Wan Nyu Mɛmba Na Di Gɔvnin Bɔdi

Wɛnsde mɔnin, Janwari 24, 2018, di Amɛrika ɛn Kanada Bɛtɛl famili dɛn bin gladi fɔ yɛri wan spɛshal anawnsmɛnt. Dɛn bin anawns se Brɔda Kɛnɛt Kuk Jiniɔ dɔn bi nyu mɛmba na di Gɔvnin Bɔdi fɔ Jiova Witnɛs dɛn.

Dɛn bɔn ɛn mɛn Brɔda Kuk na Pɛnsilvenia, insay Amɛrika. I bin lan di trut jɔs bifo i gradyuet frɔm sɛkɔndari skul ɛn i bin baptayz Jun 7, 1980. I bin stat fɔ yuz ɔl in tɛm fɔ sav Jiova as rɛgyula payɔnia Sɛptɛmba 1, 1982. Afta we i bin dɔn payɔnia fɔ tu ia, dɛn bin invayt am na Bɛtɛl, ɛn i bin stat in Bɛtɛl savis Ɔktoba 12, 1984 na Wɔlkil, insay Nyu Yɔk.

Brɔda Kuk du difrɛn wok dɛn na di say we dɛn de print buk dɛn ɛn na di Bɛtɛl Ɔfis fɔ 25 ia. I bin mared in wɛf we nem Jemi insay 1996, ɛn in wɛf bin jɔyn am fɔ wok na Bɛtɛl na Wɔlkil. Insay Disɛmba 2009, dɛn bin transfa Brɔda ɛn Sista Kuk na di Watchtower Educational Center na Patasin, insay Nyu Yɔk, we na de dɛn bin pik Brɔda Kuk fɔ wok wit di Writing Correspondence Department. Insay Epril 2016, afta we Brɔda ɛn Sista Kuk bin go wok fɔ shɔt tɛm bak na Wɔlkil, dɛn bin transfa dɛn na Bruklin, insay Nyu Yɔk. Leta afta fayv mɔnt, dɛn bin muf go na wɔl ɛdkwata na Wɔwik, insay Nyu Yɔk. Dɔn insay Janwari 2017, dɛn bin pik Brɔda Kuk fɔ ɛp na di Raytin Kɔmiti fɔ di Gɔvnin Bɔdi.