Ɛsodɔɔ

4 Kɛ mi Muuse muli aa: “Te o yɔŋ yɛ ma kɛɛ le ya laalaŋndo ɔɔ ma yeŋ ya lani le?+ Kanifuule a cho dimi aa, ‘Chɛhowa chɔɔmuŋ num te.’” 2 Mi Chɛhowa nyuna ndu aa: “Yɛɛnɛ cho yɛ num koŋ o ba?” Mbo muli aa: “Tindaa.” 3 Mi Mɛlɛka dimul ndu aa: “Mallɔ tinda koŋ lɛŋ.” Mbo mal ndu lɛŋ, nduyɛ mi tindaa simnuŋ kɛuwo,+ okoŋ mi Muuse nyaanuŋ. 4 Mi Chɛhowa dimul Muuse aa: “Siɛndi baa ma saa ndu puiileŋ.” Okoŋ mbo siɛndi baa mbo saa ndu. Nduyɛ mi kɛu koŋ simnuŋ tindaa ndu o ba. 5 Okoŋ kɔɔli, mi Mɛlɛka dimul ndu aa: “Hei cho tosa ni ma laalaŋ kɛsɛ maa ya Chɛhowa, Mɛlɛka finyaa ndaa mamaa, Mɛlɛka Ebilaham ndo, Mɛlɛka Aase wo, a Mɛlɛka Chekɔpu wo+ chɔɔmuŋ num ni.”+

6 Mi Chɛhowa dimul ndu vɛlɛ aa: “A yandii, handuŋ ndɔ baa o takpa o doma numndo bɛŋgu.” Mbo handuŋ baa o takpa o doma ndɔɔ bɛŋgu. Mɛɛ o soli baa, lɛlɔŋ wa ndu ŋ tiuwaa o ba silɔ, nduyɛ o wa o humbu fo fo!+ 7 Mi Mɛlɛka dimul ndu aa: “Miŋgi baa handɔŋ o takpa o doma numndo bɛŋgu.” Mbo miŋgi baa handɔŋ o takpa o doma ndɔɔ bɛŋgu. Mɛɛ o soli baa, mi ba ndɔɔ miiŋgu mɛɛ o wa paandu yɛ! 8 Mi Mɛlɛka dimul ndu aa: “Te o yɔŋ pɛ ma tosa kaamaa tasoo ma kɛɛ le num laalaŋndo ɔɔ ma yeŋ num lani le, a tosa kaamaa diiŋ ndɔɔ. O hei niŋ, a cho num laalaŋ, nduyɛ ma yaŋ num nilaŋ.+ 9 Kɛ te a tosa pɛ kaamaala tiɔɔŋndaŋ ndaŋ ma kɛɛ le num laalaŋndo ɔɔ ma yeŋ num lani le, a kɔndu mɛŋndaŋ o Pioo Nail, a chuiŋi maŋ lɛŋ. Nduyɛ, mɛŋma ŋ cho chuiŋi lɛŋ ndaŋ ma cho simnɔŋ koowaŋ.”+

10 Mi Muuse dimul Chɛhowa aa: “A yandii Chɛhowa, kani paandu I cho wana chaa isɔɔ le. Nduyɛ numpila sina kɛsɛ maa, kani ma kandu suɛi o ya buɛi numndo lo, I cho wana soo yoona yoona le.”*+ 11 Mi Chɛhowa nyuna ndu aa: “O nɛɛnɛ toosiaa yɛ sondo wanachioo? O nɛɛnɛ tosa yɛ mi waŋndo simnuŋ bobonɔɔ ɔɔ wana nila baŋulɛiyo? O nɛɛnɛ tosa yɛ mi waŋndo che ɔɔ mbo suma? Baa o cho ya Chɛhowa le? 12 Lelaŋ, chɔŋ ma kuɛ. I cho wa a num latulu te a wa pɛ suɛi,* nduyɛ I cho num pɛɛku nyɛ ŋ nɔ le dimioo wo.”+ 13 Kɛ mi Muuse dimi aa: “A yandii Chɛhowa, viom wana cheleŋ.” 14 Okoŋ, mi Chɛhowa duaunuŋ tumbe tau tau a Muuse. Mbo dimul ndu aa: “I sina maa Elɔŋ bɛ num+ Livainɔɔ chaa suɛi nyɛkɛndɛi. Nduyɛ o cho hunɔɔ naa num chua. Te o che num pɛ, o cho dɔɔnɔŋ nyaale.+ 15 Lelaŋ, soo naa ndu chua ma chɔm ndu nyɛ o nɔ le dimioo wo.+ I cho wa latulu a nya te la wa suɛi pɛ,+ nduyɛ mi pɛɛku nya nyɛ nya nɔ le dimioo wo. 16 Elɔŋ cho wa suɛi o waŋnda lo le num ni. Ndu cho wa sondo suaa le num ni, nduyɛ mi num wa maa Mɛlɛka le ndu.*+ 17 Bii tinda cho num koŋ o ba wo. Nduyɛ a ndu ŋ cho wa kaamaalaŋ tosaa ni.”+

18 Okoŋ, mi Muuse miiŋgu naa Chɛtulo lefu ndɔ chua.+ Mbo dimul ndu aa: “A yandii, I yeema mi miiŋgu o puaapiliaa niaa cho o lɛŋnde Ichipi leŋ niŋnda lo, le sinaa te a cho wɔ pɛ yoomu.” Mi Chɛtulo dimul ndu aa: “Mɛɛ kɔ wa kɛndɛ.” 19 Okoŋ kɔɔli, mi Chɛhowa dimul Muuse o lɛŋnde Midiaŋ ndeŋ niŋ aa: “Miiŋgu Ichipi, kanifuule wanaa wa kindi kindiŋndo le num diyɔɔ wa kpou chuu wu.”+

20 Okoŋ mi Muuse chua laa ndɔ, a puaa nduaa, mbo heelu nda o sofɛlɔɔ choo, mbo bii nɛiyo le kɔlaŋ o lɛŋnde Ichipi leŋ niŋ. Mɛɛ Muuse wa kɔlaŋ, mbo bii tinda Mɛlɛka tonyaa o ba. 21 Okoŋ mi Chɛhowa dimul Muuse aa: “Te a miiŋgu pɛ Ichipi, kaamaala ya ke num kpaayaa le tosaa laŋ, kɔ tosa laŋ kpou Feloo o hɔl.+ Kɛ I cho chɛlɔɔ mbo luɛi bolle kalaleŋ,*+ nduyɛ mbo kɛɛ le wanaa niaa malɔɔ.+ 22 Dimul Feloo aa, ‘Nyɛ Chɛhowa dimi wo cho hoo ni: “Isɔluɛi cho po ni tasoo ni.+ 23 Lelaŋ, mi dimul num, mal po nuu mbo kɔ piɛi ya. Kɛ te a kɛɛ pɛ le ndu malɔɔ, I cho po num tasoo diyɔɔ.”’”+

24 Mɛɛ nda fuuluu o fondaŋ nda wa pɛŋgioo wo, mi Chɛhowa+ chɔɔmuŋ ndu, nduyɛ o wa nɛilaŋ nuuviaa le mbo dii ndu.+ 25 O mɛɛlulaŋ kpɔŋ, mi Sipoolua+ chua pou luɛiyaa,* okoŋ mbo hivi po ndɔɔ o chiɛi kɔɔli. Mbo tosa mi suundu o faŋa koŋ ndo pilaŋ peluŋ ndɔŋ,* mbo dimi aa: “A simnuŋ pɔnɔ nuu sanaa a koowaŋ maŋ.” 26 Mi Mɛlɛka mal ndu mbo kuaŋnuŋ. Le hivi chiɛi kɔɔlioo, mi Sipoolua dimi a teleŋ koŋ aa: “A simnuŋ pɔnɔ nuu sanaa a koowaŋ.”

27 Okoŋ mi Chɛhowa dimul Elɔŋ aa: “Kɔ naa Muuse chua o pollo niŋ.”+ Mɛɛ o kuɛ, mbo komal Muuse o pembii Mɛlɛka tonyaa,+ mbo sɔsa ndu kuuwo. 28 Mi Muuse dimul Elɔŋ nyɛ o nyɛ Chɛhowa dimul ndu,+ vɛlɛ a kaamaala o dimul ndu le tosaa laŋ kpou.+ 29 Okoŋ kɔɔli, mi Muuse nda Elɔŋ kua ma kɔ chuuŋgiaa waŋ banaa o Isɔluɛi niŋ kpou naapilɛ.+ 30 Mi Elɔŋ dimul nda nyɛ o nyɛ Chɛhowa dimul Muuse, nduyɛ mbo tosa kaamaalaŋ+ waŋnda o hɔl. 31 Mi hei tosa mi waŋnda laalaŋ.+ Mɛɛ nda tuei maa Chɛhowa mulul waŋnda Isɔluɛi hɔlla,+ nduyɛ maa o che mɔnɛi nda cho biyɔɔ ve,+ ma baŋ wulaŋ ma fuuluu hɔlla lɛŋ.