Yu Go Alaw Ɛnitin fɔ Stɔp Yu fɔ Mek Yu Nɔ Fala Jizɔs?

1. Wetin go dɔn sɔprayz yu di fɔs tɛm we yu tray fɔ tɛl pipul dɛn bɔt di Baybul in mɛsej?

YU MƐMBA di fɔs tɛm we yu bin kam fɔ no se yu dɔn fɛn di tru na di Baybul? I bin rili izi fɔ lɛ yu ɔndastand ɔl wetin yu bin de lan na di Baybul. Ɛn yu bin fil se ɔlman go gladi fɔ lan dɛn tin dɛn ya we yu dɔn kam fɔ biliv. Yu bin biliv tranga wan se di Baybul in mɛsej go ɛp dɛn fɔ liv bɛtɛ layf, ɛn i go gi dɛn op fɔ tumara bambay. (Sam 119:​105) So yu bin rili gladi fɔ tɛl ɔl yu fambul ɛn yu padi dɛn bɔt di tru tin dɛn we yu dɔn lan. Bɔt wetin apin we yu du dat? Yu bin sɔprayz we bɔku pan dɛn nɔ lisin to yu.

2-3. Wetin bɔku pipul dɛn we bin de insay Jizɔs in tɛm bin de tink bɔt in ɛn di mɛsej we i bin de prich?

² Wi nɔ fɔ sɔprayz we pipul dɛn nɔ de lisin to di mɛsej we wi de prich. Insay Jizɔs in tɛm, bɔku pipul dɛn nɔ bin lisin to am, pan ɔl we i bin pafɔm mirekul dɛn we sho se Gɔd bin de wit am. Fɔ ɛgzampul, Jizɔs bin gi layf bak to Lazarɔs, we mek di wan dɛn we bin de agens am nɔ bin ebul dinay se i nɔ pafɔm da mirekul de. Bɔt stil, di Ju bigman dɛn nɔ bin biliv se Jizɔs na di Mɛsaya. Dɛn bin ivin want fɔ kil Jizɔs ɛn Lazarɔs.—Jɔn 11:​47, 48, 53; 12:​9-11.

³ Jizɔs bin no se bɔku pipul dɛn nɔ go biliv se in na di Mɛsaya. (Jɔn 5:​39-44) I bin tɛl sɔm pan Jɔn we De Baptayz Pipul Dɛn in disaypul dɛn se: “Di pɔsin we nɔ gɛt ɛni rizin fɔ dawt mi gɛt gladi-at.” (Mat. 11:​2, 3, 6) Wetin mek bɔku pipul dɛn nɔ bin de lisin to Jizɔs?

4. Wetin wi go tɔk bɔt insay dis atikul?

⁴ Insay dis atikul ɛn di nɛks wan, wi go tɔk bɔt sɔm rizin dɛn we mek bɔku pipul dɛn we bin de insay Jizɔs in tɛm nɔ bin put fet pan am. Wi go tɔk bak bɔt wetin mek bɔku pipul dɛn tide nɔ de lisin to wi mɛsej. Di tin we impɔtant pas ɔl we wi go tɔk bɔt, na wetin mek wi fɔ gɛt strɔng fet pan Jizɔs so dat wi nɔ go stɔp fɔ fala am.

(1) DI SAY WE JIZƆS KƆMƆT

5. Wetin go dɔn mek sɔm pipul dɛn tink se nɔto Jizɔs na di Mɛsaya we di prɔfɛsi dɛn bin dɔn tɔk bɔt?

⁵ Bɔku pipul dɛn nɔ bin de lisin to Jizɔs bikɔs ɔf di say we i kɔmɔt. Dɛn bin gri se Jizɔs rili sabi tich, ɛn i bin de pafɔm mirekul dɛn. Bɔt dɛn bin jɔs de si am lɛk wan po po kapɛnta in pikin. Dɔn bak, Jizɔs bin kɔmɔt na Nazarɛt, ɛn i go mɔs bi se pipul dɛn nɔ bin de si da siti de as siti we impɔtant. Ivin Nataniɛl we bin leta bi Jizɔs in disaypul bin tɔk fɔs se: “Ɛni gud tin go kɔmɔt na Nazarɛt?” (Jɔn 1:​46) I go bi se Nataniɛl nɔ bin lɛk da siti de we Jizɔs bin de. Ɔ sɔntɛm i bin de tink bɔt di prɔfɛsi we de na Mayka 5:​2, we bin dɔn tɔk se dɛn go bɔn di Mɛsaya na Bɛtliɛm, nɔto Nazarɛt dɛn go bɔn am.

6. Wetin fɔ bin dɔn ɛp di pipul dɛn we bin de insay Jizɔs in tɛm fɔ no se na Jizɔs na di Mɛsaya?

⁶ Wetin di Baybul se? Prɔfɛt Ayzaya bin dɔn prɔfɛsay se Jizɔs in ɛnimi dɛn nɔ go pe atɛnshɔn to di Mɛsaya in “jɛnareshɔn.” (Ayz. 53:​8) Bɔku tin dɛn de we di prɔfɛt dɛn bin dɔn tɔk bɔt am. If dɛn pipul dɛn de fɔ bin dɔn tek tɛm lan di tru tin dɛn bɔt di Mɛsaya, dɛn fɔ bin dɔn kam fɔ no se Jizɔs bin bɔn na Bɛtliɛm ɛn na Kiŋ Devid in famili layn i kɔmɔt. (Lyuk 2:​4-7) So Jizɔs bɔn na di say we Mayka 5:​2 bin dɔn se di Mɛsaya go bɔn. Bɔt wetin na bin di prɔblɛm? Di pipul dɛn nɔ bin westɛm fɔ jɔj Jizɔs. Dɛn nɔ bin no di tru tin dɛn. So dis bin mek dɛn nɔ bin de lisin to am.

7. Wetin mek bɔku pipul dɛn tide nɔ want fɔ bi Jiova Witnɛs?

⁷ Wi de si di sem prɔblɛm tide? Yɛs, wi de si am. Bɔku pan Jiova in pipul dɛn nɔto impɔtant pipul dɛn, ɛn dɛn nɔ jɛntri. So bɔku pipul dɛn kin fil se “dɛn nɔ lan buk ɛn [dɛn] na ɔdinari” pipul dɛn. (Akt 4:​13) Sɔm pipul dɛn fil se Gɔd in pipul dɛn nɔ fɔ tich wetin de na di Baybul bikɔs dɛn nɔ atɛnd dɛn Baybul kɔlɛj dɛn we ɔlman sabi. Ɔda wan dɛn kin se Jiova Witnɛs dɛn na “Amɛrikin man rilijɔn.” Bɔt di tru na dat, we yu kɔnt sɛvin Jiova Witnɛs dɛn, na lɛk wangren wan pan dɛn nɔmɔ de na Amɛrika. Dɛn dɔn tɛl sɔm ɔda wan dɛn se Jiova Witnɛs dɛn nɔ biliv Jizɔs. Insay dɛn ia dɛn ya we dɔn pas, pipul dɛn kin se Jiova in pipul dɛn na “spay fɔ di Amɛrikin gɔvmɛnt,” ɛn “dɛn kin de agens di lɔ dɛn we di gɔvmɛnt dɛn kin mek.” So bɔku pipul dɛn nɔ kin want fɔ bi Jiova Witnɛs bikɔs dɛn de yɛri dɛn stori dɛn ya, ɛn dɛn nɔ rili no di tru bɔt Jiova in pipul dɛn.

8. Akɔdin to Akt 17:​11, wetin pipul dɛn fɔ du if dɛn want fɔ no udat dɛn na Gɔd in savant dɛn?

⁸ Wetin go ɛp pɔsin fɔ lɛ i nɔ stɔp fɔ biliv di tru tin dɛn we i dɔn lan? Pipul dɛn fɔ tray fɔ no wetin na di tru tin. Na dat wan pan di man dɛn we rayt di Baybul we nem Lyuk bin mekɔp in maynd fɔ du. I bin tray tranga wan fɔ no “di tru bɔt ɔltin frɔm di biginin.” I bin want fɔ lɛ pipul dɛn “no se di tin dɛn” we dɛn dɔn yɛri bɔt Jizɔs “na tru.” (Lyuk 1:​1-4) Di Ju pipul dɛn we bin de na Bɛria bin tan lɛk Lyuk. Frɔm di fɔs tɛm we dɛn yɛri di gud nyuz bɔt Jizɔs, dɛn bin chɛk di Ibru Skripchɔ dɛn fɔ no if wetin dɛn bin yɛri na tru. (Rid Akt 17:​11.) Semweso, pipul dɛn tide fɔ tray fɔ no wetin na di tru tin. Dɛn fɔ kɔmpia di tin dɛn we Gɔd in pipul dɛn de tich dɛn wit wetin di Baybul se. Dɔn bak, dɛn fɔ stɔdi bɔt wetin Jiova in pipul dɛn dɔn du insay wi tɛm. If dɛn du dɛn tin dɛn ya, dɛn nɔ go alaw di lay lay tin dɛn we dɛn de yɛri bɔt Jiova in pipul dɛn fɔ mek dɛn nɔ si di tru.

(2) JIZƆS NƆ BIN DE PAFƆM MIREKUL DƐN FƆ PRUV SE IN NA DI MƐSAYA

9. Wetin apin we Jizɔs nɔ gri fɔ sho sayn we sho se na Gɔd sɛn am?

⁹ Sɔm pipul dɛn we bin de insay Jizɔs in tɛm nɔ bin satisfay wit di wɔndaful tin dɛn we Jizɔs bin de tich dɛn. Dɛn bin want am fɔ du pas dat. Dɛn bin se fɔ pruv se in na di Mɛsaya, i fɔ sho dɛn “sayn we de sho se na Gɔd sɛn am.” (Mat. 16:​1) I go bi se dɛn bin tɛl Jizɔs fɔ du dat bikɔs ɔf wetin dɛn bin dɔn rid na Daniɛl 7:​13, 14. Bɔt dat nɔto bin di tɛm we Jiova bin want fɔ lɛ da prɔfɛsi de apin. Di tin dɛn we Jizɔs bin de tich fɔ bin dɔn mek dɛn kɔnvins se in na di Mɛsaya. Bɔt we Jizɔs nɔ gri fɔ sho dɛn di sayn we dɛn bin want, dɛn nɔ bin lisin to am.—Mat. 16:​4.

10. Aw Jizɔs bin du wetin Ayzaya bin dɔn rayt bɔt di Mɛsaya?

¹⁰ Wetin di Baybul se? We prɔfɛt Ayzaya bin de rayt bɔt di Mɛsaya, i bin se: “I nɔ go kray ɔ ala lawd wan, ɔ ivin mek dɛn yɛri in vɔys na trit.” (Ayz. 42:​1, 2) We Jizɔs bin de du in prichin wok, i nɔ bin de du tin dɛn we fɔ mek pipul dɛn pe atɛnshɔn to am. I nɔ bin de bil tɛmpul dɛn, wɛr spɛshal klos, ɛn i nɔ bin want lɛ pipul dɛn de kɔl am taytul dɛn we de sho se i impɔtant. Pan ɔl we Jizɔs in layf bin de pan denja di tɛm we dɛn bin de jɔj am, i nɔ bin pafɔm sayn dɛn fɔ pliz Kiŋ Ɛrɔd. (Lyuk 23:​8-11) Pan ɔl we Jizɔs bin pafɔm sɔm mirekul dɛn, na di wok fɔ prich di gud nyuz bin impɔtant to am pas ɛni ɔda wok. I bin tɛl in disaypul dɛn se: “Na dis mek a kam.”—Mak 1:​38.

11. Us rɔng aydia we sɔm pipul dɛn gɛt?

¹¹ Wi de si di sem prɔblɛm tide? Yɛs, wi de si am. Tide, bɔku pipul dɛn kin kɔle dɛn big chɔch dɛn we dɛn dɛkɔret wit dia dia tin dɛn. Dɔn bak, dɛn kin kɔle dɛn bigman dɛn pan Gɔd biznɛs we gɛt taytul dɛn we de sho se dɛn impɔtant. Ɛn dɛn kin lɛk dɛn sɛrimɔni dɛn we di Baybul nɔ gri wit, bɔt bɔku pan dɛn dɔn fɔgɛt se di Baybul nɔ gri wit dɛn sɛrimɔni dɛn de. Di pipul dɛn we kin go na dɛn ples dɛn de fɔ wɔship, nɔ kin lan bɛtɛ tin bɔt Gɔd ɛn wetin Gɔd want. Di pipul dɛn we kin atɛnd wi Kristian mitin dɛn kin lan bɔt wetin Jiova want wi fɔ du, ɛn aw wi fɔ du dɛn tin dɛn de we i want. Wi Kiŋdɔm Ɔl dɛn klin, ɛn wi de ebul yuz dɛn fɔ wɔship. Bɔt dɛn nɔ yuz dia dia tin dɛn fɔ dɛkɔret dɛn. Di wan dɛn we de bifo nɔ de wɛr spɛshal klos, ɛn dɛn nɔ gɛt taytul dɛn we de mek i luk lɛk se dɛn impɔtant. Di tin dɛn we wi de tich, ɛn di tin dɛn we wi biliv kɔmɔt frɔm di Baybul. Bɔt stil, bɔku pipul dɛn nɔ de lisin to wi bikɔs dɛn fil se di we aw wi de wɔship tu simpul. Ɛn di tin dɛn we wi de tich, nɔto tin dɛn we dɛn want fɔ yɛri.

12. Akɔdin to wetin de na Ibruz 11:​1, 6, wetin wi fɔ du fɔ mek wi gɛt fet?

¹² Wetin go ɛp wi fɔ lɛ wi nɔ stɔp fɔ biliv di tru tin dɛn we wi dɔn lan? Apɔsul Pɔl bin tɛl di Kristian dɛn we de na Rom se: “Pɔsin de gɛt fet afta i yɛri sɔntin. Ɛn wetin i yɛri na di wɔd we pɔsin tɔk bɔt Krays.” (Rom. 10:​17) So wi go ebul fɔ gɛt fet we wi stɔdi di Baybul, nɔto we wi put an pan sɛrimɔni dɛn we di Baybul nɔ gri wit, ilɛksɛf dɛn sɛrimɔni dɛn de luk fayn to wi. Wi fɔ lan di tru we go mek wi gɛt strɔng fet bikɔs “i nɔ pɔsibul fɔ mek pɔsin pliz Gɔd fayn fayn wan if i nɔ gɛt fet.” (Rid Ibruz 11:​1, 6.) So wi nɔ nid fɔ si wɔndaful sayn frɔm Gɔd fɔ pruv se wi dɔn fɛn di tru. Bɔt we wi tek tɛm stɔdi di tin dɛn we de na di Baybul we go ɛp wi fɔ gɛt strɔng fet, dat go kɔnvins wi se wi dɔn fɛn di tru, ɛn wi nɔ go gɛt ɛni dawt.

(3) JIZƆS NƆ BIN DE FALA BƆKU PAN DI JU PIPUL DƐN TRADISHƆN DƐN

13. Wetin bin mek bɔku pipul dɛn kɔndɛm Jizɔs?

¹³ Insay Jizɔs in tɛm, Jɔn we De Baptayz Pipul Dɛn in disaypul dɛn bin sɔprayz fɔ si se Jizɔs in yon disaypul dɛn nɔ de fast. Jizɔs bin ɛksplen se dɛn nɔ bin gɛt ɛni rizin fɔ fast we i stil de alayv. (Mat. 9:​14-17) Bɔt stil, di Faresi dɛn, ɛn di ɔda pipul dɛn we bin de agens Jizɔs bin kɔndɛm am bikɔs i nɔ bin de fala dɛn kɔstɔm ɛn tradishɔn dɛn. Dɛn bin vɛks we i bin de mɛn sik pipul dɛn di Sabat de. (Mak 3:​1-6; Jɔn 9:​16) Dɛn pipul dɛn ya we bin gladi fɔ se dɛn de obe di Lɔ bɔt di Sabat, na di sem pipul dɛn we nɔ bin gɛt prɔblɛm fɔ du biznɛs na di tɛmpul. Dɛn bin vɛks bad bad wan we Jizɔs kɔndɛm dɛn fɔ dat. (Mat. 21:​12, 13, 15) Ɛn we Jizɔs bin de prich na di sinagɔg na Nazarɛt, di pipul dɛn bin vɛks we i bin yuz di istri bɔt di Izrɛlayt dɛn fɔ sho dɛn se dɛn jɔs bisin bɔt dɛnsɛf, ɛn dɛn nɔ gɛt fet. (Lyuk 4:​16, 25-30) Bɔku pipul dɛn nɔ bin de lisin to Jizɔs bikɔs i nɔ bin de du wetin dɛn bin de ɛkspɛkt se i go du.—Mat. 11:​16-19.

14. Wetin mek Jizɔs bin kɔndɛm mɔtalman tradishɔn dɛn we di Baybul nɔ gri wit?

¹⁴ Wetin di Baybul se? Jiova bin yuz prɔfɛt Ayzaya fɔ se: “Dɛn pipul ya kam nia mi wit dɛn mɔt ɛn ɔna mi wit dɛn lip, we dɛn at nɔ de to mi, ɛn di fred we dɛn de fred mi, na mɔtalman lɔ we dɛn kram.” (Ayz. 29:​13) Na di rayt tin Jizɔs bin du we i kɔndɛm mɔtalman tradishɔn dɛn we di Baybul nɔ gri wit. Dɛn wan dɛn we bin fil se mɔtalman lɔ ɛn tradishɔn dɛn impɔtant pas di Baybul bin de tɔn dɛn bak pan Jiova ɛn di wan we i sɛn as di Mɛsaya.

15. Wetin bɔku pipul dɛn nɔ lɛk bɔt Jiova Witnɛs dɛn?

¹⁵ Wi de si di sem prɔblɛm tide? Yɛs, wi de si am. Bɔku pipul dɛn kin vɛks we Jiova Witnɛs dɛn nɔ de jɔyn dɛn fɔ put an pan sɛlibreshɔn dɛn we di Baybul nɔ gri wit, lɛk batde ɛn Krismas. Ɔda wan dɛn kin vɛks we Jiova Witnɛs dɛn nɔ de jɔyn dɛn pan sɛlibreshɔn dɛn we dɛn kin gɛt fɔ dɛn kɔntri ɔ we dɛn nɔ de put an pan bɛrin sɛrimɔni dɛn we di Baybul nɔ gri wit. I go bi se di wan dɛn we nɔ kin lisin to wi bikɔs wi nɔ de du dɛn tin dɛn ya kin rili fil se dɛn de wɔship Gɔd di rayt we. Bɔt dɛn nɔ go ebul fɔ pliz Gɔd if dɛn disayd fɔ fala di tradishɔn dɛn we de na di wɔl, ɛn dɛn tɔn dɛn bak pan di tru tin dɛn we di Baybul de tich wi.—Mak 7:​7-9.

16. Akɔdin to Di Sam Dɛm 119:​97, 113, 163-165, wetin wi fɔ du ɛn wetin wi fɔ avɔyd?

¹⁶ Wetin go ɛp wi fɔ lɛ wi nɔ stɔp fɔ biliv di tru tin dɛn we wi dɔn lan? Wi fɔ du wetin go mek wi gɛt strɔng lɔv fɔ Jiova in lɔ ɛn prinsipul dɛn. (Rid Di Sam Dɛm 119:​97, 113, 163-165.) We wi lɛk Jiova, wi nɔ go put an pan ɛni tradishɔn we go mek i nɔ gladi. Wi nɔ go alaw ɛnitin fɔ impɔtant to wi pas wi lɔv fɔ Jiova.

(4) JIZƆS NƆ BIN CHENJ DI GƆVMƐNT FƆ DƐN

17. Wetin bɔku pipul dɛn we bin de insay Jizɔs in tɛm bin ɛkspɛkt se di Mɛsaya go du?

¹⁷ Sɔm pipul dɛn we bin de insay Jizɔs in tɛm bin want ɔda gɔvmɛnt. Dɛn bin de ɛkspɛkt se di Mɛsaya go pul dɛn ɔnda di Roman gɔvmɛnt we bin de mek dɛn sɔfa. Bɔt we dɛn tray fɔ mek Jizɔs kiŋ, i nɔ bin gri. (Jɔn 6:​14, 15) Di prist dɛn ɛn ɔda pipul dɛn bin de fred se Jizɔs go tray fɔ chenj di gɔvmɛnt. Ɛn we i du dat, di Roman pipul dɛn go vɛks, ɛn dɛn go tek di pawa we dɛn bin dɔn gi di prist dɛn. Bikɔs bɔku pan di Ju pipul dɛn bin de wɔri bɔt dɛn tin dɛn ya we gɛt fɔ du wit pɔlitiks, dɛn nɔ bin lisin to Jizɔs.

18. Us Baybul prɔfɛsi dɛn bɔt di Mɛsaya we bɔku pipul dɛn nɔ bin want fɔ no bɔt?

¹⁸ Wetin di Baybul se? Pan ɔl we bɔku prɔfɛsi dɛn bin dɔn se di Mɛsaya go win di fɛt we i gɛt fɔ fɛt, ɔda prɔfɛsi dɛn bin dɔn sho se i go gɛt fɔ day fɔs fɔ wi sin dɛn. (Ayz. 53:​9, 12) So wetin mek di Ju pipul dɛn bin gɛt rɔng aydia bɔt di Mɛsaya? Na bikɔs bɔku pipul dɛn we bin de insay Jizɔs in tɛm nɔ bin want fɔ no bɔt ɛni prɔfɛsi we nɔ tɔk se dɛn prɔblɛm go dɔn da tɛm de.—Jɔn 6:​26, 27.

19. Wetin bɔku pipul dɛn tide de ɛkspɛkt se wi go du?

¹⁹ Wi de si di sem prɔblɛm tide? Yɛs, wi de si am. Bɔku pipul dɛn nɔ de lisin to wi bikɔs wi nɔ de put an pan pɔlitiks. Dɛn de ɛkspɛkt se wisɛf fɔ go vot we ilɛkshɔn tɛm rich. Bɔt wi no se if wi pik mɔtalman rula, dat min se wi nɔ want Jiova fɔ bi wi rula. (1 Sam. 8:​4-7) Sɔm pipul dɛn kin fil se wi fɔ bil skul ɛn ɔspitul dɛn, ɛn du ɔda gud tin dɛn fɔ wi kɔmyuniti. Dɛn nɔ kin lisin to wi bikɔs wi de pe atɛnshɔn mɔ fɔ prich di gud nyuz bifo wi tray fɔ sɔlv di prɔblɛm dɛn na di wɔl.

20. Akɔdin to wetin Jizɔs tɔk na Matyu 7:​21-23, wetin fɔ impɔtant to wi pas ɛni ɔda tin?

²⁰ Wetin go ɛp wi fɔ lɛ wi nɔ stɔp fɔ biliv di tru tin dɛn we wi dɔn lan? (Rid Matyu 7:​21-23.) Di tin we fɔ impɔtant to wi pas ɛni ɔda tin na fɔ du di wok we Jizɔs bin dɔn kɔmand wi fɔ du. (Mat. 28:​19, 20) Wi nɔ fɔ ɛva alaw pɔlitiks prɔblɛm ɛn di ɔda prɔblɛm dɛn we de na dis wɔl fɔ pul wi maynd pan da wok de. Wi lɛk pipul dɛn, ɛn wi de fil am we prɔblɛm dɛn de mit dɛn. Bɔt wi no se di bɛst we fɔ ɛp dɛn na we wi tich dɛn bɔt Gɔd in Kiŋdɔm ɛn ɛp dɛn fɔ bi Jiova in padi.

21. Wetin wi fɔ mekɔp wi maynd fɔ du?

²¹ Insay dis atikul, wi dɔn tɔk bɔt 4 rizin dɛn we mek bɔku pipul dɛn nɔ bin de lisin to Jizɔs insay in tɛm, ɛn we go mek sɔm pipul dɛn nɔ lisin to Jizɔs in disaypul dɛn tide. Bɔt na dɛn tin dɛn ya nɔmɔ wi fɔ avɔyd? Nɔ-o, nɔto dɛn nɔmɔ. Insay di nɛks atikul, wi go tɔk bɔt 4 mɔ rizin dɛn we mek bɔku pipul dɛn nɔ bin de lisin to Jizɔs, ɛn we go mek dɛn nɔ lisin to in disaypul dɛn bak tide. Lɛ wi mekɔp wi maynd se wi nɔ go ɛva alaw sɔntin fɔ stɔp wi fɔ mek wi nɔ fala Jizɔs, ɛn wi go kɔntinyu fɔ gɛt strɔng fet.