Wetin di Baybul Se bɔt fɔ Gi?
Di Baybul in Ansa
Di Baybul ɛnkɔrej wi fɔ gi frɔm wi at ɛn fɔ di rayt rizin. I sho bak se nɔto di wan nɔmɔ we de gɛt de bɛnifit bɔt di wan sɛf we de gi de bɛnifit. (Prɔvabs 11:25; Lyuk 6:38) Jizɔs bin se: “We pɔsin gi, i de gladi mɔ pas we dɛn gi am.”—Akt 20:35.
Ustɛm we wi fɔ gi we de mek Gɔd gladi?
Gɔd de gladi we wi gi frɔm wi at. Di Baybul se: “Lɛ ɔlman gi wetin i dɔn mekɔp na in maynd fɔ gi, lɛ i nɔ gi lɛk se i nɔ want fɔ gi ɔ gi bikɔs dɛn fos am, bikɔs Gɔd lɛk pɔsin we de gladi fɔ gi.”—2 Kɔrintians 9:7, futnot.
We wi gi frɔm wi at, dat na pat ɔf di “wɔship” we Gɔd de gladi fɔ. (Jems 1:27) Pɔsin we gi frɔm in at fɔ ɛp di wan dɛn we de in nid de wok an-in-an wit Gɔd we de si dɛn kayn gud dɛn de as dɛt we i fɔ pe. (Prɔvabs 19:17) Di Baybul tich se na Gɔd insɛf de pe di pɔsin we de gi.—Lyuk 14:12-14.
Ustɛm we wi fɔ gi we nɔ de mek Gɔd gladi?
If wi gi fɔ bɛnifit wisɛf. Sɔm ɛgzampul na:
Fɔ mek ɔda pipul dɛn kɔle wi.—Matyu 6:2.
Fɔ lɛ dɛn gi wi bak.—Lyuk 14:12-14.
Fɔ bay layf we go de sote go.—Sam 49:6, 7.
If i de sɔpɔt tin dɛn ɔ we dɛn aw pipul dɛn de biev we Gɔd kɔndɛm. Fɔ ɛgzampul, i nɔ go fayn fɔ gi mɔni to pɔsin fɔ ple gambul, fɔ tek drɔgs, ɔ fɔ drink pasmak. (1 Kɔrintians 6:9, 10; 2 Kɔrintians 7:1) Semweso, i nɔ go fayn fɔ gi mɔni to pɔsin we ebul fɔ wok fɔ sɔpɔt insɛf bɔt we nɔ de gri fɔ wok fɔ du dat.—2 Tɛsalonians 3:10.
If fɔ gi go mek yu nɔ du di wok we Gɔd gi yu fɔ du. Di Baybul tich di wan dɛn we de oba dɛn famili fɔ gi di wan dɛn we de oba dɛn famili wetin dɛn nid. (1 Timoti 5:8) I nɔ go fayn fɔ di wan we de oba in famili fɔ gi to ɔda pipul dɛn te di wan dɛn we de na in famili bigin fɔ sɔfa. Semweso, Jizɔs bin kɔndɛm di wan dɛn we nɔ bin de gri fɔ kia fɔ dɛn mama ɛn papa dɛn we dɔn ol bay we dɛn de tɔk se ɔl wetin dɛn gɛt na “gift we pɔsin dɔn prɔmis fɔ gi Gɔd.”—Mak 7:9-13.