rayt fɔ disayd,” ɔ di pawa fɔ no ustɛm fɔ du sɔm patikyula tin dɛn. (Akt 1:6, 7) Jiova dɔn disayd ustɛm dis wɔl go dɔn, bɔt wi nɔ ebul fɔ no di rayt tɛm we dat go bi.

5. Bikɔs wi nɔ no ustɛm di wɔl go dɔn, aw dat kin afɛkt wi?

⁵ Frɔm wetin Jizɔs bin tɔk, wi nɔ no aw lɔng wi go nid fɔ wet fɔ mek di wɔl dɔn. Bikɔs ɔf dat, sɔntɛm wi nɔ go want fɔ kɔntinyu fɔ peshɛnt ɔ sɔntɛm wi at go pwɛl, mɔ if i dɔn te we wi de wet fɔ lɛ Jiova in de kam. Ɔ sɔntɛm i nɔ go izi fɔ lɛ wi bia we wi fambul dɛn ɔ ɔda pipul dɛn de provok wi. (2 Pit. 3:3, 4) I pɔsibul fɔ mek wi fil se if wi no di patikyula de we di ɛnd go kam, wi go ebul fɔ peshɛnt mɔ ɛn i go izi fɔ mek wi bia we dɛn de provok wi.

6. Wetin mek i fayn we wi nɔ no ustɛm di ɛnd go kam?

⁶ Fɔ tru, we Jiova nɔ sho wi di tɛm we di ɛnd go kam, i gi wi chans fɔ sho se wi de sav am bikɔs wi lɛk am ɛn wi abop pan am. Wi nɔ jɔs want fɔ sav Jiova te di ɛnd kam, bɔt wi want fɔ sav am sote go. Bifo wi jɔs pe atɛnshɔn to di tɛm we “Jiova in de” go kam, i go fayn fɔ mek wi pe atɛnshɔn to di gud tin dɛn we go apin we da de de kam. We wi du dat, i go mek wi padi biznɛs wit Gɔd tayt mɔ ɛn mɔ, abop pan am, ɛn du wetin go mek i gladi.​—2 Pit. 3:11, 12.

7. Wetin wi no?

⁷ I go fayn fɔ mek wi pe atɛnshɔn pan wetin wi no. Wi no se di las dez bigin insay 1914. Jiova dɔn gi wi Baybul prɔfɛsi dɛn we nɔ jɔs sho se na da ia de di las dez bigin, bɔt i tɔk bak bɔt patikyula tin dɛn we dɔn de apin frɔm da tɛm de. Bikɔs ɔf dat, wi biliv tranga wan se “Jiova in gret de dɔn kam nia.” (Zɛf. 1:14) Wi no bak di wok we Jiova want wi fɔ du, dat na fɔ prich di “gud nyuz bɔt di Kiŋdɔm” to ɔlman we wi ebul fɔ tɔk to. (Mat. 24:14) Wi de prich dis mɛsej na lɛk 240 kɔntri dɛn ɛn insay pas 1,000 langwej dɛn. Wi nɔ nid fɔ no “di de ɛn di awa” fɔ mek wi go du dis impɔtant wok wit zil.

WI NƆ NO WETIN JIOVA GO DU

8. Wetin “di wok we di tru Gɔd . . . de du” min? (Ɛkliziastis 11:5)

⁸ Wi nɔ kin no “di wok we di tru Gɔd . . . de du” ɔltɛm. (Rid Ɛkliziastis 11:5.) Dɛn wɔd dɛn de min di tin dɛn we Jiova de du ɔ di tin dɛn we i de alaw fɔ apin so dat wetin i want go bi. Wi nɔ ebul fɔ no wetin mek Jiova kin alaw sɔm tin dɛn fɔ apin ɔ wetin i go du fɔ ɛp wi. (Sam 37:5) Di Baybul kɔmpia di no we wi nɔ no “di wok we di tru Gɔd . . . de du” to di no we wi nɔ no aw pikin de gro insay in mama in bɛlɛ. Ivin sayɛnsman dɛnsɛf nɔ stil ebul fɔ rili ɔndastand aw pikin de gro insay in mama in bɛlɛ. Semweso, wi rili nɔ no wetin Jiova go du.

9. Bikɔs wi nɔ no wetin Jiova go du, aw dat kin mek wi fil?

⁹ We wi nɔ no aw Jiova go ɛp wi, sɔntɛm dat go mek wi nɔ ebul disayd fɔ du di rayt tin. Sɔntɛm wi go fred fɔ mek sakrifays dɛn fɔ du mɔ na di prichin wok, lɛk fɔ liv simpul layf ɔ fɔ go usay dɛn nid mɔ pipul dɛn fɔ prich bɔt di Kiŋdɔm. Ɔ sɔntɛm wi go tink se Jiova nɔ go gladi fɔ wi if wi tray fɔ du mɔ na in savis bɔt wi nɔ ebul fɔ rich wi gol dɛn. Ɔ sɔntɛm wi de du wi bɛst fɔ du di prichin wok bɔt stil wi nɔ gɛt Baybul stɔdi dɛn, ɔ wi de wok tranga wan pan wan spɛshal projɛkt fɔ di ɔganayzeshɔn, bɔt wi de gɛt bɔku prɔblɛm dɛn. Bikɔs ɔf dat, sɔntɛm wi go fil se Jiova nɔ gladi fɔ wi.

10. We wi nɔ no wetin Jiova go du, us impɔtant kwaliti dɛn dat de ɛp wi fɔ gɛt?

¹⁰ We wi nɔ no wetin Jiova go du, dat de ɛp wi fɔ gɛt impɔtant kwaliti dɛn lɛk fɔ bi fɔ pɔsin we ɔmbul ɛn fɔ bi pɔsin we no se nɔto ɔltin i ebul fɔ du. I de ɛp wi fɔ no se di we aw Jiova de tink ɛn du tin ay pas aw wi de tink ɛn du tin. (Ayz. 55:8, 9) I de ɛp wi bak fɔ abop pan Jiova wit ɔl wi at ɛn biliv se i go mek bɛtɛ fala wi. We wi gɛt gud rizɔlt dɛn na di prichin wok ɔ pan ɛni tiokratik projɛkt, na Jiova wi de gi di prez. (Sam 127:1; 1 Kɔr. 3:7) If tin dɛn nɔ apin di we aw wi de ɛkspɛkt, wi fɔ mɛmba se ɔltin stil de na Jiova in an. (Ayz. 26:12) Wi de du wetin wi ebul, ɛn kɔntinyu fɔ abop se Jiova go ɛp wi. Wi gɛt kɔnfidɛns se i go gayd wi ilɛksɛf i nɔ yuz mirekul fɔ du am lɛk aw i bin de du trade.​—Akt 16:6-10.

11. Wetin wi no we go ɛp wi?

¹¹ Wi no se Jiova lɛk wi, i de du tin fia wan, ɛn i gɛt sɛns. Wi no se i rili valyu di tin dɛn we wi de du fɔ am ɛn wi kɔmpin Kristian dɛn. Ɛn wi no se Jiova de blɛs di wan dɛn we nɔ de kɔmɔt biɛn am ɔltɛm.​—Ibru. 11:6.

WI NƆ NO WETIN GO APIN TUMARA

12. Akɔdin to Jems 4:13, 14, wetin wi nɔ shɔ bɔt?

¹² Rid Jems 4:​13, 14. Wan impɔtant tru na dat wi nɔ no aw wi layf go tan lɛk tumara. Insay dis wɔl we Setan de rul, bɔku ‘tin dɛn we wi nɔ no se go apin kin apin to wi tɛm we wi nɔ de ɛkspɛkt.’ (Ɛkli. 9:11) Bikɔs ɔf dat, wi nɔ shɔ if wi go ebul du di tin dɛn we wi plan fɔ du ɔ if wi go stil de alayv fɔ du dɛn.

13. We wi nɔ shɔ bɔt wetin go apin tumara bambay, aw dat kin afɛkt wi?

¹³ Bikɔs wi nɔ no ɔl wetin go apin tumara bambay, dat kin mek i nɔ izi fɔ mek wi bia. Wetin mek wi se so? Sɔntɛm wi go wɔri bɔt wetin go apin, ɛn dat go mek wi nɔ gɛt gladi-at. Bad tin dɛn kin apin to wi jɔs lɛk dat ɛn prɔblɛm dɛn we wi nɔ de ɛkspɛkt kin mit wi, ɛn dat kin mek wi at rili pwɛl. Ɛn we di tin dɛn we wi de ɛkspɛkt nɔ apin, dat kin mek wi fil bad ɛn wi at kin pwɛl.​—Prɔv. 13:12.

14. Wetin go mek wi gɛt tru tru gladi-at? (Luk bak di pikchɔ dɛn.)

¹⁴ We wi de bia prɔblɛm dɛn, wi de pruv se ilɛk wetin apin, wi de sav wi Papa we de na ɛvin bikɔs wi lɛk am, nɔto bikɔs wi want fɔ bɛnifit wisɛf. Akawnt dɛn na di Baybul dɔn sho se wi nɔ fɔ ɛkspɛkt se Jiova go protɛkt wi frɔm ɔl di prɔblɛm dɛn, ɛn i nɔ de mak di tin dɛn we de apin to wi. I no se nɔto we wi no wetin gɛt fɔ apin to wi tumara bambay go mek wi gɛt gladi-at. Bɔt, na we wi kɔntinyu fɔ abop pan am fɔ gayd wi ɛn obe am. (Jɛr. 10:23) We wi abop pan am fɔ gayd wi we wi de disayd fɔ du tin dɛn, i tan lɛk wi de se: “If Jiova want, wi go liv ɛn du dis ɔ dat.”—Jems 4:15.

15. Wetin wi no bɔt tumara bambay?

¹⁵ Pan ɔl we wi nɔ no wetin go apin ɛnide, wi no se Jiova dɔn prɔmis wi layf we go de sote go, ilɛk na ɛvin ɔ na dis wɔl. Wi no se i nɔ de lay ɛn natin nɔ go mek i nɔ du ɔl di tin dɛn we i dɔn prɔmis. (Taytɔs 1:2) Na in nɔmɔ go “tɔk wetin gɛt fɔ apin, ɛn frɔm trade trade [i] bin dɔn tɔk tin dɛn we nɔ bi yet.” Ɔl di tin dɛn we i bin tɔk se go apin trade bin kam tru, ɛn ɔl di tin dɛn we i dɔn tɔk se go apin tumara bambay go mɔs kam tru. (Ayz. 46:10) Wi no klia wan se natin nɔ go mek Jiova lɛf fɔ lɛk wi. (Rom. 8:35-39) I go gi wi di sɛns, kɔrej, ɛn pawa we wi nid fɔ bia ɛni prɔblɛm we go mit wi. Wi nɔ gɛt wan dawt se Jiova go ɛp ɛn blɛs wi.​—Jɛr. 17:7, 8.

WI NƆ EBUL FƆ RILI ƆNDASTAND AW JIOVA RILI SABI WI

16. Akɔdin to Sam 139:1-6, wetin Jiova no we wi nɔ rili ɔndastand?

¹⁶ Rid Sam 139:​1-6. Di Wan we mek wi no aw i mek wi ɛn wetin dɔn apin to wi we dɔn chenj di we aw wi de, di we aw wi de fil, ɛn di we aw wi de tink. I bisin bɔt wi ɔltɛm. I no wetin wi kin tɔk ɛn wetin wi kin want fɔ tɔk, wetin wi de du ɛn di rizin we mek wi du am. Jɔs lɛk wetin Kiŋ Devid bin tɔk, Jiova de rawnd wi fɔ protɛkt wi ɛn I ebul fɔ ɛp wi. I rili wɔndaful fɔ no se di Masta We De Rul Ɔlman, di ɔlmayti Gɔd We Mek di ɛvin ɛn di wɔl rili bisin bɔt wi dis kayn we! Devid bin se: “A nɔ ebul fɔ ɔndastand di kayn we aw yu rili sabi mi.”—Sam 139:6.

17. Wetin na sɔm tin dɛn we sɔntɛm go mek i nɔ izi fɔ biliv se Jiova rili sabi wi?

¹⁷ Sɔntɛm i nɔ izi fɔ mek wi si Jiova as Papa we lɛk ɛn bisin bɔt wi bikɔs ɔf di kayn famili we wi kɔmɔt, wi kɔlchɔ, ɔ di tin dɛn we wi bin biliv. Ɔ sɔntɛm wi fil se di tin dɛn we wi bin dɔn du rili bad ɛn Jiova nɔ go ɛva want fɔ sabi wi, ɛn i de fa frɔm wi. Devid sɛf bin de fil da sem we de. (Sam 38:18, 21) Ɔ sɔntɛm pɔsin we de tray tranga wan fɔ chenj di we aw i de liv in layf ɛn fala Gɔd in lɔ dɛn go de tink se, ‘If Gɔd rili ɔndastand mi, wetin mek i de ɛkspɛkt mi fɔ avɔyd fɔ du tin dɛn we a fil se nɔmal?’

18. Aw wi go bɛnifit we wi biliv se Jiova sabi wi pas aw wi sabi wisɛf? (Luk bak pikchɔ dɛn.)

¹⁸ Wi fɔ tray fɔ biliv se Jiova sabi wi pas aw wi sabi wisɛf ɛn i de si gud tin dɛn insay wi we wi nɔ ebul fɔ si. Bɔt pan ɔl we i de si wi mistek dɛn ɛn ɔndastand wetin de mek wi fil di we aw wi de fil ɛn du tin di we aw wi de du am, i stil lɛk wi. (Rom. 7:15) We wi biliv se Jiova de si gud tin dɛn insay wi, dat go mek wi gɛt di kɔnfidɛns we wi nid fɔ mek wi sav am fetful wan ɛn du am wit gladi-at.

19. Wetin wi shɔ se wi no bɔt Jiova?

¹⁹ Wi no se Jiova na lɔv. Wi nɔ gɛt wan dawt bɔt dat. (1 Jɔn 4:8) Wi no se in lɔ dɛn de sho se i lɛk wi ɛn i want mek bɛtɛ fala wi ɔltɛm. Wi no se Jiova want wi fɔ gɛt layf we go de sote go. I mek Jizɔs pe di prayz fɔ mek dat pɔsibul. Bikɔs i mek Jizɔs day fɔ wi, dat mek wi gɛt kɔnfidɛns se pan ɔl we wi de mek mistek, wi go ebul fɔ sav am di we aw i want. (Rom. 7:24, 25) Ɛn wi no se “Gɔd pas wi at ɛn i no ɔltin.” (1 Jɔn 3:19, 20) Jiova no ɔltin bɔt wi, ɛn i gɛt kɔnfidɛns se wi go ebul fɔ du wetin i want.

20. Wetin go ɛp wi nɔ fɔ wɔri tumɔs bɔt di tin dɛn we wi nɔ no?

²⁰ Jiova nɔ ayd ɛnitin pan wi we wi rili nid fɔ no. So wi nɔ nid fɔ wɔri bɔt di tin dɛn we wi nɔ no. Bifo dat, wi fɔ pe atɛnshɔn pan tin dɛn we rili impɔtant. We wi du dat, wi de sho se wi rili abop pan Jiova, “di Wan we no tin dɛn pafɛkt wan.” (Job 36:4) Pan ɔl we sɔm tin dɛn de we wi nɔ ɔndastand naw, wi no se Jiova go kɔntinyu fɔ tich wi nyu tin dɛn sote go. Ɛn wi gladi bikɔs wi nɔ go stɔp fɔ lan nyu tin dɛn bɔt wi wɔndaful Gɔd.​—Ɛkli. 3:11.