Sam
Chondii Deeve Ve.
144 Maa Chɛhowa, Pou Kpoowa nuu+ sɔla saŋgalaa,
Kanifuule ndu pɛɛku bala nilaŋ
A sooŋ nuŋ ni le chɔuwo.+
2 Ndu cho kaala lo lechoo nuu ni, a fondaŋ kala kala ya viaŋnuŋ ndo.
O ndu lo ya viaŋnuŋ ni, nduyɛ ndu cho wana ni piŋiaa ni.
Ndu cho boo ni chɔuwo ni, a wana ya kua o ndu lo le ya mandaa wo.+
Ndu tosa ni mi yem waŋnda, ma wa ya o ba bɛŋgu.+
3 Oo Chɛhowa, yɛɛ kpeekpei wanachioo cho yɛ le ma kɛsi ndu hɔlteŋ choo?
Yɛɛ kpeekpei chuauwaa ŋwaŋnda chiee cho yɛ le ma buulaŋ le nda?+
4 Wanachioo cho ko maa hueiyii yoomɛi.+
Nduyɛ, palɛi nduɛi cho ko mɛɛ wunduleŋ le keleŋa nuaa lo yɛ.+
5 Oo Chɛhowa, tusi tiŋ choo choo numndo ma tol lɛŋ.+
Pilaŋ pembuŋ bɛndoŋ, mi kumnde kinduŋ lechoo.+
6 Tosa mi nyɛ ŋualalɛi ŋualalɛiyo kiolu, mi yaamɔɔwa saŋnuŋ.+
Wuu chiŋɔma numndaŋ, ma yɔŋnuŋ pulaŋ pulaŋ.+
7 Lo o choo choo niŋ ma siɛndi bala numndaŋ,
Ma piŋi ya o mɛŋma yoŋgbaŋ yoŋgbaŋ ndaŋ niŋ
Mialla o ba,+
8 A dimi choolaŋ,
Nduyɛ ma heelu bala ndala kɛndɛlaŋ choo choo le mɛnaŋndo o choolaŋ choo wa.
9 Oo Mɛlɛka, I cho num chondii sɛnɛiye solul.+
I cho num chondoŋ solul* a nyɛchaa nɔ yuei tɔ wo.
10 Kanifuule num tosa ni mi masaa sɔla batiuwaa.*+
Num manda Deeve buɛi num ni, muɛi faŋnde dii ndu le.+
11 Piŋi ya mialla o ba,
A dimi choolaŋ,
Nduyɛ ma heelu bala ndala kɛndɛlaŋ choo choo le mɛnaŋndo o choolaŋ choo wa.
12 Okoŋ puaa naa cho wa mɛɛ tɔlɔɔ fɔŋndɔɔ hindu nuaa chɔ chɔ yɛ,
Nduyɛ mi chuauwaa naa laanduaa wa maa suŋgbuma nda tuuliaa nyɔɔŋ lechoo o chiɛi lemasaa niŋndaŋ.
13 Chiɛila naalaŋ la cho piɔ cha a nyɛdiaa suu o suu,
Mi chɔluaa naŋ manda yondolaŋ niŋnda kui waalaŋ o waalaŋ niŋ.
14 Nyɛ o nyɛ yɔŋnuŋ niŋ chɔluaa naa cho a yoltaŋ* nda, ɔɔ ma viikuu le.
Chaŋnda nyɛpalaa ve niŋ o luŋnda naalaŋ te.
15 Kɔl kɛndɔɔ cho le wanaa sɔɔŋ muŋ cho yɔŋnɔŋ nda!
Kɔl kɛndɔɔ cho le wanaa Chɛhowa cho Mɛlɛka ndaa wa!+