Masaa Tasiaa
5 Mɛɛ Hiluam, masa wa Taaya wo+ tuei maa a pɔya Sɔlɔmɔŋ le mbo wa masaa o foofo finya ndɔ wo, mbo yɔŋ buɛiyaa nduaa naa Sɔlɔmɔŋ chua, kanifuule Hiluam wa o chaŋyɛi niŋ nda Deeve.*+ 2 Mi Sɔlɔmɔŋ bɛɛ yɔŋ Hiluam yooŋgoo aa:+ 3 “Numpila sina maa, finya nuu Deeve sɔla dioo le chiɛiyo taŋgullo le diola Chɛhowa Mɛlɛka ndɔɔ le. Kanifuule, waŋnda wa fulaa ba o ba fee ma huŋ ndu chiŋalaŋndo a chɔuwo, haaa mi Chɛhowa tosa mbo nɛi yaamɔɔwaa nduaa choo.+ 4 Kɛ suŋ suŋ niŋ, Chɛhowa Mɛlɛka nuu ke ya pɛŋgioo ba o ba fee.+ Wana o wana cho ya simul te, nduyɛ nyɛ o nyɛ wɔɔŋ cho yɔŋnɔŋ te.+ 5 Lelaŋ, I yeema mi taŋgul chiɛiyo le diola Chɛhowa Mɛlɛka nuu. Kanifuule, mi Chɛhowa dimul Deeve finya ni aa: ‘Po num ya cho miŋgi o kpeŋgbei* num lemasaa choo wo, ndu cho chiɛiyo taŋgul le diola nilaŋ ni.’+ 6 Lelaŋ, dimul la wanaa numnda le ma kilul la yɔmii sida ve Lebanɔŋ.+ Kanifuule, numpila sina maa naa kpou, wana pilɛ bɛɛ chiee yɔmnde kiolɔɔ maa waŋnda Saidɔŋ te.+ Buɛiyaa niaa cho wallo tosa latulu a buɛiyaa numnda. Nduyɛ, I cho nda paawa* a mɛɛ ŋ cho ya baa kilul lɛ.”
7 Mɛɛ Hiluam tuei yooŋgu Sɔlɔmɔŋ ndo, mbo duaunuŋ nyaale tau, nduyɛ mbo dimi aa: “Maa Chɛhowa sɔla saŋgalaa paale hauleŋ ndeŋ. Kanifuule, o ke Deeve po nɔ taasioo wo le mbo wa wanaa faŋga bɛnduaa haa choo!”+ 8 Okoŋ, mi Hiluam miŋgi diomndeŋ naa Sɔlɔmɔŋ chua aa: “I tuei yooŋgu ŋ yɔŋ ya wo. I cho tosa nyɛ ŋ dimi wo, mi ke num yɔmii sida ve a yɔmii chunipa ve.+ 9 Buɛiyaa niaa cho ndi chua Lebanɔŋ ma tusi ndi o pee mɛŋma ihɛllo. Nduyɛ I cho ndi yii le ma kuɛ a ndi o pee mɛŋma ihɛllo choo, haaa o fondaŋ ŋ cho ya dimul lo. Te i fuuluu loŋ pɛ, a cho ndi tiimbuu okoŋ mi num kuɛ niko a ndi. Nyɛdiaa ya yeema wo num bɛɛ cho ya ke sɔŋgɔ koŋ ni le chiɛi nuu.”+
10 Okoŋ, mi Hiluam yɔŋ yɔmii sida ve a yɔmii chunipa ve, i Sɔlɔmɔŋ ndoo yeema ve kpou. 11 Nduyɛ nyɛdiaa Sɔlɔmɔŋ ke Hiluam le chiɛi ndɔɔ wo wa hoo ni: Witiiyoŋ kilolaŋ 3,200,000,* a chuɛima ɔlifiima kɛndɛ kɛndiaŋ litɛilaŋ 4,400.* Nyɔɔŋ muŋ Sɔlɔmɔŋ ndoo ke Hiluam iwɔsi o iwɔsi ni.+ 12 Mi Chɛhowa ke Sɔlɔmɔŋ taasioo a mɛɛ o chuel ndu buŋgɛi yɛ.+ Kɔl nyuloo wa vɛlɛ Hiluam tɛɛŋ nda Sɔlɔmɔŋ, nduyɛ ma tosa chɛlaŋndo* nda ŋiɔɔŋ.
13 Mi Masaa Sɔlɔmɔŋ hɛli puaa 30,000 o Isɔluɛi niŋ kpou le wali lechiɔɔ tosaa.+ 14 Mi ndoo yɔŋ nda Lebanɔŋ a kundalaŋ. Nduyɛ ipaŋgu o ipaŋgu, waŋnda 10,000 ndoo yɔŋ ni. Te ndaa chii pɛ paŋgei i pilɛ Lebanɔŋ, a miiŋgu o la nda lo le paŋgoŋ ŋmuuŋ. Nduyɛ, Adoniluam+ wa wanaa nda hɛli haa le wali lechiɔɔ wa bolleŋ ni. 15 Sɔlɔmɔŋ ndoo nɔ waŋnda 70,000 le walta yɔŋaalaŋ tosaa,* a waŋnda 80,000 le poutaŋ kiolɔɔ+ o pemboŋ.+ 16 Ndoo nɔ vɛlɛ masaa pɔmbuaa 3,300.+ Nduyɛ, nda wa wanaa nduaa walla kpou hɔlteŋ choo ni. 17 Mi masaa dimi ma kala pouta bɛndula kendu baa laŋ,+ ma sial taŋ+ le chiyii chiɛiyo kilaa.+ 18 Wanaa taŋgulaa Sɔlɔmɔŋ nda, wanaa taŋgulaa Hiluam nda, a Kibalaitiiya+ sɛl taŋ ni. Nduyɛ, ma bɛɛndiaa yɔmnde a poutaŋ le chiɛiyo taŋgullo.