“Gɔd Na Lɔv”

15. Wetin di Baybul tɔk bɔt Jiova in kwaliti we na lɔv? Wetin mek i spɛshal? (Luk bak di futnot.)

¹⁵ Di Baybul tɔk sɔntin bɔt lɔv we i nɔ ɛva tɔk bɔt Jiova in ɔda men kwaliti dɛn. Di Baybul nɔ se Gɔd na pawa ɔ Gɔd na jɔstis ɔ ivin se Gɔd na sɛns. I gɛt dɛn kwaliti dɛn de, na frɔm am dɛn kɔmɔt, ɛn pɔsin nɔ go kɔmpia am to ɛnibɔdi ɔ ɛnitin we i kam pan dɛn tri kwaliti dɛn de. Bɔt we i kam to di kwaliti we mek 4, dɛn tɔk sɔntin bɔt am we mek i gɛt mɔ wet. Dɛn se: “Gɔd na lɔv.”b (1 Jɔn 4:​8) Wetin dat min?

16-18. (a) Wetin mek di Baybul se “Gɔd na lɔv”? (b) Pan ɔl di tin dɛn we Gɔd mek na dis wɔl, wetin mek na mɔtalman fit fɔ tinap fɔ Jiova in kwaliti we na lɔv?

¹⁶ Fɔ se “Gɔd na lɔv” nɔto simpul mat, lɛk we pɔsin de se, “Gɔd ikwal to lɔv.” Wi nɔ go ebul fɔ tɔn di wɔd dɛn ɛn se “lɔv na Gɔd.” Jiova nɔto jɔs kwaliti we wi nɔ de si. In na pɔsin we gɛt filin, ɛn i gɛt ɔda kwaliti dɛn apat frɔm lɔv. Bɔt lɔv rili de insay Jiova. Wan buk bin tɔk bɔt dis vas se: “Gɔd insɛf sɛf na lɔv ɔ ɔltin bɔt Gɔd na lɔv.” Wi kin tink bɔt am dis we: Jiova in pawa de mek i ebul fɔ du sɔntin. In jɔstis ɛn in sɛns de sho am aw i fɔ du sɔntin. Bɔt Jiova in lɔv na in de mek i du sɔntin. Ɛn we i de yuz in ɔda kwaliti dɛn, i de du am wit lɔv ɔltɛm.

¹⁷ Bɔku tɛm dɛn kin se Jiova na di bɛst ɛgzampul we i kam pan lɔv. So, if wi want fɔ lan bɔt agape, wi fɔ lan bɔt Jiova. Na tru se wi kin si dis fayn kwaliti bak pan mɔtalman dɛn. Bɔt wetin mek dɛn gɛt am? We Gɔd bin de mek di wɔl, i tɛl in Pikin se: “Lɛ wi mek mɔtalman we go tan lɛkɛ wi.” (Jɛnɛsis 1:​26) Pan ɔl di tin dɛn we Gɔd mek na dis wɔl, na man ɛn uman nɔmɔ kin disayd fɔ sho lɔv ɛn falamakata dɛn Papa we de na ɛvin. Mɛmba se Jiova yuz difrɛn animal dɛn fɔ tinap fɔ in men kwaliti dɛn. Bɔt Jiova yuz di bɛst pan ɔl di tin dɛn we i mek na di wɔl, dat na, mɔtalman, fɔ tinap fɔ in kwaliti we pas ɔl, we na lɔv.—Izikɛl 1:​10.