Masaa Tasiaa
9 Dimioo nuaa Sɔlɔmɔŋ chii chiɛi Chɛhowa wo, chiɛi lemasaa,+ a nyɛ o nyɛ cheleŋ ndoo yeema le taŋgullo wo taŋgul,+ 2 mi Chɛhowa chɔɔmuŋ ndu chɔɔmɔŋ diiŋ ndɔɔ, mɛɛ ndoo chɔɔmuŋ ndu Kibiɔŋ yɛ.+ 3 Mi Chɛhowa dimul ndu aa: “I tuei piɛile ŋ piɛi ya lachi le mi tuiinuŋ nya inyiɛɛ leŋ. I dindi chiɛi ŋ taŋgul hoo wo, mi handu diola nilaŋ lechoo le fɛɛŋ a fɛɛŋ.+ Hɔlte nileŋ a kɔl nuu cho wa loŋ le teleŋ o teleŋ.+ 4 Nduyɛ num Sɔlɔmɔŋ, te a kela pɛ o nɛila nilaŋ choo maa Deeve finya num,+ ma nɔ kɔl walaŋndo,+ ma wa sakpo,+ ma tosa nyɛ o nyɛ ya dimul num,+ nduyɛ ma diikuŋ sawala nilaŋ,+ 5 I cho tosa mi kpeŋgbei* num lemasaa sim yi o Isɔluɛi niŋ le fɛɛŋ a fɛɛŋ, mɛɛ ya chuel Deeve finya num buŋgɛi yɛ. Mi dimul ndu aa, ‘Le teleŋ o teleŋ, waŋndo cho wa ichali o kpeŋgbei lemasaa choo Isɔluɛi,+ fulaa o pulale numndeŋ choo.’ 6 Kɛ num ni, puaa numnda ni, te la mulul la pɛ kɔɔ nduyɛ mi la kɛɛ le nyɛ ya dimul nya wo tosaa a sawala ya ke nya laŋ biyɔɔ, okoŋ mi la muliŋ mɛlɛkaa cheleŋnda wulaŋ beŋndo le nda sooluuwo,+ 7 I cho waŋnda Isɔluɛi basɔɔ tɛɛ o lɛŋnde ya ke nda leŋ+ niŋ. Chiɛi ya hɛli hoo mi dindi ndu le diola nilaŋ ndo bɛɛ, I cho ndu faŋa ya o hɔl bau.+ Waŋnda Isɔluɛi cho simnɔŋ nyɛ wɔɔŋndo waŋnda kpou o hɔl,+ nduyɛ ma simnuŋ nyɛ mamaa.* 8 Chiɛi ŋ taŋgul hoo wo cho simnɔŋ bembelaŋ.+ Wana o wana wa pɛ keilaŋ ikɛi, kɔndɔfillo cho ndu biyɔɔ mbo hɔŋ huiye, mbo dimi aa, ‘Le yɛɛnɛ Chɛhowa tosa yɛ hei a lɛŋndeŋ ndeŋ vɛlɛ a chiɛiyo hoo?’+ 9 Okoŋ ma dimi aa, ‘Le mɛɛ nda kɛɛ Chɛhowa Mɛlɛka ndaa, o soli finyaa ndaa mamaa o lɛŋnde Ichipi leŋ niŋndo yɛ. Ma muliŋ mɛlɛkaa cheleŋ wulaŋ beŋndo nduyɛ ma sooluu nda. Le saboo hoo Chɛhowa tusi nda kpundɔɔ hoo kpou choo ni.’”+
10 Wɔsilaŋ 20 Sɔlɔmɔŋ chua ni le chiɛi Chɛhowa wo a chiɛi ndɔ ndupilaa* taŋgullo.+ 11 Mi Hiluam+ masaa le Taaya ke Sɔlɔmɔŋ yɔmii sida ve, yɔmii chunipa ve, a kooliiyoŋ mɛɛ kpɛ ndoo yeema yɛ.+ Okoŋ, mi Sɔlɔmɔŋ ke Hiluam chieeŋ bɛndoŋ 20 o lɛŋnde Kalili leŋ niŋ. 12 Mi Hiluam chaŋ Taaya mbo kua le chieeŋ Sɔlɔmɔŋ ke ndu woŋ chɔɔ. Kɛ mɛɛ o che muŋ, o hini kɔl a muŋ te.* 13 Okoŋ mbo dimi aa: “Chieeŋ suu maa vɛɛ ŋ ke yɛ ya muŋ pɔmbɔŋ ndo?” Le hei, ma ke chiooŋ muŋ diolaŋ aa Lɛŋnde Kabɔɔ leŋ* haaa a paale hauleŋ ndeŋ. 14 Mi Hiluam yɔŋ masaa kooliiyoŋ, muŋ wa talɛŋndoŋ 120.*+
15 Konaa cho hoo ni a wanaa Masaa Sɔlɔmɔŋ hɛli le wali lechiɔɔ tosaa+ wa okɔɔ. Mbo soliŋ nda kpeku le chiɛi Chɛhowa wo taŋgullo,+ a chiɛi ndɔ ndupilaa. Ma heelu vɛlɛ Bemboo,*+ nduyɛ ma taŋgul kpakioo Chulusalɛm, Hasɔɔ,+ Mɛkidɔɔ,+ a Kiisa.+ 16 (Feloo, masaa le Ichipi huŋ del Kiisa choo ni mbo luam ndu chilikɔ. Nduyɛ, mbo dii Kenanaitiiyaa+ wa o chiee koŋ niŋnda kpou. Mbo chua chioo hoo mbo fanda chua ndɔɔ+ le ndu choŋgɔŋndo,* o Sɔlɔmɔŋ chua o nɔɔ niŋndo.) 17 Mi Sɔlɔmɔŋ taŋgul Kiisa, Bɛti-hɔlɔŋ Amatou,+ 18 Baalati,+ a Tamaa, chiee cho o pollo niŋ o lɛŋnde leŋ niŋndo. 19 Mi Sɔlɔmɔŋ taŋgul vɛlɛ chieeŋ bɛndoŋ le nyɔɔŋ kɛsioo, le nyɛm nyaanaŋ suaa naŋndoŋ,+ a chieeŋ bɛndoŋ le wanaa nyaanuŋ suaa wa, a nyɛ o nyɛ ndoo yeema taŋgullo Chulusalɛm, Lebanɔŋ, vɛlɛ a lɛŋii wa ndu o ba bɛŋgu ve kpou. 20 Kɛ wanaa lo yoomu o kaalaŋ ndaŋ niŋnda, nda ve Isɔluɛiya+ choo le. Nda yɔŋnuŋ ni maa Amɔluaitiiya, Hitaitiiya, Pɛluɛsaitiiya, Hivaitiiya a Chɛbusaitiiya.+ 21 Chuauwaa ndaa mamaa Isɔluɛiya mɛi o lɛŋndeŋ niŋ a tɛɛmbuu nda le wa, mi Sɔlɔmɔŋ siiŋguu nda chiaa le waltaŋ tosaa haaa a paale hauleŋ ndeŋ.+ 22 Kɛ Isɔluɛiya nda kinɛi, o pilɛ bɛɛ Sɔlɔmɔŋ siiŋguu ndu chɛ le.+ Kanifuule, nda wa kuubaa nduaa, buɛiyaa nduaa, a laŋgbaa nduaa kalla ni. Apum wa le wanaa wa puaa chɔuwa bolleŋ nda malaa. Apum yɛ, wanaa kua a nyɛm nyaanaŋ suaa naŋndoŋ nda a wanaa nyaanuŋ suaa wa nda wa bolle ni. 23 Masaa wa wali Sɔlɔmɔŋ ndo bolleŋ nda wa 550. Nda masaa pɔmbuaa wa o ba bɛŋgu ni. Nduyɛ, nda wa wanaa wa wallo tosaa wa hɔlteŋ choo ni.+
24 Mi chua Feloo wo+ faŋaŋ o Chiee Deeve Wo,+ mbo hiau o chiɛi Sɔlɔmɔŋ teŋgul ndu wo. Okoŋ, mi Sɔlɔmɔŋ heelu Bemboo.*+
25 Iwɔsi o iwɔsi, mi Sɔlɔmɔŋ ndoo soli salala luamaa laŋ a salala kɔl nyulu laŋ bɛmbɔɔ leyaa,+ o bandu luamaa lasala ndoo teŋgul Chɛhowa wo+ choo. Okoŋ, mi kumii salala laŋ ndii hel o bandu luamaa lasala wa koŋ Chɛhowa lachi wo. Wali o wali wa o chiɛiyo, mi Sɔlɔmɔŋ chii ndu tosa.+
26 Mi Sɔlɔmɔŋ toosiaa vɛlɛ dɛndɛla mamɛŋndaŋ Ɛsiɔŋ-kɛbɛ.+ Ɛlati ikɛi chioo hoo cho ni o Pee Siaŋa Mɛŋma Ihɛllo kɔŋgɔ, o lɛŋnde Idɔm ndeŋ+ niŋ. 27 Mi Hiluam yɔŋ buɛiyaa nduaa, puaa sina mɛŋndaŋ nyɛkɛndɛi ya le ma tosa wallo latulu nda buɛiyaa Sɔlɔmɔŋ nda o dɛndɛlaŋ ndaŋ niŋ.+ 28 Ma kua Ofii,+ ma kɔ chua kooliiyoŋ talɛŋndoŋ 420, ma yoo Masaa Sɔlɔmɔŋ.