“Una Disayd fɔ Unasɛf . . . Udat Una Go Sav”

1. Wetin wi fɔ du fɔ mek wi go gɛt tru tru gladi-at? Wetin mek? (Ayzaya 48:17, 18)

WI PAPA we de na ɛvin rili lɛk wi ɛn i want wi fɔ ɛnjɔy layf naw ɛn tumara bambay. (Ɛkli. 3:12, 13) I mek wi di kayn we we wi ebul fɔ du wɔndaful tin dɛn, bɔt i nɔ mek wi fɔ ebul rul wisɛf ɔ fɔ mek lɔ dɛn fɔ wisɛf bɔt wetin rayt ɛn rɔng. (Ɛkli. 8:9; Jɛr. 10:23) I no se fɔ mek wi go gɛt tru tru gladi-at, wi nid fɔ sav am ɛn obe in lɔ dɛn.​—Rid Ayzaya 48:​17, 18.

2. Wetin Setan want wi fɔ biliv? Wetin Jiova dɔn du fɔ pruv se Setan na layman?

² Setan want mek wi biliv se wi go gɛt gladi-at ilɛk wi nɔ obe Jiova, ɛn wi go ebul disayd fɔ wisɛf wetin gud ɛn bad. (Jɛn. 3:4, 5) Fɔ mek Jiova pruv se Setan na layman, i dɔn alaw mɔtalman dɛn fɔ rul dɛnsɛf fɔ sɔm tɛm. I izi fɔ si se mɔtalman nɔ ebul fɔ rul dɛnsɛf. Bɔt di Baybul tɔk bɔt bɔku man ɛn uman dɛn we bin gɛt gladi-at bikɔs dɛn bin de sav Jiova. Di pɔsin we bin gɛt gladi-at pas dɛn ɔl na Jizɔs Krays. Fɔs, lɛ wi tɔk bɔt di rizin dɛn we mek i bin disayd fɔ sav Jiova. Dɔn, wi go tɔk bɔt wetin mek wi Papa we de na ɛvin fit fɔ mek wi wɔship am. Faynali, wi go tɔk bɔt sɔm pan di rizin dɛn we mek wi disayd fɔ sav Jiova.

WETIN BIN MEK JIZƆS DISAYD FƆ SAV JIOVA?

3. Wetin Setan bin se i go gi Jizɔs? Wetin Jizɔs bin disayd fɔ du?

³ We Jizɔs bin de na di wɔl, i bin nid fɔ disayd udat i go sav. Shɔt tɛm afta i baptayz, Setan bin tɔk se i go gi am ɔl di kiŋdɔm dɛn na di wɔl if i jɔs wɔship am wan tɛm nɔmɔ. Jizɔs bin tɛl am se: “Kɔmɔt na ya Setan! Dɛn rayt se: ‘Na Jiova yu Gɔd yu fɔ wɔship, ɛn na in nɔmɔ yu fɔ sav.’” (Mat. 4:8-10) Wetin bin mek Jizɔs disayd fɔ sav Jiova? Lɛ wi tɔk bɔt sɔm pan di rizin dɛn.

4-5. Wetin na sɔm pan di rizin dɛn we mek Jizɔs disayd fɔ sav Jiova?

⁴ Di men rizin we mek Jizɔs disayd fɔ sav Jiova na bikɔs i lɛk am. Jizɔs rili lɛk in Papa. (Jɔn 14:31) Apat frɔm dat, Jizɔs de sav Jiova bikɔs dat na di rayt tin fɔ du. (Jɔn 8:28, 29; Rɛv. 4:11) I no se na Jiova gi wi layf, wi kin abop pan Am, ɛn I gɛt fri-an. (Sam 33:4; 36:9; Jems 1:17) Jiova nɔ wande lay to Jizɔs ɛn na in gi am ɔl di tin dɛn we i gɛt. (Jɔn 1:14) Bɔt Setan difrɛn frɔm Jiova. Na Setan mek mɔtalman de sin ɛn day. In na layman we want ɔltin fɔ insɛf ɛn i jɔs bisin bɔt insɛf. (Jɔn 8:44) Bikɔs Jizɔs no dɛn tru tin dɛn ya, na dat mek i nɔ wande tink bɔt fɔ falamakata Setan fɔ tɔn agens Jiova.​—Fil. 2:5-8.

⁵ Wan ɔda rizin we mek Jizɔs disayd fɔ sav Jiova na bikɔs i bin no se bɔku gud tin dɛn go apin if i du dat. (Ibru. 12:2) I bin no se if i kɔntinyu fɔ sav Jiova fetful wan, i go mek in Papa in nem oli ɛn i go fri mɔtalman frɔm ɔl di bad tin dɛn we de apin to dɛn bikɔs ɔf wetin Setan bin du.

WETIN MEK JIOVA FIT FƆ MEK WI WƆSHIP AM?

6-7. Wetin mek bɔku pipul dɛn tide nɔ de wɔship Jiova? Wetin mek Jiova fit fɔ mek wi wɔship am?

⁶ Bɔku pipul dɛn tide nɔ de wɔship Jiova bikɔs dɛn nɔ no di fayn fayn kwaliti dɛn we i gɛt ɛn dɛn nɔ no bɔt ɔl di tin dɛn we i dɔn du fɔ dɛn. Dɛn tan lɛk di pipul dɛn we Pɔl bin prich to na Atɛns. Dɛnsɛf nɔ bin no Gɔd.​—Akt 17: 19, 20, 30, 34.

⁷ Pɔl bin ɛksplen to di pipul dɛn we bin de lisin to am se na di tru Gɔd “gi ɔlman layf, briz fɔ blo, ɛn ɔltin.” I kɔntinyu fɔ tɔk se: “Na in gi wi layf, na in mek wi de muv, ɛn na in mek wi de na ya.” Na Gɔd Mek Ɔltin. Na frɔm “wan man i mek ɔl di neshɔn dɛn,” so i fit fɔ mek wi wɔship am.​—Akt 17:25, 26, 28.

8. Wetin Jiova nɔ go ɛva du? Ɛksplen.

⁸ Bikɔs na Jiova Mek Ɔltin ɛn na in De Oba Ɔlman, i ebul fɔ fos pipul dɛn fɔ sav am. Bɔt Jiova nɔ go ɛva du dat. Bifo dat, i gi wi bɔku pruf dɛn we de sho se i de ɛn i rili lɛk wi ɔl wan bay wan. I want mek bɔku bɔku pipul dɛn bi in padi dɛn sote go. (1 Tim. 2:3, 4) Na dat mek Jiova dɔn tren wi fɔ tich ɔda pipul dɛn bɔt wetin i want ɛn tɛl dɛn bɔt di gud tin dɛn we i go du fɔ mɔtalman. (Mat. 10:11-13; 28:19, 20) I dɔn mek wi de na difrɛn kɔngrigeshɔn dɛn usay wi gɛt ovasia dɛn we lɛk wi ɛn de kia fɔ wi.​—Akt 20:28.

9. Wetin de sho se Jiova lɛk wi?

⁹ Wi de si Jiova in lɔv klia wan bay di we aw i de trit di wan dɛn we nɔ want fɔ biliv se i de. Tink bɔt dis: Frɔm we Gɔd mek mɔtalman, bɔku bɔku pipul dɛn dɔn disayd fɔ liv dɛn layf akɔdin to wetin dɛn tink se rayt ɛn rɔng. Bɔt pan ɔl dat, Jiova de kɔntinyu fɔ gi dɛn wetin dɛn nid fɔ liv ɛn ɛnjɔy layf. (Mat. 5:44, 45; Akt 14:16, 17) I mek dɛn ebul fɔ gɛt fambul ɛn padi dɛn we lɛk dɛn, gɛt pikin dɛn, ɛn bɛnifit frɔm di tranga wok we dɛn de du. (Sam 127:3; Ɛkli. 2:24) Dis sho klia wan se wi Papa we de na ɛvin lɛk ɔlman. (Ɛks. 34:6) Naw, lɛ wi mɛmba wisɛf bɔt sɔm pan di rizin dɛn we mek wi disayd fɔ sav Jiova ɛn aw Jiova de blɛs wi bikɔs wi disayd fɔ sav am.

WETIN MEK WI DISAYD FƆ SAV JIOVA?

10. (a) Wetin na di men rizin we mek wi disayd fɔ sav Jiova? (Matyu 22:37) (b) Aw yu dɔn bɛnifit bikɔs Jiova de peshɛnt? (Sam 103:13, 14)

¹⁰ Jɔs lɛk Jizɔs, di men rizin we mek wi disayd fɔ sav Jiova na bikɔs wi rili lɛk Am. (Rid Matyu 22:37.) Wi de kam nia Jiova we wi lan bɔt in kwaliti dɛn. Fɔ ɛgzampul, tink bɔt aw Jiova de peshɛnt wit wi. Pan ɔl we di Izrɛlayt dɛn nɔ bin de gri fɔ obe am, i bin beg dɛn se: “Duya, una lɛf di bad we dɛn aw una de biev.” (Jɛr. 18:11) Ɛn pan ɔl we wi de mek bɔku mistek dɛn, Jiova de fɔgiv wi bikɔs i de mɛmba se wi na dɔti. (Rid Sam 103:​13, 14.) We yu tek tɛm tink gud gud wan bɔt aw Jiova peshɛnt ɛn di ɔda fayn fayn kwaliti dɛn we i gɛt, dat nɔ mek yu want fɔ sav am sote go?

11. Us ɔda rizin dɛn mek wi disayd fɔ sav wi Papa we de na ɛvin?

¹¹ Wi de sav Jiova bak bikɔs dat na di rayt tin fɔ du. (Mat. 4:10) Dɔn bak, wi no wetin go apin if wi kɔntinyu fɔ sav am fetful wan. We wi kɔntinyu fɔ sav Jiova fetful wan, wi de ɛp fɔ mek in nem oli, pruv se Setan na layman, ɛn mek wi Papa gladi. Ɛn if wi disayd fɔ sav Jiova naw, wi go gɛt chans fɔ sav am sote go!—Jɔn 17:3.

12-13. Wetin wi lan frɔm Jen ɛn Pam dɛn ɛkspiriɛns?

¹² We wi stil yɔŋ, wi go ebul fɔ lan fɔ lɛk Jiova ɛn da lɔv de go kɔntinyu fɔ strɔng as wi de big. Lɛ wi tɔk bɔt tu bɛlɛ-bɔn sista dɛn we na Jen ɛn Pam dɛn ɛgzampul.a Jen bin ol 11 ia ɛn Pam bin ol 10 ia we dɛn bigin fɔ stɔdi di Baybul. Pan ɔl we dɛn mama ɛn papa nɔ bin want fɔ stɔdi, dɛn bin alaw Jen ɛn Pam fɔ stɔdi wit Jiova Witnɛs dɛn wans dɛn de go chɔch wit di famili. Jen tɔk se: “Di tin dɛn we Jiova Witnɛs dɛn bin de tich mi frɔm di Baybul bin ɛp mi fɔ avɔyd fɔ tek drɔgs ɛn nɔ put an pan mami ɛn dadi biznɛs di we aw Gɔd nɔ want pan ɔl we mi kɔmpin dɛn bin de fos mi.”

¹³ Afta sɔm ia pas, dɛn ɔltu bi pɔblisha dɛn. Leta, dɛn bigin fɔ payɔnia as dɛn de kia fɔ dɛn mama ɛn papa we dɔn ol. We Jen tink bɔt ɔl wetin bin apin to dɛn, i tɔk se: “A dɔn lan se Jiova de kia fɔ in padi dɛn ɔltɛm. Ɛn jɔs lɛk aw 2 Timoti 2:19 tɔk, ‘Jiova no di wan dɛn we na in yon.’” Wan dawt nɔ de se Jiova de kia fɔ di wan dɛn we disayd fɔ lɛk am ɛn sav am!

14. Aw wi go ɛp fɔ pul badnem pan Jiova bay di tin dɛn we wi de se ɛn du? (Luk bak di pikchɔ dɛn.)

¹⁴ Wi want fɔ ɛp fɔ pul ɔl di badnem we dɛn dɔn put pan Jiova. Tink bɔt dis ɛgzampul: Lɛ wi se yu gɛt tayt padi we gud, gɛt fri-an, ɛn we de fɔgiv. Wan de, yu yɛri pɔsin de tɔk bɔt yu padi se i wikɛd ɛn i nɔ ɔnɛs. Wetin yu go du? Yu go tɔk di tru bɔt udat yu padi bi. Semweso, we Setan ɛn di wan dɛn we i de kɔntrol de tray fɔ pwɛl Jiova in nem bay we dɛn de tɔk lay lay tin dɛn bɔt Am, wi nɔ kin fred fɔ tɛl dɛn di tru bɔt In nem. (Sam 34:1; Ayz. 43:10) Wi de sho se wi want fɔ sav Jiova wit ɔl wi layf bay di tin dɛn we wi de se ɛn du.

15. Aw apɔsul Pɔl bin bɛnifit we i ajɔst in gol dɛn? (Filipians 3:7, 8)

¹⁵ Wi kin rɛdi fɔ ajɔst wi gol dɛn so dat wi go ebul fɔ sav Jiova di we aw i want ɔ du mɔ na in savis. Fɔ ɛgzampul, apɔsul Pɔl bin disayd fɔ giv-ɔp di impɔtant pozishɔn we i bin gɛt na di Ju rilijɔn so dat i go bi Krays in disaypul ɛn sav Jiova. (Gal. 1:14) Bikɔs ɔf dat, i bin gɛt fayn fayn ɛkspiriɛns dɛn we i bin de sav Jiova ɛn i bin gɛt di chans fɔ rul wit Krays na ɛvin. I nɔ ɛva rigrɛt we i disayd fɔ sav Jiova, ɛn wisɛf nɔ go ɛva rigrɛt am.​—Rid Filipians 3:7, 8.

16. Wetin wi lan frɔm Julia in ɛkspiriɛns? (Luk bak di pikchɔ dɛn.)

¹⁶ If wi mek wi wɔship to Jiova bi di tin we impɔtant pas ɔl ɔda tin na wi layf, i go blɛs wi naw ɛn tumara bambay. Lɛ wi tɔk bɔt wan sista we nem Julia in ɛkspiriɛns. Bifo Julia lan di trut, i bin de siŋ na di kwaya na in chɔch frɔm we i smɔl. Bikɔs i bin sabi siŋ, pɔsin we sabi bɔt myuzik bin disayd fɔ tren am. Ɛn insay shɔt tɛm, bɔku pipul dɛn bin kam fɔ sabi Julia, ɛn i bin de pafɔm na big ples dɛn we pipul dɛn sabi. We i bin de atɛnd wan big myuzik skul we bɔku pipul dɛn sabi, wan pan in klasmet dɛn bigin fɔ tɔk to am bɔt Gɔd ɛn i bin ɛksplen se Gɔd gɛt nem, ɛn in nem na Jiova. I nɔ te, Julia bigin fɔ stɔdi di Baybul tu tɛm insay di wik. As tɛm de go, i bin disayd fɔ pe atɛnshɔn fɔ sav Jiova bifo i pe atɛnshɔn pan myuzik. I nɔ bin izi fɔ mek Julia disayd fɔ du dat. I tɔk se: “Bɔku pipul dɛn bin tɛl mi se a de west mi gift, bɔt a bin want fɔ yuz ɔl mi layf fɔ sav Jiova.” Aw i de fil naw bɔt wetin i bin disayd fɔ du pan ɔl we i dɔn pas 30 ia? I tɔk se: “A gɛt kolat, ɛn a biliv se Jiova go gi mi ɔl di tin dɛn we a want tumara bambay.”​—Sam 145:16.

KƆNTINYU FƆ SAV JIOVA

17. Bikɔs wi de insay di tɛm we di wɔl want fɔ dɔn, wetin dat min fɔ di wan dɛn we dɔn disayd fɔ sav Gɔd ɛn di wan dɛn we nɔ disayd yet fɔ sav am?

¹⁷ Wi de insay di tɛm we di wɔl want fɔ dɔn. Apɔsul Pɔl bin rayt se: “I nɔ go rili te igen,” ɛn “di wan we de kam go rich ɛn i nɔ go dile.” (Ibru. 10:37) Wetin dat min? I min se bɛtɛ tɛm nɔ de igen fɔ mek pipul dɛn we nɔ de sav Jiova disayd fɔ sav am. (1 Kɔr. 7:29) Ɛn if wi dɔn ɔlrɛdi disayd fɔ sav Gɔd, wi no se pan ɔl we wi go gɛt fɔ bia prɔblɛm dɛn, “i nɔ go rili te igen” ɔl dɛn prɔblɛm dɛn de go dɔn.

18. Wetin Jiova ɛn Jizɔs want wi fɔ du?

¹⁸ Jizɔs nɔ bin jɔs ɛnkɔrej in disaypul dɛn fɔ bigin fɔ fala am, bɔt i bin ɛnkɔrej dɛn bak fɔ kɔntinyu fɔ fala am. (Mat. 16:24) So if wi dɔn de sav Jiova fɔ lɔng tɛm, lɛ wi mek-ɔp wi maynd fɔ kɔntinyu fɔ sav am. Wi nid fɔ wok tranga wan fɔ kɔntinyu fɔ du wetin wi dɔn disayd we na fɔ sav am. Na tru se i nɔ go izi, bɔt wi go gɛt gladi-at ɛn ɛnjɔy bɔku blɛsin dɛn naw we wi de sav am!​—Sam 35:27.

19. Wetin wi lan frɔm Jin in ɛkspiriɛns?

¹⁹ Sɔm pipul dɛn fil se dɛn nɔ go ɛnjɔy dɛn layf if dɛn de sav Jiova. If yu na yɔŋ pɔsin, yu fil se yu de mis sɔntin we yu de sav Jiova? Wan yɔŋ brɔda we nem Jin tɔk se: “A bin de fil se a nɔ de ɛnjɔy bikɔs mi na wan pan Jiova Witnɛs dɛn. I tan lɛk se we a kin go mitin ɛn fil savis, bɔku pan di pikin dɛn we wi ɔl gro ɔp bin de ɛnjɔy tin dɛn lɛk pati, fɔ kip galfrɛn, ɔ fɔ ple vidio gem dɛn we gɛt fɛt fɛt.” Aw di we aw Jin bin de tink afɛkt am? I tɔk se: “A bin bigin fɔ du sɔm pan di bad tin dɛn we ɔda yɔŋ pipul dɛn bin de du, ɛn fɔ sɔm tɛm a bin de ɛnjɔy am. Bɔt a nɔ bin gɛt tru tru gladi-at. A bin bigin fɔ tink bɔt di bɛnifit dɛn we pɔsin de gɛt we i obe wetin di Baybul de tich ɛn a bin disayd fɔ sav Jiova wit ɔl mi at. Frɔm da tɛm de, i tan lɛk se Jiova dɔn ansa ɔl mi prea dɛn.”

20. Wetin wi fɔ mek-ɔp wi maynd fɔ du?

²⁰ Wan pan di man dɛn we rayt di sam buk bin siŋ to Jiova se: “Di wan we yu pik ɛn drɔ nia yu go gladi fɔ de na yu kɔmpawn dɛn.” (Sam 65:4) Lɛ wi mek-ɔp wi maynd fɔ kɔntinyu fɔ sav Jiova jɔs lɛk Jɔshwa we bin tɔk se: “As fɔ mi ɛn mi famili, na Jiova wi go sav.”​—Jɔsh. 24:15.