Yu Rɛdi fɔ Da Big Big Trɔbul?

1. Wetin mek i mek sɛns fɔ pripia fɔ dizasta?

IF WI pripia fɔ sɔntin, dat go sev wi layf. Fɔ ɛgzampul, we dizasta apin, na pipul dɛn we pripia fɔ am na dɛn mɔ kin sev, ɛn na dɛn mɔ kin ebul fɔ ɛp ɔda pipul dɛn. Wan ɔganayzeshɔn na Yurop we de tray fɔ ɛp pipul dɛn tɔk se: “We pɔsin pripia gud gud wan, dat go mek i sev.”

2. Wetin mek wi fɔ pripia fɔ da big big trɔbul? (Matyu 24:​44)

² Da “big big trɔbul” go apin wantɛm wantɛm. (Mat. 24:​21) Bɔt da big big trɔbul go difrɛn frɔm bɔku ɔda dizasta dɛn bikɔs wi no se i go kam. Lɛk 2,000 ia we dɔn pas, Jizɔs bin wɔn in disaypul dɛn fɔ rɛdi fɔ da de de. (Rid Matyu 24:​44.) If wi pripia, i go izi fɔ mek wi bia da tɛm de we tin go rili tranga ɛn ɛp ɔda pipul dɛn fɔ du di sem tin.—Lyuk 21:​36.

3. Aw di kwaliti fɔ bia, fɔ gɛt sɔri-at, ɛn lɔv go ɛp wi fɔ rɛdi fɔ da big big trɔbul?

³ Lɛ wi tɔk bɔt tri kwaliti dɛn we go ɛp wi fɔ rɛdi fɔ da big big trɔbul. Wetin wi go du if dɛn tɛl wi fɔ prich jɔjmɛnt mɛsej ɛn di wan dɛn we nɔ biliv Gɔd tɔn agens wi? (Rɛv. 16:​21) Wi go nid fɔ bia fɔ obe Jiova ɛn biliv se i go protɛkt wi. Wetin wi go du if wi brɔda dɛn lɔs ɔl dɛn prɔpati dɛn ɔ sɔm pan dɛn? (Aba. 3:​17, 18) Bikɔs wi gɛt sɔri-at fɔ dɛn, wi go gi dɛn di ɛp we dɛn nid. Wetin wi go du we di neshɔn dɛn kam togɛda fɔ atak wi, dɔn dɛn tɛl wi fɔ de togɛda wit bɔku pan wi brɔda ɛn sista dɛn fɔ sɔm tɛm? (Izi. 38:​10-12) Wi go nid fɔ gɛt strɔng lɔv fɔ dɛn bikɔs na dat go ɛp wi fɔ bia da tɛm de we tin go rili tranga.

4. Aw di Baybul sho se wi fɔ kɔntinyu fɔ bia, sho sɔri-at, ɛn gɛt lɔv?

⁴ Gɔd in Wɔd de ɛnkɔrej wi fɔ kɔntinyu fɔ bia, fɔ sho sɔri-at, ɛn fɔ gɛt lɔv. Lyuk 21:​19 se: “We una bia, una go sev una layf.” Koloshians 3:​12 se: “Una go de rili sho . . . sɔri-at.” Ɛn 1 Tɛsalonians 4:​9, 10 se: “Gɔd bin dɔn tich una fɔ lɛk una kɔmpin dɛn. . . . Bɔt, wi brɔda dɛn, wi de beg una fɔ kɔntinyu fɔ du am mɔ ɛn mɔ.” Dɛn rayt ɔl dɛn wɔd dɛn ya to disaypul dɛn we bin ɔlrɛdi de bia, we bin gɛt sɔri-at, ɛn lɔv. Bɔt dɛn bin nid fɔ kɔntinyu fɔ lan aw fɔ sho dɛn kwaliti dɛn de. Wisɛf fɔ du di sem tin. Fɔ ɛp wi fɔ gɛt dɛn kwaliti dɛn de, wi go tɔk bɔt aw di fɔstɛm Kristian dɛn bin de sho ɔl dɛn kwaliti dɛn de. Dɔn wi go si aw wi go falamakata dɛn disaypul dɛn de ɛn sho se wi rɛdi fɔ da big big trɔbul.

DU TIN DƐN WE GO ƐP YU FƆ KƆNTINYU FƆ BIA

5. Aw di fɔstɛm Kristian dɛn bin ebul fɔ bia dɛn prɔblɛm dɛn?

⁵ Di Kristian dɛn we bin de insay Pɔl in tɛm bin nid fɔ bia. (Ibru. 10:​36) Dɛn bin gɛt di sem prɔblɛm we bɔku pipul dɛn we bin de da tɛm de bin gɛt. Bɔt dɛn bin de gɛt ɔda prɔblɛm dɛn bikɔs dɛn na bin Kristian. Di Ju bigman dɛn pan Gɔd biznɛs, di Roman gɔvmɛnt, ɛn dɛn yon fambul dɛn bin de mek bɔku pan dɛn sɔfa. (Mat. 10:​21) Ɛn dɛn bin gɛt fɔ mek shɔ se di lay lay tin dɛn we apɔstet dɛn bin de tich fɔ ambɔg di wanwɔd we bin de na di kɔngrigeshɔn nɔ afɛkt dɛn. (Akt 20:​29, 30) Bɔt dɛn Kristian dɛn de bin bia. (Rɛv. 2:​3) Aw? Dɛn bin tek tɛm tink bɔt ɛgzampul dɛn na di Baybul bɔt pipul dɛn we bin bia, lɛk Job. (Jems 5:​10, 11) Dɛn bin pre fɔ trɛnk. (Akt 4:​29-31) Ɛn dɛn bin pe atɛnshɔn pan di gud tin dɛn we go apin if dɛn bia.—Akt 5:​41.

6. Wetin yu lan frɔm wetin Mɛrita bin du fɔ mek i ebul bia we in fambul dɛn bin de agens am?

⁶ Wisɛf go ebul fɔ bia prɔblɛm dɛn if wi de stɔdi ɔltɛm bɔt ɛgzampul dɛn na Gɔd in Wɔd ɛn wi pɔblikeshɔn dɛn bɔt pipul dɛn we bin bia, ɛn tink gud wan bɔt dɛn. Na dat wan sista we nem Mɛrita, we de na Albenia bin du, ɛn i bin ebul fɔ bia we in famili bin de agens am ɛn we dɛn bin de trit am bad. I tɔk se: “Di stori bɔt Job na di Baybul bin rili ɛnkɔrej mi. I bin rili sɔfa, ɛn pan ɔl we i nɔ bin no udat de mek i gɛt prɔblɛm dɛn, i tɔk se: ‘Te a day, a nɔ go ɛva lɛf fɔ sav Gɔd.’ (Job 27:​5, NWT) A bin tink bɔt aw Job in prɔblɛm dɛn pas mi yon fa fawe. Job nɔ bin no udat de mek i gɛt prɔblɛm dɛn, bɔt mi no udat de mek a gɛt prɔblɛm dɛn.”

7. Ivin if wi nɔ gɛt siriɔs prɔblɛm dɛn rayt naw, wetin wi fɔ lan fɔ du?

⁷ Wi go ebul bak fɔ bia bay we wi de pre to Jiova ɔltɛm ɛn tɛl am bɔt ɔl wi prɔblɛm dɛn. (Fil. 4:​6; 1 Tɛs. 5:​17) Sɔntɛm yu nɔ gɛt siriɔs prɔblɛm rayt naw. Bɔt yu kin pre to Jiova ɛn aks am fɔ mek i ɛp yu ɛnitɛm we yu at wam, we yu kɔnfyus, ɔ we yu nɔ no wetin fɔ du? If yu de pre ɔltɛm to wi Gɔd fɔ mek i ɛp yu wit yu smɔl prɔblɛm dɛn naw, tumara bambay we yu gɛt big prɔblɛm, yu nɔ go westɛm fɔ pre to Gɔd. Dat go mek yu gɛt kɔnfidɛns se i no di patikyula tɛm fɔ ɛp yu ɛn wetin i fɔ du fɔ ɛp yu.—Sam 27:​1, 3.

8. Aw Mira in ɛgzampul sho se we wi bia prɔblɛm dɛn tide, dat go ɛp wi fɔ bia prɔblɛm dɛn tumara bambay? (Jems 1:​2-4) (Luk bak di pikchɔ.)

⁸ If wi kɔntinyu fɔ fetful to Jiova we wi gɛt prɔblɛm dɛn naw, wi go ebul fɔ bia da big big trɔbul tumara bambay. (Rom. 5:​3) Wetin mek wi se so? Bɔku brɔda dɛn tɔk se ɛnitɛm we dɛn bia prɔblɛm we nɔ izi, dat de ɛp dɛn fɔ bia ɔda prɔblɛm we go mit dɛn. We Jiova ɛp dɛn fɔ bia dɛn prɔblɛm, dat de ɛp dɛn fɔ gɛt mɔ fet se Jiova rili want fɔ ɛp dɛn. Ɛn bikɔs dɛn gɛt fet pan Jiova, dɛn go ebul fɔ bia ɔda prɔblɛm. (Rid Jems 1:​2-4.) Mira, we na wan payɔnia sista na Albenia, dɔn kam fɔ si se bikɔs i bin ebul fɔ bia prɔblɛm dɛn trade, dat dɔn ɛp am fɔ kɔntinyu fɔ bia prɔblɛm dɛn we de mit am naw. I tɔk se sɔntɛnde i kin fil se na in wangren gɛt bɔku prɔblɛm dɛn. Bɔt we i mɛmba aw Jiova dɔn sɔpɔt am insay di 20 ia we dɔn pas, i de tɛl insɛf se: ‘Kɔntinyu fɔ fetful. Nɔ mek dɛn ia dɛn de ɛn ɔl di prɔblɛm dɛn we Jiova dɔn ɛp yu fɔ bia go fɔ natin.’ Yusɛf go ebul tink bɔt aw Jiova dɔn ɔlrɛdi ɛp yu fɔ bia prɔblɛm dɛn. Gɛt kɔnfidɛns se i de notis ɛnitɛm we yu bia prɔblɛm ɛn i go mɔs blɛs yu. (Mat. 5:​10-12) Dɔn we da big big trɔbul go bigin, yu go dɔn lan aw fɔ bia, ɛn yu go mekɔp yu maynd fɔ kɔntinyu fɔ bia.

SHO SƆRI-AT

9. Aw di kɔngrigeshɔn na Antiɔk insay Siria bin sho sɔri-at?

⁹ Tink bɔt wetin bin apin we Kristian dɛn na Judia nɔ bin gɛt tin fɔ it. Wan dawt nɔ de se we di kɔngrigeshɔn we de na Antiɔk insay Siria yɛri bɔt dat, dɛn bin fil sɔri fɔ dɛn brɔda ɛn sista dɛn na Judia. So dɛn bin du sɔntin fɔ ɛp dɛn brɔda ɛn sista dɛn. Dɛn bin “mekɔp dɛn maynd fɔ sɛn sɔm tin dɛn to di brɔda dɛn we de na Judia.” (Akt 11:​27-30) Pan ɔl we di brɔda dɛn we nɔ bin gɛt bɛtɛ tin fɔ it bin de fa say, di Kristian dɛn na Antiɔk bin mekɔp dɛn maynd fɔ ɛp dɛn.—1 Jɔn 3:​17, 18.

10. Us we dɛn wi go ebul fɔ sho sɔri-at we wi kɔmpin Kristian dɛn de sɔfa bikɔs ɔf dizasta ɔ ɔda siriɔs prɔblɛm dɛn? (Luk bak di pikchɔ.)

¹⁰ Wisɛf go ebul fɔ sho sɔri-at tide we wi no se wi brɔda ɛn sista dɛn de sɔfa bikɔs ɔf dizasta ɔ ɔda siriɔs prɔblɛm dɛn. Wi nɔ de westɛm fɔ ɛp. Sɔntɛm wi kin ɛp bay we wi aks di ɛlda dɛn if wi go ebul fɔ wok pan wan projɛkt, bay we wi de gi kɔntribyushɔn fɔ di wɔlwayd wɔk, ɔ bay we wi de pre fɔ di wan dɛn we di dizasta afɛkt.b (Prɔv. 17:​17, NWT) Fɔ ɛgzampul, insay 2020, i pas 950 Dizasta Rilif Kɔmiti dɛn we dɛn pik ɔlsay na di wɔl fɔ kia fɔ di wan dɛn we di COVID-19 pandɛmik bin afɛkt. Wi de tɛl dɛn brɔda ɛn sista dɛn de we de tek pat pan di rilif wok plɛnti tɛnki. Bikɔs dɛn gɛt sɔri-at fɔ dɛn brɔda ɛn sista dɛn, dɛn de gi dɛn di tin dɛn we dɛn nid ɛn ɛp dɛn fɔ kɔntinyu fɔ sav Jiova, ɛn na sɔm say dɛn, dɛn bin bil bak dɛn os dɛn ɛn di ples dɛn we dɛn de wɔship.—Luk 2 Kɔrintians 8:​1-4.

11. Aw wi go ɔnɔ wi Papa we de na ɛvin we wi sho sɔri-at?

¹¹ We wi sho sɔri-at afta dizasta apin, ɔda pipul dɛn kin notis di sakrifays dɛn we wi de mek. Fɔ ɛgzampul, insay 2019, Ɔriken Dorian bin pwɛl wan Kiŋdɔm Ɔl na Baamas. We di brɔda ɛn sista dɛn bin de bil bak di Kiŋdɔm Ɔl, dɛn bin aks wan kɔntraktɔ we nɔto Jiova Witnɛs fɔ tɛl dɛn ɔmɔs dɛn fɔ pe am fɔ du di wok. I bin tɛl dɛn se: “A go lɛk fɔ gi . . . di tin dɛn we dɛn de wok wit, di wokman dɛn, ɛn di matirial dɛn. . . . A jɔs want fɔ du dis fɔ una ɔganayzeshɔn. A rili de kɔle di we aw [una] de fil bɔt una padi dɛn.” Bɔku pipul dɛn na di wɔl nɔ no Jiova. Bɔt bɔku pan dɛn de si wetin Jiova Witnɛs dɛn de du fɔ ɛp ɔda pipul dɛn. Wi rili gladi we wi no se we wi de sho sɔri-at to pipul dɛn, dat de mek ɔda pipul dɛn want fɔ no mɔ bɔt Jiova, we “rili gɛt sɔri-at.”—Ɛfi. 2:​4.

12. We wi gɛt sɔri-at naw, aw dat go ɛp wi fɔ rɛdi fɔ da big big trɔbul? (Rɛvɛleshɔn 13:​16, 17)

¹² Wetin mek wi go nid fɔ sho sɔri-at di tɛm fɔ da big big trɔbul? Di Baybul mek wi no se di wan dɛn we nɔ de sɔpɔt di gɔvmɛnt dɛn na dis wɔl go gɛt prɔblɛm dɛn naw ɛn di tɛm fɔ da big big trɔbul. (Rid Rɛvɛleshɔn 13:​16, 17.) Sɔntɛm wi brɔda ɛn sista dɛn go nid ɛp fɔ gɛt di tin dɛn we dɛn nid. We wi Kiŋ, we na Jizɔs Krays, go kam fɔ jɔj pipul dɛn, wi go want fɔ mek i kam mit wi de sho sɔri-at, ɛn i go invayt wi fɔ “tek di Kiŋdɔm.”—Mat. 25:​34-40.

LƐK YU BRƆDA ƐN SISTA DƐN MƆ ƐN MƆ

13. Akɔdin to Romans 15:​7, aw di fɔstɛm Kristian dɛn bin ebul fɔ lɛk dɛnsɛf mɔ ɛn mɔ?

¹³ Ɔlman bin no se di fɔstɛm Kristian dɛn ɔl bin lɛk dɛnsɛf. Bɔt fɔ se i bin izi fɔ mek dɛn sho lɔv? Tink bɔt di difrɛn pipul dɛn we bin de na di kɔngrigeshɔn na Rom. Sɔm na bin Ju, we dɛn bin tich fɔ obe di Lɔ we Gɔd bin gi Mozis, bɔt ɔda wan dɛn bin kɔmɔt na ɔda neshɔn dɛn, ɛn dɛn bin gɛt difrɛn kɔstɔm dɛn. I go bi se sɔm Kristian dɛn na bin slev ɛn ɔda wan dɛn nɔto bin slev. Sɔntɛm sɔm bin ivin gɛt slev dɛn. Aw dɛn Kristian dɛn de bin stil kɔntinyu fɔ sho se dɛn lɛk dɛnsɛf pan ɔl we dɛn difrɛn? Apɔsul Pɔl bin ɛnkɔrej dɛn fɔ “wɛlkɔm [dɛn] kɔmpin dɛn.” (Rid Romans 15:​7.) Wetin i bin min? Di wɔd we dɛn translet as “wɛlkɔm” min fɔ gladi fɔ pɔsin ɔ fɔ du gud to am, lɛk we pɔsin kam fɛn yu na yu os ɔ fɔ mek i bi yu padi. Fɔ ɛgzampul, apɔsul Pɔl bin tɛl Faylimɔn aw i fɔ wɛlkɔm di slev we bin rɔnawe, we na Onɛsimɔs. I se: “Wɛlkɔm am fayn.” (Fay. 17) Ɛn Prisila ɛn Akwila bin wɛlkɔm Apɔlɔs, we nɔ bin no bɛtɛ tin bɔt di Kristian rilijɔn lɛk dɛn; dɛn bin du dis bay we dɛn spɛn tɛm wit am. (Akt 18:​26) Dɛn Kristian dɛn de nɔ bin alaw di difrɛn we dɛn difrɛn fɔ kɔz prɔblɛm bitwin dɛn. Bifo dat, dɛn wɛlkɔm dɛnsɛf.

14. Aw Ana ɛn in man bin sho se dɛn lɛk dɛn brɔda ɛn sista dɛn?

¹⁴ Wisɛf go ebul sho se wi lɛk wi brɔda ɛn sista dɛn bay we wi de bi dɛn padi ɛn spɛn tɛm wit dɛn. Dɔn bɔku tɛm, dɛnsɛf go sho se dɛn lɛk wi. (2 Kɔr. 6:​11-13) Lɛ wi tɔk bɔt Ana ɛn in man dɛn ɛkspiriɛns. Na jɔs afta dɛn go na dɛn nyu mishɔnari asaynmɛnt na Wɛst Afrika, na in di COVID-19 pandɛmik bigin. Bikɔs ɔf di pandɛmik, dɛn nɔ bin ebul fɔ mit wit di brɔda ɛn sista dɛn na di kɔngrigeshɔn fes-to-fes, ɛn i nɔ bin izi fɔ dɛn fɔ no dɛn brɔda ɛn sista dɛn. Aw dɛn go ebul sho se dɛn lɛk dɛn brɔda ɛn sista dɛn? Dɛn bin yuz vidiokɔnfrɛns fɔ tɔk to di brɔda ɛn sista dɛn we de de. Ɛn dɛn bin tɛl dɛn se dɛn rili want fɔ no dɛn mɔ. Di famili dɛn bin gladi fɔ di kayn we aw di mishɔnari dɛn bin sho se dɛn lɛk dɛn. Ɛn bɔku tɛm, dɛnsɛf bin de kɔl ɛn sɛn mɛsej to dɛn. Wetin mek di mishɔnari dɛn bin tray fɔ no di brɔda ɛn sista dɛn na dɛn nyu kɔngrigeshɔn? Ana tɔk se, “A nɔ go ɛva fɔgɛt di brɔda ɛn sista dɛn we bin sho se dɛn lɛk mi ɛn mi famili di tɛm we tin bin fayn ɛn di tɛm we tin bin bad. Dɛn ɛgzampul dɛn de muv mi fɔ sho lɔv.”

15. Wetin yu lan frɔm Vanɛsa in ɛgzampul bɔt fɔ lɛk ɔl wi brɔda ɛn sista dɛn? (Luk bak di pikchɔ.)

¹⁵ Bɔku pan wi de na kɔngrigeshɔn dɛn wit brɔda ɛn sista dɛn we kɔmɔt difrɛn say ɛn we gɛt difrɛn abit dɛn. Wi go kɔntinyu fɔ lɛk dɛn ɔl mɔ ɛn mɔ bay we wi de pe atɛnshɔn pan dɛn gud kwaliti dɛn. I nɔ bin izi fɔ wan sista we nem Vanɛsa we de na Nyu Ziland fɔ gɛt gud padi biznɛs wit sɔm brɔda ɛn sista dɛn na in kɔngrigeshɔn. Bɔt i bin disayd se bifo i avɔyd di brɔda ɛn sista dɛn we gɛt abit dɛn we de mek i vɛks, i go spɛn mɔ tɛm wit dɛn. We i du dat, i bin ɛp am fɔ si wetin Jiova lɛk bɔt dɛn. I tɔk se: “Frɔm we mi man bi sakit ovasia, wi de spɛn tɛm wit bɔku brɔda ɛn sista dɛn we gɛt difrɛn abit dɛn, ɛn a dɔn kam fɔ si se i izi fɔ de wit dɛn. Naw a lɛk di difrɛn we wi difrɛn. Wan dawt nɔ de se Jiova sɛf lɛk dat bikɔs di pipul dɛn we i alaw fɔ wɔship am, dɛn ɔl difrɛn.” We wi lan fɔ si ɔda pipul dɛn di we aw Jiova de si dɛn, wi de pruv se wi lɛk dɛn.—2 Kɔr. 8:​24.

16. Wetin mek wi go nid fɔ lɛk wi brɔda ɛn sista dɛn di tɛm fɔ da big big trɔbul? (Luk bak di pikchɔ.)

¹⁶ Wi go nid fɔ sho se wi lɛk wi brɔda ɛn sista dɛn di tɛm fɔ da big big trɔbul. We da big big trɔbul go bigin, aw Jiova go protɛkt wi? Tink bɔt wetin Jiova bin tɛl in pipul dɛn fɔ du di tɛm we dɛn bin atak Babilɔn. I se: “Mi pipul dɛm, una kam insay una rum dɛm ɛn lɔk una do dɛm; una ayd unasɛf [fɔ shɔt tɛm] te di vɛksteshɔn dɔn.” (Ayz. 26:​20) Sɔntɛm wisɛf go nid fɔ fala da sem advays de di tɛm fɔ da big big trɔbul. Sɔntɛm di “rum dɛm” go min wi kɔngrigeshɔn dɛn. Di tɛm fɔ da big big trɔbul, Jiova prɔmis se i go protɛkt wi if wi kɔntinyu fɔ gɛt wanwɔd wit wi brɔda ɛn sista dɛn. So wi fɔ wok tranga wan naw fɔ gɛt dip lɔv fɔ wi brɔda ɛn sista dɛn. Sɔntɛm na dat go mek wi sev!

RƐDI NAW

17. If wi rɛdi naw, wetin wi go ebul fɔ du di tɛm fɔ da big big trɔbul?

¹⁷ “Jiova in gret de” nɔ go izi fɔ ɔlman. (Zɛf. 1:​14, 15, NWT) Tin nɔ go izi bak fɔ Jiova in pipul dɛn. Bɔt if wi rɛdi naw, wi nɔ go wɔri ɛn wi go ɛp ɔda pipul dɛn. Wi go bia ɛni prɔblɛm dɛn we wi gɛt. We wi brɔda ɛn sista dɛn de sɔfa, wi go du wi bɛst fɔ ɛp dɛn bay we wi go sho sɔri-at ɛn gi dɛn di tin dɛn we dɛn nid. Ɛn if wi lan fɔ sho se wi lɛk wi brɔda ɛn sista dɛn naw, wi go ebul sho se wi lɛk dɛn tumara bambay. Dɔn, Jiova go blɛs wi wit layf we go de sote go na wɔl usay dizasta ɛn trɔbul dɛn nɔ go de igen.—Ayz. 65:​17.