Sam
Chondii Deeve ve, le naa yiyalaŋndo.*
38 Oo Chɛhowa, te a wa pɛ a kɔl tuuwo, sila ya le.
Te a dɔɔnuŋ pɛ tumbe, miŋgi ya o nɛi le.+
2 Kanifuule, chiŋɔma numndaŋ ma chuku ya mi ma luɛi ya o dialloŋ niŋ di,
Nduyɛ ba numndo cho ya kindilaa kpeekpei.+
3 Mɛɛ ŋ tuulu kɔl, mi dialuŋ nuŋ kpou wa ya nɛiyo.
Le mɛɛ ya tosa hakioo yɛ, kɔl nyulu bɛɛ cho o paala nilaŋ niŋ te.+
4 Kanifuule, hakila nilaŋ la cho la deŋgelaa ya o lebol+
Maa bɔndii lusulɛi, I nɔla laŋ chua le.
5 Kusuaŋ ma luɛi o pauvii nii mi i wa chuŋndo,
Le diɔmii ya tosa ve.
6 I cho o kɔl tambɛi bɛndoo niŋ nduyɛ mi wa o yɔkpɛiyo.
Mi niilu balɔɔ kpɛŋ o kɔl tambɛi bɛndoo niŋ.
7 I cho dialuŋ nuŋ sinaŋndo maa lomnɔŋ,
Nduyɛ dialloŋ kpou cho ya nɛiyo.+
8 Dialloŋ kpou yɔŋnuŋ ya tiifaŋ, mi wa o kɔl tambɛi bɛndoo niŋ.
Kɔl ni tambɛiyo tosa mi wa kuŋndaŋ choo choo kpeleŋ a nyɛ nɛiyaa.
9 Oo Chɛhowa, a sina yeemaŋ nuŋ kpou,
Nduyɛ mɔnɛi ya cho biyɔɔ ve cho num i viaŋnaŋ te.
10 Kɔllo cho ya lɔɔ kpu kpu, nduyɛ yoomule bɛɛ I nɔ lɛ le.
Hɔltaŋ la yɔŋnuŋ ya yifidii.+
11 Wanaa niaa kaalaa a chaaŋaa niaa fafaŋ ya le kpundɛ komal la wo,
Nduyɛ wanaa naŋ chiɛɛliaŋ nda bɛɛ sɔɔŋguu lɛ ya ikɛi le.
12 Wanaa cho kindiŋndo le ya diyɔɔ wa kɛsul la yaŋɔɔlaŋ.
Wanaa cho kindiŋndo le ya nyɛpalaa tusioo choo wa cho suukaŋndo le ya diyɔɔ.+
Ma niilu choolaŋ dimioo kpɛŋ a ya okɔɔ.
13 Kɛ maa wana nila baŋulɛiyo, I cho nda lani yaŋɔɔ le.+
I cho tosa maa bobonɔ, I suu o nda lo le.+
14 I simnuŋ maa wana tui le wo,
O tiuba mbo dimi isɔɔ o isɔɔ le wo.
15 Kanifuule num Chɛhowa, num ya wa chumndo ni le ma mala ya.+
Nduyɛ num Chɛhowa Mɛlɛka nuu ma mala ya.+
16 Kanifuule mi dimi aa: “Maa waŋnda haa duaunuŋ nyaale ya choo,
Ɔɔ ma kelu yoŋgaa ya choo te I siɛɛla pɛ le.”
17 Ndoo lo niŋ chobe mi yaa del,
Nduyɛ le teleŋ o teleŋ nyɛ nɛiyaa wa ya choo.+
19 Kɛ yaamɔɔwaa niaa nɔ yoomuaŋ,* nduyɛ kpaayaa pila nda nɔ ni.*
Wanaa tul la leyɛ o fondo fuuwo choo wa cho tuŋ hiouwɔɔ lachi a kuiyo.
20 A miŋgul la maa a i wɔɔŋnde le o kɛndɛ ya tosa wo.
A wa kindiŋndo kpeekpei le ya kuunaa le nyɛ cho o kɛndɔɔ wo tosaa.
21 Oo Chɛhowa, a yandii mal la le.
Oo Mɛlɛka, wa landaŋ a ya le.+
22 Keleŋa ma mala ya,
Oo Chɛhowa, wana ni piŋiaa.+